ಸಿಜೆಪಿಯನ್ನು ಮೂಲೆಗುಂಪು ಮಾಡಲು ಬಿಜೆಪಿ ಪ್ರತಿತಂತ್ರ!

ವಿದೇಶಿ ಹಣದ ಆರೋಪದಿಂದ ದೇಶವ್ಯಾಪಿ ಅಭಿಯಾನದವರೆಗೆ ಹಲವು ಪ್ಲ್ಯಾನ್ ರೆಡಿ

ರಾಷ್ಟ್ರ ರಾಜಧಾನಿ ನವದೆಹಲಿಯ ಬೀದಿಗಳಲ್ಲಿ ಆರಂಭವಾದ ಪ್ರತಿಭಟನೆ ಈಗ ಕೇಂದ್ರ ಸರ್ಕಾರ ಮತ್ತು ಪ್ರತಿಪಕ್ಷಗಳ ನಡುವಿನ ರಾಜಕೀಯ ಸಂಘರ್ಷದ ಹೊಸ ಅಧ್ಯಾಯವಾಗಿ ರೂಪುಗೊಳ್ಳುತ್ತಿದೆ. ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ವಿರುದ್ಧದ ಆಕ್ರೋಶ, ಅವರ ಏಕಪಕ್ಷೀಯ ನಿರ್ಧಾರ, ಮತದಾರರ ಪಟ್ಟಿಯ ವಿಶೇಷ ಪರಿಷ್ಕರಣೆ ಕುರಿತ ವಿವಾದ, ಯುವಜನರ ಪಾಲ್ಗೊಳ್ಳುವಿಕೆ- ಇವೆಲ್ಲದರ ನಡುವೆ ಬಿಜೆಪಿ ತನ್ನ ಪ್ರತಿರೋಧ ತಂತ್ರವನ್ನು ತೀವ್ರಗೊಳಿಸಿದೆ. ಪ್ರತಿಭಟನಾಕಾರರ ಆರೋಪಗಳಿಗೆ ಉತ್ತರ ನೀಡುವುದಷ್ಟೇ ಅಲ್ಲ, ಅವರ ಹೋರಾಟದ ಉದ್ದೇಶವನ್ನೇ ಪ್ರಶ್ನಿಸುವ ಮೂಲಕ ಸಾರ್ವಜನಿಕ ಚರ್ಚೆಯ ದಿಕ್ಕನ್ನು ಬದಲಿಸಲು ಬಿಜೆಪಿ ಮುಂದಾಗಿದೆ.

ಪ್ರತಿಭಟನೆಯ ವಿರುದ್ಧ ಮೂರು ಹಂತದ ತಂತ್ರ!

ಮೊದಲ ಹಂತ — ರಾಜಕೀಯವಾಗಿ ಎದುರಿಸುವುದು. ಬಿಜೆಪಿ ಮತ್ತು ಕೇಂದ್ರ ಸರ್ಕಾರ ಪ್ರತಿಭಟನೆಗಳನ್ನು ಎದುರಿಸಲು ಹಲವು ಆಯಾಮಗಳ ತಂತ್ರಗಳನ್ನು ರೂಪಿಸಿವೆ. ಚುನಾವಣಾ ಆಯೋಗದ ವಿವಾದಕ್ಕೆ ಸಂಬಂಧಿಸಿದ ಅಂಕಿಅಂಶಗಳು, ಮತದಾರರ ಪಟ್ಟಿಯ ಬದಲಾವಣೆಗಳು ಹಾಗೂ ಆಯುಕ್ತರ ನಡುವಿನ ಭಿನ್ನಾಭಿಪ್ರಾಯಗಳ ಕುರಿತು ವಿವರಗಳನ್ನು ಒಳಗೊಂಡ ಮಾಹಿತಿ ಪತ್ರ ಸಿದ್ಧಪಡಿಸುವ ಪ್ರಯತ್ನ ನಡೆದಿದೆ. ಕಾಂಗ್ರೆಸ್, ರಾಹುಲ್ ಗಾಂಧಿ ಮತ್ತು ಆಮ್ ಆದ್ಮಿ ಪಕ್ಷವನ್ನು ಗುರಿಯಾಗಿಸಿಕೊಂಡು ಪ್ರತಿಪಕ್ಷಗಳ ಆರೋಪಗಳಿಗೆ ರಾಜಕೀಯವಾಗಿ ಉತ್ತರಿಸುವ ನಿಲುವನ್ನೂ ಬಿಜೆಪಿ ತಳೆದಿದೆ. ಜೊತೆಗೆ ಕಾಕ್ರೋಚ್ ಜನತಾ ಪಾರ್ಟಿಯಂತಹ ಸಂಘಟನೆಗಳನ್ನೂ ಆರಂಭದಲ್ಲೇ ಚಿವುಟಿ ಹಾಕಲು ತಂತ್ರ ಹೆಣೆದಿದೆ.

