ಸಿನಿಮಾ…ಈ ಮೂರಕ್ಷರದ ಪದಕ್ಕೆ ಅದೆಷ್ಟು ಆಯಸ್ಕಾಂತೀಯ ಶಕ್ತಿ ಇದೆ ಗೊತ್ತಾ. ಬೆಳ್ಳಿತೆರೆ ಮೇಲೆ ಮೂಡಿ ಬರುವ ದೃಶ್ಯಕಾವ್ಯ ಅಭಿಮಾನಿಗಳ ಮುಂದೆ ಹೊಸ ಜಗತ್ತನ್ನೇ ಅನಾವರಣಗೊಳಿಸುತ್ತೆ. ಅತಿ ದೊಡ್ಡ ಚುಂಬಕ ಶಕ್ತಿಯ ಸಿನಿಮಾ ಕಾಲ್ಪನಿಕ ಜಗತ್ತನ್ನೇ ಸಿನಿರಸಿಕರಿಗೆ ಉಣಬಡಿಸುವ ಶಕ್ತಿ ಹೊಂದಿದೆ.
ಇಂತಹ ಭಾರತೀಯ ಚಿತ್ರರಂಗಕ್ಕೂ ಸೇನೆಗೂ ಒಂದು ಅವಿನಾಭಾವ ಸಂಬಂಧವಿದೆ. ಕಾಲ್ಪನಿಕ ಜಗತ್ತನ್ನೇ ವರ್ಣರಂಜಿತವಾಗಿ ತೋರಿಸುವ ಸಿನಿಮಾ ಮಂದಿ ಇನ್ನು ನೈಜ ಘಟನೆಗಳ ಆಧರಿತ ಚಿತ್ರಗಳು ಅಂದ್ರೆ ಅದರ ನಿರೂಪಣೆಯೇ ಬೇರೆ. ಸದಾ ಕತೆಯ ಬರ ಅನುಭವಿಸೋ ಚಿತ್ರರಂಗಕ್ಕೀಗ ಆಪರೇಷನ್ ಸಿಂಧೂರ್ ದೊಡ್ಡ ಸರಕಿನ ಕಾಮಧೇನುವಾಗಿದೆ.
ಬಾರ್ಡರ್ ನಿಂದ ಸ್ಕೈ ಫೋರ್ಸ್ ವರೆಗೂ ಹಾಗೆ ನೋಡಿದರೆ, 1997ರಲ್ಲಿ ಬಾಲಿವುಡ್ ನಲ್ಲಿ ತೆರೆಗೆ ಬಂದ ಬಾರ್ಡರ್ ಸಿನಿಮಾ ಪೂರ್ಣ ಪ್ರಮಾಣದ ಯುದ್ಧದ ಕತೆ ಆಧರಿತವಾಗಿತ್ತು. ಸನ್ನಿ ಡಿಯೋಲ್ ನಟನೆಯ ಈ ಸಿನಿಮಾ 1971ರ ಇಂಡೋ-ಪಾಕ್ ಯುದ್ಧದ ನೈಜತೆಯನ್ನು ತೆರೆ ಮೇಲೆ ಅನಾವರಣಗೊಳಿಸಿತ್ತು. ಇದಾದ ಬಳಿಕ 2003ರಲ್ಲಿ ಬಂದ ಎಲ್ ಓಸಿ ಕಾರ್ಗಿಲ್ ಸಿನಿಮಾ ಕೂಡಾ ಪಾಕಿಸ್ತಾನದೊಟ್ಟಿಗಿನ ಕಾರ್ಗಿಲ್ ಯುದ್ಧದ ಭೀಕರತೆ ಮತ್ತು ಭಾರತೀಯ ಯೋಧರ ಸಾಹಸಗಾಥೆಯನ್ನು ತೆರೆ ಮೇಲೆ ತೆರೆದಿಟ್ಟಿತ್ತು.
