ನವದೆಹಲಿ: ಕೇಂದ್ರ ಸರ್ಕಾರವು 117 ವರ್ಷಗಳ ಹಳೆಯ ರಿಜಿಸ್ಟ್ರೇಷನ್ ಕಾಯ್ದೆ 1908 ಅನ್ನು ಬದಲಾಯಿಸಲು ಮುಂದಾಗಿದೆ. ಈ ಸಂಬಂಧ ಗ್ರಾಮೀಣಾಭಿವೃದ್ಧಿ ಸಚಿವಾಲಯವು ‘ನೋಂದಣಿ ವಿಧೇಯಕ 2025′(The Registration Bill, 2025) ಎಂಬ ಕರಡು ಮಸೂದೆಯನ್ನು ಪ್ರಕಟಿಸಿದ್ದು, ಆಸ್ತಿಗಳ ಡಿಜಿಟಲ್ ನೋಂದಣಿಯನ್ನು(Online Property Registration) ಉತ್ತೇಜಿಸುವ ಗುರಿಯನ್ನು ಹೊಂದಿದೆ. ಈ ಮಸೂದೆಯು ಆನ್‌ಲೈನ್ ಆಸ್ತಿ ನೋಂದಣಿ, ಆಧಾರ್ ಆಧಾರಿತ ದೃಢೀಕರಣ, ಡಿಜಿಟಲ್ ದಾಖಲೆಗಳ ಸಂರಕ್ಷಣೆ ಮತ್ತು ಪಾರದರ್ಶಕತೆಯನ್ನು ಹೆಚ್ಚಿಸುವಂತಹ ಪ್ರಮುಖ ವಿಷಯಗಳನ್ನು ಒಳಗೊಂಡಿದೆ.
ಆನ್‌ಲೈನ್ ಆಸ್ತಿ ನೋಂದಣಿ
ಈ ಮಸೂದೆಯಡಿ ಕಡ್ಡಾಯವಾಗಿ ಆನ್‌ಲೈನ್‌ನಲ್ಲೇ ಆಸ್ತಿಗಳ ನೋಂದಣಿ ಮಾಡಬೇಕಾಗುತ್ತದೆ. ಇದರಿಂದ ಕಾಗದದ ದಾಖಲೆಗಳ ಅಗತ್ಯ ಕಡಿಮೆಯಾಗುವುದು ಮಾತ್ರವಲ್ಲದೆ, ಆಸ್ತಿಗಳ ವಹಿವಾಟುಗಳಲ್ಲಿ ಪಾರದರ್ಶಕತೆ ಇರಲಿದೆ ಎನ್ನುವುದು ಸರ್ಕಾರದ ವಾದವಾಗಿದೆ.
ಆಧಾರ್ ಆಧಾರಿತ ದೃಢೀಕರಣ
ನೋಂದಣಿ ಪ್ರಕ್ರಿಯೆಯಲ್ಲಿ ಆಧಾರ್ ಕಾರ್ಡ್ ಆಧಾರಿತ ಗುರುತಿನ ದೃಢೀಕರಣವನ್ನು ಕಡ್ಡಾಯಗೊಳಿಸಲಾಗುವುದು. ಇದು ವಂಚನೆಯನ್ನು ತಡೆಗಟ್ಟಲು ಸಹಾಯಕವಾಗಲಿದೆ.
ಡಿಜಿಟಲ್ ದಾಖಲೆಗಳ ಸಂರಕ್ಷಣೆ
ಎಲ್ಲಾ ನೋಂದಣಿ ದಾಖಲೆಗಳನ್ನು ಡಿಜಿಟಲ್ ರೂಪದಲ್ಲಿ ಸಂರಕ್ಷಿಸಲಾಗುವುದು. ಇದರಿಂದ ದಾಖಲೆಗಳ ದೀರ್ಘಕಾಲೀನ ಭದ್ರತೆ ಮತ್ತು ಸುಲಭ ಪ್ರವೇಶವು ಸಾಧ್ಯವಾಗಲಿದೆ.
