ಬೆಂಗಳೂರಿನಲ್ಲಿ ರಸ್ತೆ ಗುಂಡಿಗಳ ಕಾಟ ಮುಂದುವರೆದಿದ್ದು, ಗುಂಡಿ ಮುಚ್ಚದ ಪಾಲಿಕೆ ಅಧಿಕಾರಿಗಳಿಗೆ ಖಾಕಿ ಪಡೆ ಕೆಲಸದ ಮೂಲಕವೇ ಛೀಮಾರಿ ಹಾಕಿದೆ. ವಾರ್ಡ್ ಒನ್ ಅಭಿಯಾನ ನಡೆಸಿದರೂ ನಗರದ ರಸ್ತೆ ಗುಂಡಿಗಳಿಂದ ಸಾರ್ವಜನಿಕರಿಗೆ ಮುಕ್ತಿ ಸಿಕ್ಕಿಲ್ಲ. ಹಲವು ಬಾರಿ ಗಮನಕ್ಕೆ ತಂದರೂ ಜಿಬಿಎ ಅಧಿಕಾರಿಗಳು ಗುಂಡಿ ಮುಚ್ಚದ ಹಿನ್ನೆಲೆಯಲ್ಲಿ, ಇದೀಗ ನಗರ ಸಂಚಾರಿ ಪೊಲೀಸರೇ ಖುದ್ದು ರಸ್ತೆಗಿಳಿದು ಗುಂಡಿ ಮುಚ್ಚಿದ್ದಾರೆ.
ಜಿಬಿಎ ಪಶ್ಚಿಮ ನಗರ ಪಾಲಿಕೆ ವ್ಯಾಪ್ತಿಗೆ ಸೇರುವ ಜ್ಞಾನಭಾರತಿ ಮೆಟ್ರೋ ನಿಲ್ದಾಣದ ಬಳಿ ಜ್ಞಾನಭಾರತಿ ಸಂಚಾರಿ ಪೊಲೀಸರು ಖುದ್ದಾಗಿ ಸಿಮೆಂಟ್ ಹಾಕಿ ರಸ್ತೆ ಗುಂಡಿಗಳನ್ನು ಮುಚ್ಚಿ ಸಾರ್ವಜನಿಕರ ಸಂಚಾರಕ್ಕೆ ಅನುಕೂಲ ಮಾಡಿಕೊಟ್ಟಿದ್ದಾರೆ.
