ಬೆಂಗಳೂರು: ಐಪಿಎಲ್ ಕೇವಲ ಬೌಂಡರಿ, ಸಿಕ್ಸರ್ಗಳ ಆಟವಲ್ಲ, ಇಲ್ಲಿ ಭಾವನೆಗಳಿಗೂ ಬೆಲೆಯಿದೆ ಎಂಬುದನ್ನು ಪಂಜಾಬ್ ಕಿಂಗ್ಸ್ ತಂಡ ಮತ್ತೊಮ್ಮೆ ಸಾಬೀತುಪಡಿಸಿದೆ. ತಮ್ಮ ತವರಿನ ಪಂದ್ಯವೊಂದರ ವೇಳೆ ಸಿಕ್ಸರ್ ಬಡಿದ ಚೆಂಡು ತಗುಲಿ ಗಾಯಗೊಂಡಿದ್ದ ವೃದ್ಧ ಅಭಿಮಾನಿಯೊಬ್ಬರನ್ನು ಸಂಪರ್ಕಿಸಿರುವ ಪಂಜಾಬ್ ಕಿಂಗ್ಸ್ ಫ್ರಾಂಚೈಸಿ, ಇದೀಗ ಅವರ ನೋವಿನ ಕ್ಷಣವನ್ನು ಮರೆಯಲಾಗದ ಸಿಹಿ ನೆನಪಾಗಿ ಪರಿವರ್ತಿಸಿದೆ. ಪಂಜಾಬ್ ತಂಡದ ಈ ಹೃದಯವಂತಿಕೆಯ ಕಾರ್ಯ ಇದೀಗ ಕ್ರಿಕೆಟ್ ವಲಯದಲ್ಲಿ ಭಾರಿ ಮೆಚ್ಚುಗೆಗೆ ಪಾತ್ರವಾಗಿದೆ.
ಮುಲ್ಲನ್ಪುರ್ ಕ್ರೀಡಾಂಗಣದಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ಹಾಗೂ ಪಂಜಾಬ್ ಕಿಂಗ್ಸ್ ನಡುವಿನ ಐಪಿಎಲ್ 2026ರ ರೋಚಕ ಪಂದ್ಯ ನಡೆಯುತ್ತಿತ್ತು. ಪಂಜಾಬ್ ತಂಡದ ಆರಂಭಿಕ ಆಟಗಾರ ಪ್ರಿಯಾಂಶು ಆರ್ಯ ಅವರು ಭರ್ಜರಿ ಹೊಡೆತವೊಂದನ್ನು ಸಿಡಿಸಿದ್ದರು.
ಈ ವೇಳೆ ಚೆಂಡು ನೇರವಾಗಿ ಗ್ಯಾಲರಿಯಲ್ಲಿ ಕುಳಿತಿದ್ದ ವಯೋವೃದ್ಧ ಅಭಿಮಾನಿ ಕೃಷ್ಣ ಚಂದ್ ಅವರ ಮುಖಕ್ಕೆ ಬಲವಾಗಿ ಅಪ್ಪಳಿಸಿತ್ತು. ಚೆಂಡು ಬಡಿದ ರಭಸಕ್ಕೆ ಅವರ ಮುಖದಿಂದ ರಕ್ತ ಸುರಿಯಲಾರಂಭಿಸಿತ್ತು. ಇದನ್ನು ಕಂಡು ಅಕ್ಕಪಕ್ಕದ ಪ್ರೇಕ್ಷಕರು ಕೂಡ ಆತಂಕಗೊಂಡಿದ್ದರು. ತಕ್ಷಣವೇ ನೆರೆದಿದ್ದ ಇತರ ಅಭಿಮಾನಿಗಳು ಅವರ ನೆರವಿಗೆ ಧಾವಿಸಿ, ಸಮೀಪದ ಆಸ್ಪತ್ರೆಗೆ ಚಿಕಿತ್ಸೆಗಾಗಿ ಕರೆದೊಯ್ದರು. ಗಾಯದ ತೀವ್ರತೆಗೆ ಅವರ ಹುಬ್ಬಿನ ಬಳಿ ಹೊಲಿಗೆಗಳನ್ನು ಸಹ ಹಾಕಲಾಗಿತ್ತು. ರಕ್ತಸಿಕ್ತ ಮುಖದೊಂದಿಗೆ ಅವರು ಅನುಭವಿಸಿದ ನೋವಿನ ದೃಶ್ಯಗಳು ಎಲ್ಲರನ್ನೂ ಕಳವಳಗೊಳಿಸಿತ್ತು.
