ಬೆಂಗಳೂರು: ಪ್ರಸಕ್ತ ಟಿ20 ವಿಶ್ವಕಪ್ 2026ರಲ್ಲಿ ಟೀಮ್ ಇಂಡಿಯಾದ ಅಬ್ಬರದ ಪ್ರದರ್ಶನ ಕಂಡು ಇಂಗ್ಲೆಂಡ್ ತಂಡದ ಮಾಜಿ ನಾಯಕ ಮೈಕಲ್ ವಾನ್, “ಈ ಟೂರ್ನಿಯಲ್ಲಿ ಭಾರತವನ್ನು ಯಾರೂ ಸೋಲಿಸಲು ಸಾಧ್ಯವಿಲ್ಲ” ಎಂದು ಭವಿಷ್ಯ ನುಡಿದಿದ್ದಾರೆ. ಆದರೆ, ಈ ಹೇಳಿಕೆಯು ಭಾರತ ತಂಡದ ಅಭಿಮಾನಿಗಳಲ್ಲಿ ‘ಜಿಂಕ್ಸ್’ (ದೃಷ್ಟಿ ಅಥವಾ ಅಪಶಕುನ) ಭೀತಿಯನ್ನು ಹುಟ್ಟುಹಾಕಿದೆ .
ಅಹಮದಾಬಾದ್ನಲ್ಲಿ ನಡೆದ ಪಂದ್ಯದಲ್ಲಿ ನೆದರ್ಲೆಂಡ್ಸ್ ವಿರುದ್ಧ 17 ರನ್ಗಳ ರೋಚಕ ಜಯ ಸಾಧಿಸಿದ ಸೂರ್ಯಕುಮಾರ್ ಯಾದವ್ ನೇತೃತ್ವದ ಭಾರತ ತಂಡ, ಲೀಗ್ ಹಂತದಲ್ಲಿ ಆಡಿದ ನಾಲ್ಕೂ ಪಂದ್ಯಗಳನ್ನು ಗೆದ್ದು ‘ಎ’ ಗುಂಪಿನಲ್ಲಿ ಅಗ್ರಸ್ಥಾನದೊಂದಿಗೆ ಸೂಪರ್ 8 ಹಂತಕ್ಕೆ ಲಗ್ಗೆ ಇಟ್ಟಿದೆ.
ಭಾರತವನ್ನು ಸೋಲಿಸುವುದು ಹೇಗೆ?
‘ಸ್ಟಿಕ್ ಟು ಕ್ರಿಕೆಟ್’ ಪಾಡ್ಕಾಸ್ಟ್ನಲ್ಲಿ ಡೇವಿಡ್ ಲಾಯ್ಡ್, ಫಿಲ್ ಟಫ್ನೆಲ್ ಮತ್ತು ಅಲಸ್ಟೈರ್ ಕುಕ್ ಅವರೊಂದಿಗೆ ಚರ್ಚೆ ನಡೆಸಿದ ಮೈಕಲ್ ವಾನ್, ಉಪಖಂಡದ ಪಿಚ್ಗಳಲ್ಲಿ ಭಾರತವನ್ನು ಕಟ್ಟಿಹಾಕುವುದು ಸುಲಭವಲ್ಲ ಎಂದು ಅಭಿಪ್ರಾಯಪಟ್ಟಿದ್ದಾರೆ. “ಅಭಿಷೇಕ್ ಶರ್ಮಾ ಸತತವಾಗಿ ಡಕ್ ಔಟ್ ಆಗಿದ್ದರೂ, ಅವರು ಅಪಾಯಕಾರಿ ಆಟಗಾರ. ಅವರು ಫಾರ್ಮ್ಗೆ ಮರಳಿದರೆ ತಡೆಯುವುದು ಕಷ್ಟ,” ಎಂದು ವಾನ್ ಹೇಳಿದ್ದಾರೆ .
