ಚಂಡೀಗಢ : ಮದ್ಯಪ್ರಿಯರೇ ಗಮನಿಸಿ, ಇನ್ನು ಮುಂದೆ ನೀವು ಮದ್ಯದಂಗಡಿ ಮುಂದೆ ಮದ್ಯಕ್ಕಾಗಿ ಸರತಿ ಸಾಲಲ್ಲಿ ನಿಲ್ಲಬೇಕಿಲ್ಲ, ಪೆಟ್ರೋಲ್ ಬಂಕ್, ಮಾಲ್ಗಳಲ್ಲೂ ಮದ್ಯ ಖರೀದಿಸಬಹುದು. ಆದರೆ, ಈ ಸೌಲಭ್ಯ ದೇಶವ್ಯಾಪಿ ಅಲ್ಲ, ಬರೀ ಚಂಡೀಗಢಕ್ಕೆ ಮಾತ್ರ ಸೀಮಿತ. ಹೌದು, ಚಂಡೀಗಢ ಆಡಳಿತವು 2026-27ನೇ ಸಾಲಿನ ನೂತನ ಅಬಕಾರಿ ನೀತಿಗೆ ಅನುಮೋದನೆ ನೀಡಿದ್ದು, ಮದ್ಯ ಮಾರಾಟ ಮತ್ತು ನಿಯಂತ್ರಣ ವ್ಯವಸ್ಥೆಯಲ್ಲಿ ಮಹತ್ತರ ಬದಲಾವಣೆಗಳನ್ನು ತಂದಿದೆ.
ಆದಾಯ ಹೆಚ್ಚಳ, ಗ್ರಾಹಕರಿಗೆ ಅನುಕೂಲ ಕಲ್ಪಿಸುವ ಉದ್ದೇಶದಿಂದ ಸಾಂಪ್ರದಾಯಿಕ ಮದ್ಯದಂಗಡಿಗಳ ಜೊತೆಗೆ ಪೆಟ್ರೋಲ್ ಬಂಕ್, ಶಾಪಿಂಗ್ ಮಾಲ್ ಹಾಗೂ ಸ್ಥಳೀಯ ಮಾರುಕಟ್ಟೆಗಳಲ್ಲೂ ಮದ್ಯ ಮಾರಾಟಕ್ಕೆ ಅವಕಾಶ ಕಲ್ಪಿಸಲಾಗಿದೆ. ಹೊಸ ನೀತಿಯ ಪ್ರಕಾರ, ಸೂಕ್ತ ಪರವಾನಗಿ ಪಡೆದು ದೊಡ್ಡ ಡಿಪಾರ್ಟ್ಮೆಂಟಲ್ ಸ್ಟೋರ್ಗಳಲ್ಲಿಯೂ ವಿದೇಶಿ ಮದ್ಯ, ವೈನ್ ಮತ್ತು ಬಿಯರ್ ಮಾರಾಟ ಮಾಡಬಹುದಾಗಿದೆ. ಸಂಘಟಿತ ಚಿಲ್ಲರೆ ಮಾರಾಟಕ್ಕಾಗಿ ‘ಎಲ್-10ಬಿ’ (L-10B) ಪರವಾನಗಿಯನ್ನು ಮರುಪರಿಚಯಿಸಲಾಗಿದೆ.
ಅಲ್ಲದೆ, ಬಾರ್ಗಳು ತಮಗೆ ಹತ್ತಿರವಿರುವ ಚಿಲ್ಲರೆ ಮದ್ಯದಂಗಡಿಗಳಿಂದಲೇ ಮದ್ಯವನ್ನು ಖರೀದಿಸಬೇಕಿದೆ. ಈ ಮಹತ್ವದ ನಿರ್ಧಾರದಿಂದಾಗಿ ಮದ್ಯದ ಲಭ್ಯತೆ ಮತ್ತಷ್ಟು ಸುಲಭವಾಗುವುದರ ಜೊತೆಗೆ, ಮದ್ಯ ಮಾರಾಟವು ಹೆಚ್ಚು ಸಂಘಟಿತ ಚಿಲ್ಲರೆ ವಲಯಗಳಿಗೆ ವಿಸ್ತರಣೆಯಾಗಲಿದೆ.
