ಬೆಂಗಳೂರು : ಇದೇ ಭಾನುವಾರ ಅಂದರೆ, ಏಪ್ರಿಲ್ 19ರಂದು ದೇಶಾದ್ಯಂತ ಅಕ್ಷಯ ತೃತೀಯದ ಶುಭ ದಿನ. ಈ ದಿನ ಚಿನ್ನವನ್ನು ಖರೀದಿಸುವುದು ಸಂಪ್ರದಾಯ ಹಾಗೂ ಮನೆಯಲ್ಲಿ ಸಮೃದ್ಧಿ ನೆಲೆಸುತ್ತದೆ ಎಂಬ ನಂಬಿಕೆ ಇದೆ. ಹಾಗಾಗಿ, ಅಕ್ಷಯ ತೃತೀಯ ದಿನದಂದು ಗುಲಗಂಜಿಯಷ್ಟಾದರೂ ಚಿನ್ನ ಖರೀದಿಸಬೇಕು ಎಂಬುದು ರೂಢಿಯಲ್ಲಿರುವ ಮಾತು. ಅದರಂತೆ, ಕೋಟ್ಯಂತರ ಜನ ಅಕ್ಷಯ ತೃತೀಯದ ದಿನ ಚಿನ್ನ ಖರೀದಿಸುತ್ತಾರೆ. ಅಷ್ಟೇ ಅಲ್ಲ, 2025ರ ಅಕ್ಷಯ ತೃತೀಯ ದಿನ ಚಿನ್ನ ಮಾತ್ರವಲ್ಲ, ಬೆಳ್ಳಿಯನ್ನು ಖರೀದಿಸಿದವರಿಗೆ ಈ ಬಾರಿ ಲಾಭವಾಗಿದೆ.
ಹೌದು, 2025ರ ಏಪ್ರಿಲ್ 30ರಂದು ಅಕ್ಷಯ ತೃತೀಯ ಆಚರಿಸಲಾಯಿತು. ಆಗ ಯಾರು ಬೆಳ್ಳಿಯ ಮೇಲೆ ಹೂಡಿಕೆ ಮಾಡಿದ್ದಾರೋ, ಬೆಳ್ಳಿಯನ್ನು ಖರೀದಿಸಿದ್ದಾರೋ, ಅವರಿಗೆಲ್ಲ ಸುಮಾರು ಶೇ.165ರಷ್ಟು ಲಾಭ ದೊರೆತಿದೆ. 2025ರ ಏಪ್ರಿಲ್ 30ರಂದು ಒಂದು ಕೆ.ಜಿ ಬೆಳ್ಳಿ ಬೆಲೆಯು 1 ಲಕ್ಷ ರೂಪಾಯಿ ಆಸುಪಾಸು ಇತ್ತು. ಆಗ ಯಾರಾದರೂ ಒಂದು ಕೆ.ಜಿ ಬೆಳ್ಳಿ ಖರೀದಿಸಿದ್ದರೆ ಈಗ ಅದರ ಬೆಲೆ 2.65 ಲಕ್ಷ ರೂ. ಆಗುತ್ತಿತ್ತು.
ಅಲ್ಲಿಗೆ, ಕಳೆದ ಒಂದು ವರ್ಷದಲ್ಲಿಯೇ ಬೆಳ್ಳಿಯ ಮೇಲಿನ ಹೂಡಿಕೆಯಿಂದ 1.65 ಲಕ್ಷ ರೂಪಾಯಿ ಲಾಭ ಸಿಗುತ್ತಿತ್ತು. ಹಾಗಾಗಿ, ಅಕ್ಷಯ ತೃತೀಯ ದಿನ ಬೆಳ್ಳಿ ಖರೀದಿಸಿದವರಿಗೂ ಉತ್ತಮ ಲಾಭ ದೊರೆತಿದೆ. ಇನ್ನು, ಕಳೆದ ವರ್ಷದ ಅಕ್ಷಯ ತೃತೀಯದ ದಿನ ಚಿನ್ನ ಖರೀದಿಸಿದವರಿಗೂ ಭರ್ಜರಿ ರಿಟರ್ನ್ಸ್ ದೊರೆತಿದೆ. ಕಳೆದ ಒಂದು ವರ್ಷದಲ್ಲಿ ಚಿನ್ನದ ಬೆಲೆಯಲ್ಲಿ ಶೇ.60ರಷ್ಟು ಏರಿಕೆಯಾಗಿರುವುದರಿಂದ ಖರೀದಿಸಿದ ಚಿನ್ನದ ಮೌಲ್ಯದಲ್ಲಿ ಏರಿಕೆಯಾಗಿದೆ.
2025ರ ಏಪ್ರಿಲ್ 30ರಂದು 22 ಕ್ಯಾರೆಟ್ ನ 10 ಗ್ರಾಂ ಚಿನ್ನದ ಬೆಲೆಯು 90 ಸಾವಿರ ರೂಪಾಯಿ ಇತ್ತು. ಈಗ ಇದೇ ಚಿನ್ನದ ಬೆಲೆಯು 1.4 ಲಕ್ಷ ರೂಪಾಯಿ ದಾಟಿದೆ. ಅಂದರೆ, ಒಂದೇ ವರ್ಷದಲ್ಲಿ 10 ಗ್ರಾಂ ಚಿನ್ನದ ಮೇಲೆ ಹೂಡಿಕೆ ಮಾಡಿದವರಿಗೆ 50 ಸಾವಿರ ರೂಪಾಯಿ ರಿಟರ್ನ್ಸ್ ದೊರೆತಿದೆ.
ಗಮನಿಸಿ
ಕಳೆದ ಒಂದು ವರ್ಷದ ಚಿನ್ನ ಹಾಗೂ ಬೆಳ್ಳಿಯ ಬೆಲೆಯನ್ನು ವಿಶ್ಲೇಷಣೆ ಮಾಡಲಾಗಿದೆ ಅಷ್ಟೆ. ಇದು ಚಿನ್ನ ಹಾಗೂ ಬೆಳ್ಳಿಯನ್ನು ಖರೀದಿಸಲು ನಾವು ಶಿಫಾರಸು ಮಾಡುತ್ತಿಲ್ಲ. ಮಾಹಿತಿ ನೀಡುವ ದೃಷ್ಟಿಯಿಂದ ಮಾತ್ರ ಲೇಖನವನ್ನು ಪ್ರಕಟಿಸಿದ್ದೇವೆ. ಜಾಗತಿಕ ಭೌಗೋಳಿಕ ಸಂಘರ್ಷ ಸೇರಿ ಹಲವು ಕಾರಣದಿಂದಾಗಿ ಚಿನ್ನ, ಬೆಳ್ಳಿಯ ಬೆಲೆಯಲ್ಲೂ ಏರಿಳಿತವಾಗುತ್ತಿದೆ. ಹಾಗಾಗಿ, ಹೂಡಿಕೆ ದೃಷ್ಟಿಯಿಂದ ಚಿನ್ನ, ಬೆಳ್ಳಿ ಖರೀದಿಸುವವರು ಪರಿಣತರ ಸಲಹೆ ಪಡೆಯುವುದು ಉತ್ತಮ.
ಇದನ್ನೂ ಓದಿ : ಪಾಂಡ್ಯ ಮೌನದ ಹಿಂದಿನ ಮರ್ಮ ಬಿಚ್ಚಿಟ್ಟ ಆರ್.ಅಶ್ವಿನ್!
