ಡಾಕಾ: ಇಲ್ಲಿನ ಶೇರ್ ಬಾಂಗ್ಲಾ ರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಶುಕ್ರವಾರ ನಡೆದ ಬಾಂಗ್ಲಾದೇಶ ಮತ್ತು ಪಾಕಿಸ್ತಾನ ನಡುವಿನ ಎರಡನೇ ಏಕದಿನ ಪಂದ್ಯವು ಒಂದು ವಿಚಿತ್ರ ಹಾಗೂ ವಿವಾದಾತ್ಮಕ ರನ್ ಔಟ್ ಘಟನೆಗೆ ಸಾಕ್ಷಿಯಾಗಿದೆ. ಪಾಕಿಸ್ತಾನದ ಬ್ಯಾಟರ್ ಸಲ್ಮಾನ್ ಅಲಿ ಆಘಾ ಅವರು ಬಾಂಗ್ಲಾದೇಶದ ನಾಯಕ ಮೆಹಿದಿ ಹಸನ್ ಮಿರಾಜ್ ಅವರಿಂದ ರನ್ ಔಟ್ ಆದ ಪರಿ ಇದೀಗ ಕ್ರಿಕೆಟ್ ವಲಯದಲ್ಲಿ ‘ಸ್ಪಿರಿಟ್ ಆಫ್ ಕ್ರಿಕೆಟ್’ (ಕ್ರೀಡಾಸ್ಫೂರ್ತಿ) ಕುರಿತಾಗಿ ಮತ್ತೊಮ್ಮೆ ಬಿಸಿಬಿಸಿ ಚರ್ಚೆಯನ್ನು ಹುಟ್ಟುಹಾಕಿದೆ.
ಕ್ರೀಸ್ನಲ್ಲಿದ್ದ ಬ್ಯಾಟರ್ನ ಅಜಾಗರೂಕತೆ ಹಾಗೂ ಎದುರಾಳಿ ನಾಯಕನ ಸಮಯಪ್ರಜ್ಞೆ ಈ ಘಟನೆಯ ಕೇಂದ್ರಬಿಂದುವಾಗಿದ್ದು, ಕ್ರೀಡಾಭಿಮಾನಿಗಳಲ್ಲಿ ಪರ-ವಿರೋಧದ ಅಲೆಗಳು ಸೃಷ್ಟಿಯಾಗಿವೆ.’
39ನೇ ಓವರ್ನ ಹೈಡ್ರಾಮಾ ಹಾಗೂ ಅನಿರೀಕ್ಷಿತ ಘರ್ಷಣೆ
ಪಂದ್ಯದಲ್ಲಿ ಬಾಂಗ್ಲಾದೇಶ ತಂಡವು ಟಾಸ್ ಗೆದ್ದು ಮೊದಲು ಬೌಲಿಂಗ್ ಮಾಡಲು ನಿರ್ಧರಿಸಿತು. ಪಾಕಿಸ್ತಾನ ತಂಡವು ಆರಂಭಿಕ ಆಘಾತಗಳ ಹೊರತಾಗಿಯೂ, ಸಲ್ಮಾನ್ ಆಘಾ ಮತ್ತು ಮೊಹಮ್ಮದ್ ರಿಜ್ವಾನ್ ಅವರ ಜವಾಬ್ದಾರಿಯುತ ಜೊತೆಯಾಟದ ನೆರವಿನಿಂದ ಉತ್ತಮ ಸ್ಥಿತಿಯತ್ತ ಮುಖಮಾಡಿತ್ತು. ಇನ್ನಿಂಗ್ಸ್ನ 39ನೇ ಓವರ್ನಲ್ಲಿ ಈ ಹೈಡ್ರಾಮಾ ನಡೆಯಿತು. ಆ ಓವರ್ನ ನಾಲ್ಕನೇ ಎಸೆತವನ್ನು ರಿಜ್ವಾನ್ ಅವರು ಬೌಲರ್ನ ಬಲಭಾಗಕ್ಕೆ ತಳ್ಳಿದರು. ಈ ವೇಳೆ ಬೌಲಿಂಗ್ ಮುಗಿಸಿ ಫಾಲೋ-ತ್ರೂನಲ್ಲಿದ್ದ ಬಾಂಗ್ಲಾದೇಶದ ನಾಯಕ ಮೆಹಿದಿ ಹಸನ್ ಮಿರಾಜ್ ಚೆಂಡನ್ನು ತಡೆಯಲು ತಮ್ಮ ಕಾಲನ್ನು ಚಾಚಿದರು. ಚೆಂಡು