ಮಾಜಿ ಸ್ಪಿನ್ನರ್ ಫಿಲ್ ಟಫ್ನೆಲ್ ಮಾತನಾಡಿ, “ಭಾರತದಲ್ಲಿ ಭಾರತವನ್ನು ಸೋಲಿಸಲು ಒತ್ತಡವೊಂದೇ ಏಕೈಕ ಅಸ್ತ್ರ. ಸಣ್ಣ ತಂಡಗಳು ಭಾರತಕ್ಕೆ ಪ್ರಬಲ ಪೈಪೋಟಿ ನೀಡಿವೆ, ಆದರೆ ಅಂತಿಮವಾಗಿ ಒತ್ತಡ ನಿರ್ವಹಣೆಯೇ ಮುಖ್ಯವಾಗುತ್ತದೆ,” ಎಂದಿದ್ದಾರೆ.
ಯುಎಸ್ಎ ನೀಡಿದ ಪೈಪೋಟಿ
ಈ ಚರ್ಚೆಯಲ್ಲಿ ಅಲಸ್ಟೈರ್ ಕುಕ್ ಅವರು ಭಾರತದ ವಿರುದ್ಧ ಮೊದಲು ಬ್ಯಾಟಿಂಗ್ ನಡೆಸಿ ಬೃಹತ್ ಮೊತ್ತ ಕಲೆಹಾಕುವುದು ಉತ್ತಮ ತಂತ್ರ ಎಂದು ಸಲಹೆ ನೀಡಿದ್ದಾರೆ. ಇದಕ್ಕೆ ದನಿಗೂಡಿಸಿದ ಮೈಕಲ್ ವಾನ್, “ಇಲ್ಲಿಯವರೆಗೆ ಯುಎಸ್ಎ ತಂಡವೊಂದೇ ಭಾರತಕ್ಕೆ ನಿಕಟ ಪೈಪೋಟಿ ನೀಡಿದೆ,” ಎಂದು ನೆನಪಿಸಿಕೊಂಡಿದ್ದಾರೆ. ಲೀಗ್ ಹಂತದ ಪಂದ್ಯದಲ್ಲಿ ಯುಎಸ್ಎ ವಿರುದ್ಧ ಭಾರತ 7 ವಿಕೆಟ್ಗೆ 70 ರನ್ ಗಳಿಸಿ ಸಂಕಷ್ಟದಲ್ಲಿದ್ದಾಗಲೂ, ಚೇತರಿಸಿಕೊಂಡು ಪಂದ್ಯ ಗೆದ್ದಿದ್ದನ್ನು ಅವರು ಉಲ್ಲೇಖಿಸಿದ್ದಾರೆ .
ಶಿವಂ ದುಬೆ ಅಬ್ಬರ, ವರುಣ್ ಸ್ಪಿನ್ ಮೋಡಿ
ನೆದರ್ಲೆಂಡ್ಸ್ ವಿರುದ್ಧದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಭಾರತ 6 ವಿಕೆಟ್ಗೆ 193 ರನ್ ಕಲೆಹಾಕಿತು. ಶಿವಂ ದುಬೆ ಕೇವಲ 31 ಎಸೆತಗಳಲ್ಲಿ 66 ರನ್ ಸಿಡಿಸಿ ಪಂದ್ಯದ ಗತಿಯನ್ನೇ ಬದಲಿಸಿದರು. ಬೌಲಿಂಗ್ನಲ್ಲೂ ಮಿಂಚಿದ ದುಬೆ 2 ವಿಕೆಟ್ ಪಡೆದರೆ, ವರುಣ್ ಚಕ್ರವರ್ತಿ 14 ರನ್ಗೆ 3 ವಿಕೆಟ್ ಕಿತ್ತು ಡಚ್ಚರ ಓಟಕ್ಕೆ ಕಡಿವಾಣ ಹಾಕಿದರು. ಅಂತಿಮವಾಗಿ ನೆದರ್ಲೆಂಡ್ಸ್ 176 ರನ್ಗಳಿಗೆ ಸೀಮಿತವಾಯಿತು .
ಇದನ್ನೂ ಓದಿ : ಶಾರ್ಟ್ ಪಿಚ್ ಎಸೆತಕ್ಕೆ ಹೆದರುತ್ತಿದ್ದ ಆಟಗಾರ ಈಗ ಆಲ್ರೌಂಡರ್.. ದುಬೆ ಯಶಸ್ಸಿನ ಗುಟ್ಟು ಬಿಚ್ಚಿಟ್ಟ ಧೋನಿ ಸಲಹೆ!
