ಬೆಂಗಳೂರು: ಕೇಂದ್ರ ಸರ್ಕಾರವು ಮಾರ್ಚ್ 1ರಿಂದ ಎರಡು ಪ್ರಮುಖ ನಿಯಮಗಳನ್ನು ಬದಲಾವಣೆ ಮಾಡಿದೆ. ಗ್ರಾಹಕರ ಸುರಕ್ಷತೆ, ಸೈಬರ್ ವಂಚನೆ ತಡೆ ದೃಷ್ಟಿಯಿಂದ ಸಿಮ್ ಬೈಂಡಿಂಗ್ ಜಾರಿಗೆ ಬರಲಿದೆ. ಇದೇ ರೀತಿ, ರೈಲು ಟಿಕೆಟ್ ಬುಕಿಂಗ್ ವ್ಯವಸ್ಥೆಯಲ್ಲಿ ಮಹತ್ವದ ಬದಲಾವಣೆಯಾಗುತ್ತಿದೆ. ಹೊಸ ನಿಯಮಗಳ ಕುರಿತ ಮಾಹಿತಿ ಇಲ್ಲಿದೆ.
ರೈಲು ಟಿಕೆಟ್ ಬುಕ್ ಮಾಡಲು ಒಂದೇ ಆ್ಯಪ್
ಈಗ ನೀವು ಟಿಕೆಟ್ ಬುಕ್ ಮಾಡಲು ‘IRCTC Connect’, ಕಾಯ್ದಿರಿಸದ (General) ಟಿಕೆಟ್ಗಾಗಿ ‘UTS’ ಮತ್ತು ದೂರು ನೀಡಲು ‘Rail Madad’ ಆ್ಯಪ್ ಗಳನ್ನು ಬೇರೆ ಬೇರೆಯಾಗಿ ಬಳಸುತ್ತಿದ್ದೀರಿ. ‘ರೈಲ್ ಒನ್’ ಬಂದ ನಂತರ ಇವೆಲ್ಲವೂ ಒಂದೇ ಆ್ಯಪ್ ನಲ್ಲಿ ಲಭ್ಯವಿರುತ್ತವೆ.
ಇದನ್ನು ರೈಲ್ವೆಯ “ಸೂಪರ್ ಆ್ಯಪ್” ಎಂದು ಕರೆಯಲಾಗುತ್ತಿದೆ. ಇದು ಪ್ರಯಾಣಿಕರಿಗೆ ಟಿಕೆಟ್ ಬುಕಿಂಗ್, ಲೈವ್ ಟ್ರೈನ್ ಸ್ಟೇಟಸ್, ಪಿಎನ್ ಆರ್ (PNR) ಚೆಕಿಂಗ್ ಮತ್ತು ಊಟದ ಆರ್ಡರ್ (E-Catering) ಮಾಡಲು ಅವಕಾಶ ನೀಡುತ್ತದೆ. ಮಾರ್ಚ್ 1ರಿಂದ ಹೊಸ ಆ್ಯಪ್ ಮೂಲಕವೇ ಟಿಕೆಟ್ ಮಾಡಬಹುದು. ಯುಟಿಎಸ್ ಆ್ಯಪ್ ಸ್ಥಗಿತಗೊಂಡಿದೆ ಎಂದು ರೈಲ್ವೆ ಇಲಾಖೆ ತಿಳಿಸಿದೆ.
ಸಿಮ್ ಬೈಂಡಿಂಗ್ ನಿಯಮ
ನಿಮ್ಮ ಬ್ಯಾಂಕ್ ಖಾತೆಗೆ ಲಿಂಕ್ ಆಗಿರುವ ಮೊಬೈಲ್ ಸಂಖ್ಯೆಯ ಸಿಮ್ ಕಾರ್ಡ್ (SIM card) ಆ ಫೋನ್ನಲ್ಲಿ ಇದ್ದರೆ ಮಾತ್ರ ಆ್ಯಪ್ ಕೆಲಸ ಮಾಡುವಂತೆ ಮಾಡುವುದೇ ಸಿಮ್ ಬೈಂಡಿಂಗ್. ಅಂದರೆ, ಕೇವಲ ಮೊಬೈಲ್ ನಂಬರ್ ಮತ್ತು OTP ಇದ್ದರೆ ಸಾಲದು, ಆ ನಿರ್ದಿಷ್ಟ ಸಿಮ್ ಅದೇ ಮೊಬೈಲ್ನಲ್ಲಿ ಇರಬೇಕು. ನೀವು ಯಾವ ಫೋನ್ನಲ್ಲಿ ಬ್ಯಾಂಕಿಂಗ್ ಆ್ಯಪ್ ಬಳಸುತ್ತಿದ್ದೀರೋ, ಅದೇ ಫೋನ್ ನಲ್ಲಿ ಬ್ಯಾಂಕ್ ಗೆ ನೋಂದಾಯಿತವಾದ ಸಿಮ್ ಇರಲೇಬೇಕು.
ಒಂದು ವೇಳೆ ನೀವು ಸಿಮ್ ಕಾರ್ಡ್ ಅನ್ನು ಆ ಫೋನ್ನಿಂದ ಹೊರತೆಗೆದರೆ ಅಥವಾ ಬೇರೆ ಫೋನ್ಗೆ ಹಾಕಿದರೆ, ಆ್ಯಪ್ ಕೆಲಸ ಮಾಡುವುದನ್ನು ನಿಲ್ಲಿಸುತ್ತದೆ. ಮತ್ತೆ ಬಳಸಲು ನೀವು ಮೊದಲಿನಿಂದ ‘Verification’ ಮಾಡಬೇಕಾಗುತ್ತದೆ. ಯಾರಾದರೂ ನಿಮ್ಮ ಬ್ಯಾಂಕ್ ವಿವರ ಮತ್ತು OTP ಪಡೆದುಕೊಂಡರೂ, ಅವರ ಫೋನ್ ನಲ್ಲಿ ನಿಮ್ಮ ಸಿಮ್ ಇಲ್ಲದಿದ್ದರೆ ಅವರು ಹಣ ಕದಿಯಲು ಸಾಧ್ಯವಿಲ್ಲ.
ಇದನ್ನೂ ಓದಿ : ರಾಜ್ಯ ಸರ್ಕಾರದ DHFWS ಸಂಸ್ಥೆಯಲ್ಲಿ 20 ಹುದ್ದೆಗಳ ನೇಮಕಾತಿ | ಮಹಿಳಾ ಅಭ್ಯರ್ಥಿಗಳಿಗೆ ಗುಡ್ ನ್ಯೂಸ್