ನೆರವಿಗೆ ಧಾವಿಸಿದ ಪಂಜಾಬ್ ಕಿಂಗ್ಸ್
ಈ ದುರದೃಷ್ಟಕರ ಘಟನೆಯ ಬಗ್ಗೆ ಮಾಹಿತಿ ತಿಳಿದ ಕೂಡಲೇ ಪಂಜಾಬ್ ಕಿಂಗ್ಸ್ ಫ್ರಾಂಚೈಸಿ ಸುಮ್ಮನೆ ಕೂರಲಿಲ್ಲ. ಗಾಯಗೊಂಡ ಅಭಿಮಾನಿ ಕೃಷ್ಣ ಚಂದ್ ಹಾಗೂ ಅವರ ಕುಟುಂಬವನ್ನು ಫ್ರಾಂಚೈಸಿಯ ಅಧಿಕಾರಿಗಳು ತಕ್ಷಣವೇ ಸಂಪರ್ಕಿಸಿದರು. ಕೇವಲ ವಿಚಾರಣೆಗಷ್ಟೇ ಸೀಮಿತವಾಗದೆ, ಆಟಗಾರ ಪ್ರಿಯಾಂಶು ಆರ್ಯ ಹಾಗೂ ತಂಡದ ಸಹ-ಮಾಲಕಿ ಪ್ರೀತಿ ಜಿಂಟಾ ಅವರು ವಿಡಿಯೋ ಕರೆ (Zoom Call) ಮೂಲಕ ಕೃಷ್ಣ ಚಂದ್ ಮತ್ತು ಅವರ ಪುತ್ರನೊಂದಿಗೆ ನೇರವಾಗಿ ಮಾತನಾಡಿದರು. ಕರೆಯಲ್ಲಿ ಮಾತನಾಡಿದ ಪ್ರಿಯಾಂಶು ಆರ್ಯ, ವಿಡಿಯೋ ನೋಡಿದಾಗಿನಿಂದಲೂ ತಮಗೆ ತುಂಬಾ ಆತಂಕವಾಗಿತ್ತು ಎಂದು ಹೇಳಿ, ಅಭಿಮಾನಿಯ ಆರೋಗ್ಯ ವಿಚಾರಿಸಿದರು. ಇದಕ್ಕೆ ನಗುಮುಖದಿಂದಲೇ ಪ್ರತಿಕ್ರಿಯಿಸಿದ ಕೃಷ್ಣ ಚಂದ್, ನಿಮ್ಮೆಲ್ಲರ ಆಶೀರ್ವಾದದಿಂದ ತಾನು ಗುಣಮುಖನಾಗುತ್ತಿದ್ದೇನೆ ಎಂದು ಭರವಸೆ ನೀಡಿದರು. ಪ್ರೀತಿ ಜಿಂಟಾ ಕೂಡ ಘಟನೆಯ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿ, “ನಮ್ಮ ಪಾಲಿಗೆ ಅಭಿಮಾನಿಗಳೇ ಮೊದಲು” ಎಂಬ ಸ್ಪಷ್ಟ ಸಂದೇಶವನ್ನು ರವಾನಿಸಿದರು.
