ದ್ವಿಚಕ್ರ ವಾಹನ ತಯಾರಕ ಸಂಸ್ಥೆ ಜಾವಾ ಯೆಜ್ಡಿ ತನ್ನ ಮಾರಾಟ ಮತ್ತು ಸೇವಾ ಜಾಲವನ್ನು ವಿಸ್ತರಿಸಲು ಮುಂದಾಗಿದೆ. ಭಾರತೀಯ ಮಾರುಕಟ್ಟೆಯಲ್ಲಿ ತನ್ನ ಅಸ್ತಿತ್ವವನ್ನು ಮತ್ತಷ್ಟು ವಿಸ್ತರಿಸುವ ಉದ್ದೇಶದಿಂದ, 2028ರ ಆರ್ಥಿಕ ವರ್ಷದ ವೇಳೆಗೆ ದೇಶಾದ್ಯಂತ 700ಕ್ಕೂ ಹೆಚ್ಚು ಶೋರೂಮ್‌ಗಳನ್ನು ತೆರೆಯುವ ಗುರಿಯನ್ನು ಸಂಸ್ಥೆ ಹಾಕಿಕೊಂಡಿದೆ. ಪ್ರಸ್ತುತ 2026ನೇ ವರ್ಷದಲ್ಲಿ ಸಂಸ್ಥೆಯು 500 ಡೀಲರ್‌ಶಿಪ್‌ಗಳ ಮೈಲಿಗಲ್ಲನ್ನು ತಲುಪುವ ಹಾದಿಯಲ್ಲಿದೆ.
ಕೇವಲ ಹೊಸ ವಾಹನಗಳ ಮಾರಾಟದ ಮೇಲೆ ಮಾತ್ರ ಗಮನಹರಿಸದೆ, ಮಾರಾಟದ ನಂತರದ ಸೇವೆಗಳನ್ನು ಸುಧಾರಿಸುವತ್ತ ಕಂಪನಿ ಗಮನ ಹರಿಸಿದೆ. ಗ್ರಾಹಕರಿಗೆ ವಾಹನಗಳ ಅಧಿಕೃತ ಬಿಡಿಭಾಗಗಳು ತ್ವರಿತವಾಗಿ ಮತ್ತು ಸುಲಭವಾಗಿ ಸಿಗುವಂತೆ ಮಾಡಲು ತನ್ನ ಪೂರೈಕೆ ವ್ಯವಸ್ಥೆಯನ್ನು ಬಲಪಡಿಸಿದೆ.
ಇದರ ಜೊತೆಗೆ ಗ್ರಾಹಕರಿಗೆ ಸೇವೆ ಒದಗಿಸಲು ದೇಶಾದ್ಯಂತ ‘ಲೆಜೆಂಡ್ಸ್ ಕೇರ್ ಕ್ಯಾಂಪ್’ಗಳನ್ನು ಸಹ ಸಂಸ್ಥೆ ಆಯೋಜಿಸುತ್ತಿದೆ. ಅಲ್ಲದೆ ಹೊಸ ಶೋರೂಮ್ ಮತ್ತು ಸರ್ವಿಸ್ ಸೆಂಟರ್‌ಗಳ ವಿಸ್ತರಣೆಯ ಮೂಲಕ ಸಣ್ಣ ನಗರಗಳಿಗೂ ತನ್ನ ಸೇವೆಯನ್ನು ತಲುಪಿಸಲು ಕಂಪನಿ ಯೋಜಿಸಿದೆ.
ಮೋಟಾರ್‌ಸೈಕಲ್‌ಗಳ ಗುಣಮಟ್ಟದಲ್ಲೂ ಸುಧಾರಣೆ
ಇತ್ತೀಚಿನ ತಲೆಮಾರಿನ ಜಾವಾ ಮತ್ತು ಯೆಜ್ಡಿ ಮೋಟಾರ್‌ಸೈಕಲ್‌ಗಳ ನಿರ್ಮಾಣ ಗುಣಮಟ್ಟ, ಫಿಟ್ಟಿಂಗ್ ಮತ್ತು ಪೇಂಟ್ ಗುಣಮಟ್ಟದಲ್ಲಿ ಈ ಹಿಂದಿನ ಮಾಡೆಲ್‌ಗಳಿಗಿಂತ ಸಾಕಷ್ಟು ಸುಧಾರಣೆ ಕಂಡುಬಂದಿದೆ ಎಂದು ಮಾರುಕಟ್ಟೆಯ ಸ್ವತಂತ್ರ ವಿಶ್ಲೇಷಣೆಗಳು ವರದಿ ಮಾಡಿವೆ.
