ಇರಾನ್ ಮೇಲೆ ಅಮೆರಿಕ ಹಾಗೂ ಇಸ್ರೇಲ್ ಯುದ್ಧ ಭೀಕರತೆ ಹೆಚ್ಚಿಸುತ್ತಿದ್ದಂತೆ ಇಡೀ ವಿಶ್ವಕ್ಕೆ ದೊಡ್ಡ ಶಾಕ್ ಎದುರಾಗಿದೆ. ಹರ್ಮುಜ್ ಜಲಸಂಧಿಯ ದಿಗ್ಬಂಧನದ ಬಳಿಕ ಎಲ್ಲರೂ ತೈಲ ಗಂಡಾಂತರದ ಬಗ್ಗೆ ಮಾತನಾಡುತ್ತಿದ್ದಾರೆ. ಆದರೆ, ಯುದ್ಧ ಹೀಗೆ ಮುಂದುವರೆದರೆ ವಿಶ್ವದ ಸಂಪರ್ಕವೂ ಬಂದ್ ಆಗಿ ಬಿಡುತ್ತೆ.
ಹೌದು. ಹರ್ಮುಜ್ ಜಲಸಂಧಿ ಬಂದಾದರೆ ತೈಲವಷ್ಟೇ ಅಲ್ಲ ನಾವು ಈಗ ನೆಚ್ಚಿಕೊಂಡಿರುವ ಅಂತರ್ಜಾಲ ಜಗತ್ತು ಸಂಪೂರ್ಣ ಬಂದ್ ಆಗತ್ತೆ. ಇರಾನಿನ ಕಾಲ್ಬುಡದ ಹರ್ಮುಜ್ ಜಲಸಂಧಿ ಕೇವಲ ಪೆಟ್ರೋಲಿಯಂ ಕಚ್ಚಾತೈಲ, ಅಡುಗೆ ಅನಿಲಗಳ ಸಾಗಾಟಕ್ಕೆ ಮಾತ್ರ ಇಲ್ಲ. ಅಂತರ್ಜಾಲಕ್ಕೂ ಇದೇ ಮಾರ್ಗ ಅನುಸರಿಸಲಾಗಿದೆ. ಮಧ್ಯಪ್ರಾಚ್ಯದಲ್ಲಿನ ಯುದ್ಧದ ತರಂಗ ತನ್ನ ಮಿತಿಯನ್ನ ಏರಿಸಿದರೆ, ಅಂತರ್ಜಾಲ ಬಂದ್ ಆಗಲಿದೆ.
ಜಲಸಂಧಿಯ ತಳದಲ್ಲಿ ಜಲಾಂತರ್ಗಾಮಿಯಂತಿರುವ ಫೈಬರ್‌- ಆಪ್ಟಿಕ್‌ ಕೇಬಲ್‌ಗಳ ದಟ್ಟ ಜಾಲವೇ ಹರಡಿದೆ. ಇದಕ್ಕೆ ‘ಇಂಟರ್ನೆಟ್‌ ಕಾರಿಡಾರ್‌’ ಅಂತಾರೆ. ಹಣಕಾಸಿನ ವಹಿವಾಟುಗಳು, ಕ್ಲೌಡ್‌ ಕಂಪ್ಯೂಟಿಂಗ್‌ ಟ್ರಾಫಿಕ್‌, ವಿಡಿಯೊ ಕಾನ್ಫರೆನ್ಸಿಂಗ್‌, ಸಾಮಾಜಿಕ ಜಾಲತಾಣಗಳ ಡೇಟಾ ಸೇರಿದಂತೆ ನಮ್ಮ ಬಹುಪಾಲು ಡಿಜಿಟಲ್‌ ಸಂವಹನ ಇಲ್ಲಿ ಹಾದು ಹೋಗಿರುವ ಕೇಬಲ್ ಮೂಲಕ ನಡೆಯುತ್ತದೆ. ಆದರೆ ಯುದ್ಧವು ತೈಲಾಗಾರಗಳ ಮೇಲೆ ನಡೆಸಿದ ಪ್ರಹಾರದಂತೆ ಉದ್ಧೇಶಪೂರ್ವಕವಾಗಿ ಕೇಬಲ್ ಗಳಿಗೂ ಧಕ್ಕೆ ತಂದರೆ, ಭಾರತವೂ ಸೇರಿ ಜಗತ್ತಿನ ಬಹುಪಾಲು ದೇಶಗಳ ಇಂಟರ್ನೆಟ್‌ನ ಉಸಿರು ನಿಂತೇ ಬಿಡುತ್ತದೆ.
