ಡಾ. ಶಾಂತಲಿಂಗ ನಿಗುಡಗಿ, ಸೀನಿಯರ್ ಕನ್ಸಲ್ಟಂಟ್ ರೇಡಿಯೇಶನ್/ಕ್ಲಿನಿಕಲ್ ಆಂಕೊಲಾಜಿಸ್ಟ್, ಎಚ್‌ಸಿಜಿ ಕ್ಯಾನ್ಸರ್ ಸೆಂಟರ್, ಕಲಬುರಗಿ
ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್ ರೋಗನಿರ್ಣಯವಾದಾಗ ಸಾಮಾನ್ಯವಾಗಿ ಮೊದಲ ಪ್ರತಿಕ್ರಿಯೆ ಎಂದರೆ, ‘ಅದನ್ನು ತೆಗೆದು ಬಿಡಿ’. ಆದರೆ, ಆಂಕೊಲಾಜಿಯ ಕ್ಷೇತ್ರದಲ್ಲಿ ಕೆಲವು ಕ್ರಾಂತಿಕಾರಕ ಬೆಳವಣಿಗೆಗಳಾಗಿದ್ದು, ರೇಡಿಯೇಶನ್ ಚಿಕಿತ್ಸೆಯು ಒಂದು ಶಕ್ತಿಶಾಲಿ ಸಾಧನವಾಗಿ ಹೊರಹೊಮ್ಮಿದೆ. ಕೇವಲ ಶಸ್ತ್ರಚಿಕಿತ್ಸೆಗೆ ಪೂರಕವಾಗಿರದೆ, (radiation oncology) ಕೆಲವೊಮ್ಮೆ ಶಸ್ತ್ರಚಿಕಿತ್ಸೆಗೆ ಸಮಾನಾಂತರವಾದ ಚಿಕಿತ್ಸಾ ಪದ್ಧತಿಯಾಗಿಯೂ ಮತ್ತು ಕೆಲವು ಸಂದರ್ಭಗಳಲ್ಲಿ ಪ್ರಾಥಮಿಕ ಚಿಕಿತ್ಸೆಯ ಆಯ್ಕೆಯಾಗಿಯೂ ಕಾರ್ಯನಿರ್ವಹಿಸುತ್ತಿದೆ.
ಈ ಸಂದರ್ಭದಲ್ಲಿ, ಬಹುವಿಧ ತಜ್ಞರ ತಂಡದ ಸಹಕಾರವು ಮಹತ್ವವಾಗುತ್ತದೆ. ಶಸ್ತ್ರಚಿಕಿತ್ಸಕರು, ವೈದ್ಯಕೀಯ ಆಂಕೊಲಾಜಿಸ್ಟ್‌ಗಳು ಮತ್ತು ರೇಡಿಯೇಶನ್ ಆಂಕೊಲಾಜಿಸ್ಟ್‌ಗಳು ಆರಂಭದಿಂದಲೇ ಒಟ್ಟಿಗೆ ಕೆಲಸ ಮಾಡಿ ಪ್ರತಿಯೊಬ್ಬ ರೋಗಿಗೂ ಸೂಕ್ತ ಚಿಕಿತ್ಸಾ ಯೋಜನೆ ರೂಪಿಸುತ್ತಾರೆ. ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್‌ಗಳಿಗೆ ಈ ಸಹಕಾರವು ಕೇವಲ ಒಂದು ಪ್ರಯೋಜನವಾಗಿರದೇ ಅತ್ಯಗತ್ಯ
ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್‌ಗಳ ವಿಶೇಷತೆ
ಬಾಯಿ, ಗಂಟಲು, ಧ್ವನಿಪೆಟ್ಟಿಗೆ, ಮತ್ತು ಸಂಬಂಧಿತ ಪ್ರದೇಶಗಳ ಕ್ಯಾನ್ಸರ್‌ಗಳು ವಿಶೇಷವಾಗಿ ಸವಾಲಿನ ಸ್ವರೂಪ ಹೊಂದಿವೆ. ಈ ಕ್ಯಾನ್ಸರ್‌ಗಳ ಚಿಕಿತ್ಸೆಗೆ ಕೇವಲ ಗೆಡ್ಡೆಯನ್ನು ತೆಗೆದುಹಾಕುವುದಷ್ಟೇ ಪ್ರಮುಖವಲ್ಲ. ಮಾತನಾಡುವಿಕೆ, ಆಹಾರ ಮತ್ತು ನೀರು ನುಂಗುವಿಕೆ, ಮತ್ತು ಉಸಿರಾಟದಂತಹ ಪ್ರಮುಖ ಕಾರ್ಯಗಳನ್ನು ಸಂರಕ್ಷಿಸುವುದೂ ಮಹತ್ವದ್ದಾಗಿದೆ.
ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್‌ಗಳು ನಮ್ಮ ಗುರುತನ್ನು ವ್ಯಾಖ್ಯಾನಿಸುವ ಮತ್ತು ಜೀವನದ ಗುಣಮಟ್ಟವನ್ನು ನಿರ್ಧರಿಸುವ ಪ್ರದೇಶಗಳನ್ನು ಪರಿಣಾಮ ಬೀರುತ್ತವೆ. ಆದ್ದರಿಂದ, ಒಂದೇ ರೀತಿಯ ಚಿಕಿತ್ಸಾ ವಿಧಾನವು ಇಲ್ಲಿ ಕಾರ್ಯಸಾಧ್ಯವಲ್ಲ. ಚಿಕಿತ್ಸೆಯನ್ನು ಯೋಜಿಸುವ ವೈದ್ಯಕೀಯ ತಂಡವು ನಿಖರತೆ, ಸಹಾನುಭೂತಿ, ಮತ್ತು ಕಾಳಜಿಯ ಸಂಯೋಜನೆ ಅಳವಡಿಸಿಕೊಳ್ಳಬೇಕು.
ರೇಡಿಯೇಶನ್ ಆಂಕೊಲಾಜಿಸ್ಟ್‌ನ ಪಾತ್ರ
ರೇಡಿಯೇಶನ್ ಚಿಕಿತ್ಸೆಯಲ್ಲಿ ಕ್ಯಾನ್ಸರ್ ಕೋಶಗಳನ್ನು ನಾಶಪಡಿಸಲು ಉನ್ನತ-ಶಕ್ತಿಯ ಕಿರಣಗಳನ್ನು ಬಳಸಲಾಗುತ್ತದೆ. ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್‌ನ ಸಂದರ್ಭದಲ್ಲಿ, ರೇಡಿಯೇಶನ್ ಚಿಕಿತ್ಸೆಯನ್ನು ಈ ಕೆಳಗಿನ ರೀತಿಯಲ್ಲಿ ಬಳಸಲಾಗುತ್ತದೆ:
ಪ್ರಾಥಮಿಕ ಚಿಕಿತ್ಸೆಯಾಗಿ: ವಿಶೇಷವಾಗಿ ಗಂಟಲು ಅಥವಾ ಧ್ವನಿಪೆಟ್ಟಿಗೆಯ ಕ್ಯಾನ್ಸರ್‌ಗಳಿಗೆ.
ಶಸ್ತ್ರಚಿಕಿತ್ಸೆಯ ನಂತರ: ಉಳಿದಿರುವ ಕ್ಯಾನ್ಸರ್ ಕೋಶಗಳನ್ನು ನಾಶಪಡಿಸಲು.
ಶಸ್ತ್ರಚಿಕಿತ್ಸೆಗೆ ಮೊದಲು: ಕೆಲವು ಸಂದರ್ಭಗಳಲ್ಲಿ ಗೆಡ್ಡೆಯ ಗಾತ್ರವನ್ನು ಕಡಿಮೆ ಮಾಡಲು.
ಕೀಮೋಥೆರಪಿಯೊಂದಿಗೆ: ಪರಿಣಾಮಕಾರಿತ್ವವನ್ನು ಹೆಚ್ಚಿಸಲು (ಇದನ್ನು ಕೆಮೊರೇಡಿಯೇಶನ್ ಎಂದು ಕರೆಯಲಾಗುತ್ತದೆ).
ನಿಖರ ಚಿಕಿತ್ಸೆಗಾಗಿ ಆಧುನಿಕ ತಂತ್ರಜ್ಞಾನ
ರೇಡಿಯೇಶನ್ ಆಂಕೊಲಾಜಿಯು ಕಳೆದ ಕೆಲವು ವರ್ಷಗಳಲ್ಲಿ ಗಣನೀಯವಾಗಿ ಬೆಳವಣಿಗೆ ಕಂಡಿದೆ. ಇಂಟೆನ್ಸಿಟಿ-ಮಾಡ್ಯುಲೇಟೆಡ್ ರೇಡಿಯೇಶನ್ ಥೆರಪಿ (IMRT) ಮತ್ತು ಇಮೇಜ್-ಗೈಡೆಡ್ ರೇಡಿಯೇಶನ್ ಥೆರಪಿ (IGRT) ರೀತಿಯ ತಂತ್ರಜ್ಞಾನಗಳು ಗೆಡ್ಡೆಯ ನಿಖರ ಆಕಾರ ಮತ್ತು ಆಳಕ್ಕೆ ರೇಡಿಯೇಶನ್ ಕಿರಣಗಳನ್ನು ಗುರಿಯಾಗಿಸುವ ಸಾಮರ್ಥ್ಯವನ್ನು ಕೊಡುತ್ತದೆ. ಇದರಿಂದ ಕಣ್ಣುಗಳು, ಮೆದುಳು, ಅಥವಾ ಲಾಲಾರಸ ಗ್ರಂಥಿಗಳಂತಹ ಸುತ್ತಮುತ್ತಲಿನ ಅಂಗಾಂಶಗಳಿಗೆ ಹಾನಿಯಾಗದಂತೆ ರಕ್ಷಿಸಲಾಗುತ್ತದೆ.