ಎರಡನೇ ಹಂತ — ಪ್ರತಿಭಟನೆಯ ಉದ್ದೇಶದ ಬಗ್ಗೆ ಪ್ರಶ್ನೆ. ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ನಿತಿನ್ ನವೀನ್ ಮತ್ತು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಸೇರಿದಂತೆ ಹಿರಿಯ ನಾಯಕರು ಪ್ರತಿಭಟನೆಗಳ ಬಗ್ಗೆ ಸಾರ್ವಜನಿಕವಾಗಿ ಪ್ರತಿಕ್ರಿಯಿಸಲು ಆರಂಭಿಸಿದ್ದಾರೆ. ಪ್ರತಿಭಟನೆಯಲ್ಲಿ ಕೇಳಿಬರುತ್ತಿರುವ ‘ಸರ್ಕಾರ ಬದಲಾವಣೆ’ ಘೋಷಣೆಗಳನ್ನು ಉಲ್ಲೇಖಿಸಿ, ವಿದೇಶಿ ಶಕ್ತಿಗಳ ಕೈವಾಡ ಹಾಗೂ ದೇಶದಲ್ಲಿ ಅರಾಜಕತೆ ಸೃಷ್ಟಿಸುವ ಪ್ರಯತ್ನದ ಆರೋಪಗಳನ್ನು ಬಿಜೆಪಿ ಮುಂದಿಟ್ಟಿದೆ. ಆದರೆ ಇವು ಬಿಜೆಪಿ ನಾಯಕರ ಆರೋಪಗಳಾಗಿದ್ದು, ವಿದೇಶಿ ಕೈವಾಡ ಸಾಬೀತಾಗಿದೆ ಎಂದು ಪರಿಗಣಿಸಲು ಸ್ವತಂತ್ರ ಸಾಕ್ಷ್ಯ ಎಲ್ಲೂ ಸಿಕ್ಕಿಲ್ಲ. ಆದರೂ, ರಾಜಕೀಯವಾಗಿ ಈ ಆರೋಪಗಳನ್ನು ಬಳಸಿ ವಿಪಕ್ಷಗಳ ಬಾಯಿಮುಚ್ಚಿಸುವುದು ಬಿಜೆಪಿ ಲೆಕ್ಕಾಚಾರ.

