ನವದೆಹಲಿ: ರಾಷ್ಟ್ರೀಯ ಸ್ವಚ್ಛತೆಯ ಶ್ರೇಯಾಂಕದಲ್ಲಿ ಸತತ 8 ವರ್ಷಗಳಿಂದಲೂ ಅಗ್ರಸ್ಥಾನ ಕಾಯ್ದುಕೊಂಡಿದ್ದ ಇಂದೋರ್ ನಗರದ ಸುದೀರ್ಘ ಆಳ್ವಿಕೆಗೆ ನವಿ ಮುಂಬೈ ಅಂತ್ಯ ಹಾಡಿದ್ದು, ಭಾರತದ ಅತ್ಯಂತ ಸ್ವಚ್ಛ ನಗರವಾಗಿ ಹೊರಹೊಮ್ಮಿದೆ. ಕೇಂದ್ರ ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯ ಪ್ರಕಟಿಸಿರುವ ‘ಸ್ವಚ್ಛ ಸರ್ವೇಕ್ಷಣ್ 2025-26’ ರ‍್ಯಾಂಕಿಂಗ್‌ನಲ್ಲಿ ನವಿ ಮುಂಬೈ ಮೊದಲ ಸ್ಥಾನ ಪಡೆದರೆ, ಸೂರತ್ ಮತ್ತು ವಿಜಯವಾಡ ಕ್ರಮವಾಗಿ ಎರಡು ಮತ್ತು ಮೂರನೇ ಸ್ಥಾನಗಳನ್ನು ಗಳಿಸಿವೆ.
ಇಲ್ಲಿ ನಡೆದ ಸಮಾರಂಭದಲ್ಲಿ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ವಿಜೇತ ನಗರಗಳಿಗೆ ಪ್ರಶಸ್ತಿಗಳನ್ನು ಪ್ರದಾನ ಮಾಡಿದರು. ದೇಶಾದ್ಯಂತ 4,700ಕ್ಕೂ ಹೆಚ್ಚು ನಗರ ಸ್ಥಳೀಯ ಸಂಸ್ಥೆಗಳು ಈ ಸಮೀಕ್ಷೆಯಲ್ಲಿ ಪಾಲ್ಗೊಂಡಿದ್ದವು.
ಇಂದೋರ್‌ಗೆ ‘ಮೆಂಟರ್ ಸಿಟಿ’ ಗೌರವ
ಕಳೆದ ಎಂಟು ವರ್ಷಗಳಿಂದ ಸತತವಾಗಿ ದೇಶದ ಅತ್ಯಂತ ಸ್ವಚ್ಛ ನಗರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದ್ದ ಇಂದೋರ್ ಅನ್ನು ಈ ಬಾರಿ ವಿಶೇಷ ವಿಭಾಗದಲ್ಲಿ ಪರಿಗಣಿಸಲಾಗಿತ್ತು. ಹೊಸದಾಗಿ ಪರಿಚಯಿಸಲಾದ ‘ಸ್ವಚ್ಛ ಶಹರ್ ಜೋಡಿ’ ಉಪಕ್ರಮದಡಿ, ಇಂದೋರ್ ತನ್ನ ಪಾಲುದಾರ ಪಟ್ಟಣ ದೇಪಾಲ್‌ಪುರದೊಂದಿಗೆ ‘ಮೆಂಟರ್ ಸಿಟಿ’ (ಮಾರ್ಗದರ್ಶಕ ನಗರ) ವಿಭಾಗದಲ್ಲಿ ಎರಡನೇ ಸ್ಥಾನವನ್ನು ಪಡೆದುಕೊಂಡಿದೆ. ಈ ವಿಭಾಗದಲ್ಲಿ ಅಹಮದಾಬಾದ್ ತನ್ನ ಪಾಲುದಾರ ಪಟ್ಟಣ ಸಾನಂದ್‌ನೊಂದಿಗೆ ಅಗ್ರಸ್ಥಾನ ಪಡೆದರೆ, ತಿರುಪತಿ ತನ್ನ ಪಾಲುದಾರ ಪಟ್ಟಣ ಕುಪ್ಪಂನೊಂದಿಗೆ ಮೂರನೇ ಸ್ಥಾನವನ್ನು ಗಳಿಸಿದೆ.
