ಬೆಂಗಳೂರು : ಬ್ರೆಂಡನ್ ಮೆಕಲಮ್ ಅವರ ನಿರ್ಗಮನದ ಬಳಿಕ ಇಂಗ್ಲೆಂಡ್ ಟೆಸ್ಟ್ ಕ್ರಿಕೆಟ್ ತಂಡದ ಮುಂದಿನ ಮುಖ್ಯ ಕೋಚ್ ಆಗಿ ನೇಮಕಗೊಳ್ಳಲು ಆಸ್ಟ್ರೇಲಿಯಾದ ಮಾಜಿ ಆರಂಭಿಕ ಆಟಗಾರ ಜಸ್ಟಿನ್ ಲ್ಯಾಂಗರ್ ಅವರ ಹೆಸರು ಮುಂಚೂಣಿಯಲ್ಲಿದೆ. ಹೊಸ ರೆಡ್-ಬಾಲ್ ಕೋಚ್ ಹುಡುಕಾಟದಲ್ಲಿರುವ ಇಂಗ್ಲೆಂಡ್ ಮತ್ತು ವೇಲ್ಸ್ ಕ್ರಿಕೆಟ್ ಮಂಡಳಿ (ಇಸಿಬಿ) ಈ ಪ್ರಕ್ರಿಯೆಯಲ್ಲಿ ಗಮನಾರ್ಹ ಮುನ್ನಡೆ ಸಾಧಿಸಿದೆ ಎಂದು ವರದಿಯಾಗಿದೆ.
ಈ ಪ್ರತಿಷ್ಠಿತ ಹುದ್ದೆಗೆ ಲ್ಯಾಂಗರ್ ಪ್ರಮುಖ ಅಭ್ಯರ್ಥಿಯಾಗಿದ್ದರೂ, ಪ್ರಸ್ತುತ ಐಪಿಎಲ್ ಫ್ರಾಂಚೈಸಿ ಲಕ್ನೋ ಸೂಪರ್ ಜೈಂಟ್ಸ್ (ಎಲ್ಎಸ್ಜಿ) ಮತ್ತು ‘ದಿ ಹಂಡ್ರೆಡ್’ ಟೂರ್ನಿಯ ಮ್ಯಾಂಚೆಸ್ಟರ್ ಸೂಪರ್ ಜೈಂಟ್ಸ್ ತಂಡಗಳೊಂದಿಗಿನ ಅವರ ಒಪ್ಪಂದಗಳು ನೇಮಕಾತಿಗೆ ಕೊಂಚ ತೊಡಕಾಗುವ ಸಾಧ್ಯತೆಯಿದೆ.
ನ್ಯೂಜಿಲೆಂಡ್ ಮೂಲದ ಬ್ರೆಂಡನ್ ಮೆಕಲಮ್ ತಮ್ಮ ಹುದ್ದೆಯಿಂದ ಕೆಳಗಿಳಿದ ನಂತರ ಅವರ ಸ್ಥಾನಕ್ಕೆ ಜಸ್ಟಿನ್ ಲ್ಯಾಂಗರ್ ಅವರನ್ನು ಆಯ್ಕೆ ಮಾಡಲು ಇಸಿಬಿ ಒಲವು ತೋರಿದೆ. ಟೈಮ್ಸ್ ಆಫ್ ಇಂಡಿಯಾ ವರದಿಯ ಪ್ರಕಾರ, ಇಸಿಬಿಯ ಕಿರುಪಟ್ಟಿಯಲ್ಲಿ ಲ್ಯಾಂಗರ್ ಪ್ರಸ್ತುತ ಅಗ್ರಸ್ಥಾನದಲ್ಲಿದ್ದಾರೆ ಹಾಗೂ ಮುಂದಿನ ದಿನಗಳಲ್ಲಿ ಈ ಕುರಿತ ಮಾತುಕತೆಗಳು ಚುರುಕುಗೊಳ್ಳುವ ನಿರೀಕ್ಷೆಯಿದೆ.
