ನವದೆಹಲಿ: ಭಾರತದ ಐಷಾರಾಮಿ ಎಲೆಕ್ಟ್ರಿಕ್ ವಾಹನ ಮಾರುಕಟ್ಟೆಯಲ್ಲಿ ಜರ್ಮನ್ ಮೂಲದ ವಾಹನ ತಯಾರಕ ದಿಗ್ಗಜ ‘ಬಿಎಂಡಬ್ಲ್ಯು‘ (BMW) ಹೊಸ ಇತಿಹಾಸವನ್ನೇ ನಿರ್ಮಿಸಿದೆ. ಕಂಪನಿಯ ಅತ್ಯಂತ ಪ್ರತಿಷ್ಠಿತ ಹಾಗೂ ದುಬಾರಿ ಬೆಲೆಯ ಫ್ಲ್ಯಾಗ್ಶಿಪ್ ಎಲೆಕ್ಟ್ರಿಕ್ ಸೆಡಾನ್ ಆಗಿರುವ ‘BMW i7’ ಭಾರತದಲ್ಲಿ ಬರೋಬ್ಬರಿ 1,000 ಯುನಿಟ್ ವಿತರಣೆಯ (Deliveries) ಮೈಲಿಗಲ್ಲನ್ನು ದಾಟಿದೆ.
ಭಾರತದಂತಹ ಮಾರುಕಟ್ಟೆಯಲ್ಲಿ ಪ್ರೀಮಿಯಂ ಎಲೆಕ್ಟ್ರಿಕ್ ವಾಹನಗಳಿಗೆ ಹೆಚ್ಚುತ್ತಿರುವ ಬೇಡಿಕೆ ಮತ್ತು ಗ್ರಾಹಕರು ಪರಿಸರ ಸ್ನೇಹಿ ಐಷಾರಾಮಿ ವಾಹನಗಳತ್ತ ವಾಲುತ್ತಿರುವುದಕ್ಕೆ ಈ ಸಾಧನೆಯೇ ಪ್ರತ್ಯಕ್ಷ ಸಾಕ್ಷಿಯಾಗಿದೆ. ದೇಶದಲ್ಲಿ ಬಿಡುಗಡೆಯಾದ ಅಲ್ಪಾವಧಿಯಲ್ಲೇ ಈ ಕಾರು ಶ್ರೀಮಂತ ವರ್ಗದವರ ನೆಚ್ಚಿನ ಆಯ್ಕೆಯಾಗಿ ಹೊರಹೊಮ್ಮಿದೆ.
ಸಿಇಒ ಹರ್ದೀಪ್ ಸಿಂಗ್ ಬ್ರಾರ್ ಹರ್ಷ
ಈ ಮಹತ್ವದ ಸಾಧನೆಯ ಬಗ್ಗೆ ಪ್ರತಿಕ್ರಿಯಿಸಿರುವ ಬಿಎಂಡಬ್ಲ್ಯು ಗ್ರೂಪ್ ಇಂಡಿಯಾದ ಅಧ್ಯಕ್ಷ ಮತ್ತು ಸಿಇಒ ಹರ್ದೀಪ್ ಸಿಂಗ್ ಬ್ರಾರ್ ಅವರು ಹರ್ಷ ವ್ಯಕ್ತಪಡಿಸಿದ್ದಾರೆ. ಅವರ ಪ್ರಕಾರ, BMW i7 ಕೇವಲ ಒಂದು ಐಷಾರಾಮಿ ಸೆಡಾನ್ ಕಾರು ಮಾತ್ರವಲ್ಲ, ಇದೊಂದು ಭವಿಷ್ಯದ ತಂತ್ರಜ್ಞಾನದ ದಿಕ್ಸೂಚಿಯಾಗಿದೆ. 1,000 ಯುನಿಟ್ಗಳ ಮಾರಾಟದ ಗಡಿ ದಾಟಿರುವುದು ಗ್ರಾಹಕರು ಈ ಕಾರಿನ ಮೇಲೆ ಇಟ್ಟಿರುವ ನಂಬಿಕೆ ಮತ್ತು ಪ್ರೀತಿಯನ್ನು ತೋರಿಸುತ್ತದೆ. ಅತ್ಯಾಧುನಿಕ ವಿನ್ಯಾಸ, ಎಲೆಕ್ಟ್ರಿಫೈಯಿಂಗ್ ಪರ್ಫಾರ್ಮೆನ್ಸ್ ಮತ್ತು ರಾಜಿ ಇಲ್ಲದ ಐಷಾರಾಮಿತನದ ಪರಿಪೂರ್ಣ ಸಮ್ಮಿಲನವೇ ಈ ಕಾರು ಎಂದು ಅವರು ಬಣ್ಣಿಸಿದ್ದಾರೆ. ಈ ಕಾರು ಭಾರತದ ಎಲೆಕ್ಟ್ರಿಕ್ ವಾಹನ ವಲಯದಲ್ಲಿ ನಾಯಕತ್ವವನ್ನು ಗಟ್ಟಿಗೊಳಿಸಿದೆ ಎಂದೂ ಅವರು ಅಭಿಪ್ರಾಯಪಟ್ಟಿದ್ದಾರೆ.