ಡಿಜಿಟಲ್ ಪಾವತಿ, ಆಲ್ಕೋಮೀಟರ್ ಕಡ್ಡಾಯ
ವ್ಯವಹಾರದಲ್ಲಿ ಪಾರದರ್ಶಕತೆ ತರಲು ಹಾಗೂ ಸುಗಮ ವಹಿವಾಟಿಗೆ ಅನುಕೂಲವಾಗುವಂತೆ ಮದ್ಯದಂಗಡಿಗಳಲ್ಲಿ ಡಿಜಿಟಲ್ ಪಾವತಿಯನ್ನು ಕಡ್ಡಾಯಗೊಳಿಸಲಾಗಿದೆ. ಗ್ರಾಹಕರು ಕಾರ್ಡ್ ಅಥವಾ ಪಿಒಎಸ್ (POS) ಯಂತ್ರಗಳ ಮೂಲಕ ಹಣ ಪಾವತಿಸಲು ಅವಕಾಶ ಕಲ್ಪಿಸುವುದು ಕಡ್ಡಾಯವಾಗಿದೆ. ಇದರ ಜೊತೆಗೆ, ಜವಾಬ್ದಾರಿಯುತ ಮದ್ಯಪಾನವನ್ನು ಪ್ರೋತ್ಸಾಹಿಸುವ ನಿಟ್ಟಿನಲ್ಲಿ ಬಾರ್, ಹೋಟೆಲ್ ಹಾಗೂ ರೆಸ್ಟೋರೆಂಟ್ಗಳಲ್ಲಿ ಗ್ರಾಹಕರು ತಮ್ಮ ಮದ್ಯದ ಅಮಲಿನ ಪ್ರಮಾಣವನ್ನು ಪರೀಕ್ಷಿಸಿಕೊಳ್ಳಲು ‘ಆಲ್ಕೋಮೀಟರ್’ (ಮದ್ಯ ಪರೀಕ್ಷಾ ಯಂತ್ರ) ಅಳವಡಿಸುವುದನ್ನು ಆಡಳಿತವು ಕಡ್ಡಾಯಗೊಳಿಸಿದೆ.
97 ಮದ್ಯದಂಗಡಿಗಳಿಗೆ ಅನುಮೋದನೆ
ಚಂಡೀಗಢ ಆಡಳಿತವು ಒಟ್ಟು 97 ಚಿಲ್ಲರೆ ಮದ್ಯದಂಗಡಿಗಳಿಗೆ ಅನುಮೋದನೆ ನೀಡಿದ್ದು, ಮೀಸಲು ಬೆಲೆಯನ್ನು 457.35 ಕೋಟಿ ರೂಪಾಯಿಗಳಿಗೆ ನಿಗದಿಪಡಿಸಿದೆ. ಬಿಡ್ ಮೌಲ್ಯದ ಭದ್ರತಾ ಠೇವಣಿಯನ್ನು ಶೇಕಡಾ 17ಕ್ಕೆ ಹೆಚ್ಚಿಸಲಾಗಿದೆ. ಕಂತುಗಳ ಮೂಲಕ ಹಣ ಪಾವತಿಸುವ ಹಳೆಯ ಪದ್ಧತಿಯನ್ನು ರದ್ದುಗೊಳಿಸಿ, ಪ್ರತಿ ತಿಂಗಳ 15ನೇ ತಾರೀಖಿನೊಳಗೆ ಪರವಾನಗಿ ಶುಲ್ಕ ಪಾವತಿಸುವ ಹೊಸ ವ್ಯವಸ್ಥೆ ಜಾರಿಗೆ ತರಲಾಗಿದೆ.