ಜನಸಂಖ್ಯೆ ಮತ್ತು ಪ್ರಾದೇಶಿಕ ವಿಭಾಗದ ವಿಜೇತರು
10 ಲಕ್ಷಕ್ಕಿಂತ ಹೆಚ್ಚಿನ ಜನಸಂಖ್ಯೆ ಹೊಂದಿರುವ ನಗರಗಳ ವಿಭಾಗದಲ್ಲಿ ಗ್ರೇಟರ್ ವಿಶಾಖಪಟ್ಟಣ ಅಗ್ರಸ್ಥಾನ ಪಡೆದರೆ, 3 ರಿಂದ 10 ಲಕ್ಷ ಜನಸಂಖ್ಯೆಯ ನಗರಗಳಲ್ಲಿ ಉಜ್ಜಯಿನಿ ಮೊದಲ ಸ್ಥಾನದಲ್ಲಿದೆ. 50 ಸಾವಿರದಿಂದ 3 ಲಕ್ಷ ಜನಸಂಖ್ಯೆ ವಿಭಾಗದಲ್ಲಿ ಮಧ್ಯಪ್ರದೇಶದ ದೇವಾಸ್ ಮೊದಲ ಹಾಗೂ ಸಾಗರ್ ಮೂರನೇ ಸ್ಥಾನ ಪಡೆದಿದ್ದು, ನವದೆಹಲಿ ಮುನ್ಸಿಪಲ್ ಕೌನ್ಸಿಲ್ (NDMC) ಎರಡನೇ ಸ್ಥಾನ ಗಳಿಸಿದೆ. 20 ರಿಂದ 50 ಸಾವಿರ ಜನಸಂಖ್ಯೆ ವಿಭಾಗದಲ್ಲಿ ಮಹಾರಾಷ್ಟ್ರದ ವೀಟಾ ಪ್ರಥಮ, ಒಡಿಶಾದ ಅಸ್ಕಾ ದ್ವಿತೀಯ ಹಾಗೂ ಗೋವಾದ ಪಣಜಿ ತೃತೀಯ ಸ್ಥಾನಕ್ಕೆ ಪಾತ್ರವಾಗಿವೆ.
ಇನ್ನು ವಿಶೇಷ ವಿಭಾಗಗಳಲ್ಲಿ, ಮಧ್ಯಪ್ರದೇಶದ ರೇವಾ ಅತ್ಯಂತ ಸ್ವಚ್ಛ ನದಿತೀರದ ಪಟ್ಟಣವಾಗಿ ಹೊರಹೊಮ್ಮಿದ್ದು, ಬಿಲಾಸ್‌ಪುರ ಮತ್ತು ವಾರಾಣಸಿ ನಂತರದ ಸ್ಥಾನಗಳಲ್ಲಿವೆ. ಸ್ವಚ್ಛ ಕರಾವಳಿ ಪಟ್ಟಣ ವಿಭಾಗದಲ್ಲಿ ಒಡಿಶಾದ ಪುರಿ ಮೊದಲ ಸ್ಥಾನ ಪಡೆದರೆ, ಕೇರಳದ ಆಲಪ್ಪುಳ ಮತ್ತು ಮಹಾರಾಷ್ಟ್ರದ ರತ್ನಗಿರಿ ಕ್ರಮವಾಗಿ ಎರಡು ಹಾಗೂ ಮೂರನೇ ಸ್ಥಾನ ಪಡೆದಿವೆ. ಹಿಮಾಲಯನ್ ನಗರಗಳ ವಿಭಾಗದಲ್ಲಿ ರುದ್ರಾಪುರ ಅಗ್ರಸ್ಥಾನದಲ್ಲಿದ್ದು, ಜಮ್ಮು ಎರಡನೇ ಮತ್ತು ಶೋಪಿಯಾನ್ ಮೂರನೇ ಸ್ಥಾನ ಗಳಿಸಿವೆ.
