ಲೂಧಿಯಾನ: ಸಿನಿಮೀಯ ಶೈಲಿಯ ಸಾಹಸವೆಂಬಂತೆ, ಆಸ್ಟ್ರೇಲಿಯಾದಿಂದ ಇತ್ತೀಚೆಗಷ್ಟೇ ಭಾರತಕ್ಕೆ ಮರಳಿದ್ದ ಅನಿವಾಸಿ ಭಾರತೀಯ ಮಹಿಳೆಯೊಬ್ಬರು ತಮ್ಮನ್ನು ಲೂಟಿ ಮಾಡಲು ಬಂದಿದ್ದ ದರೋಡೆಕೋರರನ್ನೇ ಅಟ್ಟಾಡಿಸಿರುವ ಘಟನೆ ಪಂಜಾಬ್ನಲ್ಲಿ ನಡೆದಿದೆ. ಹರ್ಜಿಂದ್ ಕೌರ್ ಎಂಬ ಮಹಿಳೆ ತೋರಿರುವ ಈ ಅದ್ಭುತ ಧೈರ್ಯದ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಸಾರ್ವಜನಿಕರ ಶ್ಲಾಘನೆಗೆ ಪಾತ್ರವಾಗಿದೆ.
ಶುಕ್ರವಾರ ಸಂಜೆ ಹರ್ಜಿಂದ್ ಕೌರ್ ಅವರು ತಮ್ಮ ಅತ್ತೆ ಮತ್ತು ಚಿಕ್ಕಮ್ಮನೊಂದಿಗೆ ಲೂಧಿಯಾನದ ಸಂಬಂಧಿಕರ ಮನೆಗೆ ಕಾರಿನಲ್ಲಿ ತೆರಳುತ್ತಿದ್ದರು. ಈ ವೇಳೆ ಬೈಕ್ನಲ್ಲಿ ಬಂದ ಇಬ್ಬರು ಅಪರಿಚಿತರು ದಾರಿಯುದ್ದಕ್ಕೂ ಇವರ ಕಾರನ್ನು ಹಿಂಬಾಲಿಸುತ್ತಿದ್ದರು. ಬೈಕ್ಗೆ ದಾರಿ ಬಿಟ್ಟರೂ ಅವರು ಓವರ್ಟೇಕ್ ಮಾಡದೆ ಸತತವಾಗಿ ಬೆನ್ನಟ್ಟುತ್ತಿರುವುದನ್ನು ಗಮನಿಸಿದ ಹರ್ಜಿಂದ್ ಕೌರ್ ಅವರಿಗೆ ದರೋಡೆಯ ಸಂಶಯ ಬಂದಿದೆ. ಈ ವೇಳೆ ಹರ್ಜಿಂದ್ ಕಾರಿನ ವೇಗ ಕಡಿಮೆ ಮಾಡಿದಾಗ, ಲೂಟಿಕೋರರು ಕಾರಿನ ವಿಂಡ್ಸ್ಕ್ರೀನ್ ಮೇಲೆ ಮೊಟ್ಟೆಗಳನ್ನು ಎಸೆದು ದಾರಿ ಕಾಣದಂತೆ ಮಾಡುವ ಮೂಲಕ ಕಾರನ್ನು ನಿಲ್ಲಿಸಲು ಸಂಚು ರೂಪಿಸಿದ್ದಾರೆ.
ಖಡ್ಗ ಝಳಪಿಸಿ ರಣಚಂಡಿಯಾದ ಹರ್ಜಿಂದ್
ನಿರ್ಜನ ಪ್ರದೇಶದಲ್ಲಿ ಕಾರನ್ನು ಅಡ್ಡಗಟ್ಟಿದ ದರೋಡೆಕೋರರನ್ನು ಕಂಡು ಕಾರಿನಲ್ಲಿದ್ದ ಇತರ ಮಹಿಳೆಯರು ಗಾಬರಿಗೊಂಡರು. ಆದರೆ ಕಿಂಚಿತ್ತೂ ಹೆದರದ ಹರ್ಜಿಂದ್ ಕೌರ್, “ಹೊರಗೆ ಹೋಗಬೇಡ, ಅವರು ನಿನ್ನ ಮೇಲೆ ಹಲ್ಲೆ ಮಾಡಬಹುದು” ಎಂಬ ಮನೆಯವರ ಎಚ್ಚರಿಕೆಯನ್ನೂ ಮೀರಿ ಕೈಯಲ್ಲಿ ಖಡ್ಗ ಹಿಡಿದು ಕೆಳಗಿಳಿದಿದ್ದಾರೆ. ರಸ್ತೆಯ ಮಧ್ಯೆ ನಿಂತು ಖಡ್ಗ ಝಳಪಿಸುತ್ತಾ, “ಧೈರ್ಯವಿದ್ದರೆ ಮುಂದೆ ಬನ್ನಿ” ಎಂದು ಲೂಟಿಕೋರರಿಗೆ ಸವಾಲು ಹಾಕಿದ್ದಾರೆ. ಮಹಿಳೆಯ ಈ ರೌದ್ರಾವತಾರ ಕಂಡು ದಂಗಾದ ದರೋಡೆಕೋರರು ಅಲ್ಲಿಂದ ಕಾಲ್ಕಿತ್ತಿದ್ದಾರೆ. ಈ ಇಡೀ ದೃಶ್ಯವನ್ನು ಕಾರಿನಲ್ಲಿದ್ದ ಅವರ ಚಿಕ್ಕಮ್ಮ ಮೊಬೈಲ್ನಲ್ಲಿ ಸೆರೆಹಿಡಿದಿದ್ದಾರೆ.
ಸದ್ಯ ಲೂಧಿಯಾನ ಪೊಲೀಸರು ವೈರಲ್ ವಿಡಿಯೋ ಆಧಾರದ ಮೇಲೆ ಪ್ರಕರಣ ದಾಖಲಿಸಿಕೊಂಡಿದ್ದು, ಇಬ್ಬರು ಶಂಕಿತರನ್ನು ವಶಕ್ಕೆ ಪಡೆದು ತನಿಖೆ ನಡೆಸುತ್ತಿದ್ದಾರೆ. ಆಪತ್ತಿನ ಸಮಯದಲ್ಲಿ ಗಾಬರಿಯಾಗದೆ ಎದುರಾಳಿಗಳಿಗೆ ದಿಟ್ಟ ಪ್ರತ್ಯುತ್ತರ ನೀಡಿದ ಹರ್ಜಿಂದ್ ಕೌರ್ ಅವರ ಸಾಹಸ ಈಗ ಎಲ್ಲೆಡೆ ಮೆಚ್ಚುಗೆಗೆ ಪಾತ್ರವಾಗಿದೆ.
ಇದನ್ನೂ ಓದಿ: ಆರ್ಡರ್ ಮಾಡಿದ್ದು ವ್ಲಾಗಿಂಗ್ ಕ್ಯಾಮರಾ.. ಬಂದಿದ್ದು ವಾಷಿಂಗ್ ಪೌಡರ್..! ಉದ್ಯಮಿಗೆ 61 ಸಾವಿರ ರೂ. ವಂಚನೆ
