ಧೋನಿ ನೀಡಿದ ಆ ಒಂದು ಸಲಹೆ ಅಕ್ಷರ್ ಪಟೇಲ್ ಬದುಕು ಬದಲಿಸಿತು! ವೃತ್ತಿಜೀವನದ ಕಠಿಣ ದಿನಗಳನ್ನು ಸ್ಮರಿಸಿದ ಸ್ಪಿನ್ ಆಲ್-ರೌಂಡರ್

ಇನವದೆಹಲಿ: ನ್ಯೂಜಿಲೆಂಡ್ ವಿರುದ್ಧದ ಐದು ಪಂದ್ಯಗಳ ಟಿ20 ಸರಣಿಯಲ್ಲಿ ಕಣಕ್ಕಿಳಿಯಲು ಸಜ್ಜಾಗುತ್ತಿರುವ ಭಾರತದ ಸ್ಪಿನ್ ಆಲ್-ರೌಂಡರ್ ಅಕ್ಷರ್ ಪಟೇಲ್, ತಮ್ಮ ಯಶಸ್ಸಿನ ಹಿಂದೆ ಇರುವ ‘ಮಾಹಿ’ ಮಂತ್ರವನ್ನು ಸ್ಮರಿಸಿಕೊಂಡಿದ್ದಾರೆ. 2026ರ ಟಿ20 ವಿಶ್ವಕಪ್ ಸಿದ್ಧತೆಗಳ ನಡುವೆ ಮಾಧ್ಯಮವೊಂದರ ಜೊತೆ ಮಾತನಾಡಿದ ಅವರು, 2021ರ ಸಮಯದಲ್ಲಿ ತಮ್ಮ ಅಂತರರಾಷ್ಟ್ರೀಯ ಕ್ರಿಕೆಟ್ ಬದುಕು ಅನಿಶ್ಚಿತತೆಯಲ್ಲಿದ್ದಾಗ ಎಂ.ಎಸ್. ಧೋನಿ ನೀಡಿದ ಮಾರ್ಗದರ್ಶನ ತಮ್ಮ ಪಾಲಿಗೆ ಸಂಜೀವಿನಿಯಾಯಿತು ಎಂದು ಹೇಳಿದ್ದಾರೆ. ದಕ್ಷಿಣ ಆಫ್ರಿಕಾ ಪ್ರವಾಸದಲ್ಲಿ ಮಿಂಚಿದ್ದ ಅಕ್ಷರ್, ಈಗ ಕಿವೀಸ್ ಪಡೆಗೆ ಸವಾಲಾಗಲು ಸಜ್ಜಾಗಿದ್ದಾರೆ.

ಕಮ್‌ಬ್ಯಾಕ್ ಮತ್ತು ಆತ್ಮವಿಶ್ವಾಸದ ಕೊರತೆ

ಅಕ್ಷರ್ ಪಟೇಲ್ ಅವರ ಕ್ರಿಕೆಟ್ ಪಯಣ ಸುಲಭದ್ದಾಗಿರಲಿಲ್ಲ. 2015ರಲ್ಲಿ ಪದಾರ್ಪಣೆ ಮಾಡಿದರೂ ತಂಡದಲ್ಲಿ ಖಾಯಂ ಸ್ಥಾನ ಪಡೆಯಲು ಅವರು ಹೆಣಗಾಡಿದ್ದರು. 2018ರಲ್ಲಿ ತಂಡದಿಂದ ಹೊರಬಿದ್ದ ನಂತರ ತಮ್ಮ ಬ್ಯಾಟಿಂಗ್ ಮೇಲೆ ಅಪಾರ ಶ್ರಮ ಹಾಕಿದ ಅಕ್ಷರ್, 2021ರಲ್ಲಿ ಟಿ20 ತಂಡಕ್ಕೆ ಮರಳಿದ್ದರು. ಆದರೆ, ಪುನರಾಗಮನದ ನಂತರವೂ ನಿರೀಕ್ಷಿತ ಪ್ರದರ್ಶನ ನೀಡಲು ಸಾಧ್ಯವಾಗದಿದ್ದಾಗ ಅವರಲ್ಲಿ ತಮ್ಮ ಸಾಮರ್ಥ್ಯದ ಬಗ್ಗೆಯೇ ಅನುಮಾನ ಮೂಡತೊಡಗಿತ್ತು. ಅಂತಹ ಸಮಯದಲ್ಲಿ 2021ರ ಟಿ20 ವಿಶ್ವಕಪ್‌ಗೆ ಮೆಂಟರ್ ಆಗಿ ಬಂದ ಎಂ.ಎಸ್. ಧೋನಿ, ಅಕ್ಷರ್ ಅವರ ಆಟದ ವೈಖರಿಗಿಂತ ಹೆಚ್ಚಾಗಿ ಅವರ ಮಾನಸಿಕ ಒತ್ತಡವನ್ನು ಗಮನಿಸಿದರು.