ಮಾರ್ಗದರ್ಶನದಿಂದ ಸ್ವಚ್ಛತೆಯಲ್ಲಿ ಭಾರಿ ಸುಧಾರಣೆ
ಸ್ವಚ್ಛತಾ ಕಿ ನಯೀ ಪಹಲ್ – ಬಢಾಯೇಂ ಹಾಥ್, ಕರೇಂ ಸಫಾಯಿ ಸಾಥ್’ ಎಂಬ ಧ್ಯೇಯವಾಕ್ಯದಡಿ ನಡೆದ ಈ ಬಾರಿಯ ಸಮೀಕ್ಷೆಯಲ್ಲಿ 3,000ಕ್ಕೂ ಹೆಚ್ಚು ತರಬೇತಿ ಪಡೆದ ಮೌಲ್ಯಮಾಪಕರು ರಿಯಲ್-ಟೈಮ್ ಜಿಪಿಎಸ್ (GPS) ಮೇಲ್ವಿಚಾರಣೆಯೊಂದಿಗೆ ಸಂಪೂರ್ಣ ಡಿಜಿಟಲ್ ಮತ್ತು ಪಾರದರ್ಶಕವಾಗಿ ಮೌಲ್ಯಮಾಪನ ನಡೆಸಿದ್ದಾರೆ ಎಂದು ಸಚಿವಾಲಯ ತಿಳಿಸಿದೆ.
ಅತ್ಯುತ್ತಮ ಸಾಧನೆ ಮಾಡಿದ ನಗರಗಳ ಮಾರ್ಗದರ್ಶನದಿಂದಾಗಿ ‘ಮೆಂಟಿ’ (ಮಾರ್ಗದರ್ಶನ ಪಡೆದ) ನಗರಗಳ ಸ್ವಚ್ಛತಾ ಸೂಚ್ಯಂಕಗಳಲ್ಲಿ ಗಮನಾರ್ಹ ಪ್ರಗತಿ ಕಂಡುಬಂದಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ‘ಗೋಚರ ಸ್ವಚ್ಛತೆ’ ಪ್ರಮಾಣ ಶೇ. 48ರಿಂದ ಶೇ. 70ಕ್ಕೆ ಏರಿಕೆಯಾಗಿದೆ. ಮನೆ-ಮನೆಗೆ ಕಸ ಸಂಗ್ರಹಣೆ ಶೇ. 52ರಿಂದ ಶೇ. 74ಕ್ಕೆ, ಮೂಲದಲ್ಲೇ ಕಸ ವಿಂಗಡಣೆ ಶೇ. 16ರಿಂದ ಶೇ. 30ಕ್ಕೆ, ನೈರ್ಮಲ್ಯ ಸೌಲಭ್ಯ ಶೇ. 11ರಿಂದ ಶೇ. 38ಕ್ಕೆ, ಬಳಸಿದ ನೀರಿನ ನಿರ್ವಹಣೆ ಶೇ. 32ರಿಂದ ಶೇ. 53ಕ್ಕೆ ಹಾಗೂ ಸ್ವಚ್ಛತಾ ಜಾಗೃತಿ ಅಭಿಯಾನ ಶೇ. 48ರಿಂದ ಶೇ. 66ಕ್ಕೆ ಏರಿಕೆಯಾಗುವ ಮೂಲಕ ದೇಶದ ನಗರ ನೈರ್ಮಲ್ಯ ವ್ಯವಸ್ಥೆ ಮತ್ತಷ್ಟು ಬಲಗೊಂಡಿದೆ ಎಂದು ಸಚಿವಾಲಯ ಮಾಹಿತಿ ನೀಡಿದೆ.
