ಲಖನೌ: ವೇದಿಕೆ ಅದ್ಧೂರಿಯಾಗಿ ಸಿದ್ಧವಾಗಿತ್ತು. ನಾಯಕರು ಬಿರುಸಿನ ಭಾಷಣಕ್ಕೆ ತಯಾರಿ ನಡೆಸಿದ್ದರು. ಸಾಲಾಗಿ ಜೋಡಿಸಿದ್ದ ನೂರಾರು ಕುರ್ಚಿಗಳನ್ನು ನೋಡಿ, ಬೃಹತ್ ಜನಸಾಗರವೇ ಹರಿದುಬರಲಿದೆ ಎಂಬ ನಿರೀಕ್ಷೆಯಲ್ಲಿದ್ದರು. ಆದರೆ, ಬಿಳಿ ಬಟ್ಟೆ ತೊಟ್ಟು ಕಾಲರ್‌ ಎತ್ತಿ ವೇದಿಕೆಯೇರಿದ ನಾಯಕರಿಗೆ ಎದುರಾಗಿದ್ದು ಮಾತ್ರ ದಿಗ್ಭ್ರಮೆ! ಮುಂಭಾಗದಲ್ಲಿ ಕುಳಿತಿದ್ದ ಜನರಿಗಿಂತ ವೇದಿಕೆಯ ಮೇಲಿದ್ದ ನಾಯಕರ ಸಂಖ್ಯೆಯೇ ಹೆಚ್ಚಿತ್ತು. ಸಮಾಜವಾದಿ ಪಕ್ಷದ ಭದ್ರಕೋಟೆ ಕನ್ನೌಜ್‌ನಲ್ಲಿ ನಡೆದ ಈ ಅಚ್ಚರಿಯ ಘಟನೆ ಇದೀಗ ಇಡೀ ಉತ್ತರ ಪ್ರದೇಶದ ರಾಜಕೀಯದಲ್ಲಿ ಸಂಚಲನ ಮೂಡಿಸಿದೆ.
ಅದು ಸಮಾಜವಾದಿ ಪಕ್ಷದ ರಾಜ್ಯಾಧ್ಯಕ್ಷ ಶ್ಯಾಮ್‌ಲಾಲ್ ಪಾಲ್ ಅವರೇ ಖುದ್ದು ಆಗಮಿಸಿ ನಡೆಸುತ್ತಿದ್ದ ‘ಪಿಡಿಎ’ (ಹಿಂದುಳಿದ, ದಲಿತ ಮತ್ತು ಅಲ್ಪಸಂಖ್ಯಾತ) ಕಾರ್ಯಕರ್ತರ ಮಹತ್ವದ ಸಮಾವೇಶ. ಕನ್ನೌಜ್ ಎಂದರೆ ಅಖಿಲೇಶ್ ಯಾದವ್ ಅವರ ತವರು ಕ್ಷೇತ್ರ, ಜೊತೆಗೆ ಅವರೇ ಅಲ್ಲಿನ ಹಾಲಿ ಸಂಸದರು. ಹೀಗಿರುವಾಗ ಕನಿಷ್ಠ ಪಕ್ಷ ಸಾವಿರಾರು ಕಾರ್ಯಕರ್ತರು ಸೇರಬೇಕಿತ್ತು. ಆದರೆ, ಕಾರ್ಯಕ್ರಮ ಶುರುವಾದರೂ ಕುರ್ಚಿಗಳು ಭರ್ತಿಯಾಗಲೇ ಇಲ್ಲ. “ಜನ ಎಲ್ಲಿ ಹೋದರು?” ಎಂಬ ಆತಂಕ ವೇದಿಕೆಯ ಮೇಲಿದ್ದ ನಾಯಕರನ್ನು ಕಾಡತೊಡಗಿತು. ಕಾರ್ಯಕರ್ತರನ್ನು ಕರೆತರುವಲ್ಲಿ ಸ್ಥಳೀಯ ನಾಯಕರ ನಿರ್ಲಕ್ಷ್ಯವೋ ಅಥವಾ ನಾವೇ ಸುಪ್ರೀಂ ಎಂಬ ಅತಿಯಾದ ಆತ್ಮವಿಶ್ವಾಸವೋ, ಒಟ್ಟಿನಲ್ಲಿ ಅನಾಥವಾಗಿ ಬಿದ್ದಿದ್ದ ‘ಖಾಲಿ ಕುರ್ಚಿ’ಗಳೇ ಅಂದು ಸಭೆಯ ಮುಖ್ಯ ಆಕರ್ಷಣೆಯಾಗಿದ್ದವು.
