ದ್ವಿತೀಯ ಏಕದಿನ ಪಂದ್ಯದಲ್ಲಿ ರೋಹಿತ್ ಅಬ್ಬರಿಸುವುದು ಖಚಿತ : ಹಿಟ್ ಮ್ಯಾನ್ ಬೆನ್ನಿಗೆ ನಿಂತ ಅಭಿಷೇಕ್ ನಾಯರ್!

ಬೆಂಗಳೂರು : ಭಾರತ ಹಾಗೂ ವೆಸ್ಟ್ ಇಂಡೀಸ್ ನಡುವೆ ನಡೆಯುತ್ತಿರುವ ಏಕದಿನ ಕ್ರಿಕೆಟ್ ಸರಣಿಯ ಎರಡನೇ ಪಂದ್ಯಕ್ಕೆ ಕ್ಷಣಗಣನೆ ಆರಂಭವಾಗಿದೆ. ಗುವಾಹಟಿಯ ಬರ್ಸಾಪರಾ ಕ್ರೀಡಾಂಗಣದಲ್ಲಿ ನಡೆಯಲಿರುವ ಈ ಹೈ-ವೋಲ್ಟೇಜ್ ಪಂದ್ಯದಲ್ಲಿ ಟೀಂ ಇಂಡಿಯಾ ನಾಯಕ ರೋಹಿತ್ ಶರ್ಮಾ ಭರ್ಜರಿ ಪ್ರದರ್ಶನ ನೀಡಲಿದ್ದಾರೆ ಎಂದು ಮಾಜಿ ಕ್ರಿಕೆಟಿಗ ಹಾಗೂ ಜಿಯೋ ಸ್ಟಾರ್ ತಜ್ಞ ಅಭಿಷೇಕ್ ನಾಯರ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಮೊದಲ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಮತ್ತು ಶುಭಮನ್ ಗಿಲ್ ಶತಕ ಸಿಡಿಸಿ ಅಬ್ಬರಿಸಿದ್ದರೆ, ನಾಯಕ ರೋಹಿತ್ ಶರ್ಮಾ ಬೇಗನೆ ವಿಕೆಟ್ ಕೈಚೆಲ್ಲಿ ನಿರಾಸೆ ಮೂಡಿಸಿದ್ದರು. ಇದೀಗ ದ್ವಿತೀಯ ಪಂದ್ಯದಲ್ಲಿ ತಮ್ಮ ನೈಜ ಆಟವನ್ನು ಪ್ರದರ್ಶಿಸಲು ‘ಹಿಟ್ ಮ್ಯಾನ್’ ಸಜ್ಜಾಗಿದ್ದಾರೆ ಎಂದು ನಾಯರ್ ಭವಿಷ್ಯ ನುಡಿದಿದ್ದಾರೆ.