ಧೋನಿ ನೀಡಿದ ಆ ‘ಮ್ಯಾಜಿಕ್’ ಸಲಹೆ

ತಮ್ಮ ಮತ್ತು ಧೋನಿ ನಡುವಿನ ಸಂಭಾಷಣೆಯನ್ನು ನೆನೆದ ಅಕ್ಷರ್, ತಾನು ಪ್ರತಿ ಪಂದ್ಯದಲ್ಲೂ ಅತ್ಯುತ್ತಮ ಪ್ರದರ್ಶನ ನೀಡಲೇಬೇಕೆಂದು ತನ್ನ ಮೇಲೆ ತಾನೇ ಅನಗತ್ಯ ಒತ್ತಡ ಹೇರಿಕೊಳ್ಳುತ್ತಿದ್ದ ಅಂಶವನ್ನು ಧೋನಿ ಗುರುತಿಸಿದ್ದರು ಎಂದು ತಿಳಿಸಿದ್ದಾರೆ. “ನೀನು ನಿನ್ನ ಮೇಲೆ ನಂಬಿಕೆ ಇಡಬೇಕು, ಹೆಚ್ಚು ಯೋಚನೆ ಮಾಡುವುದನ್ನು ಬಿಟ್ಟು ಸಹಜವಾಗಿ ಆಟದ ಮೇಲೆ ಗಮನ ಹರಿಸು” ಎಂದು ಧೋನಿ ಹೇಳಿದ್ದರು. ಮಾಹಿ ಭಾಯ್ ಹೇಳಿದ ಈ ಮಾತು ಅಕ್ಷರ್ ಅವರ ಮನಸ್ಥಿತಿಯನ್ನೇ ಬದಲಿಸಿತು. ಅತಿಯಾದ ಆಲೋಚನೆಯಿಂದ ಹೊರಬಂದ ನಂತರವೇ ಅವರ ಪ್ರದರ್ಶನದಲ್ಲಿ ನೈಜ ಸುಧಾರಣೆ ಕಂಡಿತು ಮತ್ತು ಅವರು ತಂಡದ ನಂಬಿಕಸ್ತ ಆಲ್-ರೌಂಡರ್ ಆಗಿ ಬೆಳೆಯಲು ಸಾಧ್ಯವಾಯಿತು.

ಬೌಲರ್‌ನಿಂದ ಪರಿಪೂರ್ಣ ಬ್ಯಾಟರ್ ಆಗಿ ಪರಿವರ್ತನೆ

ಧೋನಿಯ ಮಾರ್ಗದರ್ಶನದ ನಂತರ ಅಕ್ಷರ್ ಕೇವಲ ಒಬ್ಬ ಬೌಲರ್ ಆಗಿ ಉಳಿಯಲಿಲ್ಲ. ಭಾರತ ತಂಡದ ಮಧ್ಯಮ ಕ್ರಮಾಂಕದಲ್ಲಿ ಯಾವುದೇ ಕ್ರಮಾಂಕದಲ್ಲೂ ಆಡಬಲ್ಲ ಸಮರ್ಥ ಬ್ಯಾಟರ್ ಆಗಿ ಅವರು ಗುರುತಿಸಿಕೊಂಡಿದ್ದಾರೆ. ಐಪಿಎಲ್‌ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ನಾಯಕತ್ವ ವಹಿಸಿಕೊಂಡಿರುವುದು ಅವರ ನಾಯಕತ್ವದ ಗುಣಕ್ಕೆ ಸಾಕ್ಷಿಯಾಗಿದೆ. ತಾವು ಈಗ ಕೇವಲ ರನ್ ವೇಗ ಹೆಚ್ಚಿಸಲು ಕಳುಹಿಸುವ ‘ಫ್ಲೋಟರ್’ ಆಗಿ ಉಳಿದಿಲ್ಲ, ಬದಲಿಗೆ ತಂಡದ ಇತರ ಅಗ್ರ ಕ್ರಮಾಂಕದ ಬ್ಯಾಟರ್‌ಗಳಂತೆ ತಮಗೂ ಪೂರ್ಣ ಜವಾಬ್ದಾರಿ ನೀಡಲಾಗಿದೆ ಎಂದು ಅಕ್ಷರ್ ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ. ಈ ಹೊಸ ಆತ್ಮವಿಶ್ವಾಸದೊಂದಿಗೆ ಅವರು ನ್ಯೂಜಿಲೆಂಡ್ ವಿರುದ್ಧದ ಹೋರಾಟಕ್ಕೆ ಸಜ್ಜಾಗಿದ್ದಾರೆ.

ಇದನ್ನೂ ಓದಿ: ಅಂಡರ್‌-19 ವಿಶ್ವಕಪ್‌ಗೂ ಮುನ್ನ ಸೂರ್ಯವಂಶಿ ಸುನಾಮಿ | 50 ಎಸೆತಗಳಲ್ಲಿ 96 ರನ್‌ ಚಚ್ಚಿದ 14ರ ಹರೆಯದ ವಿಸ್ಮಯ ಬಾಲಕ!