ಬೆಂಗಳೂರು: ನೀವೇನಾದರೂ ಖಾಸಗಿ ಕಂಪನಿಗಳಲ್ಲಿ ಉದ್ಯೋಗ ಮಾಡುತ್ತಿದ್ದೀರಾ? ನೀವು ಪಿಎಫ್ ಸದಸ್ಯರೂ ಆಗಿದ್ದೀರಾ? ಹಾಗಾದರೆ, ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆಯು (ಇಪಿಎಫ್ಒ) ನಿಮಗೆ ಮೂರು ಗುಡ್ ನ್ಯೂಸ್ ಗಳನ್ನು ನೀಡಿದೆ. ನಿವೃತ್ತಿ ಬಳಿಕ ಸಂಬಳದ ರೀತಿ ಪಿಎಫ್ ಹಣವನ್ನು ವಿತ್ ಡ್ರಾ ಮಾಡುವುದು ಸೇರಿ ಪ್ರಮುಖ ಮೂರು ನಿಯಮಗಳನ್ನು ಬದಲಾವಣೆ ಮಾಡಿದೆ. ಅವುಗಳ ಸವಿಸ್ತಾರ ಮಾಹಿತಿ ಇಲ್ಲಿದೆ.
ಉದ್ಯೋಗದಿಂದ ನಿವೃತ್ತಿ ಹೊಂದುವ ನೌಕರರು ತಮ್ಮ ಇಡೀ ಉಳಿತಾಯದ ಹಣವನ್ನು ಒಟ್ಟಿಗೆ ಪಡೆಯುವ ಬದಲು, ತಮಗೆ ಬೇಕಾದ ರೀತಿ ಅಂದರೆ, ತಿಂಗಳಿಗೊಮ್ಮೆ ಅಥವಾ ಮೂರು ತಿಂಗಳಿಗೊಮ್ಮೆ ಕಂತುಗಳಲ್ಲಿ ಹಿಂಪಡೆಯಬಹುದು. ಇದರಿಂದ ನಿವೃತ್ತಿಯ ನಂತರವೂ ಮಾಸಿಕ ಖರ್ಚಿಗೆ ನಿಯಮಿತ ಆದಾಯ ಕೈಸೇರಲಿದೆ. ಪಿಎಫ್ ಖಾತೆಯಲ್ಲಿ ಉಳಿದ ಹಣಕ್ಕೆ ಸರ್ಕಾರದಿಂದ ಆಕರ್ಷಕ ಬಡ್ಡಿಯೂ ಮುಂದುವರಿಯಲಿದೆ.
ಸುಮಾರು 10 ವರ್ಷ ಸೇವೆ ಸಲ್ಲಿಸಿದವರು, 55 ವರ್ಷ ದಾಟಿದವರು ಹಾಗೂ ಪಿಎಫ್ ಖಾತೆಯಲ್ಲಿ 5 ಲಕ್ಷ ರೂಪಾಯಿಗಿಂತ ಹೆಚ್ಚಿನ ನಿಧಿ ಹೊಂದಿರುವವರು ಪಿಎಫ್ ಹಣವನ್ನು ಸಂಬಳದ ರೀತಿ ಹಿಂಪಡೆಯಲು ಸಾಧ್ಯವಾಗಿದೆ. ಇದರಿಂದ, ನಿವೃತ್ತಿಯ ಬಳಿಕ ಲಭಿಸುವ ದೊಡ್ಡ ಮೊತ್ತವನ್ನು ಹೇಗೆ ಹೂಡಿಕೆ ಮಾಡಬಹುದು ಎಂಬ ತಲೆನೋವಿನಿಂದ ನೌಕರರು ಪಾರಾದಂತೆ ಆಗಿದೆ.
ಪಿಎಫ್ ಖಾತೆಯಿಂದ 90% ವಿತ್ ಡ್ರಾ
ಪಿಎಫ್ ಖಾತೆಯಿಂದ ವಿತ್ ಡ್ರಾ ಮಾಡುವ ಮಿತಿಯನ್ನು ಕೂಡ ಬದಲಾಯಿಸಲಾಗಿದೆ. ಇದುವರೆಗೆ, ಪಿಎಫ್ ಖಾತೆಯಲ್ಲಿರುವ ಒಟ್ಟು ಹಣದಲ್ಲಿ ಶೇ.75ರಷ್ಟು ಮೊತ್ತವನ್ನು ಮಾತ್ರ ವಿತ್ ಡ್ರಾ ಮಾಡಬಹುದಿತ್ತು. ಆದರೆ, ಈ ಮಿತಿಯನ್ನು ಈಗ ಶೇ.90ಕ್ಕೆ ಏರಿಕೆ ಮಾಡಲಾಗಿದೆ.
ಮದುವೆ, ಶಿಕ್ಷಣ, ಅನಾರೋಗ್ಯ, ಮನೆ ನಿರ್ಮಾಣದಂತಹ ಸಂದರ್ಭದಲ್ಲಿ ಶೇ.90ರಷ್ಟು ಹಣ ವಿತ್ ಡ್ರಾ ಮಾಡಬಹುದು. ಇದಲ್ಲದೆ, ಉದ್ಯೋಗ ಕಳೆದುಕೊಂಡ ಬಳಿಕ ಇಪಿಎಫ್ಒ ಸದಸ್ಯರು 2 ತಿಂಗಳಲ್ಲೇ ಪಿಎಫ್ ಹಣ ವಿತ್ ಡ್ರಾ ಮಾಡಬಹುದು. ಇದಕ್ಕೂ ಮೊದಲು, ಕೆಲಸ ಕಳೆದುಕೊಂಡ 1 ವರ್ಷದವರೆಗೆ ವಿತ್ ಡ್ರಾ ಮಾಡಲು ಅವಕಾಶ ಇರಲಿಲ್ಲ.


