ತಿರುವನಂತಪುರಂನ ಗ್ರೀನ್‌ಫೀಲ್ಡ್ ಇಂಟರ್‌‌ನ್ಯಾಷನಲ್ ಸ್ಟೇಡಿಯಂನಲ್ಲಿ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ರೋಹಿತ್ ಶರ್ಮಾ ಉತ್ತಮ ಆರಂಭ ಪಡೆದರೂ ಅದನ್ನು ದೊಡ್ಡ ಮೊತ್ತವಾಗಿ ಪರಿವರ್ತಿಸುವಲ್ಲಿ ವಿಫಲರಾದರು. 35 ಎಸೆತಗಳನ್ನು ಎದುರಿಸಿದ ಅವರು ಎರಡು ಬೌಂಡರಿ ಹಾಗೂ ಮೂರು ಭರ್ಜರಿ ಸಿಕ್ಸರ್‌ಗಳ ನೆರವಿನಿಂದ 32 ರನ್ ಗಳಿಸಿದ್ದರು. ಕ್ರೀಸ್‌ನಲ್ಲಿ ಇದ್ದಷ್ಟು ಹೊತ್ತು ಆತ್ಮವಿಶ್ವಾಸದಿಂದಲೇ ಬ್ಯಾಟ್ ಬೀಸುತ್ತಿದ್ದ ರೋಹಿತ್‌ಗೆ, ವೆಸ್ಟ್ ಇಂಡೀಸ್‌ನ ವೇಗದ ಬೌಲರ್ ಅಲ್ಜಾರಿ ಜೋಸೆಫ್ ಕಂಟಕವಾಗಿ ಪರಿಣಮಿಸಿದರು. ಬೌಂಡರಿ ಗಳಿಸುವ ಆತುರದಲ್ಲಿ ರೋಹಿತ್ ಆಡಿದ ‘ಹುಕ್ಡ್ ಫ್ಲಿಕ್’ ಶಾಟ್ ಸರಿಯಾಗಿ ಕನೆಕ್ಟ್ ಆಗದ ಕಾರಣ, ಚೆಂಡು ನೇರವಾಗಿ ಡೀಪ್‌ನಲ್ಲಿದ್ದ ಜ್ಯುವೆಲ್ ಆಂಡ್ರ್ಯೂ ಅವರ ಕೈಸೇರಿತು. ಈ ಮೂಲಕ ಅಲ್ಜಾರಿ ಜೋಸೆಫ್ ತಮ್ಮ ವೇಗದ ಬೌಲಿಂಗ್ ದಾಳಿಯಿಂದ ಭಾರತದ ನಾಯಕನನ್ನು ಪೆವಿಲಿಯನ್ ಸೇರಿಸುವಲ್ಲಿ ಯಶಸ್ವಿಯಾದರು.

ಸಾಮಾನ್ಯವಾಗಿ ವೇಗದ ಬೌಲರ್‌ಗಳ ವಿರುದ್ಧ ಲೀಲಾಜಾಲವಾಗಿ ಬ್ಯಾಟ್ ಬೀಸುವ ರೋಹಿತ್ ಶರ್ಮಾ, ಅಲ್ಜಾರಿ ಜೋಸೆಫ್ ಎದುರು ವಿಕೆಟ್ ಒಪ್ಪಿಸಿದ್ದು ಅಚ್ಚರಿ ಮೂಡಿಸಿತ್ತು. ಈ ಕುರಿತು ‘ಗೇಮ್ ಪ್ಲಾನ್’ ಕಾರ್ಯಕ್ರಮದಲ್ಲಿ ಮಾತನಾಡಿದ ಅಭಿಷೇಕ್ ನಾಯರ್, “ರೋಹಿತ್ ಶರ್ಮಾ ವೇಗಿಗಳ ಎದುರು ಅತ್ಯುತ್ತಮವಾಗಿ ರನ್ ಕಲೆಹಾಕುತ್ತಾರೆ. ಆದರೆ ಅಲ್ಜಾರಿ ಜೋಸೆಫ್ ತಮ್ಮ ವೇಗದಿಂದ ರೋಹಿತ್‌ಗೆ ಆಘಾತ ನೀಡಿದರು.

ಈ ಬಗ್ಗೆ ರೋಹಿತ್ ಖಂಡಿತವಾಗಿಯೂ ಚಿಂತನೆ ನಡೆಸುತ್ತಿರುತ್ತಾರೆ. ತಾನು ಹೇಗೆ ಔಟಾದೆ ಎನ್ನುವ ವಿಡಿಯೋ ತುಣುಕುಗಳನ್ನು ಅವರು ಮತ್ತೆ ಮತ್ತೆ ನೋಡಿ ವಿಶ್ಲೇಷಿಸಿರುತ್ತಾರೆ. ಎದುರಾಳಿ ಬೌಲರ್‌ಗಳ ತಂತ್ರಗಳನ್ನು ಅರಿತುಕೊಂಡು ಮುಂದಿನ ಪಂದ್ಯದಲ್ಲಿ ಅವರು ಮತ್ತಷ್ಟು ಬಲಿಷ್ಠವಾಗಿ ಕಣಕ್ಕಿಳಿಯುವುದು ನಿಶ್ಚಿತ,” ಎಂದು ನಾಯರ್ ವಿವರಿಸಿದ್ದಾರೆ. ತಾನು ಮಾಡಿದ ತಪ್ಪನ್ನು ಅರಿತುಕೊಂಡು ರೋಹಿತ್ ಪುಟಿದೇಳುವ ರೀತಿ ವಿಭಿನ್ನವಾಗಿರುತ್ತದೆ ಎಂದು ನಾಯರ್ ಶ್ಲಾಘಿಸಿದ್ದಾರೆ.

