ಹೊರ್ಮುಜ್ ಜಲಸಂಧಿಯಲ್ಲಿ ಹೂತಿಟ್ಟ ಸ್ಫೋಟಕಗಳ ನಿಖರ ಸ್ಥಳ ಗೊತ್ತಾಗದೆ ಪೇಚಿಗೆ ಸಿಲುಕಿದ ಇರಾನ್!

ಟೆಹ್ರಾನ್/ಇಸ್ಲಾಮಾಬಾದ್ : ಕದನ ವಿರಾಮ ಒಪ್ಪಂದದಂತೆ ವಿಶ್ವದ ತೈಲ ಸಾಗಣೆಯ ಜೀವನಾಡಿಯಾಗಿರುವ ಹೊರ್ಮುಜ್ ಜಲಸಂಧಿಯನ್ನು ತೆರೆಯಲು ಇರಾನ್ ಮುಂದಾಗಿದೆಯಾದರೂ, ಅದಕ್ಕೆ ಹೊಸ ಸಂಕಷ್ಟವೊಂದು ಎದುರಾಗಿದೆ. ಯುದ್ಧದ ಸಮಯದಲ್ಲಿ ಜಲಸಂಧಿಯನ್ನು ಬಂದ್ ಮಾಡಲು ಇರಾನ್ ಸಮುದ್ರದ ಅಡಿಯಲ್ಲಿ ಹಲವಾರು ಸ್ಫೋಟಕ (Sea Mines)ಗಳನ್ನು ಹೂತಿಟ್ಟಿದ್ದು, ಈಗ ಅವುಗಳ ನಿಖರ ಸ್ಥಳವನ್ನು ಪತ್ತೆಹಚ್ಚಲು ಇರಾನ್‌ಗೆ ಸಾಧ್ಯವಾಗುತ್ತಿಲ್ಲ ಎಂದು ವರದಿಗಳು ಹೇಳಿವೆ. ಇದು ಅಮೆರಿಕದೊಂದಿಗೆ ಇಸ್ಲಾಮಾಬಾದ್‌ನಲ್ಲಿ ನಡೆಯಲಿರುವ ಶಾಂತಿ ಮಾತುಕತೆಯ ಮೇಲೆ ಕಪ್ಪುಛಾಯೆ ಬೀರಿದೆ.

ಗೋಜಲಾದ ಸ್ಫೋಟಕಗಳ ಜಾಲ

ಕಳೆದ ತಿಂಗಳು ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ವೈಮಾನಿಕ ದಾಳಿಗೆ ಪ್ರತಿಕಾರವಾಗಿ ಇರಾನ್ ಸಣ್ಣ ದೋಣಿಗಳ ಮೂಲಕ ಹೊರ್ಮುಜ್ ಜಲಸಂಧಿಯಲ್ಲಿ ಬೇಕಾಬಿಟ್ಟಿಯಾಗಿ ಸ್ಫೋಟಕಗಳನ್ನು ಅಳವಡಿಸಿತ್ತು. ಆದರೆ, ‘ದ ನ್ಯೂಯಾರ್ಕ್ ಟೈಮ್ಸ್’ ವರದಿಯ ಪ್ರಕಾರ, ಈ ಸ್ಫೋಟಕಗಳನ್ನು ಎಲ್ಲಿ ಇರಿಸಲಾಗಿದೆ ಎಂಬುದರ ನಿಖರ ದಾಖಲೆಗಳು ಇರಾನ್ ಬಳಿ ಇಲ್ಲ ಎನ್ನಲಾಗಿದೆ. ಕೆಲವು ಸ್ಫೋಟಕಗಳನ್ನು ಅಲೆಗಳಿಗೆ ತಕ್ಕಂತೆ ಚಲಿಸುವಂತೆ ವಿನ್ಯಾಸಗೊಳಿಸಲಾಗಿದ್ದು, ಅವು ಈಗ ಎಲ್ಲೆಲ್ಲಿ ಹರಡಿವೆ ಎಂಬುದು ಸ್ವತಃ ಇರಾನ್ ಸೇನೆಗೂ ತಿಳಿಯದಂತಾಗಿದೆ. ಅಮೆರಿಕ ಅಧಿಕಾರಿಗಳ ಪ್ರಕಾರ, ಇರಾನ್ ಅತ್ಯಂತ “ಅವೈಜ್ಞಾನಿಕವಾಗಿ” ಈ ಸ್ಫೋಟಕಗಳನ್ನು ಅಳವಡಿಸಿದೆ.