ಮೂರನೇ ಹಂತ — ದೇಶವ್ಯಾಪಿ ಪ್ರಚಾರ. ವರದಿಗಳ ಪ್ರಕಾರ, ಮತದಾರರ ಪಟ್ಟಿ ಪರಿಷ್ಕರಣೆ ಕುರಿತು ಕಾಂಗ್ರೆಸ್ ಸೇರಿದಂತೆ ಪ್ರತಿಪಕ್ಷಗಳು ಹರಡುತ್ತಿವೆ ಎನ್ನಲಾದ ತಪ್ಪು ಮಾಹಿತಿಗೆ ಉತ್ತರಿಸಲು ಬಿಜೆಪಿ ರಾಷ್ಟ್ರವ್ಯಾಪಿ ಅಭಿಯಾನಕ್ಕೆ ಸಿದ್ಧತೆ ನಡೆಸುತ್ತಿದೆ. ಸಂಸದರು, ಶಾಸಕರು ಮತ್ತು ಸ್ಥಳೀಯ ನಾಯಕರು ತಮ್ಮ ಕ್ಷೇತ್ರಗಳಲ್ಲಿ ಪಕ್ಷದ ನಿಲುವನ್ನು ಜನರಿಗೆ ವಿವರಿಸುವ ನಿರೀಕ್ಷೆಯಿದೆ. ಸಾಮಾಜಿಕ ಮಾಧ್ಯಮಗಳ ಮೂಲಕವೂ ಈ ಅಭಿಯಾನ ನಡೆಸಲು ಯೋಜಿಸಲಾಗಿದೆ. ಕರ್ನಾಟಕದಲ್ಲಿ ಗುರುವಾರದಿಂದಲೇ ಈ ಅಭಿಯಾನಕ್ಕೆ ಚಾಲನೆ ದೊರೆತಿದೆ.

ವಿದೇಶಿ ಹಣದ ಆರೋಪ: ತನಿಖೆಯೇ ಅಥವಾ ರಾಜಕೀಯ ಅಸ್ತ್ರ?

ಪ್ರತಿಭಟನಾಕಾರರ ಪರವಾಗಿ ಧ್ವನಿ ಎತ್ತುತ್ತಿರುವ ಪ್ರಭಾವಿಗಳು, ವಕೀಲರು ಮತ್ತು ಸಂಘಟನೆಗಳ ವಿದೇಶಿ ಹಣಕಾಸಿನ ಮೂಲಗಳ ಪರಿಶೀಲನೆಯೂ ಈ ವಿವಾದದ ಪ್ರಮುಖ ಭಾಗವಾಗಿದೆ. ಇದಕ್ಕೆ ಪೂರಕವಾಗಿ, ಅಕ್ಟೋಬರ್ 4ರಂದು ಕೇಂದ್ರ ಗೃಹ ಕಾರ್ಯದರ್ಶಿ ಕೆಲವು ರಾಜ್ಯಗಳ ಪೊಲೀಸ್ ಮಹಾನಿರ್ದೇಶಕರು ಮತ್ತು ಪೊಲೀಸ್ ಆಯುಕ್ತರೊಂದಿಗೆ ಸಭೆ ನಡೆಸಿದ್ದಾರೆ. ಪ್ರತಿಭಟನೆಯಲ್ಲಿ ಭಾಗವಹಿಸುವವರನ್ನು ಮುನ್ನೆಚ್ಚರಿಕೆಯಾಗಿ ತಡೆಯುವುದು, ನೋಟಿಸ್ ನೀಡುವುದು ಮತ್ತು ಹಣಕಾಸಿನ ಮೂಲಗಳನ್ನು ಪರಿಶೀಲಿಸುವುದರ ಬಗ್ಗೆ ಸೂಚನೆ ನೀಡಲಾಗಿತ್ತು ಎಂದು ಮೂಲಗಳನ್ನು ಉಲ್ಲೇಖಿಸಿ ಕೆಲವು ಪ್ರಮುಖ ಮಾಧ್ಯಮಗಳು ವರದಿ ಮಾಡಿವೆ.

ಆದರೆ ವಿದೇಶಿ ಹಣಕಾಸಿನ ಮೂಲಗಳನ್ನು ಪರಿಶೀಲಿಸುವುದಕ್ಕೂ, ವಿದೇಶಿ ಶಕ್ತಿಗಳೇ ಪ್ರತಿಭಟನೆಗಳನ್ನು ನಡೆಸುತ್ತಿವೆ ಎಂದು ನಿರ್ಧರಿಸುವುದಕ್ಕೂ ವ್ಯತ್ಯಾಸವಿದೆ. ಹಣಕಾಸಿನ ಅಕ್ರಮಗಳಿದ್ದರೆ ಸಾಕ್ಷ್ಯಾಧಾರಗಳೊಂದಿಗೆ ತನಿಖೆ ನಡೆಸುವುದು ಅಗತ್ಯ. ಅದೇ ರೀತಿ, ಆರೋಪ ಎದುರಿಸುತ್ತಿರುವವರಿಗೂ ತಮ್ಮ ನಿಲುವು ಮಂಡಿಸುವ ಅವಕಾಶ ಇರಬೇಕಾಗುತ್ತದೆ.