ರಾಜಗಾಂಭೀರ್ಯದ ವಿನ್ಯಾಸ ಮತ್ತು ಸ್ವರೋವ್ಸ್ಕಿ ಹರಳುಗಳು
ನೋಟದಲ್ಲಿ ಈ ಕಾರು ರಸ್ತೆಯಲ್ಲಿ ಚಲಿಸುವಾಗ ರಾಜಗಾಂಭೀರ್ಯವನ್ನು ಉಂಟುಮಾಡುತ್ತದೆ. ಕಾರಿನ ಮುಂಭಾಗದಲ್ಲಿರುವ ಸ್ಪ್ಲಿಟ್ ಹೆಡ್ಲ್ಯಾಂಪ್ ಸೆಟಪ್ ವಿಶಿಷ್ಟವಾಗಿದ್ದು, ಡೇ-ಟೈಮ್ ರನ್ನಿಂಗ್ ಲೈಟ್ಸ್ (DRL) ಅನ್ನು ಮೇಲ್ಭಾಗದಲ್ಲಿ ಅಳವಡಿಸಲಾಗಿದೆ. ವಿಶೇಷವೆಂದರೆ, ಈ ಲೈಟ್ಗಳಲ್ಲಿ ಜಗತ್ಪ್ರಸಿದ್ಧ ‘ಸ್ವರೋವ್ಸ್ಕಿ’ (Swarovski) ಹರಳುಗಳಿಂದ ತಯಾರಿಸಿದ ಬಿಎಂಡಬ್ಲ್ಯು ಕ್ರಿಸ್ಟಲ್ ಹೆಡ್ಲೈಟ್ಗಳನ್ನು ಬಳಸಲಾಗಿದೆ. ಇದು ರಾತ್ರಿ ವೇಳೆಯಲ್ಲಿ ಕಾರಿಗೆ ಅದ್ಭುತವಾದ ಹೊಳಪನ್ನು ನೀಡುತ್ತದೆ. ಇದರೊಂದಿಗೆ ಮುಂಭಾಗದಲ್ಲಿರುವ ‘ಐಕಾನಿಕ್ ಗ್ಲೋ ಕಿಡ್ನಿ ಗ್ರಿಲ್’ ಈ ಕಾರಿನ ಅಂದವನ್ನು ಮತ್ತಷ್ಟು ಹೆಚ್ಚಿಸಿದ್ದು, ಇದು ಬಿಎಂಡಬ್ಲ್ಯು ಬ್ರ್ಯಾಂಡ್ನ ಸಿಗ್ನೇಚರ್ ಲುಕ್ ಅನ್ನು ಎತ್ತಿ ತೋರಿಸುತ್ತದೆ.
ಚಲಿಸುವ ಥಿಯೇಟರ್ನಂತಿರುವ ಒಳಾಂಗಣ
ಕಾರಿನ ಒಳಭಾಗಕ್ಕೆ ಕಾಲಿಟ್ಟರೆ ಅದೊಂದು ಚಲಿಸುವ ಐಷಾರಾಮಿ ಅರಮನೆಯ ಅನುಭವ ನೀಡುತ್ತದೆ. ಡ್ಯಾಶ್ಬೋರ್ಡ್ನಲ್ಲಿರುವ ಬಿಎಂಡಬ್ಲ್ಯು ಇಂಟರಾಕ್ಷನ್ ಬಾರ್ ಮತ್ತು ಬಾಗಿದ ಆಕಾರದ ಡಿಸ್ಪ್ಲೇ (Curved Display) ಚಾಲಕನಿಗೆ ನ್ಯಾವಿಗೇಷನ್ ಮತ್ತು ರಿಯಲ್-ಟೈಮ್ ಟ್ರಾಫಿಕ್ ಮಾಹಿತಿಯನ್ನು ಒದಗಿಸುತ್ತದೆ. ಆದರೆ ಈ ಕಾರಿನ ನಿಜವಾದ ಹೈಲೈಟ್ ಇರುವುದು ಹಿಂಬದಿ ಸೀಟಿನಲ್ಲಿ. ಹಿಂಬದಿ ಪ್ರಯಾಣಿಕರಿಗಾಗಿ ಬರೋಬ್ಬರಿ 31-ಇಂಚಿನ ಬೃಹತ್ 8K ರೆಸಲ್ಯೂಶನ್ ಹೊಂದಿರುವ ‘ಬಿಎಂಡಬ್ಲ್ಯು