ವಿಶ್ವದ ಒಟ್ಟು ತೈಲ ಪೂರೈಕೆಯ ಶೇ.25ರಷ್ಟು ಭಾಗ ಈ ಜಲಸಂಧಿಯ ಮೂಲಕವೇ ಸಾಗುತ್ತದೆ. ಭಾರತಕ್ಕೆ ಬೇಕಾದ ಶೇ.80ರಷ್ಟು ಇಂಧನ ಕೂಡ ಇದೇ ಮಾರ್ಗದಲ್ಲಿ ಬರುತ್ತದೆ. ಇಸ್ಲಾಮಾಬಾದ್‌ ಶಾಂತಿ ಮಾತುಕತೆಗೆ ಮೊದಲೇ ಡೊನಾಲ್ಡ್ ಟ್ರಂಪ್, ಹೊರ್ಮುಜ್ ಜಲಸಂಧಿಯನ್ನು ತಕ್ಷಣವೇ ತೆರೆಯುವಂತೆ ಇರಾನ್‌ಗೆ ಖಡಕ್ ಗಡುವು ನೀಡಿದ್ದರು. ಈಗ ಕದನ ವಿರಾಮಕ್ಕೆ ಒಪ್ಪಿಕೊಂಡಿದ್ದರೂ, ಸ್ಫೋಟಕಗಳ ಭಯದಿಂದಾಗಿ ಪೂರ್ಣ ಪ್ರಮಾಣದ ಹಡಗು ಸಂಚಾರ ಆರಂಭಿಸಲು ಸಾಧ್ಯವಾಗುತ್ತಿಲ್ಲ. ಇದು ಟ್ರಂಪ್ ಆಡಳಿತವನ್ನು ಮತ್ತಷ್ಟು ಕೆರಳಿಸುವ ಸಾಧ್ಯತೆಯಿದೆ.

ಪರ್ಯಾಯ ಮಾರ್ಗಗಳ ಸೂಚನೆ

ಜಲಸಂಧಿಯಲ್ಲಿ ಸ್ಫೋಟಕಗಳು ಸಿಡಿಯುವ ಅಪಾಯವಿರುವುದನ್ನು ಇರಾನ್‌ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಕೂಡ ಒಪ್ಪಿಕೊಂಡಿದೆ. ಹಡಗುಗಳು ಸ್ಫೋಟಕಗಳಿಗೆ ಡಿಕ್ಕಿ ಹೊಡೆಯುವುದನ್ನು ತಪ್ಪಿಸಲು ಇರಾನ್ ಇದೀಗ ಪರ್ಯಾಯ ಮಾರ್ಗಗಳ ನಕ್ಷೆಯನ್ನು ಬಿಡುಗಡೆ ಮಾಡಿದೆ. “ಮೂಲ ಮಾರ್ಗದಲ್ಲಿ ಸಮುದ್ರ ಮೈನ್‌ಗಳ ಅಪಾಯವಿರುವುದರಿಂದ, ಸಾಗರ ಸುರಕ್ಷತೆಯ ಹಿತದೃಷ್ಟಿಯಿಂದ ಹಡಗುಗಳು ನಾವು ಸೂಚಿಸಿದ ಪರ್ಯಾಯ ಹಾದಿಯಲ್ಲೇ ಚಲಿಸಬೇಕು” ಎಂದು ಇರಾನ್ ಸೇನೆ ಅಧಿಕೃತ ಪ್ರಕಟಣೆಯಲ್ಲಿ ತಿಳಿಸಿದೆ. ತಾನು ಹೂತ ಸ್ಫೋಟಕಗಳೇ ಇರಾನ್‌ಗೆ ಈಗ ಉರುಳಾಗಿ ಪರಿಣಮಿಸಿದ್ದು, ಒಂದು ವೇಳೆ ಈ ಮಾರ್ಗದಲ್ಲಿ ಯಾವುದಾದರೂ ಹಡಗು ಸ್ಫೋಟಕ್ಕೆ ಬಲಿಯಾದರೆ ಇಸ್ಲಾಮಾಬಾದ್ ಶಾಂತಿ ಮಾತುಕತೆಯು ಹಳಿ ತಪ್ಪುವ ಭೀತಿ ಎದುರಾಗಿದೆ. ಅಲ್ಲದೆ ಜಾಗತಿಕ ತೈಲ ದರವೂ ಗಗನಕ್ಕೇರುವ ಅಪಾಯವಿದೆ.

ಇದನ್ನೂ ಓದಿ : ಟಿ20 ಕ್ರಿಕೆಟ್‌ನಲ್ಲಿ ಜಡೇಜಾ ಹೊಸ ಇತಿಹಾಸ.. 4 ಸಾವಿರ ರನ್, 200 ವಿಕೆಟ್‌ಗಳ ಅಪರೂಪದ ಮೈಲಿಗಲ್ಲು!