ಧರ್ಮಶಾಲಾ ಪಂದ್ಯಕ್ಕೆ ವಿಶೇಷ ಆಹ್ವಾನ
ಅಭಿಮಾನಿ ಕೃಷ್ಣ ಚಂದ್ ಅವರ ಉತ್ಸಾಹವನ್ನು ಕಂಡ ಆಟಗಾರ ಪ್ರಿಯಾಂಶು ಆರ್ಯ, ಧರ್ಮಶಾಲಾದಲ್ಲಿ ನಡೆಯಲಿರುವ ಮುಂದಿನ ಪಂದ್ಯವನ್ನು ವೀಕ್ಷಿಸಲು ಬರುವಂತೆ ವೈಯಕ್ತಿಕವಾಗಿ ಆಹ್ವಾನ ನೀಡಿದರು. ಈ ಆಹ್ವಾನವನ್ನು ಅಧಿಕೃತಗೊಳಿಸಿದ ಪ್ರೀತಿ ಜಿಂಟಾ, ಕೃಷ್ಣ ಚಂದ್ ಅವರನ್ನು ಪಂಜಾಬ್ ಕಿಂಗ್ಸ್ ತಂಡದ ‘ವಿಶೇಷ ಅತಿಥಿ’ಯಾಗಿ ಧರ್ಮಶಾಲಾ ಪಂದ್ಯಕ್ಕೆ ಬರುವಂತೆ ಆಗ್ರಹಪೂರ್ವಕವಾಗಿ ಮನವಿ ಮಾಡಿದರು. ಇದೇ ವೇಳೆ ತಮಾಷೆಯಾಗಿ ಮಾತನಾಡಿದ ಪ್ರೀತಿ ಜಿಂಟಾ, “ನೀವು ಖಂಡಿತಾ ಧರ್ಮಶಾಲಾಗೆ ಬರಬೇಕು. ಈ ಬಾರಿ ನಿಮಗೆ ಚೆಂಡು ತಗುಲದಂತೆ ರಕ್ಷಿಸಲು ನಾವೇ ಖುದ್ದಾಗಿ ಒಂದು ಹೆಲ್ಮೆಟ್ ವ್ಯವಸ್ಥೆ ಮಾಡುತ್ತೇವೆ, ಇದರಿಂದ ನೀವು ಸಂಪೂರ್ಣ ಸುರಕ್ಷಿತವಾಗಿ ಪಂದ್ಯವನ್ನು ಆನಂದಿಸಬಹುದು” ಎಂದು ನಗುತ್ತಲೇ ಹೇಳಿದರು.
ಮೈದಾನದಲ್ಲಿನ ಅದ್ಭುತ ಪ್ರದರ್ಶನದ ಜೊತೆಗೆ, ಮೈದಾನದ ಹೊರಗೂ ಪಂಜಾಬ್ ಕಿಂಗ್ಸ್ ತನ್ನ ಅಭಿಮಾನಿಗಳ ಮೇಲಿನ ಕಾಳಜಿಯ ಮೂಲಕ ನೈಜ ಚಾಂಪಿಯನ್ ಎನಿಸಿಕೊಂಡಿದೆ. ಕ್ರಿಕೆಟ್ ಎಂಬುದು ಕೇವಲ ಒಂದು ಆಟವಲ್ಲ, ಅದೊಂದು ಭಾವನಾತ್ಮಕ ಬೆಸುಗೆ ಎನ್ನುವುದನ್ನು ಈ ಘಟನೆ ಎತ್ತಿ ತೋರಿಸುತ್ತದೆ. ಕೃಷ್ಣ ಚಂದ್ ಅವರು ಇದೀಗ ಹೆಚ್ಚಿನ ಭದ್ರತೆ ಮತ್ತು ಹೆಲ್ಮೆಟ್ನೊಂದಿಗೆ ಧರ್ಮಶಾಲಾ ಕ್ರೀಡಾಂಗಣದಲ್ಲಿ ಪಂಜಾಬ್ ತಂಡವನ್ನು ಹುರಿದುಂಬಿಸಲು ಉತ್ಸಾಹದಿಂದ ಸಜ್ಜಾಗಿದ್ದಾರೆ.
ಇದನ್ನೂ ಓದಿ : ಶುಭಮನ್ ಗಿಲ್ ನಾಯಕತ್ವ ಕಂಡು ಬೆರಗಾದ ರವಿಚಂದ್ರನ್ ಅಶ್ವಿನ್!