ಹಿಂದಿನ ದಿನಗಳಲ್ಲಿ, ಚಿಕಿತ್ಸೆಯ ನಂತರ ರೋಗಿಗಳು ಮಾತನಾಡುವ ಅಥವಾ ಆರಾಮವಾಗಿ ಆಹಾರ ಸೇವಿಸುವ ಸಾಮರ್ಥ್ಯವನ್ನು ಕಳೆದುಕೊಳ್ಳುತ್ತಿದ್ದರು. ಆದರೆ, ಇಂದಿನ ಆಧುನಿಕ ತಂತ್ರಜ್ಞಾನಗಳಿಂದಾಗಿ, ಅನೇಕ ರೋಗಿಗಳು ತಮ್ಮ ಈ ಕಾರ್ಯಗಳನ್ನು ಮತ್ತು ಆತ್ಮವಿಶ್ವಾಸ ಉಳಿಸಿಕೊಳ್ಳುತ್ತಿದ್ದಾರೆ.
ಬಹುವಿಧ ತಂಡದ ಸಹಕಾರ
ಪ್ರಮುಖ ಕ್ಯಾನ್ಸರ್ ಕೇಂದ್ರಗಳಲ್ಲಿ. ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್ ಪ್ರಕರಣವನ್ನು ಟ್ಯೂಮರ್ ಬೋರ್ಡ್‌ಗಳಲ್ಲಿ ಚರ್ಚಿಸಲಾಗುತ್ತದೆ. ಈ ಬೋರ್ಡ್‌ಗಳಲ್ಲಿ ಶಸ್ತ್ರಚಿಕಿತ್ಸಕರು. ವೈದ್ಯಕೀಯ ಆಂಕೊಲಾಜಿಸ್ಟ್‌ಗಳು, ರೇಡಿಯೇಶನ್ ಆಂಕೊಲಾಜಿಸ್ಟ್‌ಗಳು ಮತ್ತು ಇತರ ತಜ್ಞರು ರೋಗಿಯ ಸ್ಕ್ಯಾನ್‌ಗಳು, ಬಯಾಪ್ಸಿ ಫಲಿತಾಂಶಗಳು, ವೈದ್ಯಕೀಯ ಇತಿಹಾಸ ಮತ್ತು ಜೀವನಶೈಲಿಯನ್ನು ಪರಿಶೀಲಿಸಿ ಅತ್ಯಂತ ಪರಿಣಾಮಕಾರಿ ಮತ್ತು ಕಡಿಮೆ ಹಾನಿಕಾರಕ ಚಿಕಿತ್ಸಾ ಮಾರ್ಗವನ್ನು ಶಿಫಾರಸು ಮಾಡುತ್ತಾರೆ.
ಕೆಲವೊಮ್ಮೆ ಶಸ್ತ್ರಚಿಕಿತ್ಸೆ ಮತ್ತು ರೇಡಿಯೇಶನ್‌ನ ಸಂಯೋಜನೆಯನ್ನು ಆಯ್ಕೆ ಮಾಡಲಾಗುತ್ತದೆ ಅಥವಾ ರೇಡಿಯೇಶನ್ ಮತ್ತು ಕೀಮೋಥೆರಪಿಯ ಮೂಲಕ ಶಸ್ತ್ರಚಿಕಿತ್ಸೆಯನ್ನು ಸಂಪೂರ್ಣವಾಗಿ ತಪ್ಪಿಸಲಾಗುತ್ತದೆ. ಉದಾಹರಣೆಗೆ, ಧ್ವನಿಪೆಟ್ಟಿಗೆಯ ಸಣ್ಣ ಗೆಡ್ಡೆಯನ್ನು ಕೇವಲ ರೇಡಿಯೇಶನ್‌ನಿಂದ ಯಶಸ್ವಿಯಾಗಿ ಚಿಕಿತ್ಸೆ ಮಾಡಬಹುದು, ಇದರಿಂದ ರೋಗಿಯು ಶಸ್ತ್ರಚಿಕಿತ್ಸೆಯ ಅಪಾಯಗಳಿಂದ ಮತ್ತು ಜೀವನಶೈಲಿಯ ಬದಲಾವಣೆಗಳಿಂದ ಪಾರಾಗುತ್ತಾನೆ.
