ಬೆಂಗಳೂರು: ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆಯಲು ವಿಭಿನ್ನ ರೀತಿಯ ರೀಲ್ಸ್ ಮಾಡುವ ಟ್ರೆಂಡ್ ನಡುವೆ, ಬೆಂಗಳೂರಿನಲ್ಲಿ ನಡೆದ ಘಟನೆಯೊಂದು ಇದೀಗ ಭಾರೀ ಚರ್ಚೆಗೆ ಗ್ರಾಸವಾಗಿದೆ. ತುಂಡು ತುಂಡುಗೆ ತೊಟ್ಟು ರಸ್ತೆಯಲ್ಲಿ ರೀಲ್ಸ್ ಮಾಡುತ್ತಿದ್ದ ಯುವತಿಗೆ ಹಿರಿಯ ಮಹಿಳೆಯೊಬ್ಬರು ಬುದ್ಧಿವಾದ ಹೇಳುತ್ತಿರುವ ವಿಡಿಯೊ ಒಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಈ ವಿಡಿಯೊದಲ್ಲಿ ಯುವತಿ ರಸ್ತೆಯ ಮಧ್ಯೆ ರೀಲ್ಸ್ ಚಿತ್ರೀಕರಣ ಮಾಡುತ್ತಿದ್ದ ವೇಳೆ, ಅಜ್ಜಿಯೊಬ್ಬರು ಬಳಿ ಬಂದು ಆಕೆಯ ಉಡುಗೆ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸುತ್ತಾರೆ.
ಯುವತಿಯ ಉಡುಗೆ ನೋಡಿ, “ಏನಮ್ಮಾ ನಿನ್ನ ವೇಷ? ದಯವಿಟ್ಟು ಬಟ್ಟೆ ಬದಲಿಸು” ಎಂಬ ಅರ್ಥದಲ್ಲಿ ಅಜ್ಜಿ ಸನ್ನೆ ಮುಖೇನ ಸೂಚಿಸುತ್ತಿರುವುದು ವಿಡಿಯೊದಲ್ಲಿ ಕಾಣಿಸುತ್ತದೆ. ಇದಕ್ಕೆ ಯುವತಿ ನಗುತಲೇ ಪ್ರತಿಕ್ರಿಯಿಸಿ ಅಲ್ಲಿಂದ ತೆರಳಿರುವುದು ದೃಶ್ಯದಲ್ಲಿದೆ.
ಮೂಲಗಳ ಪ್ರಕಾರ, ಈ ವಿಡಿಯೊವನ್ನು ಶ್ರಿಯಾಂಶಿ ಎಂಬ ಯುವತಿ ತನ್ನ ಸಾಮಾಜಿಕ ಜಾಲತಾಣ ಖಾತೆಯಲ್ಲಿ ಹಂಚಿಕೊಂಡಿದ್ದಾಳೆ. ಆದರೆ ವಿಡಿಯೊ ವೈರಲ್ ಆಗಿ ನೆಟ್ಟಿಗರಿಂದ ಟೀಕೆಗಳು ಕೇಳಿಬಂದ ಹಿನ್ನೆಲೆಯಲ್ಲಿ, ಆಕೆ ಬಳಿಕ ಪೋಸ್ಟ್ ಅನ್ನು ಅಳಿಸಿದ್ದಾಳೆ ಎಂದು ತಿಳಿದುಬಂದಿದೆ. ಈ ಘಟನೆ ಸಾಮಾಜಿಕ ಮಾಧ್ಯಮ ಬಳಕೆ, ಸಾರ್ವಜನಿಕ ಸ್ಥಳಗಳಲ್ಲಿ ವರ್ತನೆ ಹಾಗೂ ಉಡುಗೆ ಕುರಿತ ಚರ್ಚೆಗಳಿಗೆ ಮತ್ತೆ ವೇದಿಕೆ ಕಲ್ಪಿಸಿದೆ.
ಇದನ್ನೂ ಓದಿ : ವ್ಯಕ್ತಿಯ ಕತ್ತು ಸೀಳಿ ಆರೋಪಿ ಎಸ್ಕೇಪ್.. ರಕ್ತದ ಮಡುವಲ್ಲಿ ಒದ್ದಾಡ್ತಿದ್ದವನ ಪ್ರಾಣ ಉಳಿಸಿದ ಪೊಲೀಸರು!
