ಬೆಂಗಳೂರು : ಐಷಾರಾಮಿ ಮತ್ತು ವೇಗದ ಕಾರುಗಳಿಗೆ ಹೆಸರಾಗಿರುವ ಮರ್ಸಿಡಿಸ್ ಬೆಂಝ್ (Mercedes-Benz) ತನ್ನ ಜನಪ್ರಿಯ ಎಎಂಜಿ ಸರಣಿಯಲ್ಲಿ ಹೊಸ ದೈತ್ಯವನ್ನು ಬಿಡುಗಡೆ ಮಾಡಿದೆ. ಅದೇ ‘ಮರ್ಸಿಡಿಸ್-ಎಎಂಜಿ ಜಿಎಲ್‌ಸಿ 53’. ಈ ಹೊಸ ಕಾರು ಎಸ್‌ಯುವಿ ಮತ್ತು ಕೂಪೆ ಎಂಬ ಎರಡು ಆವೃತ್ತಿಗಳಲ್ಲಿ ಲಭ್ಯವಿರಲಿದೆ.
ಅತ್ಯಂತ ಪ್ರಮುಖ ವಿಷಯವೆಂದರೆ, ಮರ್ಸಿಡಿಸ್ ಕಂಪನಿ ಈ ಕಾರಿನ ಮೂಲಕ ಮತ್ತೆ 6-ಸಿಲಿಂಡರ್ ಎಂಜಿನ್ ಅನ್ನು ತನ್ನ ಪರ್ಫಾರ್ಮೆನ್ಸ್ ಎಸ್‌ಯುವಿಗಳಿಗೆ ಮರಳಿ ತಂದಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ಸದ್ಯ ಲಭ್ಯವಿರುವ ‘ಎಎಂಜಿ 43’ ಮತ್ತು ‘ಎಎಂಜಿ 63′ ಮಾಡೆಲ್‌ಗಳನ್ನು ಈ ಹೊಸ ’53’ ಬ್ಯಾಡ್ಜ್‌ನ ಕಾರುಗಳು ಬದಲಾಯಿಸಲಿವೆ.
ಎಂಜಿನ್ ಮತ್ತು ಪವರ್
ಜಿಎಲ್‌ಸಿ 53 ಕಾರಿನ ಹೃದಯ ಭಾಗದಲ್ಲಿ ಬಲಿಷ್ಠವಾದ 3.0-ಲೀಟರ್ ಇನ್‌ಲೈನ್ 6-ಸಿಲಿಂಡರ್ ಟರ್ಬೊ ಪೆಟ್ರೋಲ್ ಎಂಜಿನ್ ಇದೆ. ಇದು 48V ಮೈಲ್ಡ್-ಹೈಬ್ರಿಡ್ ಸಿಸ್ಟಮ್ ಜೊತೆಗೆ ಕೆಲಸ ಮಾಡುತ್ತದೆ. ಈ ಎಂಜಿನ್ 443 hp ಶಕ್ತಿ ಮತ್ತು 600 Nm ಟಾರ್ಕ್ ಉತ್ಪಾದಿಸುತ್ತದೆ. ಓವರ್‌ಬೂಸ್ಟ್ ಫಂಕ್ಷನ್ ಮೂಲಕ 10 ಸೆಕೆಂಡ್‌ಗಳ ಕಾಲ ಟಾರ್ಕ್ ಅನ್ನು 640 Nmಗೆ ಹೆಚ್ಚಿಸಬಹುದು! ಇದರಲ್ಲಿರುವ ಇಂಟಿಗ್ರೇಟೆಡ್ ಸ್ಟಾರ್ಟರ್ ಜನರಲ್ (ISG) ಹೆಚ್ಚುವರಿಯಾಗಿ 23 hp ಮತ್ತು 205 Nm ಟಾರ್ಕ್ ನೀಡುತ್ತದೆ. ಕೇವಲ 4.2 ಸೆಕೆಂಡ್‌ಗಳಲ್ಲಿ ಈ ಕಾರು 0 ರಿಂದ 100 ಕಿ.ಮೀ ವೇಗ ಪಡೆದುಕೊಳ್ಳಬಲ್ಲದು. ಇದರ ಗರಿಷ್ಠ ವೇಗ ಗಂಟೆಗೆ 250 ಕಿ.ಮೀ. (ಎಲೆಕ್ಟ್ರಾನಿಕ್ ಲಿಮಿಟೆಡ್). ‘ಎಎಂಜಿ ಡ್ರೈವರ್ಸ್ ಪ್ಯಾಕೇಜ್’ ಹಾಕಿಸಿದರೆ ಇದನ್ನು 270 ಕಿ.ಮೀ.ಗೆ ಹೆಚ್ಚಿಸಿಕೊಳ್ಳಬಹುದು.