ತಿರುಗುಬಾಣವಾದ ಅಸ್ತ್ರ, ವಿರೋಧಿಗಳ ಕೇಕೆ
ಕೌತುಕದ ದೃಶ್ಯ ಕೇವಲ ಕಚೇರಿಯ ನಾಲ್ಕು ಗೋಡೆಗಳ ಮಧ್ಯೆ ಉಳಿಯಲಿಲ್ಲ. ಯಾರೋ ಮೊಬೈಲ್‌ನಲ್ಲಿ ಸೆರೆಹಿಡಿದ ವಿಡಿಯೋ ಕ್ಷಣಾರ್ಧದಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಕಾಡ್ಗಿಚ್ಚಿನಂತೆ ಹಬ್ಬಿತು. ಒಂದು ಕಾಲದಲ್ಲಿ ಪ್ರಧಾನಿ ಮೋದಿ ಮತ್ತು ಸಿಎಂ ಯೋಗಿ ಆದಿತ್ಯನಾಥ್ ಅವರ ಸಮಾವೇಶಗಳಲ್ಲಿ ಖಾಲಿ ಕುರ್ಚಿಗಳನ್ನು ಕ್ಯಾಮೆರಾದಲ್ಲಿ ಜೂಮ್ ಮಾಡಿ ವ್ಯಂಗ್ಯವಾಡುತ್ತಿದ್ದ ಸಮಾಜವಾದಿ ಪಕ್ಷಕ್ಕೆ, ಈಗ ತಾನು ತೋಡಿದ ಗುಂಡಿಗೆ ತಾನೇ ಬಿದ್ದಂತಾಯಿತು. “ನಿಮ್ಮ ಪಿಡಿಎ ಘೋಷಣೆ ಕೇವಲ ಬೂಟಾಟಿಕೆ, ನಿಮ್ಮವರೇ ನಿಮ್ಮ ಕಾರ್ಯಕ್ರಮಕ್ಕೆ ಬರುತ್ತಿಲ್ಲ” ಎಂದು ಬಿಜೆಪಿ ನಾಯಕರು ಲೇವಡಿ ಮಾಡಲು ಶುರುಮಾಡಿದರು.
ಒಂದೇ ಏಟಿಗೆ ಉರುಳಿದ ತಲೆಗಳು
ಸಾಮ್ರಾಜ್ಯದಲ್ಲಿ ನಡೆದ ಈ ಭಾರಿ ಮುಖಭಂಗ ಅಖಿಲೇಶ್ ಯಾದವ್ ಅವರ ಕೋಪದ ಕಟ್ಟೆಯೊಡೆಯುವಂತೆ ಮಾಡಿತು. ಶತ್ರುಗಳಿಗೆ ನಗೆಪಾಟಲಾದ ಈ ‘ಖಾಲಿ ಕುರ್ಚಿ’ಗಳ ಪ್ರಹಸನವನ್ನು ಗಂಭೀರವಾಗಿ ಪರಿಗಣಿಸಿದ ಅವರು ಕ್ಷಣಾರ್ಧದಲ್ಲಿ ಕಠಿಣ ನಿರ್ಧಾರ ಕೈಗೊಂಡರು. ಪರಿಣಾಮ, ಇಡೀ ಕನ್ನೌಜ್ ಜಿಲ್ಲಾ ಘಟಕವನ್ನೇ ಸಂಪೂರ್ಣವಾಗಿ ವಿಸರ್ಜಿಸಿ, ಎಲ್ಲ ಪದಾಧಿಕಾರಿಗಳನ್ನು ರಾತ್ರೋರಾತ್ರಿ ಮನೆಗೆ ಕಳುಹಿಸಿದರು.
ನಾಯಕನಿಗೆ ತೀರಾ ಆಪ್ತರು ಎಂಬ ಹಮ್ಮಿನಲ್ಲಿದ್ದ ಕನ್ನೌಜ್ ನಾಯಕರಿಗೆ ಈ ಘಟನೆ ಬಹುದೊಡ್ಡ ಆಘಾತ ನೀಡಿದೆ. ಹಿಂದೆ ಗೋರಖ್‌ಪುರ, ಏಟಾ ಮತ್ತು ಕಾಸಗಂಜ್‌ನಲ್ಲೂ ಗುಂಪುಗಾರಿಕೆ ನಡೆದಾಗ ಇದೇ ರೀತಿ ಇಡೀ ಘಟಕವನ್ನೇ ಅಮಾನತು ಮಾಡಿದ್ದ ಅಖಿಲೇಶ್, “ಪಕ್ಷಕ್ಕಿಂತ ಯಾರೂ ದೊಡ್ಡವರಲ್ಲ” ಎಂಬ ಎಚ್ಚರಿಕೆಯ ಗಂಟೆಯನ್ನು ಈ ಮೂಲಕ ಮತ್ತೊಮ್ಮೆ ರವಾನಿಸಿದ್ದಾರೆ.
ಇದನ್ನೂ ಓದಿ:ಮರಣದಂಡನೆಯ ನೆರಳು, ಗಡೀಪಾರಿನ ಭೀತಿ: ಡಿಸೆಂಬರ್‌ನಲ್ಲಿ ಬಾಂಗ್ಲಾ ಗಡಿಯೊಳಗೆ ಕಾಲಿಡಲಿದ್ದಾರಾ ಶೇಖ್ ಹಸೀನಾ?
