ರಾಯ್ಪುರ: ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ನ ನಂಬರ್ ಒನ್ ಬ್ಯಾಟರ್ ಸೂರ್ಯಕುಮಾರ್ ಯಾದವ್ ಅಕ್ಷರಶಃ ಅಬ್ಬರಿಸುವ ಮೂಲಕ ತಮ್ಮ ವಿಶ್ವರೂಪವನ್ನು ಮರಳಿ ಪ್ರದರ್ಶಿಸಿದ್ದಾರೆ. ನ್ಯೂಜಿಲೆಂಡ್ ವಿರುದ್ಧ ರಾಯ್ಪುರದಲ್ಲಿ ನಡೆದ ಎರಡನೇ ಟಿ20 ಪಂದ್ಯದಲ್ಲಿ ಕೇವಲ 37 ಎಸೆತಗಳಲ್ಲಿ ಅಜೇಯ 82 ರನ್ ಸಿಡಿಸಿದ ಸೂರ್ಯ, ಭಾರತಕ್ಕೆ ಐತಿಹಾಸಿಕ ಜಯ ತಂದುಕೊಟ್ಟಿದ್ದಲ್ಲದೆ, ಕಳೆದ ಕೆಲವು ಸಮಯದಿಂದ ತಮ್ಮ ಫಾರ್ಮ್ ಬಗ್ಗೆ ಎದ್ದಿದ್ದ ಟೀಕೆಗಳಿಗೆ ಬ್ಯಾಟ್ ಮೂಲಕವೇ ಉತ್ತರ ನೀಡಿದ್ದಾರೆ. ಸತತ 468 ದಿನಗಳು ಹಾಗೂ 24 ಇನಿಂಗ್ಸ್ಗಳ ಸುದೀರ್ಘ ಕಾಯುವಿಕೆಯ ನಂತರ ಸೂರ್ಯಕುಮಾರ್ ಅವರ ಬ್ಯಾಟ್ನಿಂದ ಸಿಡಿದ ಈ ಅರ್ಧಶತಕವು ಭಾರತೀಯ ಕ್ರಿಕೆಟ್ ಅಭಿಮಾನಿಗಳಲ್ಲಿ ಹೊಸ ಭರವಸೆ ಮೂಡಿಸಿದೆ.
ಸೂರ್ಯಕುಮಾರ್ ಅವರ ಈ ಸ್ಫೋಟಕ ಪುನರಾಗಮನದ ಹಿಂದೆ ಒಂದು ಪ್ರಮುಖ ತಾಂತ್ರಿಕ ಬದಲಾವಣೆ ಅಡಗಿದೆ ಎಂದು ಭಾರತದ ಕ್ರಿಕೆಟ್ ದಂತಕಥೆ ಸುನಿಲ್ ಗವಾಸ್ಕರ್ ವಿಶ್ಲೇಷಿಸಿದ್ದಾರೆ. ಈ ಹಿಂದೆ ಇನಿಂಗ್ಸ್ನ ಆರಂಭದಲ್ಲೇ ಲೆಗ್ ಸೈಡ್ ಅಥವಾ ವಿಕೆಟ್ ಹಿಂದೆ ವಿಲಕ್ಷಣ ಶಾಟ್ಗಳನ್ನು ಆಡಲು ಹೋಗಿ ಸೂರ್ಯ ಔಟಾಗುತ್ತಿದ್ದರು. ಆದರೆ ರಾಯ್ಪುರದಲ್ಲಿ ಅವರು ತಮ್ಮ ಹಳೆಯ ಶೈಲಿಯನ್ನೇ ಬದಲಿಸಿಕೊಂಡು ಮೈದಾನದ ನೇರ ದಿಕ್ಕಿನಲ್ಲಿ (Straight) ಆಡಲು ಒತ್ತು ನೀಡಿದ್ದರು. ಇನಿಂಗ್ಸ್ನ ಆರಂಭದಲ್ಲಿ ಆಫ್ ಸೈಡ್ನಲ್ಲಿ ಅವರು ಬಾರಿಸಿದ ಅಮೋಘ ಡ್ರೈವ್ಗಳು ಅವರ ಆತ್ಮವಿಶ್ವಾಸವನ್ನು ಹೆಚ್ಚಿಸಿದವು. ಚೆಂಡು ಬ್ಯಾಟ್ನ ಮಧ್ಯಭಾಗಕ್ಕೆ ತಗುಲಿದಾಗ ಸಿಗುವ ಆ ದೃಢತೆ ಸೂರ್ಯ ಅವರಿಗೆ ಇಡೀ ಮೈದಾನವನ್ನು ಆವರಿಸಿಕೊಳ್ಳಲು ನೆರವಾಯಿತು ಎಂದು ಗವಾಸ್ಕರ್ ಅಭಿಪ್ರಾಯಪಟ್ಟಿದ್ದಾರೆ.