ವಿವಾದದ ಕೇಂದ್ರದಲ್ಲಿ ಮತದಾರರ ಹಕ್ಕು

ಈ ರಾಜಕೀಯ ಸಂಘರ್ಷದ ಮೂಲದಲ್ಲಿರುವುದು ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ. ಅರ್ಹ ಮತದಾರರ ಹೆಸರುಗಳನ್ನು ಪಟ್ಟಿಯಿಂದ ಕೈಬಿಡಲಾಗಿದೆ ಎಂಬುದು ಪ್ರತಿಪಕ್ಷಗಳ ಪ್ರಮುಖ ಆರೋಪ. ಚುನಾವಣಾ ಆಯೋಗ ಮಾತ್ರ ಅರ್ಹ ಮತದಾರರನ್ನು ಹೊರಗಿಡದಂತೆ ಕ್ರಮ ಕೈಗೊಳ್ಳುವುದಾಗಿ ಹೇಳಿದೆ. ದೆಹಲಿಯಲ್ಲಿ ಸುಮಾರು 33 ಲಕ್ಷ ಪ್ರಕರಣಗಳಲ್ಲಿ ಕಂಡುಬಂದ ವ್ಯತ್ಯಾಸಗಳ ಪೈಕಿ 20 ಲಕ್ಷ ಪ್ರಕರಣಗಳನ್ನು ಇತ್ಯರ್ಥಪಡಿಸಲಾಗಿದೆ ಎಂದು ದೆಹಲಿಯ ಮುಖ್ಯ ಚುನಾವಣಾಧಿಕಾರಿ ತಿಳಿಸಿದ್ದಾರೆ.

ಹೀಗಾಗಿ, ಈ ವಿವಾದವನ್ನು ಕೇವಲ ಬಿಜೆಪಿ ಮತ್ತು ಪ್ರತಿಪಕ್ಷಗಳ ನಡುವಿನ ಅಧಿಕಾರದ ಹೋರಾಟವೆಂದು ನೋಡುವುದಕ್ಕಿಂತ, ಮತದಾರರ ಹಕ್ಕುಗಳು, ಪ್ರತಿಭಟನೆಯ ಸ್ವಾತಂತ್ರ್ಯ ಮತ್ತು ಚುನಾವಣಾ ವ್ಯವಸ್ಥೆಯ ವಿಶ್ವಾಸಾರ್ಹತೆಯ ದೃಷ್ಟಿಯಿಂದಲೂ ಪರಿಶೀಲಿಸಬೇಕಿದೆ.