ನಿರ್ವಹಿಸಬಹುದಾದ ಅಡ್ಡ ಪರಿಣಾಮಗಳು
ಯಾವುದೇ ಕ್ಯಾನ್ಸರ್ ಚಿಕಿತ್ಸೆಯು ದುಷ್ಪರಿಣಾಮಗಳಿಂದ ಮುಕ್ತವಾಗಿರುವುದಿಲ್ಲ. ತಲೆ ಮತ್ತು ಕುತ್ತಿಗೆಗೆ ರೇಡಿಯೇಶನ್ ಚಿಕಿತ್ಸೆಯಿಂದ ಬಾಯಿಯ ಗಾಯಗಳು, ಬಾಯಿ ಒಣಗುವಿಕೆ, ಚರ್ಮದ ಕಿರಿಕಿರಿ, ಮತ್ತು ನೀರು ನುಂಗುವ ತೊಂದರೆಗಳಂತಹ ಅಡ್ಡ ಪರಿಣಾಮಗಳು ಉಂಟಾಗಬಹುದು. ಆದರೆ, ಈ ದುಷ್ಪರಿಣಾಮಗಳು ತಾತ್ಕಾಲಿಕವಾಗಿರಬಹುದು ಮತ್ತು ಮಾತು ಚಿಕಿತ್ಸಕರು. ಪೌಷ್ಟಿಕ ತಜ್ಞರು ಮತ್ತು ನೋವು ನಿರ್ವಹಣಾ ತಂಡಗಳಿಂದ ಚಿಕಿತ್ಸೆ ಪಡೆಯಬಹುದು.
ಮಾನವೀಯ ಆಯಾಮ
ಕ್ಯಾನ್ಸರ್ ಕೇವಲ ದೇಹವನ್ನು ಮಾತ್ರವಲ್ಲ, ಆತ್ಮವಿಶ್ವಾಸ, ಸಂಬಂಧಗಳು, ಮತ್ತು ದೈನಂದಿನ ಜೀವನದ ಮೇಲೆ ಪರಿಣಾಮ ಬೀರುತ್ತದೆ. ಇದು ವಿಶೇಷವಾಗಿ ಮುಖ ಮತ್ತು ಕುತ್ತಿಗೆಯ ಕ್ಯಾನ್ಸರ್‌ಗಳಿಗೆ ಅನ್ವಯ. ಈ ಸಂದರ್ಭದಲ್ಲಿ, ರೂಪವಿಕಾರಗೊಳಿಸುವ ಶಸ್ತ್ರಚಿಕಿತ್ಸೆಗಳನ್ನು ತಪ್ಪಿಸುವುದು ಅನಿವಾರ್ಯ. ಅದಕ್ಕೆ ರೇಡಿಯೇಶನ್ ಆಂಕೊಲಾಜಿಯು, ಸಮನ್ವದ ಆರೈಕೆ ತಂತ್ರದ ಭಾಗವಾಗಿದೆ.
ವಿಳಂಬ ಮಾಡಬೇಡಿ, ಆರಂಭದಲ್ಲೇ ಚರ್ಚಿಸಿ
ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್‌ಗಳು ಆರಂಭಿಕ ಹಂತದಲ್ಲಿಯೇ ಪತ್ತೆಯಾದರೆ ಮತ್ತು ತಜ್ಞರಿಂದ ಸೂಕ್ತವಾಗಿ ಚಿಕಿತ್ಸೆ ನೀಡಿದರೆ ಯಶಸ್ವಿಯಾಗಿ ಗುಣಪಡಿಸಬಹುದು. ಆದ್ದರಿಂದ, ಬಹುವಿಧ ತಜ್ಞರ ತಂಡದೊಂದಿಗೆ ಆರಂಭಿಕ ಸಮಾಲೋಚನೆಯು ಅತ್ಯಗತ್ಯ.
ನೀವು ಅಥವಾ ನಿಮ್ಮ ಪ್ರೀತಿಪಾತ್ರರು ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್ ಎದುರಿಸುತ್ತಿದ್ದರೆ, ರೇಡಿಯೇಶನ್ ಚಿಕಿತ್ಸೆ ಸೇರಿದಂತೆ ಎಲ್ಲಾ ಆಯ್ಕೆಗಳನ್ನು ಪರಿಶೀಲಿಸಿ. ಇಂದು ತೆಗೆದುಕೊಳ್ಳುವ ವಾಸ್ತವದ ನಿರ್ಣಯವು ನಿಮ್ಮ ಧ್ವನಿಯನ್ನು, ನಿಮ್ಮ ನಗುವನ್ನು ಮತ್ತು ನಿಮ್ಮ ಜೀವನದ ಗುಣಮಟ್ಟವನ್ನು ಹೆಚ್ಚಿಸಬಹುದು.