ಆದರೆ, ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ಮತ್ತು ದಿ ಹಂಡ್ರೆಡ್ನಲ್ಲಿ ಮ್ಯಾಂಚೆಸ್ಟರ್ ಸೂಪರ್ ಜೈಂಟ್ಸ್ ಜೊತೆಗಿನ ಅವರ ಕೋಚಿಂಗ್ ಬದ್ಧತೆಗಳು ಅತಿದೊಡ್ಡ ಅಡಚಣೆಯಾಗಿ ಉಳಿದಿವೆ. ಇಸಿಬಿ ಜೊತೆಗಿನ ಮಾತುಕತೆಗಳು ಯಶಸ್ವಿಯಾದರೆ ಜಸ್ಟಿನ್ ಲ್ಯಾಂಗರ್ ಅವರು ಎಲ್ಎಸ್ಜಿ ಜೊತೆಗಿನ ತಮ್ಮ ಒಪ್ಪಂದವನ್ನು ಕೊನೆಗೊಳಿಸಬಹುದು ಎಂಬ ಬಲವಾದ ಸೂಚನೆಗಳಿವೆ ಎಂದು ವರದಿ ಹೇಳಿದೆ. ಇತ್ತೀಚೆಗಷ್ಟೇ ಮಾರ್ಕಸ್ ಸ್ಟೋಯ್ನಿಸ್ ಕೂಡ ಇಂಗ್ಲೆಂಡ್ ಮುಖ್ಯ ಕೋಚ್ ಪಾತ್ರಕ್ಕೆ ಲ್ಯಾಂಗರ್ ಸೂಕ್ತ ಎಂದು ಬೆಂಬಲ ಸೂಚಿಸಿದ್ದರು.
ಇದೇ ವೇಳೆ, ಇಂಗ್ಲೆಂಡ್ ಟೆಸ್ಟ್ ಕೋಚ್ ಸ್ಥಾನಕ್ಕೆ ಭಾರತ ತಂಡದ ಮಾಜಿ ಮುಖ್ಯ ಕೋಚ್ಗಳಾದ ರವಿಶಾಸ್ತ್ರಿ ಮತ್ತು ರಾಹುಲ್ ದ್ರಾವಿಡ್ ಅವರನ್ನು ಪರಿಗಣಿಸಲಾಗುತ್ತಿದೆ ಎಂಬ ಊಹಾಪೋಹಗಳು ಎದ್ದಿದ್ದವು. ಆದರೆ, ಈ ಇಬ್ಬರೂ ದಿಗ್ಗಜರು ಇಸಿಬಿಯ ನೇಮಕಾತಿ ಪ್ರಕ್ರಿಯೆಯ ರೇಸ್ನಲ್ಲಿ ಇಲ್ಲ ಎಂದು ವರದಿಯಿಂದ ಸ್ಪಷ್ಟವಾಗಿದೆ. ಮುಂದಿನ ತಿಂಗಳು ತವರಿನಲ್ಲಿ ಪಾಕಿಸ್ತಾನ ವಿರುದ್ಧ ನಡೆಯಲಿರುವ ಸರಣಿ ಆರಂಭಕ್ಕೂ ಮುನ್ನ ತಮ್ಮ ಹೊಸ ಟೆಸ್ಟ್ ಕೋಚ್ ಅನ್ನು ನೇಮಿಸಲು ಇಂಗ್ಲೆಂಡ್ ಮಂಡಳಿ ಗುರಿಹೊಂದಿದೆ.
