ನವದೆಹಲಿ: “ಪ್ಯಾಲೆಸ್ತೀನ್” ಎಂದು ಬರೆದಿರುವ ಬ್ಯಾಗ್ ಹಾಕಿಕೊಂಡು ಬಂದು ಈ ಹಿಂದೆ ಬಿಜೆಪಿಗೆ ಟಾಂಗ್ ನೀಡಿದ್ದ ಕಾಂಗ್ರೆಸ್ ನಾಯಕಿ, ಸಂಸದೆ ಪ್ರಿಯಾಂಕಾ ಗಾಂಧಿ ವಾದ್ರಾ(Priyanaka Gandhi Bag) ಅವರಿಗೆ ಈಗ ಬಿಜೆಪಿ ಸಂಸದೆ ಬಾನ್ಸುರಿ ಸ್ವರಾಜ್ ಅವರು ಅದೇ ಮಾದರಿಯಲ್ಲಿ ತಿರುಗೇಟು ನೀಡಿದ್ದಾರೆ. ಒಂದು ದೇಶ, ಒಂದು ಚುನಾವಣೆಗೆ ಸಂಬಂಧಿಸಿದ ಜಂಟಿ ಸಂಸದೀಯ ಸಮಿತಿಯ ಸಭೆಯಲ್ಲಿ ಪಾಲ್ಗೊಳ್ಳಲೆಂದು ಮಂಗಳವಾರ(ಏಪ್ರಿಲ್ 22) ಸಂಸತ್ ಭವನಕ್ಕೆ ಬಂದ ಬಾನ್ಸುರಿ ಸ್ವರಾಜ್ ಅವರು “ನ್ಯಾಷನಲ್ ಹೆರಾಲ್ಡ್ ಕೀ ಲೂಟ್” ಎಂದು ಬರೆದಿರುವ ಬ್ಯಾಗ್ ಧರಿಸಿಕೊಂಡೇ ಆಗಮಿಸಿದ್ದಾರೆ.
ನ್ಯಾಷನಲ್ ಹೆರಾಲ್ಡ್ ಅಕ್ರಮ ಹಣಕಾಸು ವರ್ಗಾವಣೆ ಪ್ರಕರಣದಲ್ಲಿ ಕಾಂಗ್ರೆಸ್ ನಾಯಕರಾದ ಸೋನಿಯಾಗಾಂಧಿ, ರಾಹುಲ್ ಗಾಂಧಿ ಸೇರಿದಂತೆ ಹಲವರ ವಿರುದ್ಧ ಜಾರಿ ನಿರ್ದೇಶನಾಲಯ ಆರೋಪಪಟ್ಟಿ ಸಲ್ಲಿಕೆ ಮಾಡಿರುವಂತೆಯೇ ಈ ಬೆಳವಣಿಗೆ ನಡೆದಿದೆ.
ಕಳೆದ ವರ್ಷದ ಡಿಸೆಂಬರ್ ಪ್ರಿಯಾಂಕಾ ಅವರು ಪ್ಯಾಲೆಸ್ತೀನ್ ಎಂದು ಬರೆದಿರುವ ಬ್ಯಾಂಗ್ ಧರಿಸಿಕೊಂಡು ಸಂಸತ್ ಭವನಕ್ಕೆ ಬರುವ ಮೂಲಕ ವಿವಾದ ಸೃಷ್ಟಿಸಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ್ದ ಬಿಜೆಪಿ ನಾಯಕರು, “ಪ್ರಿಯಾಂಕಾ ಅವರಿಗೆ ಬಾಂಗ್ಲಾದೇಶಿ ಹಿಂದೂಗಳ ಸಮಸ್ಯೆಗಳು ಕಾಣಿಸುತ್ತಿಲ್ಲ” ಎಂದು ವಾಕ್ ಪ್ರಹಾರ ನಡೆಸಿದ್ದರು.
ಇದಕ್ಕೆ ಪ್ರತ್ಯುತ್ತರ ನೀಡಿದ್ದ ಪ್ರಿಯಾಂಕಾ, “ನಾನು ಏನನ್ನು ಧರಿಸಬೇಕೆಂದು ಬೇರೆಯವರು ನಿರ್ಧರಿಸಬೇಕಾಗಿಲ್ಲ. ಅದು ನನ್ನಿಷ್ಟ” ಎಂದು ಉತ್ತರಿಸಿದ್ದರು. ಅಲ್ಲದೆ, ನನ್ನ ಟ್ವೀಟರ್ ಖಾತೆಯನ್ನೊಮ್ಮೆ ಗಮನಿಸಿ ನೋಡಿ, ಎಲ್ಲ ವಿಚಾರಗಳ ಬಗ್ಗೆಯೂ ನನ್ನ ಅಭಿಪ್ರಾಯಗಳನ್ನು ನಾನಲ್ಲಿ ಹೇಳಿದ್ದೇನೆ ಎಂದಿದ್ದರು.
ಅಲ್ಲದೇ, ಅದರ ಮಾರನೇ ದಿನವೇ ಪ್ರಿಯಾಂಕಾ ಅವರು, “ನಾನು ಬಾಂಗ್ಲಾದೇಶದ ಹಿಂದೂಗಳು ಮತ್ತು ಕ್ರಿಶ್ಚಿಯನ್ನರ ಜೊತೆಗೆ ಇದ್ದೇನೆ” ಎಂದು ಮುದ್ರಿಸಲಾದ ಬ್ಯಾಗ್ ಧರಿಸಿಕೊಂಡು ಸಂಸತ್ ಗೆ ಬಂದಿದ್ದರು. ಇದಕ್ಕೆ ಪ್ರತಿಯಾಗಿ ಬಿಜೆಪಿ ಸಂಸದೆ ಅಪರಾಜಿತಾ ಸಾರಂಗಿ ಅವರು, “1984” ಎಂದು ಕೆಂಪು ಬಣ್ಣದ ಅಕ್ಷರಗಳಲ್ಲಿ ಬರೆದಿರುವ ಹಾಗೂ ಸಿಖ್ ವಿರೋಧಿ ದಂಗೆಯನ್ನು ಬಿಂಬಿಸುವಂಥ ಬ್ಯಾಗ್ ಅನ್ನು ಪ್ರಿಯಾಂಕಾಗೆ ಉಡುಗೊರೆಯಾಗಿ ನೀಡಲು ಮುಂದಾಗಿದ್ದರು.
ಇದೀಗ ಬಾನ್ಸುರಿ ಸ್ವರಾಜ್ ಅವರು ಕಾಂಗ್ರೆಸ್ ನ ಗಾಂಧಿ ಕುಟುಂಬವನ್ನು ಹೀಗಳೆಯುವ ಸಲುವಾಗಿಯೇ ನ್ಯಾಷನಲ್ ಹೆರಾಲ್ಡ್ ಬಗ್ಗೆ ಉಲ್ಲೇಖವಿರುವ ಬ್ಯಾಗ್ ಧರಿಸಿಕೊಂಡು ಬಂದಿದ್ದಾರೆ.