ಡ್ರಿಫ್ಟ್ ಮೋಡ್
ಎಎಂಜಿ ಎಸ್‌ಯುವಿ ಇತಿಹಾಸದಲ್ಲೇ ಮೊದಲ ಬಾರಿಗೆ, ಜಿಎಲ್‌ಸಿ 53 ಮಾಡೆಲ್‌ನಲ್ಲಿ ‘ಡ್ರಿಫ್ಟ್ ಮೋಡ್’ ನೀಡಲಾಗಿದೆ. ‘ಎಎಂಜಿ ಡೈನಾಮಿಕ್ ಪ್ಲಸ್ ಪ್ಯಾಕೇಜ್’ ಮೂಲಕ ಇದು ಲಭ್ಯವಿದ್ದು, ರೇಸ್ ಟ್ರ್ಯಾಕ್‌ಗಳಲ್ಲಿ ಹಿಂಬದಿ ಚಕ್ರಗಳಿಗೆ ಸಂಪೂರ್ಣ ಪವರ್ ನೀಡಿ ಡ್ರಿಫ್ಟ್ ಮಾಡಲು ಇದು ಅವಕಾಶ ಕಲ್ಪಿಸುತ್ತದೆ.
ಚಾಸಿಸ್ ಮತ್ತು ಬ್ರೇಕಿಂಗ್
‘ಎಎಂಜಿ ಪರ್ಫಾರ್ಮೆನ್ಸ್ 4 ಮ್ಯಾಟಿಕ್+’ (4MATIC+) ಸಿಸ್ಟಮ್ ಇದ್ದು, ಇದು ನಾಲ್ಕೂ ಚಕ್ರಗಳಿಗೆ ಶಕ್ತಿ ನೀಡುತ್ತದೆ. ರಸ್ತೆಯ ಪರಿಸ್ಥಿತಿಗೆ ತಕ್ಕಂತೆ ಮುಂಭಾಗ ಮತ್ತು ಹಿಂಭಾಗದ ಚಕ್ರಗಳಿಗೆ ಟಾರ್ಕ್ ಹಂಚಿಕೆ ಬದಲಾಗುತ್ತದೆ. ರಿಯರ್ ಆಕ್ಸಲ್ ಸ್ಟೀರಿಂಗ್ ಸ್ಟ್ಯಾಂಡರ್ಡ್ ಆಗಿ ಬರಲಿದ್ದು, ಕಡಿಮೆ ವೇಗದಲ್ಲಿ ಹಿಂಬದಿ ಚಕ್ರಗಳು 2.5 ಡಿಗ್ರಿ ತಿರುಗುತ್ತವೆ. ಇದರಿಂದ ಕಾರು ತಿರುಗಿಸುವುದು ಸುಲಭ. ‘ಎಎಂಜಿ ರೈಡ್ ಕಂಟ್ರೋಲ್’ ಸಸ್ಪೆನ್ಷನ್ ಇದ್ದು, ಕಂಫರ್ಟ್, ಸ್ಪೋರ್ಟ್ ಮತ್ತು ಸ್ಪೋರ್ಟ್+ ಎಂಬ ಮೂರು ಮೋಡ್‌ಗಳಲ್ಲಿ ಡ್ಯಾಂಪರ್ ಅಡ್ಜಸ್ಟ್ ಮಾಡಿಕೊಳ್ಳಬಹುದು.
