ನ್ಯೂಯಾರ್ಕ್: ವಿವಾದಿತ ವ್ಯಾಪಾರ ನೀತಿ ಮತ್ತು ಸುಂಕಾಸ್ತ್ರದ ಮೂಲಕ ವಿಶ್ವದ ಬಹುತೇಕ ದೇಶಗಳ ನಿದ್ದೆಗೆಡಿಸಿದ್ದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ಇದೀಗ ಅಲ್ಲಿನ ನ್ಯಾಯಾಲಯ ಶಾಕ್ ಕೊಟ್ಟಿದೆ. ಟ್ರಂಪ್ ಆಡಳಿತಾವಧಿಯಲ್ಲಿ ಆಮದುದಾರರಿಂದ ಅಕ್ರಮವಾಗಿ ವಸೂಲಿ ಮಾಡಲಾಗಿದ್ದ ಸುಮಾರು 130 ಬಿಲಿಯನ್ ಡಾಲರ್ (ಅಂದಾಜು 10.7 ಲಕ್ಷ ಕೋಟಿ ರೂ.ಗೂ ಅಧಿಕ) ಸುಂಕವನ್ನು ಬಡ್ಡಿ ಸಮೇತ ಮರುಪಾವತಿಸುವಂತೆ ಮ್ಯಾನ್ಹ್ಯಾಟನ್ನ ಅಂತಾರಾಷ್ಟ್ರೀಯ ವ್ಯಾಪಾರ ನ್ಯಾಯಾಲಯವು ಐತಿಹಾಸಿಕ ತೀರ್ಪು ನೀಡಿದೆ.
ಸುಪ್ರೀಂ ತೀರ್ಪಿನ ಬೆನ್ನಲ್ಲೇ ಕಠಿಣ ಕ್ರಮ
ಟ್ರಂಪ್ ಸರ್ಕಾರವು ಅಂತಾರಾಷ್ಟ್ರೀಯ ತುರ್ತು ಆರ್ಥಿಕ ಅಧಿಕಾರ ಕಾಯ್ದೆಯಡಿ (IEEPA) ವಿಧಿಸಿದ್ದ ಸುಂಕಗಳು ಕಾನೂನುಬಾಹಿರ ಎಂದು ಕಳೆದ ತಿಂಗಳು ಅಮೆರಿಕದ ಸುಪ್ರೀಂ ಕೋರ್ಟ್ ಘೋಷಿಸಿತ್ತು. ಈ ತೀರ್ಪಿನ ಆಧಾರದ ಮೇಲೆ ಇದೀಗ ಜಡ್ಜ್ ರಿಚರ್ಡ್ ಈಟನ್ ಅವರು, ಸುಂಕದ ಹೆಸರಿನಲ್ಲಿ ಸಂಗ್ರಹಿಸಲಾದ ಹಣವನ್ನು ಕೂಡಲೇ ಆಮದುದಾರರಿಗೆ ಹಿಂದಿರುಗಿಸುವ ಪ್ರಕ್ರಿಯೆಯನ್ನು ಅಂತಿಮಗೊಳಿಸುವಂತೆ ಕಸ್ಟಮ್ಸ್ ಮತ್ತು ಗಡಿ ರಕ್ಷಣೆ (CBP) ಇಲಾಖೆಗೆ ನಿರ್ದೇಶನ ನೀಡಿದ್ದಾರೆ. “ಕಸ್ಟಮ್ಸ್ ಇಲಾಖೆಗೆ ಇದು ಹೊಸದೇನಲ್ಲ, ಅವರು ಪ್ರತಿದಿನವೂ ಇಂತಹ ಮರುಪಾವತಿಗಳನ್ನು ಮಾಡುತ್ತಾರೆ,” ಎಂದು ನ್ಯಾಯಾಧೀಶರು ಈ ಸಂದರ್ಭದಲ್ಲಿ ತಿಳಿಸಿದ್ದಾರೆ.
