ಬೆಂಗಳೂರು : ರಾಜ್ಯ ಸರ್ಕಾರದ ಮಹತ್ವಾಕಾಂಕ್ಷಿ ಶಕ್ತಿ ಯೋಜನೆ ಅಡಿಯಲ್ಲಿ ಮಹಿಳೆಯರ ಉಚಿತ ಬಸ್ ಪ್ರಯಾಣ ವ್ಯವಸ್ಥೆಯನ್ನು ಇನ್ನಷ್ಟು ಸುಧಾರಿತ ಹಾಗೂ ಪಾರದರ್ಶಕಗೊಳಿಸಲು ಸ್ಮಾರ್ಟ್ ಕಾರ್ಡ್ ಜಾರಿಗೆ ಸರ್ಕಾರ ಸಿದ್ಧತೆ ನಡೆಸಿದೆ. ಈ ಕುರಿತು ಸಚಿವ ಸಂಪುಟ ಮಟ್ಟದಲ್ಲಿ ಚರ್ಚೆ ನಡೆದಿದ್ದು, ಮೊದಲ ಹಂತದಲ್ಲಿ ಟ್ರಯಲ್ ನಡೆಸಿ ಬಳಿಕ ರಾಜ್ಯಾದ್ಯಂತ ಸಂಪೂರ್ಣ ಜಾರಿಗೆ ತರಲು ಯೋಜನೆ ರೂಪಿಸಲಾಗಿದೆ.
ಸರ್ಕಾರದ ಪ್ರಕಾರ, ಈಗಿನಂತೆ ಗುರುತಿನ ಚೀಟಿ ತೋರಿಸಿ ಟಿಕೆಟ್ ಪಡೆಯುವ ವಿಧಾನಕ್ಕೆ ಬದಲಾಗಿ ಮುಂದಿನ ದಿನಗಳಲ್ಲಿ ಸ್ಮಾರ್ಟ್ ಕಾರ್ಡ್ ಕಡ್ಡಾಯಗೊಳ್ಳುವ ಸಾಧ್ಯತೆ ಇದೆ. ಫಲಾನುಭವಿ ಮಹಿಳೆಯರಿಗೆ ಈ ಕಾರ್ಡ್ ಉಚಿತವಾಗಿ ನೀಡಲಾಗಲಿದ್ದು, ಕೆಲ ವರದಿಗಳ ಪ್ರಕಾರ ಕಾರ್ಡ್ ತಯಾರಿ ಹಾಗೂ ನಿರ್ವಹಣಾ ವೆಚ್ಚದ ಅಂದಾಜು ಸುಮಾರು 40 ಇರಬಹುದು ಎಂದು ಸಾರಿಗೆ ಇಲಾಖೆ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಹೇಗಿರಲಿದೆ ಸ್ಮಾರ್ಟ್ ಕಾರ್ಡ್?
ಈ ಕಾರ್ಡ್ ಆರೋಗ್ಯ ಇಲಾಖೆಯ ಆಯುಷ್ಮಾನ್ ಕಾರ್ಡ್ ಮಾದರಿಯಲ್ಲಿ ಇರಲಿದೆ. ಕಾರ್ಡ್ನಲ್ಲಿ ಫಲಾನುಭವಿಯ ಹೆಸರು, ದೃಢೀಕರಣ ಸಂಖ್ಯೆ, ಗುರುತಿನ ಚೀಟಿ ಸಂಖ್ಯೆ, ಫೋಟೋ, ಡಿಜಿಟಲ್ ಮಾಹಿತಿ ಹೊಂದಿರುವ ಮೈಕ್ರೋ ಚಿಪ್ ಒಳಗೊಂಡಿರಲಿವೆ.
ಟಿಕೆಟ್ ವಿತರಣೆಯ ವಿಧಾನ ಹೇಗೆ?
ಬಸ್ನಲ್ಲಿ ಟಿಕೆಟ್ ನೀಡುವ ವೇಳೆ ಕಂಡಕ್ಟರ್ಗಳು ತಮ್ಮ ETM ಯಂತ್ರದಲ್ಲಿ ಕಾರ್ಡ್ನ ದೃಢೀಕರಣ ಸಂಖ್ಯೆಯನ್ನು ನಮೂದಿಸಿ ಟಿಕೆಟ್ ನೀಡಲಿದ್ದಾರೆ. ಮುಂದಿನ ಹಂತದಲ್ಲಿ ಸ್ವೈಪಿಂಗ್ ವ್ಯವಸ್ಥೆ, ವೈಫೈ ಅಥವಾ ಟ್ಯಾಪ್ ತಂತ್ರಜ್ಞಾನ, ಡಿಜಿಟಲ್ ವೆರಿಫಿಕೇಶನ್ ಅನ್ನು ಅಳವಡಿಸುವ ಸಾಧ್ಯತೆಯೂ ಇದೆ.
ಮೊದಲಿಗೆ ಎಲ್ಲಿಗೆ ಜಾರಿ?
ಮೊದಲ ಹಂತದಲ್ಲಿ ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ ವ್ಯಾಪ್ತಿಯಲ್ಲಿ ಪ್ರಾಯೋಗಿಕವಾಗಿ (ಟ್ರಯಲ್) ಜಾರಿಗೆ ತರಲು ಚಿಂತನೆ ನಡೆದಿದೆ. ಸಾಧಕ-ಬಾಧಕಗಳನ್ನು ಪರಿಶೀಲಿಸಿದ ಬಳಿಕ ಇತರೆ ಸಾರಿಗೆ ನಿಗಮಗಳಿಗೂ ವಿಸ್ತರಣೆ ಸಾಧ್ಯತೆ ಇದೆ.
ಸರ್ಕಾರ ಈ ಕ್ರಮದ ಮೂಲಕ ನಕಲಿ ಪ್ರಯಾಣ ತಡೆ, ಫಲಾನುಭವಿಗಳ ನಿಖರ ಡೇಟಾಬೇಸ್, ಡಿಜಿಟಲ್ ಟ್ರ್ಯಾಕಿಂಗ್, ವೇಗವಾದ ಟಿಕೆಟ್ ವಿತರಣೆ, ಯೋಜನೆಯ ಹಣಕಾಸು ಪಾರದರ್ಶಕತೆ ಇವುಗಳನ್ನು ಸಾಧಿಸಲು ಮುಂದಾಗಿದೆ. ಸದ್ಯ ಟೆಂಡರ್ ಪ್ರಕ್ರಿಯೆ ನಡೆಯುತ್ತಿದ್ದು ಅಧಿಕೃತ ಘೋಷಣೆ ಮತ್ತು ನೋಂದಣಿ ವಿಧಾನ ಕೆಲವೇ ದಿನಗಳಲ್ಲಿ ಪ್ರಕಟವಾಗುವ ಸಾಧ್ಯತೆ ಇದೆ.
ಇದನ್ನೂ ಓದಿ : CBSE ಮೌಲ್ಯಮಾಪನ ಎಡವಟ್ಟು : ಹಗರಣದ ಕಳಂಕ ಹೊತ್ತಿದ್ದ ಹೈದರಾಬಾದ್ ಕಂಪನಿಯ ಮೇಲೆ ಕಣ್ಣು!
