ಬೆಂಗಳೂರು: ಸರ್ಕಾರಿ ಸ್ವಾಮ್ಯದ, ದೇಶದ ವಿಶ್ವಾಸಾರ್ಹ ವಿಮಾ ಸಂಸ್ಥೆಯಾದ ಭಾರತೀಯ ಜೀವ ವಿಮಾ ನಿಗಮವು (ಎಲ್ಐಸಿ) ಗ್ರಾಹಕರ ದೀರ್ಘಕಾಲೀನ ಆರ್ಥಿಕ ಭದ್ರತೆಗಾಗಿ ಮೂರು ಹೊಸ ಯೋಜನೆಗಳನ್ನು ಪರಿಚಯಿಸಿದೆ. ನಿವೃತ್ತಿ ಆದಾಯ, ಆರೋಗ್ಯ ರಕ್ಷಣೆ ಮತ್ತು ಕ್ಯಾನ್ಸರ್ ಚಿಕಿತ್ಸೆಯಂತಹ ಅಗತ್ಯಗಳನ್ನು ಗಮನದಲ್ಲಿಟ್ಟುಕೊಂಡು ಈ ಹೊಸ ಪಾಲಿಸಿಗಳನ್ನು ರೂಪಿಸಲಾಗಿದೆ. ಈ ಯೋಜನೆಗಳು ಅಕ್ಟೋಬರ್ 19ರಿಂದ ಖರೀದಿಗೆ ಲಭ್ಯವಿರಲಿವೆ.
- ಹೊಸ ಜೀವನ್ ಧರಾ-II
ಇದು ನಿವೃತ್ತಿಯ ನಂತರದ ಜೀವನಕ್ಕೆ ಖಚಿತವಾದ ಆದಾಯವನ್ನು ಒದಗಿಸುವ ಡಿಫರ್ಡ್ ಆನ್ಯುಟಿ (deferred annuity) ಯೋಜನೆಯಾಗಿದೆ. ಉದ್ಯೋಗದಿಂದ ನಿವೃತ್ತಿ ಪಡೆದ ಬಳಿಕ ಆರ್ಥಿಕ ಸ್ವಾತಂತ್ರ್ಯವನ್ನು ಬಯಸುವವರಿಗೆ ಈ ಪಾಲಿಸಿ ಅತ್ಯಂತ ಸಹಕಾರಿಯಾಗಿದೆ. ನಿರ್ದಿಷ್ಟ ಅವಧಿಯವರೆಗೆ ಹಣ ಹೂಡಿಕೆ ಮಾಡಿದ ನಂತರ, ನಿಗದಿತ ವಯಸ್ಸಿನಿಂದ ನಿಯಮಿತ ಪಿಂಚಣಿ ಪಡೆಯಲು ಇದು ಅವಕಾಶ ಕಲ್ಪಿಸುತ್ತದೆ. - ಹೆಲ್ತ್ ಶೀಲ್ಡ್
ಕುಟುಂಬದ ಸಮಗ್ರ ಆರೋಗ್ಯ ರಕ್ಷಣೆಗಾಗಿ ಈ ಪಾಲಿಸಿಯನ್ನು ತರಲಾಗಿದೆ. ಇದು ಆಸ್ಪತ್ರೆಗೆ ದಾಖಲಾದ ಸಂದರ್ಭದಲ್ಲಿ ನಿಗದಿತ ಹಣಕಾಸಿನ ನೆರವು ನೀಡುತ್ತದೆ. ಅಲ್ಲದೆ, ಪ್ರಮುಖ ಶಸ್ತ್ರಚಿಕಿತ್ಸೆಗಳು ಮತ್ತು ಗಂಭೀರ ಕಾಯಿಲೆಗಳಿಗೆ ಒಮ್ಮೆಯೇ ಪಾವತಿ ಮಾಡುವ ಪ್ರಯೋಜನವನ್ನೂ ಇದು ಹೊಂದಿದೆ. ಇದು ಸಾಂಪ್ರದಾಯಿಕ ಆರೋಗ್ಯ ವಿಮೆಗೆ ಪೂರಕವಾಗಿ ಕಾರ್ಯನಿರ್ವಹಿಸುತ್ತದೆ. - ನ್ಯೂ ಕ್ಯಾನ್ಸರ್ ಕವರ್
ಕ್ಯಾನ್ಸರ್ ರೋಗನಿರ್ಣಯವಾದ ತಕ್ಷಣ ಆರ್ಥಿಕ ನೆರವು ಒದಗಿಸಲು ಈ ವಿಶೇಷ ಯೋಜನೆಯನ್ನು ತರಲಾಗಿದೆ. ಕ್ಯಾನ್ಸರ್ ಹಂತಗಳ ಆಧಾರದ ಮೇಲೆ ವೈದ್ಯಕೀಯ ವೆಚ್ಚದೊಂದಿಗೆ ಸಂಬಂಧವಿಲ್ಲದೆ ನಿಗದಿತ ಮೊತ್ತವನ್ನು ವಿಮಾ ಗ್ರಾಹಕರಿಗೆ ನೀಡಲಾಗುತ್ತದೆ. ಇದರ ಕನಿಷ್ಠ ವಿಮಾ ಮೊತ್ತವು ವಯಸ್ಸಿಗೆ ತಕ್ಕಂತೆ 15 ಲಕ್ಷದಿಂದ 35 ಲಕ್ಷ ರೂಪಾಯಿಗಳವರೆಗೆ ಇರಲಿದ್ದು, ಗರಿಷ್ಠ ಮೊತ್ತ 50 ಲಕ್ಷ ರೂಪಾಯಿಗಳವರೆಗೆ ಲಭ್ಯವಿರಲಿದೆ.
ಖರೀದಿದಾರರಿಗೆ ಸಲಹೆ:
ಈ ಯೋಜನೆಗಳನ್ನು ಖರೀದಿಸುವ ಮುನ್ನ ಗ್ರಾಹಕರು ತಮ್ಮ ಹೂಡಿಕೆ ಸಾಮರ್ಥ್ಯ, ಅಸ್ತಿತ್ವದಲ್ಲಿರುವ ವಿಮಾ ಪಾಲಿಸಿಗಳು ಮತ್ತು ನಿಯಮಗಳನ್ನು ಎಚ್ಚರಿಕೆಯಿಂದ ಪರಿಶೀಲಿಸಬೇಕು ಎಂದು ತಜ್ಞರು ಸೂಚಿಸಿದ್ದಾರೆ. ಪೂರ್ಣ ಪ್ರಮಾಣದ ಪಾಲಿಸಿ ದಾಖಲೆಗಳನ್ನು ಓದಿ, ತಮ್ಮ ಆರ್ಥಿಕ ಅಗತ್ಯಗಳಿಗೆ ತಕ್ಕಂತೆ ಸೂಕ್ತವಾದ ಯೋಜನೆಯನ್ನು ಆಯ್ಕೆ ಮಾಡಿಕೊಳ್ಳುವುದು ಉತ್ತಮ.
ಇದನ್ನೂ ಓದಿ:ಬಾಂಗ್ಲಾದೇಶ: ಧರ್ಮನಿಂದನೆ ಆರೋಪದ ಮೇರೆಗೆ ಆಸ್ಪತ್ರೆಗೆ ನುಗ್ಗಿ ವ್ಯಕ್ತಿಯನ್ನು ಬರ್ಬರವಾಗಿ ಹತ್ಯೆ ಮಾಡಿದ ಗುಂಪು!
