ಚೊಚ್ಚಲ ಪಂದ್ಯದಲ್ಲಿಯೇ 16 ವರ್ಷದ ಬೌಲರ್ ದಾಖಲೆಯ ವಿಕೆಟ್ ಗಳನ್ನು ಪಡೆದ ಸಾಧನೆ ಮಾಡಿದ್ದಾರೆ.
ಇಂಗ್ಲೆಂಡ್ ನಲ್ಲಿ ನಡೆಯುತ್ತಿರುವ ಕೌಂಟಿ ಚಾಂಪಿಯನ್ ಶಿಪ್ ನಲ್ಲಿ ಯುವ ಸ್ಪಿನ್ನರ್ ಫರ್ಹಾನ್ ಅಹ್ಮದ್ ಈ ದಾಖಲೆ ಬರೆದಿದ್ದಾರೆ. ಕೌಂಟಿ ಚಾಂಪಿಯನ್ ಶಿಪ್ ಇತಿಹಾಸದಲ್ಲೇ 5 ವಿಕೆಟ್ ಗಳ ಸಾಧನೆ ಮಾಡಿದ ಅತ್ಯಂತ ಕಿರಿಯ ಸ್ಪಿನ್ನರ್ ಎಂಬ ದಾಖಲೆ ಬರೆದಿದ್ದಾರೆ. ಈ ದಾಖಲೆ ಇಲ್ಲಿಯವರೆಗೆ ಅಫ್ಘಾನಿಸ್ತಾನದ ಹಮೀದುಲ್ಲಾ ಖಾದ್ರಿ ಹೆಸರಿನಲ್ಲಿತ್ತು. 2017 ರ ಕೌಂಟಿ ಚಾಂಪಿಯನ್ಶಿಪ್ ನಲ್ಲಿ ಡರ್ಬಿಶೈರ್ ಪರ ಕಣಕ್ಕಿಳಿದಿದ್ದ ಹಮೀದುಲ್ಲಾ ಗ್ಲಾಮೊರ್ಗಾನ್ ತಂಡದ ವಿರುದ್ಧ 5 ವಿಕೆಟ್ ಗಳಿಸಿದ್ದರು. ಆಗ ಅವರಿಗೆ 16 ವರ್ಷ ಮತ್ತು 203 ದಿನಗಳಾಗಿದ್ದವು.
ಈಗ ನಾಟಿಂಗ್ ಹ್ಯಾಮ್ ಶೈರ್ ಪರ ಕಣಕ್ಕಿಳಿದಿರುವ ಫರ್ಹಾನ್ ಅಹ್ಮದ್ ತನ್ನ ಚೊಚ್ಚಲ ಪಂದ್ಯದಲ್ಲೇ ಐದು ವಿಕೆಟ್ ಗಳಿಸಿದ್ದಾರೆ. ಸರ್ರೆ ವಿರುದ್ಧದ ಈ ಪಂದ್ಯದಲ್ಲಿ ರೋರಿ ಬರ್ನ್ಸ್ (161), ರಿಯಾನ್ ಪಟೇಲ್ (77), ವಿಲ್ ಜ್ಯಾಕ್ಸ್ (59), ಬೆನ್ ಫೋಕ್ಸ್ (0), ಸಾಯಿ ಸುದರ್ಶನ್ (105), ಟಾಮ್ ಲಾವ್ಸ್ (11) ಮತ್ತು ಕಾನರ್ ಮೆಕೆರ್ (32) ಅವರ ವಿಕೆಟ್ ಪಡೆಯುವ ಮೂಲಕ 16 ವರ್ಷದ ಯುವ ಸ್ಪಿನ್ನರ್ ಎಂಬ ದಾಖಲೆ ಬರೆದಿದ್ದಾರೆ.
50.4 ಓವರ್ಗಳನ್ನು ಎಸೆದ ಫರ್ಹಾನ್ ಅಹ್ಮದ್ 6 ಮೇಡನ್ ಓವರ್ಗಳೊಂದಿಗೆ 140 ರನ್ ನೀಡಿ 7 ವಿಕೆಟ್ ಗಳ ಗಳಿಸಿದ್ದಾರೆ. ಫರ್ಹಾನ್ ಅಹ್ಮದ್ ಇಂಗ್ಲೆಂಡ್ ತಂಡದ ಸ್ಪಿನ್ನರ್ ರೆಹಾನ್ ಅಹ್ಮದ್ ಅವರ ಕಿರಿಯ ಸಹೋದರ ಎಂಬುವುದು ವಿಶೇಷ. 2022 ರಲ್ಲಿ ಪಾಕಿಸ್ತಾನ್ ವಿರುದ್ಧದ ಟೆಸ್ಟ್ ಪಂದ್ಯದ ಮೂಲಕ ಇಂಗ್ಲೆಂಡ್ ಪರ ಪಾದಾರ್ಪಣೆ ಮಾಡಿದ್ದ 18 ವರ್ಷದ ರೆಹಾನ್, ಚೊಚ್ಚಲ ಪಂದ್ಯದಲ್ಲೇ 5 ವಿಕೆಟ್ ಕಬಳಿಸಿದ್ದರು. ಈ ಮೂಲಕ ಚೊಚ್ಚಲ ಟೆಸ್ಟ್ನಲ್ಲಿ 5 ವಿಕೆಟ್ ಪಡೆದ ಅತ್ಯಂತ ಕಿರಿಯ ಬೌಲರ್ ಎಂಬ ದಾಖಲೆ ಬರೆದಿದ್ದರು. ಈಗ ಅವರ ಸಹೋದರ ಕೌಂಟಿ ಕ್ರಿಕೆಟ್ ನಲ್ಲಿ ಈ ಸಾಧನೆ ಮಾಡಿದ್ದಾರೆ.