ಅಕ್ರಮಗಳನ್ನು ತಡೆಯಲು ಹೆಚ್ಚುವರಿ ಶೇಖರಣಾ ಘಟಕಗಳಲ್ಲಿ ಸಿಸಿಟಿವಿ ಕ್ಯಾಮೆರಾಗಳನ್ನು ಕಡ್ಡಾಯಗೊಳಿಸಲಾಗಿದ್ದು, ಅಧಿಕಾರಿಗಳು ನೇರ ನಿಗಾ (ಲೈವ್ ಮಾನಿಟರಿಂಗ್) ವಹಿಸಲು ಅವಕಾಶ ನೀಡಲಾಗಿದೆ. ಮದ್ಯ ಸಾಗಿಸುವ ವಾಹನಗಳಿಗೆ ಜಿಪಿಎಸ್ ಟ್ರ್ಯಾಕಿಂಗ್ ಕಡ್ಡಾಯಗೊಳಿಸಲಾಗಿದೆ ಹಾಗೂ ಅಕ್ರಮ ಮದ್ಯ ಜಾಹೀರಾತುಗಳಿಗೆ ಕಠಿಣ ದಂಡ ವಿಧಿಸುವ ನಿಯಮವನ್ನು ತರಲಾಗಿದೆ. ಬಾಟ್ಲಿಂಗ್ ಘಟಕಗಳು ಇನ್ಮುಂದೆ ವಾರದಲ್ಲಿ ಆರು ದಿನ ಕಾರ್ಯನಿರ್ವಹಿಸಲಿವೆ.
ಹೊಸ ನೀತಿಯಲ್ಲಿ ಭಾರತೀಯ ಮದ್ಯ, ಬಿಯರ್ ಮತ್ತು ವೈನ್ನ ಎಕ್ಸ್-ಡಿಸ್ಟಿಲರಿ ಬೆಲೆಯಲ್ಲಿ (EDP) ಶೇಕಡಾ 2 ರಷ್ಟು ಏರಿಕೆಗೆ ಅವಕಾಶ ನೀಡಲಾಗಿದೆ. ಆದರೆ, ಆಮದು ಮಾಡಿಕೊಂಡ ಮದ್ಯದ ಬೆಲೆಯಲ್ಲಿ ಯಾವುದೇ ಬದಲಾವಣೆ ಮಾಡಲಾಗಿಲ್ಲ. ವ್ಯಾಪಾರವನ್ನು ಸುಲಭಗೊಳಿಸುವ ಉದ್ದೇಶದಿಂದ, ಭಾರತದಲ್ಲಿ ಎಲ್ಲಿ ಬೇಕಾದರೂ ‘ಬಾಂಡೆಡ್ ವೇರ್ಹೌಸ್’ಗಳನ್ನು (ಗೋದಾಮು) ಸ್ಥಾಪಿಸಲು ಅವಕಾಶ ನೀಡಲಾಗಿದೆ ಮತ್ತು ಈ ಹಿಂದಿನ ಅನುಭವದ ಅಗತ್ಯವನ್ನು ಕೈಬಿಡಲಾಗಿದೆ. ಜೊತೆಗೆ ಆನ್ಲೈನ್ ನೋಂದಣಿ ಮತ್ತು ಮಾಸಿಕ ವರದಿ ಸಲ್ಲಿಕೆಯನ್ನು ಕಡ್ಡಾಯ ಮಾಡಲಾಗಿದೆ. ವಿವಾದಗಳನ್ನು ತಪ್ಪಿಸಲು ‘ಕುಟುಂಬ’ ಎಂಬುದರ ಸ್ಪಷ್ಟ ವ್ಯಾಖ್ಯಾನ ನೀಡಲಾಗಿದೆ. ಗೋಮಾತಾ ಸೆಸ್ (ಹಸು ಸೆಸ್) ಅನ್ನು ಈಗಿರುವ ದರದಲ್ಲೇ ಮುಂದುವರಿಸಲಾಗಿದ್ದು, ಬಿಯರ್ನ ಕನಿಷ್ಠ ಚಿಲ್ಲರೆ ಬೆಲೆಯನ್ನು ಪರಿಷ್ಕರಿಸಲಾಗಿದೆ.
ಇದನ್ನೂ ಓದಿ : ಕ್ಯಾನ್ಗಳಲ್ಲಿ ಪೆಟ್ರೋಲ್ ತುಂಬಿಸಿ ಕೊಟ್ಟರೆ ಬಂಕ್ ಮಾಲೀಕರ ವಿರುದ್ಧ ಕ್ರಮ – ಮಂಡ್ಯ ಡಿಸಿ ಎಚ್ಚರಿಕೆ!