ಗುವಾಹಟಿ ಪಿಚ್‌ನಲ್ಲಿ ಕಾದಿದೆ ಅಗ್ನಿಪರೀಕ್ಷೆ

ಸೆಪ್ಟೆಂಬರ್ 30ರಂದು ಗುವಾಹಟಿಯಲ್ಲಿ ನಡೆಯಲಿರುವ ಎರಡನೇ ಏಕದಿನ ಪಂದ್ಯವು ರೋಹಿತ್ ಶರ್ಮಾಗೆ ಮಹತ್ವದ ಪರೀಕ್ಷೆಯಾಗಲಿದೆ. ಗುವಾಹಟಿಯ ಕೆಂಪು ಮಣ್ಣಿನ ಪಿಚ್‌ನಲ್ಲಿ ವೇಗದ ಬೌಲರ್‌ಗಳಿಗೆ ಹೆಚ್ಚಿನ ಬೌನ್ಸ್ ಮತ್ತು ವೇಗ ಸಿಗುವ ಸಾಧ್ಯತೆಯಿದೆ. ಹೀಗಾಗಿ ಇದು ಬ್ಯಾಟರ್‌ಗಳ ತಂತ್ರಗಾರಿಕೆಯನ್ನು ಒರೆಗೆ ಹಚ್ಚಲಿದೆ. “ಪಿಚ್‌ನ ಬೌನ್ಸ್ ರೋಹಿತ್‌ಗೆ ಸವಾಲಾಗಬಹುದು. ಆದರೆ ಅವರು ಆರಂಭದಲ್ಲಿ ಎಚ್ಚರಿಕೆಯ ಆಟವಾಡುತ್ತಾರೋ ಅಥವಾ ಮೊದಲಿನಿಂದಲೇ ಆಕ್ರಮಣಕಾರಿ ಶೈಲಿಗೆ ಮೊರೆಹೋಗುತ್ತಾರೋ ಎನ್ನುವುದು ಅವರ ಪ್ಲಾನ್ ಮೇಲೆ ಅವಲಂಬಿತವಾಗಿದೆ.

ಏನೇ ಆದರೂ, ಎರಡನೇ ಪಂದ್ಯದಲ್ಲಿ ರೋಹಿತ್ ತಮ್ಮ ಹಳೆಯ ತಪ್ಪನ್ನು ತಿದ್ದಿಕೊಂಡು ದೊಡ್ಡ ಇನ್ನಿಂಗ್ಸ್ ಕಟ್ಟುವ ಮೂಲಕ ತಮ್ಮ ಕ್ಲಾಸ್ ಪ್ರದರ್ಶಿಸಲಿದ್ದಾರೆ,” ಎಂದು ಅಭಿಷೇಕ್ ನಾಯರ್ ವಿಶ್ವಾಸದ ನುಡಿಗಳನ್ನಾಡಿದ್ದಾರೆ. ರೋಹಿತ್ ಅವರ ಈ ‘ಕಮ್ ಬ್ಯಾಕ್’ ಇನ್ನಿಂಗ್ಸ್ ಕಣ್ತುಂಬಿಕೊಳ್ಳಲು ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ.

ಇದನ್ನೂ ಓದಿ : 2 ಸೆಂಟಿಮೀಟರ್‌ ಅಂತರದಲ್ಲಿ ಚಿನ್ನ ಕೈತಪ್ಪಿದ ನೋವು : ಬೆಳ್ಳಿ ಗೆದ್ದ ಬಳಿಕ ವಿಜಯ್ ಕರೆಗಾಗಿ ಕಾಯುತ್ತಿರುವ ಆ್ಯನ್ಸಿ ಸೋಜನ್!