ವಿನ್ಯಾಸ ಮತ್ತು ಒಳಾಂಗಣ
ಮುಂಭಾಗದಲ್ಲಿ ಎಎಂಜಿ ಸಿಗ್ನೇಚರ್ ‘ಪ್ಯಾನಮೆರಿಕಾನಾ ಗ್ರಿಲ್’, ದೊಡ್ಡದಾದ ಏರ್ ಇಂಟೆಕ್, 21 ಇಂಚಿನ ಅಲೋಯ್ ವೀಲ್ ಮತ್ತು ಹಿಂಭಾಗದಲ್ಲಿ ಸ್ಪೋರ್ಟಿ ಎಕ್ಸಾಸ್ಟ್ ಪೈಪ್‌ಗಳು ಕಾರಿಗೆ ಅಗ್ರೆಸಿವ್ ಲುಕ್ ನೀಡಿವೆ. ಒಳಗೆ 12.3 ಇಂಚಿನ ಡಿಜಿಟಲ್ ಇನ್ಸ್‌ಟ್ರುಮೆಂಟ್ ಕ್ಲಸ್ಟರ್ ಮತ್ತು 11.9 ಇಂಚಿನ ಇನ್ಫೋಟೈನ್‌ಮೆಂಟ್ ಸ್ಕ್ರೀನ್ ಇದೆ. ಎಎಂಜಿ ಸ್ಪೋರ್ಟ್ಸ್ ಸೀಟ್‌ಗಳು, ಕಾರ್ಬನ್ ಫೈಬರ್ ಟ್ರಿಮ್ ಮತ್ತು ಬರ್ಮೆಸ್ಟರ್ 3ಡಿ ಸೌಂಡ್ ಸಿಸ್ಟಮ್ ಪ್ರೀಮಿಯಂ ಅನುಭವ ನೀಡುತ್ತವೆ.
‘ಗೋಲ್ಡನ್ ಅಸೆಂಟ್ಸ್’ ಲಿಮಿಟೆಡ್ ಎಡಿಷನ್
2027ರ ಮಾಡೆಲ್ ವರ್ಷಕ್ಕೆ ಮರ್ಸಿಡಿಸ್ ‘ಗೋಲ್ಡನ್ ಅಸೆಂಟ್ಸ್ ಪ್ಯಾಕೇಜ್’ ಪರಿಚಯಿಸಲಿದೆ. ಕಪ್ಪು ಅಥವಾ ಬೂದು ಬಣ್ಣದ ಕಾರುಗಳ ಮೇಲೆ ಚಿನ್ನದ ಬಣ್ಣದ ಲೈನಿಂಗ್, ವೀಲ್ ರಿಮ್‌ಗಳು ಮತ್ತು ಒಳಾಂಗಣದಲ್ಲಿ ಗೋಲ್ಡ್ ಸ್ಟಿಚಿಂಗ್ ಈ ಪ್ಯಾಕೇಜ್‌ನ ವಿಶೇಷ.
ಭಾರತಕ್ಕೆ ಯಾವಾಗ? ಬೆಲೆ ಎಷ್ಟು?
ಪ್ರಸ್ತುತ ಭಾರತದಲ್ಲಿ ‘ಎಎಂಜಿ ಜಿಎಲ್‌ಸಿ 43 ಕೂಪೆ’ (ಬೆಲೆ 99.85 ಲಕ್ಷ ರೂಪಾಯಿ ಎಕ್ಸ್-ಶೋರೂಂ) ಲಭ್ಯವಿದೆ. ಹೊಸ ಜಿಎಲ್‌ಸಿ 53 ಕೂಡ ಭಾರತಕ್ಕೆ ಬರುವ ಸಾಧ್ಯತೆಯಿದ್ದು, ಇದರ ಬೆಲೆ ಸಹಜವಾಗಿಯೇ ಹಳೆಯ ಮಾಡೆಲ್‌ಗಿಂತ ಹೆಚ್ಚಿರಲಿದೆ.
ಇದನ್ನೂ ಓದಿ : ಸಿದ್ದರಾಮಯ್ಯ 5 ಅಲ್ಲ, 15 ವರ್ಷದವರೆಗೂ ಸಿಎಂ ಆಗ್ಬೇಕು | ಶಾಸಕ ಕೆ ಹರೀಶ್ ಗೌಡ
