ವಿಶ್ವಸಂಸ್ಥೆ: ಭಾರತದ ವಿರುದ್ಧದ ಯುದ್ಧದಲ್ಲಿ ಪಾಕಿಸ್ತಾನವು ವಿಜಯಶಾಲಿಯಾಗಿದೆ ಎಂಬ ಪಾಕಿಸ್ತಾನದ ಪ್ರಧಾನಿ ಶೆಹಬಾಜ್ ಷರೀಷ್ ಅವರ ಭಾಷಣಕ್ಕೆ ಭಾರತವು ಖಡಕ್ ತಿರುಗೇಟು ನೀಡಿದೆ. “ನಾಶವಾಗಿರುವ ರನ್‌ವೇಗಳು ನಿಮಗೆ ವಿಜಯವೆಂದು ಭಾಸವಾಗುತ್ತಿದೆಯೇ?” ಎಂದು ವಿಶ್ವಸಂಸ್ಥೆಯಲ್ಲಿ ಭಾರತೀಯ ರಾಜತಾಂತ್ರಿಕ ಅಧಿಕಾರಿ ಪೆಟಲ್ ಗೆಹ್ಲೋಟ್ ಅವರು ಪಾಕಿಸ್ತಾನವನ್ನು ಪ್ರಶ್ನಿಸಿದ್ದಾರೆ. ಅಲ್ಲದೇ ಪಾಕಿಸ್ತಾನದ ವಿದೇಶಾಂಗ ನೀತಿಯ ಕೇಂದ್ರಬಿಂದುವೇ ಭಯೋತ್ಪಾದನೆ ಎಂದಿದ್ದಾರೆ.
ಪಾಕ್ ಪ್ರಧಾನಿ ಹೇಳಿದ್ದೇನು?
ವಿಶ್ವಸಂಸ್ಥೆಯ 80ನೇ ಮಹಾಧಿವೇಶನದಲ್ಲಿ ಮಾತನಾಡಿದ ಪಾಕ್ ಪ್ರಧಾನಿ ಶೆಹಬಾಜ್ ಷರೀಫ್, ಈ ವರ್ಷದ ಆರಂಭದಲ್ಲಿ ‘ಆಪರೇಷನ್ ಸಿಂದೂರ’ ಹೆಸರಿನಲ್ಲಿ ಭಾರತವು ಅಪ್ರಚೋದಿತ ಆಕ್ರಮಣ ನಡೆಸಿತ್ತು. ಆದರೆ, ಪಾಕಿಸ್ತಾನದ ಸಶಸ್ತ್ರ ಪಡೆಗಳು “ಬೆರಗುಗೊಳಿಸುವ ವೃತ್ತಿಪರತೆ ಮತ್ತು ಶೌರ್ಯದಿಂದ” ಈ ದಾಳಿಯನ್ನು ಹಿಮ್ಮೆಟ್ಟಿಸಿವೆ ಎಂದು ಹೇಳಿದ್ದರು. ಇದಲ್ಲದೆ, ಶಾಂತಿ, ಪರಸ್ಪರ ಗೌರವ ಮತ್ತು ಮಾತುಕತೆ ಮೂಲಕ ವಿವಾದಗಳನ್ನು ಬಗೆಹರಿಸಿಕೊಳ್ಳಲು ಪಾಕಿಸ್ತಾನ ಸಿದ್ಧವಿದೆ ಎಂದೂ ಅವರು ತಿಳಿಸಿದ್ದರು.
ಭಾರತದ ತೀಕ್ಷ್ಣ ತಿರುಗೇಟು
ಷರೀಫ್ ಅವರ ಭಾಷಣವನ್ನು “ಅಸಂಬದ್ಧ ನಾಟಕ” ಎಂದು ಬಣ್ಣಿಸಿದ ಭಾರತೀಯ ರಾಜತಾಂತ್ರಿಕ ಅಧಿಕಾರಿ ಪೆಟಲ್ ಗಹ್ಲೋಟ್, ಪಾಕಿಸ್ತಾನದ ದ್ವಿಮುಖ ನೀತಿಯನ್ನು ಜಗತ್ತಿನ ಮುಂದೆ ತೆರೆದಿಟ್ಟರು. ಅಲ್-ಖೈದಾ ಮುಖ್ಯಸ್ಥ ಒಸಾಮಾ ಬಿನ್ ಲಾಡೆನ್‌ಗೆ ಪಾಕಿಸ್ತಾನ ದಶಕಗಳ ಕಾಲ ಆಶ್ರಯ ನೀಡಿತ್ತು. ಅಲ್ಲದೆ, ಏಪ್ರಿಲ್ 22 ರಂದು ಜಮ್ಮು ಮತ್ತು ಕಾಶ್ಮೀರದ ಪಹಲ್ಗಾಮ್‌ನಲ್ಲಿ ನಡೆದ ಪ್ರವಾಸಿಗರ ಮೇಲಿನ ಭೀಕರ ದಾಳಿಯ ಹೊಣೆ ಹೊತ್ತಿದ್ದ ‘ದಿ ರೆಸಿಸ್ಟೆನ್ಸ್ ಫ್ರಂಟ್’ ಎಂಬ ಭಯೋತ್ಪಾದಕ ಸಂಘಟನೆಯನ್ನು ಪಾಕಿಸ್ತಾನವೇ ರಕ್ಷಿಸಿದೆ ಎಂದು ಗಹ್ಲೋಟ್ ಆರೋಪಿಸಿದರು.