ಆಂಡಿ ಫ್ಲವರ್ ಹಿಂದೇಟು, ಲ್ಯಾಂಗರ್ಗೆ ಸುಗಮ ಹಾದಿ
ಇಂಗ್ಲೆಂಡ್ ತಂಡದ ಮಾಜಿ ಮುಖ್ಯ ಕೋಚ್ ಆಂಡಿ ಫ್ಲವರ್ ಅವರು ಮತ್ತೆ ಆ ಹುದ್ದೆಗೆ ಮರಳಲು ನಿರಾಕರಿಸಿರುವುದರಿಂದ ಜಸ್ಟಿನ್ ಲ್ಯಾಂಗರ್ ಇಂಗ್ಲೆಂಡ್ ಪಡೆಯ ಕೋಚ್ ಆಗಿ ನೇಮಕಗೊಳ್ಳುವ ಅವಕಾಶಗಳು ಮತ್ತಷ್ಟು ಹೆಚ್ಚಾಗಿವೆ. 2009 ಮತ್ತು 2014ರ ನಡುವೆ ತಮ್ಮ ಅಧಿಕಾರಾವಧಿಯಲ್ಲಿ ಇಂಗ್ಲೆಂಡ್ ಅನ್ನು ನಂಬರ್ ಒನ್ ಟೆಸ್ಟ್ ಶ್ರೇಯಾಂಕಕ್ಕೆ ಕೊಂಡೊಯ್ದು ಮೂರು ಆಶಸ್ ಸರಣಿ ವಿಜಯಗಳನ್ನು ತಂದುಕೊಟ್ಟಿದ್ದ ಫ್ಲವರ್, ಮೆಕಲಮ್ ನಿರ್ಗಮನದ ನಂತರ ಇಸಿಬಿಯ ಪುರುಷರ ಕ್ರಿಕೆಟ್ ವ್ಯವಸ್ಥಾಪಕ ನಿರ್ದೇಶಕ ರಾಬ್ ಕೀ ಅವರೊಂದಿಗೆ ಚರ್ಚೆ ನಡೆಸಿದ್ದರು.
ಆದರೆ, ಅವರು ರಾಷ್ಟ್ರೀಯ ತಂಡದ ಜವಾಬ್ದಾರಿಗೆ ಮರಳದಿರಲು ನಿರ್ಧರಿಸಿದ್ದಾರೆ. ಜಿಂಬಾಬ್ವೆ ಮೂಲದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ಮತ್ತು ‘ದಿ ಹಂಡ್ರೆಡ್’ ಟೂರ್ನಿಯ ಲಂಡನ್ ಸ್ಪಿರಿಟ್ ತಂಡದೊಂದಿಗಿನ ತಮ್ಮ ಪ್ರಸ್ತುತ ಕೋಚಿಂಗ್ ಪಾತ್ರಗಳಲ್ಲಿ ತೃಪ್ತರಾಗಿರುವುದಾಗಿ ಆಂಡಿ ಫ್ಲವರ್ ಸ್ಪಷ್ಟಪಡಿಸಿದ್ದಾರೆ. ಅಷ್ಟೇ ಅಲ್ಲದೆ, ಫ್ರಾಂಚೈಸಿ ಬದ್ಧತೆಗಳನ್ನು ಅಂತರಾಷ್ಟ್ರೀಯ ಕೋಚಿಂಗ್ ಸ್ಥಾನದೊಂದಿಗೆ ಸಂಯೋಜಿಸುವುದು ಸರಿಯಾದ ನಡೆಯಲ್ಲ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಅವರ ಈ ಹಿಂದೇಟು ಜಸ್ಟಿನ್ ಲ್ಯಾಂಗರ್ ಸ್ಥಾನವನ್ನು ಮತ್ತಷ್ಟು ಬಲಪಡಿಸಿದೆ.
ಬ್ರೆಂಡನ್ ಮೆಕಲಮ್ ನಿರ್ಗಮನಕ್ಕೆ ಕಾರಣಗಳೇನು?