ಅವರ ಬೂಟಿಗೆ ತಗುಲಿ ನಿಂತಿತು. ಆದರೆ ಇದೇ ಸಮಯದಲ್ಲಿ, ನಾನ್-ಸ್ಟ್ರೈಕರ್ ತುದಿಯಲ್ಲಿದ್ದ ಸಲ್ಮಾನ್ ಆಘಾ ಮತ್ತು ಬೌಲರ್ ಮೆಹಿದಿ ಹಸನ್ ನಡುವೆ ಆಕಸ್ಮಿಕವಾಗಿ ಸಣ್ಣಮಟ್ಟದ ಡಿಕ್ಕಿಯಾಯಿತು. ಪರಿಣಾಮವಾಗಿ ಚೆಂಡು ಅವರಿಬ್ಬರ ಕಾಲುಗಳ ಬಳಿಯೇ ನಿಂತಿತು ಹಾಗೂ ಸಲ್ಮಾನ್ ಆಘಾ ತಮ್ಮ ಕ್ರೀಸ್ನಿಂದ ಕೊಂಚ ಹೊರಗಿದ್ದರು.
ಸಹಾಯ ಮಾಡಲು ಹೋಗಿ ವಿಕೆಟ್ ಕಳೆದುಕೊಂಡ ಸಲ್ಮಾನ್ ಆಘಾ
ಈ ಹಂತದಲ್ಲಿ ಸಲ್ಮಾನ್ ಆಘಾ ಅವರು ತಕ್ಷಣವೇ ತಮ್ಮ ಕ್ರೀಸ್ಗೆ ಮರಳುವ ಮೂಲಕ ಸುರಕ್ಷಿತವಾಗಬಹುದಿತ್ತು. ಆದರೆ, ಕ್ರೀಸ್ನಿಂದ ಹೊರಗಿದ್ದ ಅವರು ಅನಿರೀಕ್ಷಿತವಾಗಿ ಕೆಳಕ್ಕೆ ಬಾಗಿ ಚೆಂಡನ್ನು ಕೈಯಿಂದ ಎತ್ತಿಕೊಂಡು ಬೌಲರ್ ಮೆಹಿದಿ ಹಸನ್ಗೆ ನೀಡಲು ಮುಂದಾದರು. ಈ ಅಲ್ಪಾವಧಿಯ ಅವಕಾಶವನ್ನು ಬಳಸಿಕೊಂಡ ಬಾಂಗ್ಲಾ ನಾಯಕ ಮಿರಾಜ್, ತಕ್ಷಣವೇ ಕಾರ್ಯಪ್ರವೃತ್ತರಾದರು. ಸಲ್ಮಾನ್ ಚೆಂಡನ್ನು ಎತ್ತುವ ಮುನ್ನವೇ ಮಿರಾಜ್ ಅತ್ಯಂತ ಚಾಕಚಕ್ಯತೆಯಿಂದ ಚೆಂಡನ್ನು ಕೈಗೆತ್ತಿಕೊಂಡು ನಾನ್-ಸ್ಟ್ರೈಕರ್ ತುದಿಯಲ್ಲಿದ್ದ ಸ್ಟಂಪ್ಗಳಿಗೆ ಎಸೆದರು. ಆ ಕ್ಷಣದಲ್ಲಿ ಸಲ್ಮಾನ್ ಆಘಾ ಅವರು ಕ್ರೀಸ್ನ ಹೊರಗೇ ಉಳಿದಿದ್ದರು. ಬೌಲರ್ ತಕ್ಷಣವೇ ರನ್ ಔಟ್ಗಾಗಿ ಅಂಪೈರ್ ಮೊರೆ ಹೋದರು. ಮೈದಾನದಲ್ಲಿದ್ದ ಅಂಪೈರ್ ತನ್ವೀರ್ ಅಹ್ಮದ್ ಈ ನಿರ್ಧಾರವನ್ನು ಟಿವಿ ಅಂಪೈರ್ಗೆ (ಮೂರನೇ ಅಂಪೈರ್) ವರ್ಗಾಯಿಸಿದರು. ಚೆಂಡು ಇನ್ನೂ ‘ಡೆಡ್’ ಆಗಿರಲಿಲ್ಲ ಹಾಗೂ ಬ್ಯಾಟರ್ ಕ್ರೀಸ್ನಿಂದ ಹೊರಗಿದ್ದರು ಎಂಬುದನ್ನು ಖಚಿತಪಡಿಸಿಕೊಂಡ ಟಿವಿ ಅಂಪೈರ್, ನಿಯಮಗಳ ಪ್ರಕಾರ ಸಲ್ಮಾನ್ ಅವರನ್ನು ಔಟ್ ಎಂದು ಘೋಷಿಸಿದರು.