ತಾಳ್ಮೆಯಿಂದ ಆಟಿ ಪುಟಿದೆದ್ದರು
ಪಂದ್ಯದ ಒಂದು ಹಂತದಲ್ಲಿ ಕೇವಲ 6 ರನ್ಗಳಿಗೆ 2 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ಭಾರತಕ್ಕೆ ಸೂರ್ಯಕುಮಾರ್ ಮತ್ತು ಇಶಾನ್ ಕಿಶನ್ ಜೋಡಿ ಆಸರೆಯಾಯಿತು. ಆರಂಭದಲ್ಲಿ ಅತ್ಯಂತ ತಾಳ್ಮೆಯಿಂದ ಆಡಿದ ಸೂರ್ಯ, ಮೊದಲ 11 ಎಸೆತಗಳಲ್ಲಿ ಕೇವಲ 11 ರನ್ ಗಳಿಸಿದ್ದರು. ಆ ಸಮಯದಲ್ಲಿ ಅಬ್ಬರಿಸುತ್ತಿದ್ದ ಇಶಾನ್ ಕಿಶನ್ಗೆ ಹೆಚ್ಚಿನ ಸ್ಟ್ರೈಕ್ ನೀಡುವ ಮೂಲಕ ಸೂರ್ಯ ಒಬ್ಬ ಜವಾಬ್ದಾರಿಯುತ ನಾಯಕನಾಗಿ ಪಕ್ವತೆ ಮೆರೆದರು. ಒಮ್ಮೆ ಕಣ್ಣು ಕುಳಿತ ಮೇಲೆ ತಮ್ಮ ನೈಜ ಆಟ ಆರಂಭಿಸಿದ ಅವರು, ಕೇವಲ 23 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ಕಿಶನ್ ಅವರ 76 ರನ್ ಹಾಗೂ ಸೂರ್ಯ ಅವರ ಅಜೇಯ 82 ರನ್ಗಳ ನೆರವಿನಿಂದ ಭಾರತವು ಪಾಕಿಸ್ತಾನದ ಹೆಸರಲ್ಲಿದ್ದ ವಿಶ್ವ ದಾಖಲೆಯನ್ನು ಅಳಿಸಿ ಹಾಕಿ, ಅತಿ ವೇಗವಾಗಿ 209 ರನ್ಗಳ ಗುರಿಯನ್ನು ಬೆನ್ನಟ್ಟಿತು.
ಸ್ವದೇಶದಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್ಗೆ ಮುನ್ನ ಸೂರ್ಯಕುಮಾರ್ ಯಾದವ್ ಲಯಕ್ಕೆ ಮರಳಿರುವುದು ಟೀಮ್ ಇಂಡಿಯಾಕ್ಕೆ ಆನೆಬಲ ತಂದಿದೆ. 2024ರ ವಿಶ್ವಕಪ್ ಗೆಲುವಿನ ನಂತರ ಕಳಪೆ ಸರಾಸರಿ ಹೊಂದಿದ್ದ ಸೂರ್ಯ, ಇದೀಗ ಸರಿಯಾದ ಸಮಯದಲ್ಲಿ ಫಾರ್ಮ್ಗೆ ಮರಳಿದ್ದಾರೆ. ಅವರ ಈ ಮನಸ್ಥಿತಿಯ ಬದಲಾವಣೆ ಮತ್ತು ತಾಂತ್ರಿಕ ಶಿಸ್ತು ಭಾರತದ ಮಧ್ಯಮ ಕ್ರಮಾಂಕವನ್ನು ಮತ್ತಷ್ಟು ಬಲಿಷ್ಠಗೊಳಿಸಿದೆ. ರಾಯ್ಪುರದ ಈ ಇನಿಂಗ್ಸ್ ಸೂರ್ಯಕುಮಾರ್ ಅವರ ವೃತ್ತಿಜೀವನದ ಮೈಲಿಗಲ್ಲಾಗಿದ್ದು, ಮುಂಬರುವ ಪಂದ್ಯಗಳಲ್ಲಿ ಅವರು ಇದೇ ಲಯವನ್ನು ಮುಂದುವರಿಸುವ ಮುನ್ಸೂಚನೆ ನೀಡಿದ್ದಾರೆ.
ಇದನ್ನೂ ಓದಿ: ದುಬಾರಿಯಾದ ಅರ್ಷದೀಪ್ ಸಿಂಗ್ ಹೆಸರಿಗೆ ಅನಗತ್ಯ ದಾಖಲೆ | ಏನದು ಕೆಟ್ಟ ದಾಖಲೆ