ಇಂಗ್ಲೆಂಡ್ ಟೆಸ್ಟ್ ತಂಡದ ಕಳಪೆ ಪ್ರದರ್ಶನಗಳ ಸರಣಿಯು ಬ್ರೆಂಡನ್ ಮೆಕಲಮ್ ಅವರ ಅಧಿಕಾರಾವಧಿಯ ಅಂತ್ಯಕ್ಕೆ ಕಾರಣವಾಯಿತು. 2022 ರಲ್ಲಿ ಹುದ್ದೆ ವಹಿಸಿಕೊಂಡ ನಂತರ ನಾಯಕ ಬೆನ್ ಸ್ಟೋಕ್ಸ್ ಜೊತೆಯಾಗಿ ತಮ್ಮ ಮೊದಲ 11 ಟೆಸ್ಟ್ಗಳಲ್ಲಿ 10 ಪಂದ್ಯಗಳನ್ನು ಗೆದ್ದುಕೊಡುವ ಮೂಲಕ ಮೆಕಲಮ್ ತ್ವರಿತ ಪ್ರಭಾವ ಬೀರಿದ್ದರು. ‘ಬ್ಯಾಜ್ಬಾಲ್’ ಎಂಬ ಆಕ್ರಮಣಕಾರಿ ಶೈಲಿಯನ್ನು ಪರಿಚಯಿಸಿದ ಕೀರ್ತಿ ಅವರದ್ದಾಗಿತ್ತು. ಆದರೆ, ಆ ನಂತರದ ವರ್ಷಗಳಲ್ಲಿ ತಂಡದ ಪ್ರದರ್ಶನ ಗಮನಾರ್ಹವಾಗಿ ಕುಸಿಯಿತು.
ಮೆಕಲಮ್ ಅವರ ಅಧಿಕಾರಾವಧಿಯಲ್ಲಿ ಇಂಗ್ಲೆಂಡ್ ತಂಡ ಆಸ್ಟ್ರೇಲಿಯಾ ಅಥವಾ ಭಾರತದ ವಿರುದ್ಧ ಟೆಸ್ಟ್ ಸರಣಿಯನ್ನು ಗೆಲ್ಲಲು ವಿಫಲವಾಯಿತು ಮತ್ತು ಅವರ ಕೊನೆಯ ಒಂಬತ್ತು ಟೆಸ್ಟ್ ಪಂದ್ಯಗಳಲ್ಲಿ ಏಳನ್ನು ಸೋತಿತು. ಇತ್ತೀಚೆಗೆ ನ್ಯೂಜಿಲೆಂಡ್ ವಿರುದ್ಧ ತವರಿನಲ್ಲಿ 2-1 ಅಂತರದ ಟೆಸ್ಟ್ ಸರಣಿ ಸೋಲು ಬಿಟ್ಟ ಬಾಣದಂತಾಯಿತು ಹಾಗೂ ಇದು ಬೆನ್ ಸ್ಟೋಕ್ಸ್ ಅವರ ಟೆಸ್ಟ್ ವೃತ್ತಿಜೀವನಕ್ಕೂ ವಿದಾಯ ಹಾಡುವಂತೆ ಮಾಡಿತು. ಒಟ್ಟಾರೆಯಾಗಿ, ಮೆಕಲಮ್ ಇಂಗ್ಲೆಂಡ್ನ ಟೆಸ್ಟ್ ಕೋಚ್ ಆಗಿ 27 ಗೆಲುವುಗಳು, ಎರಡು ಡ್ರಾ ಮತ್ತು 20 ಸೋಲುಗಳ ದಾಖಲೆಯನ್ನು ಹೊಂದಿದ್ದಾರೆ. ಟೆಸ್ಟ್ ಕ್ರಿಕೆಟ್ ಜವಾಬ್ದಾರಿಯಿಂದ ಕೆಳಗಿಳಿದಿರುವ ಅವರು, ಇಂಗ್ಲೆಂಡ್ನ ಸೀಮಿತ ಓವರ್ಗಳ ಕ್ರಿಕೆಟ್ನಲ್ಲಿ ಮುಂದುವರಿಯಲಿದ್ದಾರೆ.
ಇದನ್ನೂ ಓದಿ : ‘ಬೆಂಕಿಯಿಲ್ಲದೆ ಹೊಗೆಯಾಡುವುದಿಲ್ಲ’ : ರೋಹಿತ್ ನಿವೃತ್ತಿ ವದಂತಿ ಕುರಿತು ಮೌನ ಮುರಿದ ಆರ್. ಅಶ್ವಿನ್