ಜಗತ್ತಿನ ಶೇ.97ಕ್ಕಿಂತ ಹೆಚ್ಚಿನ ಡೇಟಾ ಸಂಚಾರವು ಸಮುದ್ರದ ತಳದಲ್ಲಿ ಸಾಗಿರುವ ‘ಸಬ್‌ಮರಿನ್‌ ಫೈಬರ್‌- ಆಪ್ಟಿಕ್‌ ಕೇಬಲ್’ಗಳ ಮೂಲಕ ನಡೆಯುತ್ತದೆ. ಉಪಗ್ರಹಗಳು ಕೇವಲ ಶೇ.3ರಷ್ಟು, ಎತ್ತರದ ಗುಡ್ಡಗಾಡು ಪ್ರದೇಶಗಳಿಗೆ ಮಾತ್ರ ಸಂಪರ್ಕ ನೀಡುತ್ತವೆ. ಕೇಬಲ್‌ಗಳು ಕೂದಲಿನ ಎಳೆಯಷ್ಟು ತೆಳುವಾಗಿದ್ದರೂ, ಸೆಕೆಂಡಿಗೆ ಟೆರಾಬೈಟ್‌ಗಳಷ್ಟು ದತ್ತಾಂಶ ಸಾಗಿಸುವ ಶಕ್ತಿ ಹೊಂದಿವೆ. ಹರ್ಮುಜ್ ಜಲಸಂಧಿಯ ನೂರಿನ್ನೂರು ಮೀಟರ್‌ ಆಳದಲ್ಲಿ ಹಾದು ಹೋಗುವ ಈ ಕೇಬಲ್‌ಗಳು ಜಗತ್ತಿನ ಅಂತರ್ಜಾಲವನ್ನು ಬೆಸೆದಿವೆ. ಯುರೋಪ್‌ ಮತ್ತು ಏಷ್ಯಾವನ್ನು ಸಂಪರ್ಕಿಸುವ ಬಹುತೇಕ ಇಂಟರ್ನೆಟ್‌ ಕೇಬಲ್‌ಗಳು ಈ ಕಿರಿದಾದ ಜಲಸಂಧಿಯ ಮೂಲಕವೇ ಹಾದು ಹೋಗುತ್ತವೆ.
ಹೀಗಾಗಿ ಆತಂಕ ತಲೆದೋರಿದ್ದು, ಯುದ್ಧ ಹಡಗುಗಳ ಲಂಗರು ವ್ಯವಸ್ಥೆ ಆಕಸ್ಮಿಕವಾಗಿ ಕೇಬಲ್ ಗಳಿಗೆ ಸಿಲುಕಿದರೆ ಹಾನಿಯಾಗುವ ಸಾಧ್ಯತೆ ಇರುತ್ತದೆ. ಒಂದು ವೇಳೆ ಕೇಬಲ್ ತುಂಡಾದರೆ ಸದ್ಯಕ್ಕೆ ದುರಸ್ಥಿ ಅಸಾಧ್ಯ. ಏಕೆಂದರೆ, ಅದನ್ನು ಸರಿ ಮಾಡಲು ತಾಂತ್ರಿಕ ನಿಪುಣರು ಬೇಕು. ಅವರು ಯುದ್ಧ ಕಾಲದಲ್ಲಿ ಅಲ್ಲಿಗೆ ತೆರಳುವುದಿಲ್ಲ. ಹೀಗಾಗಿ ಯುದ್ಧ ನಿಲ್ಲುವುದು ಅನಿವಾರ್ಯವಾಗಿದೆ.
ಇದನ್ನೂ ಓದಿ : ಬೆಂಗಳೂರಿಗರಿಗೆ ಶುಭ ಸುದ್ದಿ – ಗ್ಯಾಸ್ ಕೊರತೆ ಬಗ್ಗೆ ಜಿಲ್ಲಾಧಿಕಾರಿ ಮಹತ್ವದ ಸ್ಪಷ್ಟನೆ!