7 ಕೋಟಿ ದಾಖಲೆಗಳ ಮರುಪರಿಶೀಲನೆ ಸವಾಲು
ನ್ಯಾಯಾಲಯದ ಈ ಆದೇಶವು ಕಸ್ಟಮ್ಸ್ ಇಲಾಖೆಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ಸುಮಾರು 7 ಕೋಟಿಗೂ ಹೆಚ್ಚು ಆಮದು ದಾಖಲೆಗಳನ್ನು ಮರುಪರಿಶೀಲಿಸಬೇಕಾಗುತ್ತದೆ ಮತ್ತು ಇದು ಬಹಳ ಕಷ್ಟಕರ ಕೆಲಸವಾಗಿದೆ ಎಂದು ಇಲಾಖೆ ಕೋರ್ಟ್ಗೆ ತಿಳಿಸಿದೆ. ಈ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲು ತನಗೆ ಕನಿಷ್ಠ 4 ತಿಂಗಳ ಕಾಲಾವಕಾಶ ಬೇಕು ಎಂದೂ ಮನವಿ ಮಾಡಿದೆ. ಆದರೆ, ನ್ಯಾಯಾಲಯವು ಈ ಬಗ್ಗೆ ಶುಕ್ರವಾರ ಮತ್ತೊಂದು ವಿಚಾರಣೆ ನಡೆಸಲಿದ್ದು, ಮರುಪಾವತಿಯ ಯೋಜನೆಯ ಬಗ್ಗೆ ಅಪ್ಡೇಟ್ ನೀಡುವಂತೆ ಸೂಚಿಸಿದೆ.
ಸಣ್ಣ ಉದ್ದಿಮೆದಾರರಿಗೆ ಸಿಕ್ಕ ದೊಡ್ಡ ಜಯ
ಟ್ರಂಪ್ ಸರ್ಕಾರದ ಈ ಅಕ್ರಮ ಸುಂಕದಿಂದ ಸುಮಾರು 3 ಲಕ್ಷಕ್ಕೂ ಹೆಚ್ಚು ಆಮದುದಾರರು ಬಾಧಿತರಾಗಿದ್ದರು. ಇವರಲ್ಲಿ ಬಹುತೇಕರು ಸಣ್ಣ ಉದ್ದಿಮೆದಾರರಾಗಿದ್ದು, ಕಾನೂನು ಹೋರಾಟ ನಡೆಸಲು ಶಕ್ತಿಯಿಲ್ಲದೆ ಸುಮ್ಮನಾಗಿದ್ದರು. ಈಗ ಎಟ್ಮಸ್ ಫಿಲ್ಟರೇಶನ್ (Atmus Filtration) ಎಂಬ ಕಂಪನಿ ನೀಡಿದ್ದ ದೂರಿನ ಹಿನ್ನೆಲೆಯಲ್ಲಿ ಇಡೀ ಸಮುದಾಯಕ್ಕೆ ನ್ಯಾಯ ಸಿಕ್ಕಂತಾಗಿದೆ. ಸುಮಾರು 2,000ಕ್ಕೂ ಹೆಚ್ಚು ಕಂಪನಿಗಳು ಈಗಾಗಲೇ ಮರುಪಾವತಿ ಕೋರಿ ದೂರು ದಾಖಲಿಸಿದ್ದು, ಈ ಎಲ್ಲ ಪ್ರಕರಣಗಳನ್ನು ಸರಳೀಕೃತ ಪದ್ಧತಿಯ ಮೂಲಕ ಇತ್ಯರ್ಥಪಡಿಸಲು ನ್ಯಾಯಾಲಯ ಉದ್ದೇಶಿಸಿದೆ.
ಇದನ್ನೂ ಓದಿ : ಸಪ್ತಪದಿ ತುಳಿದ ಕ್ರಿಕೆಟಿಗ ವೈಶಾಕ್ ವಿಜಯ್.. ನವ ಜೋಡಿಗೆ ಶುಭ ಹಾರೈಸಿದ ಕಿಚ್ಚ