ಕಾಕ್ರೋಚ್ ಮಟ್ಟಹಾಕಲು ಕ್ರಮ

ಸಿಜೆಪಿ ಚಳವಳಿ ಮತ್ತು ಪ್ರತಿಭಟನಾಕಾರರನ್ನು ಎದುರಿಸಲು ಬಿಜೆಪಿ ಹಲವು ಹಂತಗಳಲ್ಲಿ ಕಾರ್ಯತಂತ್ರ ರೂಪಿಸುತ್ತಿದೆ ಎನ್ನಲಾಗಿದೆ.
150ಕ್ಕೂ ಹೆಚ್ಚು ಪ್ರಭಾವಿಗಳ ಪಟ್ಟಿ: ಸಿಜೆಪಿ ಮತ್ತು ಪ್ರತಿಪಕ್ಷಗಳ ವಿರುದ್ಧ ಹೇಳಿಕೆಗಳನ್ನು ಸಂಗ್ರಹಿಸಲು 150ಕ್ಕೂ ಹೆಚ್ಚು ಸಾಮಾಜಿಕ ಮಾಧ್ಯಮ ಪ್ರಭಾವಿಗಳ ಪಟ್ಟಿಯನ್ನು ಸಿದ್ಧಪಡಿಸಲಾಗಿದೆ ಎಂದು ವರದಿಗಳು ಹೇಳಿದೆ. ಇವರಲ್ಲಿ ಕೆಲವರು ಪ್ರತಿಭಟನಾ ಸ್ಥಳಗಳಿಗೆ ತೆರಳಿ ಮಾಹಿತಿ ಸಂಗ್ರಹಿಸುತ್ತಿದ್ದಾರೆ ಎನ್ನಲಾಗಿದೆ.

ಹಿರಿಯ ಪತ್ರಕರ್ತರ ಮೂಲಕ ನಿರೂಪಣೆ: ಸಿಜೆಪಿ ಮತ್ತು ಪ್ರತಿಪಕ್ಷಗಳ ವಿರುದ್ಧ ಸಾರ್ವಜನಿಕ ಅಭಿಪ್ರಾಯ ರೂಪಿಸುವ ಉದ್ದೇಶದಿಂದ ಹಿರಿಯ ಪತ್ರಕರ್ತರ ಪಟ್ಟಿಯನ್ನೂ ಸಿದ್ಧಪಡಿಸಲಾಗುತ್ತಿದೆ ಎನ್ನಲಾಗಿದೆ. ಇದಕ್ಕೆ ಬಿಜೆಪಿಯ ಸಂಶೋಧನಾ ವಿಭಾಗ ಮತ್ತು ಮಾಹಿತಿ ತಂತ್ರಜ್ಞಾನ ಘಟಕ ನೆರವಾಗುತ್ತಿವೆ ಎನ್ನಲಾಗಿದೆ.

ಮೀಮ್‌ಗಳ ಮೂಲಕ ಪ್ರಚಾರ: ಪ್ರತಿಪಕ್ಷಗಳು ಮತ್ತು ಸಿಜೆಪಿಯನ್ನು ಗುರಿಯಾಗಿಸಿಕೊಂಡು ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿಬಿಡಲು ವ್ಯಂಗ್ಯಚಿತ್ರಗಳು ಹಾಗೂ ಮೀಮ್‌ಗಳನ್ನು ಬಿಜೆಪಿಯ ಸೃಜನಶೀಲ ವಿಭಾಗ ಸಿದ್ಧಪಡಿಸುತ್ತಿದೆ.

ಕಾನೂನು ಹೋರಾಟಕ್ಕೆ ವಕೀಲರ ತಂಡ: ಸರ್ಕಾರದ ವಿರುದ್ಧದ ಆರೋಪಗಳು ಸಾಬೀತಾಗದ ಸಂದರ್ಭಗಳಲ್ಲಿ ಕೈಗೊಳ್ಳಬಹುದಾದ ಕಾನೂನು ಕ್ರಮಗಳ ಕುರಿತು ಮಾಹಿತಿ ಸಂಗ್ರಹಿಸಲು ವಕೀಲರ ತಂಡವನ್ನು ರಚಿಸಲಾಗಿದೆ ಎನ್ನಲಾಗಿದೆ.