“ನಾವು ಯುದ್ಧವನ್ನು ಗೆದ್ದಿದ್ದೇವೆ” ಎಂಬ ಷರೀಫ್ ಅವರ ಹೇಳಿಕೆಗೆ ಪ್ರತಿಕ್ರಿಯಿಸಿದ ಗಹ್ಲೋಟ್, “ಮೇ 10 ರಂದು ಪಾಕಿಸ್ತಾನದ ಸೇನೆಯೇ ಯುದ್ಧ ನಿಲ್ಲಿಸುವಂತೆ ನಮ್ಮಲ್ಲಿ ಮನವಿ ಮಾಡಿತ್ತು. ನಾಶವಾದ ರನ್‌ವೇಗಳು ಮತ್ತು ಸುಟ್ಟುಹೋದ ಹ್ಯಾಂಗರ್‌ಗಳ ಚಿತ್ರಗಳೇ ಎಲ್ಲದಕ್ಕೂ ಸಾಕ್ಷಿ ಹೇಳುತ್ತಿವೆ. ಒಂದುವೇಳೆ ಇವುಗಳೇ ನಿಮಗೆ ವಿಜಯದಂತೆ ಕಂಡರೆ, ಪಾಕಿಸ್ತಾನ ಅದನ್ನು ಖುಷಿಯಿಂದ ಆನಂದಿಸಬಹುದು,” ಎಂದು ವ್ಯಂಗ್ಯವಾಡಿದರು.
ಪಾಕಿಸ್ತಾನ ಮಾತುಕತೆಯ ಬಗ್ಗೆ ಪ್ರಾಮಾಣಿಕವಾಗಿದ್ದರೆ, ಮೊದಲು ತನ್ನ ನೆಲದಲ್ಲಿರುವ ಎಲ್ಲಾ ಭಯೋತ್ಪಾದಕ ಶಿಬಿರಗಳನ್ನು ಮುಚ್ಚಬೇಕು ಮತ್ತು ಭಾರತಕ್ಕೆ ಬೇಕಾಗಿರುವ ಉಗ್ರರನ್ನು ಹಸ್ತಾಂತರಿಸಬೇಕು ಎಂದು ಭಾರತ ಸ್ಪಷ್ಟ ಷರತ್ತು ವಿಧಿಸಿದೆ ಎಂದರು.
ಸಿಂಧೂ ನದಿ ನೀರು ಒಪ್ಪಂದ ಮತ್ತು ಟ್ರಂಪ್ ಮಧ್ಯಸ್ಥಿಕೆ
ಸಿಂಧೂ ನದಿ ನೀರು ಒಪ್ಪಂದವನ್ನು ಭಾರತ ಅಮಾನತುಗೊಳಿಸಿರುವುದನ್ನು “ಯುದ್ಧದ ಕೃತ್ಯ” ಎಂದು ಷರೀಫ್ ಹೇಳಿದ್ದರು. ಇದಕ್ಕೆ ಉತ್ತರಿಸಿದ ಭಾರತ, ಪಹಲ್ಗಾಮ್ ದಾಳಿಯ ನಂತರವೇ ಒಪ್ಪಂದವನ್ನು ಅಮಾನತುಗೊಳಿಸಲಾಗಿದೆ ಎಂದು ಸ್ಪಷ್ಟಪಡಿಸಿದೆ. ಇದಲ್ಲದೆ, ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಮಧ್ಯಸ್ಥಿಕೆಯ ಬಗ್ಗೆ ಷರೀಫ್ ಮಾತನಾಡಿದ್ದಕ್ಕೆ, ಭಾರತ-ಪಾಕ್ ನಡುವಿನ ಯಾವುದೇ ವಿಷಯದಲ್ಲಿ “ಮೂರನೇ ವ್ಯಕ್ತಿಗೆ ಸ್ಥಾನವಿಲ್ಲ” ಎಂದು ಭಾರತ ಪುನರುಚ್ಚರಿಸಿದೆ.
ಭಯೋತ್ಪಾದನೆಯ ವಿಷಯದಲ್ಲಿ ಶೂನ್ಯ ಸಹಿಷ್ಣುತೆ ನೀತಿ ಅನುಸರಿಸಲಾಗುವುದು ಮತ್ತು “ಅಣ್ವಸ್ತ್ರ ಬ್ಲ್ಯಾಕ್‌ಮೇಲ್‌ಗೆ ಭಾರತ ಎಂದಿಗೂ ಮಣಿಯುವುದಿಲ್ಲ” ಎಂಬ ಸ್ಪಷ್ಟ ಸಂದೇಶವನ್ನು ಗಹ್ಲೋಟ್ ತಮ್ಮ ಭಾಷಣದ ಮೂಲಕ ಜಗತ್ತಿಗೆ ರವಾನಿಸಿದರು.