ಕಡ್ಡಾಯ ನೋಂದಣಿ ದಾಖಲೆಗಳ ವಿಸ್ತರಣೆ
ಈ ಮಸೂದೆಯು ಕೆಲವು ಆಸ್ತಿ ವಹಿವಾಟಿನ ದಾಖಲೆಗಳಾದ ಮಾರಾಟ ಒಪ್ಪಂದ, ಪವರ್ ಆಫ್ ಅಟಾರ್ನಿ, ಸರ್ಕಾರಿ ಪ್ರಾಧಿಕಾರದಿಂದ ನೀಡಲಾದ ಮಾರಾಟ ಪತ್ರಗಳು, ಈಕ್ವಿಟಬಲ್ ಮಾರ್ಟ್‌ಗೇಜ್ ವ್ಯವಸ್ಥೆಗಳು ಮತ್ತು ಕೆಲವು ನ್ಯಾಯಾಲಯದ ಆದೇಶದ ಆಧಾರದ ದಾಖಲೆಗಳನ್ನು ಕಡ್ಡಾಯವಾಗಿ ನೋಂದಾಯಿಸಬೇಕೆಂದು ಸೂಚಿಸುತ್ತದೆ.
ಪ್ರಯೋಜನಗಳೇನು:
ಗ್ರಾಮೀಣಾಭಿವೃದ್ಧಿ ಸಚಿವಾಲಯದ ಪ್ರಕಾರ, 1908ರ ಕಾಯ್ದೆಯು ಒಂದು ಶತಮಾನಕ್ಕೂ ಹೆಚ್ಚು ಕಾಲ ಆಸ್ತಿ ನೋಂದಣಿಗೆ ಕಾನೂನು ಆಧಾರವಾಗಿ ಕಾರ್ಯನಿರ್ವಹಿಸಿದೆ. ಆದರೆ, ಆಧುನಿಕ ತಾಂತ್ರಿಕತೆ ಮತ್ತು ಸಾಮಾಜಿಕ-ಆರ್ಥಿಕ ಬದಲಾವಣೆಗಳಿಗೆ ತಕ್ಕಂತೆ ಈ ಕಾಯ್ದೆಯನ್ನು ನವೀಕರಿಸುವ ಅಗತ್ಯವಿದೆ. ಈ ಮಸೂದೆಯು ಆಸ್ತಿ ವಹಿವಾಟುಗಳಲ್ಲಿ ಪಾರದರ್ಶಕತೆಯನ್ನು ಹೆಚ್ಚಿಸುವುದರ ಜೊತೆಗೆ, ಆಡಳಿತಾತ್ಮಕ ಮತ್ತು ಕಾನೂನು ಪ್ರಕ್ರಿಯೆಗಳನ್ನು ಸುಗಮಗೊಳಿಸಲಿದೆ.
ಸಾರ್ವಜನಿಕ ಸಲಹೆಗೆ ಅವಕಾಶ:
ಕರಡು ಮಸೂದೆಯನ್ನು ಭೂ ಸಂಪನ್ಮೂಲ ಇಲಾಖೆಯ ವೆಬ್‌ಸೈಟ್‌ನಲ್ಲಿ (https://dolr.gov.in) ಪ್ರಕಟಿಸಲಾಗಿದ್ದು, ಸಾರ್ವಜನಿಕರು ಜೂನ್ 25, 2025 ರೊಳಗೆ ತಮ್ಮ ಸಲಹೆಗಳನ್ನು ಸಲ್ಲಿಸಬಹುದಾಗಿದೆ. ಈ ಮಸೂದೆಯು ಕಾನೂನಾತ್ಮಕ ರೂಪ ಪಡೆದರೆ, ಆಸ್ತಿ ನೋಂದಣಿ ವ್ಯವಸ್ಥೆಯಲ್ಲಿ ಕ್ರಾಂತಿಕಾರಿ ಬದಲಾವಣೆ ತರುವ ನಿರೀಕ್ಷೆಯಿದೆ.