ವಿದೇಶಿ ಹಣಕಾಸಿನ ಮೂಲಗಳ ಪರಿಶೀಲನೆ: ಮುಂದಿನ ಎರಡು–ಮೂರು ತಿಂಗಳಲ್ಲಿ ಸಿಜೆಪಿಗೆ ಸಂಬಂಧಿಸಿದ ವಿದೇಶಿ ಹಣಕಾಸಿನ ಮೂಲಗಳನ್ನು ಬಹಿರಂಗಪಡಿಸುವ ಪ್ರಯತ್ನ ನಡೆಯುತ್ತಿದೆ ಎಂದು ಮೂಲಗಳನ್ನು ಉಲ್ಲೇಖಿಸಿ ವರದಿಗಳು ಹೇಳಿವೆ. ಇದಕ್ಕೆ ಸಂಬಂಧಿಸಿದ ಮಾಹಿತಿ ಸಂಗ್ರಹಿಸುವ ಕೆಲಸ ಜುಲೈನಿಂದಲೇ ನಡೆಯುತ್ತಿದೆ ಎನ್ನಲಾಗಿದೆ. ಆದರೆ ಯಾವ ದಾಖಲೆಗಳು ಲಭ್ಯವಾಗಿವೆ ಎಂಬುದು ಸ್ಪಷ್ಟವಾಗಿಲ್ಲ.ಪ್ರತಿಭಟನಾಕಾರರ ವಿರುದ್ಧ ಕಾನೂನು ಕ್ರಮದ ಸಿದ್ಧತೆ: ಸಿಜೆಪಿಗೆ ಸಂಬಂಧಿಸಿದ ಪ್ರತಿಭಟನಾಕಾರರ ವಿರುದ್ಧ ಕಾನೂನು ವ್ಯಾಪ್ತಿಯಲ್ಲಿ ದೀರ್ಘಕಾಲದ ಕ್ರಮ ಕೈಗೊಳ್ಳುವ ಸಿದ್ಧತೆ ನಡೆಯುತ್ತಿದೆ. ಅವರ ವಿರುದ್ಧ ಗಂಭೀರ ಆರೋಪಗಳು ಹೊರಬೀಳಬಹುದು ಎಂದೂ ಹೇಳಲಾಗಿದೆ.

ಜನರ ಗಮನ ಯಾವ ವಿಷಯದತ್ತ?

ಬಿಜೆಪಿಯ ದೇಶವ್ಯಾಪಿ ಪ್ರಚಾರ ಆರಂಭವಾದರೆ, ಚುನಾವಣಾ ಆಯೋಗದ ವಿರುದ್ಧದ ಆರೋಪಗಳಿಗೆ ಅದು ಯಾವ ರೀತಿಯ ಉತ್ತರ ನೀಡುತ್ತದೆ ಎಂಬುದು ಕುತೂಹಲ ಮೂಡಿಸಿದೆ. ಅದೇ ಸಮಯದಲ್ಲಿ, ಪ್ರತಿಪಕ್ಷಗಳು ತಮ್ಮ ಆರೋಪಗಳಿಗೆ ಎಷ್ಟು ಸ್ಪಷ್ಟವಾದ ದಾಖಲೆಗಳನ್ನು ಮುಂದಿಡುತ್ತವೆ ಎಂಬುದೂ ಮುಖ್ಯವಾಗಲಿದೆ.

ಪ್ರತಿಭಟನೆಯ ಹಿಂದಿನ ಉದ್ದೇಶವೇ ರಾಜಕೀಯವಾಗಿ ಪ್ರಶ್ನಿಸಲ್ಪಡುತ್ತದೆಯೇ, ಅಥವಾ ಮತದಾರರ ಪಟ್ಟಿಯಲ್ಲಿನ ಲೋಪದೋಷಗಳೇ ಚರ್ಚೆಯ ಕೇಂದ್ರದಲ್ಲಿ ಉಳಿಯುತ್ತವೆಯೇ? ಈ ಎರಡರ ನಡುವಿನ ಸಂಘರ್ಷವೇ ಮುಂದಿನ ದಿನಗಳಲ್ಲಿ ರಾಷ್ಟ್ರ ರಾಜಕಾರಣದ ಗಮನ ಸೆಳೆಯುವ ಸಾಧ್ಯತೆಯಿದೆ.

ಇದನ್ನೂ ಓದಿ:ಮಲತಾಯಿಯ ಮೇಲೆಯೇ ಡೀಸೆಲ್ ಸುರಿದು ಸಜೀವ ದಹನ ಮಾಡಿದ ಮಲಮಗ!