ಬೆಂಗಳೂರು : ಮದುವೆ, ಅನಾರೋಗ್ಯ, ಮನೆ ಖರೀದಿ, ಉದ್ಯೋಗ ನಷ್ಟ ಸೇರಿ ಹಲವು ಸಂದರ್ಭಗಳಲ್ಲಿ ಪಿಎಫ್ ಮೊತ್ತವನ್ನು ವಿತ್ ಡ್ರಾ ಮಾಡಲಾಗುತ್ತದೆ. ಈಗ EPFO ಕಚೇರಿಗಳಿಗೆ ಅಲೆದಾಡುವ ಅವಶ್ಯಕತೆ ಇಲ್ಲದಿದ್ದರೂ ಆನ್ ಲೈನ್ ಮೂಲಕ ಕ್ಲೇಮ್ ಅರ್ಜಿ ಸಲ್ಲಿಸಬಹುದು. ಆದರೆ, ಕ್ಲೇಮ್ ಅರ್ಜಿ ಸಲ್ಲಿಸಿದ ಬಳಿಕ ಸೆಟಲ್ ಮೆಂಟ್ ಗೆ 20 ದಿನ ಬೇಕಾಗುತ್ತಿದೆ. ಆದರೆ, ಶೀಘ್ರವೇ ಇದಕ್ಕೆ ಮುಕ್ತಿ ಹಾಡಲು ಕೇಂದ್ರ ಸರ್ಕಾರ ತೀರ್ಮಾನಿಸಿದೆ.
ಹೌದು, ಇಪಿಎಫ್ಒ ಖಾತೆಯಲ್ಲಿರುವ ಹಣವನ್ನು ಇನ್ನುಮುಂದೆ 20 ದಿನಗಳ ಬದಲಾಗಿ ಕೇವಲ 72 ಗಂಟೆ ಅಂದರೆ, ಮೂರು ದಿನಗಳಲ್ಲೇ ಕ್ಲೇಮ್ ಸೆಟಲ್ ಮೆಂಟ್ ಆಗುವ ವ್ಯವಸ್ಥೆ ಜಾರಿಗೆ ತರಲಾಗುತ್ತಿದೆ. ಯುಪಿಐ ಮೂಲಕ ಪಿಎಫ್ ವಿತ್ ಡ್ರಾ, ಎಟಿಎಂಗಳ ಮೂಲಕ ಪಿಎಫ್ ಮೊತ್ತದ ವಿತ್ ಡ್ರಾ ಜತೆಗೆ ಇಪಿಎಫ್ಒ 3.0ದಲ್ಲಿ ಕ್ಷಿಪ್ರವಾಗಿ ಪಿಎಫ್ ವಿತ್ ಡ್ರಾ ಮಾಡುವ ವ್ಯವಸ್ಥೆಯನ್ನೂ ಜಾರಿಗೆ ತರಲಾಗುತ್ತಿದೆ.
ಕೇವಲ ಮೂರು ದಿನಗಳಲ್ಲಿಯೇ ಪಿಎಫ್ ಕ್ಲೇಮ್ ಸೆಟಲ್ ಮೆಂಟ್ ಜಾರಿ ಕುರಿತು ಕೇಂದ್ರ ಕಾರ್ಮಿಕ ಮತ್ತು ಉದ್ಯೋಗ ಖಾತೆ ರಾಜ್ಯ ಸಚಿವೆ ಶೋಭಾ ಕರಂದ್ಲಾಜೆ ಅವರೇ ಸಂಸತ್ತಿಗೆ ಮಾಹಿತಿ ನೀಡಿದ್ದಾರೆ. ಇಪಿಎಫ್ಒ 3.0 ಸುಧಾರಣೆಯು ಕೇಂದ್ರ ಸರ್ಕಾರದ ಮಹತ್ವಾಕಾಂಕ್ಷೆಯ ಸುಧಾರಣೆಯಾಗಿದೆ. ಪೇಪರ್ ವರ್ಕ್ ಇಲ್ಲದೆ, ಡಿಜಿಟಲ್ ವ್ಯವಸ್ಥೆಯ ಮೂಲಕ ಇಪಿಎಫ್ಒ ಸೌಲಭ್ಯಗಳನ್ನು ಜನರಿಗೆ ನೀಡುವುದು ಗುರಿಯಾಗಿದೆ.
ಇಪಿಎಫ್ಒ 3.0 ವ್ಯವಸ್ಥೆ ಶೀಘ್ರದಲ್ಲೇ ಜಾರಿಗೆ ಬರಲಿದೆ. ಇದಕ್ಕಾಗಿ ಹೊಸ ಆ್ಯಪ್ ಅಭಿವೃದ್ಧಿಪಡಿಸಲಾಗುತ್ತದೆ. ಅಲ್ಲದೆ, ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನದ ಸಹಾಯದಿಂದ ಕ್ಷಿಪ್ರವಾಗಿ ಸೇವೆಗಳನ್ನು ನೀಡಲಾಗುತ್ತದೆ. ಆಯಾ ಸ್ಥಳೀಯ ಭಾಷೆಗಳಲ್ಲೂ ಜನರಿಗೆ ಸೇವೆಗಳು ಲಭ್ಯವಿರಲಿವೆ ಎಂದು ಮೂಲಗಳು ತಿಳಿಸಿವೆ.
ಇದನ್ನೂ ಓದಿ : ವೆಸ್ಪಾ ‘ಅಫಿಸಿನಾ 8’ ವಿಶೇಷ ಆವೃತ್ತಿಯ ಸ್ಕೂಟರ್ ಭಾರತದಲ್ಲಿ ಬಿಡುಗಡೆ | ಇತಿಹಾಸಕ್ಕೆ ಗೌರವ