ಥಿಯೇಟರ್ ಸ್ಕ್ರೀನ್’ ಅಳವಡಿಸಲಾಗಿದೆ. ಅಮೆಜಾನ್ ಫೈರ್ ಟಿವಿ ಬೆಂಬಲದೊಂದಿಗೆ ಬರುವ ಈ ಪರದೆಯು ಪ್ರಯಾಣದ ವೇಳೆ ಸಿನಿಮೀಯ ಅನುಭವ ನೀಡುತ್ತದೆ. ಇದರೊಂದಿಗೆ ಹಿಂಬದಿ ಸೀಟುಗಳನ್ನು 42.5 ಡಿಗ್ರಿಗಳಷ್ಟು ಒರಗಿಸಿಕೊಳ್ಳಬಹುದಾದ ಸೌಲಭ್ಯವಿದ್ದು, ಮೆರಿನೊ ಲೆದರ್ ಸೀಟುಗಳು, ಮಸಾಜ್ ಫಂಕ್ಷನ್ ಮತ್ತು ಎಲ್ಇಡಿ ಲೈಟಿಂಗ್ ಹೊಂದಿರುವ ಪನೋರಾಮಿಕ್ ಗ್ಲಾಸ್ ರೂಫ್ ಪ್ರಯಾಣಿಕರಿಗೆ ಫಸ್ಟ್ ಕ್ಲಾಸ್ ವಿಮಾನ ಪ್ರಯಾಣದ ಅನುಭವ ನೀಡುತ್ತವೆ.
ಅದ್ಭುತ ವೇಗ ಮತ್ತು ಮೈಲೇಜ್ ಸಾಮರ್ಥ್ಯ
ಪರ್ಫಾರ್ಮೆನ್ಸ್ ವಿಷಯದಲ್ಲೂ ಈ ಕಾರು ಹಿಂದೆ ಬಿದ್ದಿಲ್ಲ. BMW i7 eDrive50 ಮಾಡೆಲ್ನಲ್ಲಿ ಐದನೇ ತಲೆಮಾರಿನ eDrive ತಂತ್ರಜ್ಞಾನವನ್ನು ಅಳವಡಿಸಲಾಗಿದೆ. ಈ ಎಲೆಕ್ಟ್ರಿಕ್ ಸೆಡಾನ್ ಕೇವಲ 5.5 ಸೆಕೆಂಡುಗಳಲ್ಲಿ ಸೊನ್ನೆಯಿಂದ 100 ಕಿಲೋಮೀಟರ್ ವೇಗವನ್ನು ಪಡೆದುಕೊಳ್ಳುವ ಸಾಮರ್ಥ್ಯ ಹೊಂದಿದೆ. ಇದು 449 bhp ಶಕ್ತಿ ಮತ್ತು 650 Nm ಟಾರ್ಕ್ ಉತ್ಪಾದಿಸುತ್ತದೆ. ಇನ್ನು ಮೈಲೇಜ್ (ರೇಂಜ್) ವಿಚಾರಕ್ಕೆ ಬರುವುದಾದರೆ, ಒಮ್ಮೆ ಪೂರ್ತಿ ಚಾರ್ಜ್ ಮಾಡಿದರೆ ಬರೋಬ್ಬರಿ 603 ಕಿಲೋಮೀಟರ್ಗಳಷ್ಟು (WLTP ಪ್ರಮಾಣೀಕೃತ) ದೂರವನ್ನು ಇದು ಕ್ರಮಿಸಬಲ್ಲದು. ಇದು ಪ್ರಸ್ತುತ ಭಾರತದಲ್ಲಿ ಲಭ್ಯವಿರುವ ಅತ್ಯುತ್ತಮ ರೇಂಜ್ ನೀಡುವ ಐಷಾರಾಮಿ ಎಲೆಕ್ಟ್ರಿಕ್ ಕಾರುಗಳಲ್ಲಿ ಒಂದಾಗಿದೆ.
ಇದನ್ನೂ ಓದಿ: ಕೇಂದ್ರ ಸರ್ಕಾರದ ಹಿಂದೂಸ್ತಾನ್ ಕಾಪರ್ ಸಂಸ್ಥೆಯಲ್ಲಿ 3 ಹುದ್ದೆಗಳು | 65 ಸಾವಿರ ರೂ. ಸಂಬಳ