ಮೈದಾನದಲ್ಲಿ ಭುಗಿಲೆದ್ದ ಆಕ್ರೋಶ ಮತ್ತು ಕ್ರೀಡಾಸ್ಫೂರ್ತಿಯ ಪ್ರಶ್ನೆ
ಮೂರನೇ ಅಂಪೈರ್ ತೀರ್ಪು ಹೊರಬೀಳುತ್ತಿದ್ದಂತೆ 62 ಎಸೆತಗಳಲ್ಲಿ 64 ರನ್ ಗಳಿಸಿ ಅತ್ಯುತ್ತಮವಾಗಿ ಆಡುತ್ತಿದ್ದ ಸಲ್ಮಾನ್ ಆಘಾ ಅವರ ಕೋಪ ನೆತ್ತಿಗೇರಿತು. ಈ ರೀತಿಯಲ್ಲಿ ಔಟ್ ಆಗಿದ್ದಕ್ಕೆ ತೀವ್ರ ಅಸಮಾಧಾನಗೊಂಡ ಅವರು, ಕ್ರೀಸ್ ಬಿಟ್ಟು ತೆರಳುವ ಮುನ್ನ ಬಾಂಗ್ಲಾ ನಾಯಕ ಮೆಹಿದಿ ಹಸನ್ ಅವರೊಂದಿಗೆ ಮಾತಿನ ಚಕಮಕಿಗೆ ಇಳಿದರು. ಪೆವಿಲಿಯನ್ಗೆ ಮರಳುವಾಗಲೂ ಅವರ ಹತಾಶೆ ಮುಂದುವರಿದಿತ್ತು. ಈ ಸಂದರ್ಭದಲ್ಲಿ ಬಾಂಗ್ಲಾದೇಶದ ವಿಕೆಟ್ ಕೀಪರ್ ಲಿಟನ್ ದಾಸ್ ಕೂಡ ಚರ್ಚೆಗೆ ಇಳಿದಿದ್ದರಿಂದ ಮೈದಾನದಲ್ಲಿ ಕೆಲಕಾಲ ಉದ್ವಿಗ್ನ ವಾತಾವರಣ ನಿರ್ಮಾಣವಾಗಿತ್ತು. ತಕ್ಷಣವೇ ಮಧ್ಯಪ್ರವೇಶಿಸಿದ ಪಾಕಿಸ್ತಾನದ ಮತ್ತೋರ್ವ ಬ್ಯಾಟರ್ ಮೊಹಮ್ಮದ್ ರಿಜ್ವಾನ್ ಪರಿಸ್ಥಿತಿಯನ್ನು ತಿಳಿಗೊಳಿಸಿದರು.
