ಹುಬ್ಬಳ್ಳಿ: ವ್ಲಾಗಿಂಗ್ ಕ್ಯಾಮರಾ ಆರ್ಡರ್ ಮಾಡಿದ ಉದ್ಯಮಿಗೆ ವಾಷಿಂಗ್ ಪೌಡರ್ ಪ್ಯಾಕೆಟ್ ಡೆಲಿವರಿ ಆದ ಘಟನೆ ಹುಬ್ಬಳ್ಳಿಯಲ್ಲಿ ಬೆಳಕಿಗೆ ಬಂದಿದೆ.
ಹುಬ್ಬಳ್ಳಿ ಮೂಲದ, ಪ್ರಸ್ತುತ ಶಾರ್ಜಾದಲ್ಲಿ ನೆಲೆಸಿರುವ ಉದ್ಯಮಿ ಅಲ್ಫ್ರೆಡ್ ಝೇವಿಯರ್ ಮಿರಾಂಡಾ ಅವರು ಸುಮಾರು 61 ಸಾವಿರ ರೂ. ಮೌಲ್ಯದ ವ್ಲಾಗಿಂಗ್ ಕ್ಯಾಮರಾವನ್ನು ಆನ್ಲೈನ್ ಮೂಲಕ ಬುಕ್ ಮಾಡಿದ್ದರು. ತಮ್ಮ ಪುಸ್ತಕ ಬಿಡುಗಡೆ ಕಾರ್ಯಕ್ರಮದ ಹಿನ್ನೆಲೆಯಲ್ಲಿ ಹುಬ್ಬಳ್ಳಿಗೆ ಆಗಮಿಸಿದ್ದ ಅವರು, ಸ್ನೇಹಿತನಿಗೆ ಗಿಫ್ಟ್ ನೀಡಲು ಕ್ಯಾಮರಾವನ್ನು ಆರ್ಡರ್ ಮಾಡಿದ್ದಾಗಿ ತಿಳಿಸಿದ್ದಾರೆ.
ಅಮೆಜಾನ್ ಮೂಲಕ ಬುಕ್ ಮಾಡಿದ್ದ ಈ ವಸ್ತು ಹುಬ್ಬಳ್ಳಿಯ ಖಾಸಗಿ ಹೋಟೆಲ್ ವಿಳಾಸಕ್ಕೆ ಕೊರಿಯರ್ ಮೂಲಕ ತಲುಪಿದೆ. ಆದರೆ ಪಾರ್ಸೆಲ್ ತೆರೆದಾಗ ಕ್ಯಾಮರಾ ಬದಲು ವಾಷಿಂಗ್ ಪೌಡರ್ ಪ್ಯಾಕೆಟ್ ಕಂಡು ಅಲ್ಫ್ರೆಡ್ ದಿಗ್ಭ್ರಮೆಗೆ ಒಳಗಾದರು.
ಪಾರ್ಸೆಲ್ ತೆಗೆಯುವ ವೇಳೆ ಅವರು ವೀಡಿಯೋ ಚಿತ್ರೀಕರಿಸಿದ್ದು, ಶೀಲ್ಡ್ ಕವರ್ನಲ್ಲೇ ಸೋಪಿನ ಪುಡಿ ಬಂದಿರುವುದು ದೃಶ್ಯದಲ್ಲಿದೆ ಎಂದು ತಿಳಿಸಿದ್ದಾರೆ.
“ಆನ್ಲೈನ್ ಮೂಲಕ ಸಂಪೂರ್ಣ ಹಣ ಪಾವತಿಸಿದ್ದೆ. ಆದರೆ ಕ್ಯಾಮರಾ ಬದಲು ವಾಷಿಂಗ್ ಪೌಡರ್ ಬಂದಿದೆ. ಕಸ್ಟಮರ್ ಕೇರ್ಗೆ ಫೋನ್ ಮಾಡಿದ್ದೇನೆ. ಆದರೆ ಅಮೆಜಾನ್ ಕಂಪನಿಯಿಂದ ಯಾವುದೇ ಸ್ಪಂದನೆ ಸಿಕ್ಕಿಲ್ಲ. ಈ ಹಿಂದೆ ಎಂದೂ ಇಂತಹ ಅನುಭವವಾಗಿಲ್ಲ. ದೊಡ್ಡ ಮೊತ್ತದ ವಸ್ತು ಬುಕ್ ಮಾಡಿದಾಗಲೇ ಹೀಗಾಗಿದೆ. ನನಗೆ ನ್ಯಾಯ ದೊರಕಿಸಿಕೊಡಬೇಕು,” ಎಂದು ಉದ್ಯಮಿ ಅಲ್ಫ್ರೆಡ್ ಮಿರಾಂಡಾ ಆಗ್ರಹಿಸಿದ್ದಾರೆ.
ಇದನ್ನೂ ಓದಿ: ವಿರಾಟ್-ಅನುಷ್ಕಾ ದಂಪತಿಯ ಸರಳತೆಗೆ ಫಿದಾ ಆದ ಪಾಪರಾಜಿಗಳು | ಏರ್ಪೋರ್ಟ್ನಲ್ಲಿ ಮುಗಿಬಿದ್ದ ಫೋಟೋಗ್ರಾಫರ್ಗಳು