ಯುವ ಪೀಳಿಗೆ ನಟರಿಗೂ ಯುದ್ಧವೇ ಪ್ರೇರಣೆ
ಕೇವಲ 90ರ ದಶಕವಷ್ಟೇ ಅಲ್ಲಾ ಹೊಸಪೀಳಿಗೆಗೂ ಯುದ್ಧದ ನೆರಳೇ ಸಾಧನೆಗೆ ಪ್ರೇರಣೆಯಗಿದ್ದು ನಿಜ. 2004ರಲ್ಲಿ ಹೃತಿಕ್ ರೋಷನ್ ನಟನೆಯ ಲಕ್ಷ್ಯ ಸಿನಿಮಾ ರಿಲೀಸ್ ಆಗಿತ್ತು. ಯೋಧನ ಪಾತ್ರದಲ್ಲಿ ಹೃತಿಕ್ ಅಂದು ಅಪಾರ ಜನಮನ್ನಣೆ ಪಡೆದಿದ್ದರು. 2019ರಲ್ಲಿ ವಿಕ್ಕಿ ಕೌಶಲ್ ನಟನೆಯಲ್ಲಿ ಬಂದ ಉರಿ ಸಿನಿಮಾ ಕೂಡಾ ದೇಶದೆಲ್ಲೆಡೆ ಸಂಚಲನವನ್ನೇ ಸೃಷ್ಟಿ ಮಾಡಿತ್ತು. ಉಳಿದಂತೆ, ಸಂಶೇರಾ, ಶ್ಯಾಮ್ ಬಹದ್ದೂರ್, ಫೈಟರ್ ಸಿನಿಮಾಗಳು ಕೂಡಾ ಅಪಾರ ಜನ ಮನ್ನಣೆ ಗಳಿಸಿದ್ದವು.
ಬಾಕ್ಸ್ ಆಫೀಸ್ ನಲ್ಲಿ ಯುದ್ಧದ ಸಿನಿಮಾಗಳ ಹಂಗಾಮ
1997ರ ಬಾರ್ಡರ್ ನಿಂದ ಹಿಡಿದು ಇತ್ತೀಚೆಗೆ ಬಂದ ಫೈಟರ್, ಸ್ಕೈ ಫೋರ್ಸ್ ವರೆಗೂ ಎಲ್ಲ ಸಿನಿಮಾಗಳು ಗಲ್ಲಾ ಪೆಟ್ಟಿಗೆಯಲ್ಲಿ ಧೂಳೀಪಟ ಎಬ್ಬಿಸಿವೆ,. ಕೋಟಿ ಕೋಟಿ ಕಲೆಕ್ಷನ್ ಮಾಡೋ ಮೂಲಕ ನಿರ್ಮಾಪಕರ ಪಾಲಿಗೆ ಚಿನ್ನದ ಮೊಟ್ಟೆಯಿಡೋ ಕೋಳಿಯಂತಾಗಿದ್ದವು. ಇದೀಗ ಭಾರತೀಯ ಸೇನೆ ಪಾಕಿಸ್ತಾನದೊಳಗೆ ನುಗ್ಗಿ ರಣಬೇಟೆ ಆಡಿರುವ ಸರಕು ಭವಿಷ್ಯದಲ್ಲಿ ಹತ್ತಾರು ಸಿನಿಮಾಗಳಿಗೆ ಆಹಾರವಾಗಬಹುದು. ಆಪರೇಷನ್ ಸಿಂಧೂರ್ ಹೆಸರಿನಲ್ಲೇ ಮುಂದಿನ ದಿನಗಳಲ್ಲಿ ಚಿತ್ರ ನಿರ್ಮಾಣವಾಗಬಹುದು. ಆ ಮೂಲಕ ಅವತ್ತಿನಲ್ಲಿ ನಡೆದ ರಣರೋಚಕ ಕಾರ್ಯಾಚರಣೆಯನ್ನು ದೇಶವಾಸಿಗಳ ಮುಂದೆ ತೆರೆದಿಡಬಹುದಾಗಿದೆ. ಒಟ್ನಲ್ಲಿ, ಕತೆ ಇಲ್ಲದೆ ಕಂಗಾಲಾಗಿರುವ ಸಿನಿಮಾ ಮಂದಿಗೆ ಆಪರೇಷನ್ ಸಿಂಧೂರ್ ಅಕ್ಷಯ ಪಾತ್ರೆಯಾಗುತ್ತಿರುವುದು ಸುಳ್ಳಲ್ಲ.