ಈ ಘಟನೆಯು ಇದೀಗ ಕ್ರಿಕೆಟ್ ಲೋಕದಲ್ಲಿ ಎರಡು ಬಣಗಳನ್ನು ಸೃಷ್ಟಿಸಿದೆ. ನಿಯಮಗಳ ಪ್ರಕಾರ ಮೆಹಿದಿ ಹಸನ್ ಮಾಡಿದ್ದು ನೂರಕ್ಕೆ ನೂರು ಸರಿ, ಚೆಂಡು ಆಟದಲ್ಲಿರುವಾಗ ಬ್ಯಾಟರ್ ಕ್ರೀಸ್ ಬಿಟ್ಟು ಹೊರಗಿದ್ದು ಕೈಯಿಂದ ಚೆಂಡನ್ನು ಮುಟ್ಟಲು ಹೋಗಿದ್ದು ಅವರದ್ದೇ ತಪ್ಪು ಎಂದು ಹಲವರು ವಾದಿಸುತ್ತಿದ್ದಾರೆ. ಮತ್ತೊಂದೆಡೆ, ಬ್ಯಾಟರ್ ಕೇವಲ ಸಹಾಯ ಮಾಡುವ ಉದ್ದೇಶದಿಂದ ಚೆಂಡನ್ನು ಎತ್ತಿಕೊಡಲು ಮುಂದಾಗಿದ್ದರೇ ವಿನಃ ರನ್ ಕದಿಯುವ ಉದ್ದೇಶ ಅವರಿಗಿರಲಿಲ್ಲ, ಹೀಗಾಗಿ ಬಾಂಗ್ಲಾ ನಾಯಕನ ನಡೆ ಕ್ರೀಡಾಸ್ಫೂರ್ತಿಗೆ ವಿರುದ್ಧವಾಗಿದೆ ಎಂಬ ಟೀಕೆಗಳೂ ಕೇಳಿಬರುತ್ತಿವೆ.
ಪಾಕಿಸ್ತಾನದ ದಿಢೀರ್ ಕುಸಿತಕ್ಕೆ ಕಾರಣವಾದ ಆ ಒಂದು ರನ್ ಔಟ್
ಸಲ್ಮಾನ್ ಆಘಾ ಅವರ ಈ ವಿಕೆಟ್ ಪತನ ಕೇವಲ ಒಂದು ವಿವಾದವನ್ನಷ್ಟೇ ಸೃಷ್ಟಿಸಲಿಲ್ಲ, ಬದಲಾಗಿ ಪಂದ್ಯದ ಗತಿಯನ್ನೇ ಬದಲಿಸಿತು. ನಾಲ್ಕನೇ ವಿಕೆಟ್ಗೆ ಸಲ್ಮಾನ್ ಮತ್ತು ರಿಜ್ವಾನ್ (59 ಎಸೆತಗಳಲ್ಲಿ 44 ರನ್) ನಡುವೆ ಮೂಡಿಬಂದಿದ್ದ 109 ರನ್ಗಳ ನಿರ್ಣಾಯಕ ಜೊತೆಯಾಟವು ಈ ವಿಚಿತ್ರ ರನ್ ಔಟ್ ಮೂಲಕ ಅಂತ್ಯಕಂಡಿತು. ಸಲ್ಮಾನ್ ಔಟಾದ ಕೇವಲ ಎರಡು ಎಸೆತಗಳ ಅಂತರದಲ್ಲಿ ರಿಜ್ವಾನ್ ಕೂಡ ವಿಕೆಟ್ ಒಪ್ಪಿಸಿದರು. ಇದರಿಂದಾಗಿ 39 ಓವರ್ಗಳಲ್ಲಿ 231 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡಿದ್ದ ಪಾಕಿಸ್ತಾನ, ಆ ಬಳಿಕ ನಾಟಕೀಯ ಕುಸಿತ ಕಂಡು 47.3 ಓವರ್ಗಳಲ್ಲಿ ಕೇವಲ 274 ರನ್ಗಳಿಗೆ ಸರ್ವಪತನ ಕಂಡಿತು. ಬಾಂಗ್ಲಾದೇಶದ ಪರ ಬೌಲಿಂಗ್ನಲ್ಲಿ ಮಿಂಚಿದ ರಿಶಾದ್ ಹೊಸೈನ್ 3 ವಿಕೆಟ್ ಪಡೆದರೆ, ಮೆಹಿದಿ ಹಸನ್ 2 ವಿಕೆಟ್ ಕಬಳಿಸಿ ಪಾಕ್ ಪಡೆಯನ್ನು ಕಟ್ಟಿಹಾಕುವಲ್ಲಿ ಯಶಸ್ವಿಯಾದರು.
ಇದನ್ನೂ ಓದಿ : ಸನ್ರೈಸರ್ಸ್ ಲೀಡ್ಸ್ ತಂಡಕ್ಕೆ ಪಾಕಿಸ್ತಾನದ ಅಬ್ರಾರ್ ಅಹ್ಮದ್ ಸೇರ್ಪಡೆ : ಈ ಬಗ್ಗೆ ಬಿಸಿಸಿಐ ಹೇಳುವುದೇನು?