ಗ್ರಾಹಕರನ್ನು ಹಿಡಿದಿಟ್ಟುಕೊಳ್ಳುವ ನಿಟ್ಟಿನಲ್ಲಿ ಕಂಪನಿಯು ತನ್ನ ಹೊಸ ಮೋಟಾರ್‌ಸೈಕಲ್‌ಗಳಿಗೆ 4 ವರ್ಷಗಳು ಅಥವಾ 50,000 ಕಿಲೋಮೀಟರ್‌ಗಳ ಸ್ಟ್ಯಾಂಡರ್ಡ್ ವಾರಂಟಿಯನ್ನು ಘೋಷಿಸಿದೆ. ಇದರ ಜೊತೆಗೆ ವಿಸ್ತೃತ ವಾರಂಟಿ, ವಾರ್ಷಿಕ ನಿರ್ವಹಣಾ ಒಪ್ಪಂದ ಮತ್ತು ರೋಡ್‌ಸೈಡ್‌ ಅಸಿಸ್ಟನ್ಸ್‌ ಸೇವೆಗಳನ್ನು ಸಹ ಒದಗಿಸುತ್ತಿದೆ.
ಕಂಪನಿಯ ಈ ವಿಸ್ತರಣಾ ಯೋಜನೆಗಳ ಕುರಿತು ಕ್ಲಾಸಿಕ್ ಲೆಜೆಂಡ್ಸ್‌ನ ಸಹ-ಸಂಸ್ಥಾಪಕ ಅನುಪಮ್ ಥರೇಜಾ ಪ್ರತಿಕ್ರಿಯಿಸಿದ್ದು, “ಕಳೆದ ಕೆಲವು ವರ್ಷಗಳಿಂದ ಗ್ರಾಹಕರಿಗೆ ನೀಡುವ ಸೇವೆಗಳಲ್ಲಿ ಸುಧಾರಣೆ ತರಲು ನಾವು ಗಮನ ಹರಿಸಿದ್ದೇವೆ. ನೆಟ್‌ವರ್ಕ್ ವಿಸ್ತರಣೆ, ಸರ್ವಿಸ್ ಲಭ್ಯತೆ ಮತ್ತು ಬಿಡಿಭಾಗಗಳನ್ನು ಸುಲಭವಾಗಿ ಒದಗಿಸುವ ಮೂಲಕ ಗ್ರಾಹಕರಿಗೆ ವಿಶ್ವಾಸಾರ್ಹ ಸೇವೆ ನೀಡುವುದು ನಮ್ಮ ಉದ್ದೇಶವಾಗಿದೆ. ಜಾವಾ, ಯೆಜ್ಡಿ ಅಥವಾ ಬಿಎಸ್‌ಎ ಮೋಟಾರ್‌ಸೈಕಲ್ ಖರೀದಿಸುವ ಪ್ರತಿಯೊಬ್ಬರಿಗೂ ತೊಂದರೆರಹಿತ ಅನುಭವ ಸಿಗುವಂತೆ ಮಾಡುವುದು ನಮ್ಮ ಗುರಿಯಾಗಿದೆ,” ಎಂದು ಅವರು ತಿಳಿಸಿದ್ದಾರೆ.
ಒಟ್ಟಾರೆಯಾಗಿ, ಕೇವಲ ಹೊಸ ಮಾಡೆಲ್‌ಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡುವುದರ ಜೊತೆಗೆ, ವಾಹನ ಖರೀದಿಸಿದ ನಂತರ ಗ್ರಾಹಕರಿಗೆ ಅಗತ್ಯವಿರುವ ಸೇವಾ ಮೂಲಸೌಕರ್ಯಗಳನ್ನು ಅಭಿವೃದ್ಧಿಪಡಿಸುವತ್ತ ಜಾವಾ ಯೆಜ್ಡಿ ಪ್ರಸ್ತುತ ತನ್ನ ಗಮನವನ್ನು ಕೇಂದ್ರೀಕರಿಸಿದೆ.
