ಮಾರಕ ರೋಗದಿಂದ ಸಾವಿನ ದವಡೆ ತಲುಪಿದ ಆಸ್ಟ್ರೇಲಿಯಾದ ಕ್ರಿಕೆಟಿಗ ಡೇಮಿಯನ್ ಮಾರ್ಟಿನ್

ಸಿಡ್ನಿ: ಆಸ್ಟ್ರೇಲಿಯಾ ಕ್ರಿಕೆಟ್ ತಂಡದ ಸ್ಟೈಲಿಶ್ ಬ್ಯಾಟರ್ ಡೇಮಿಯನ್ ಮಾರ್ಟಿನ್ ಪ್ರಸ್ತುತ ಆಸ್ಪತ್ರೆಯಲ್ಲಿ ಮೆನಿಂಜೈಟಿಸ್ (Meningitis) ಎಂಬ ಮಾರಣಾಂತಿಕ ಕಾಯಿಲೆಯ ವಿರುದ್ಧ ಹೋರಾಡುತ್ತಿದ್ದಾರೆ. ಕಳೆದ ಕೆಲವು ದಿನಗಳಿಂದ ‘ಕೋಮಾ’ ಸ್ಥಿತಿಯಲ್ಲಿರುವ ಅವರ ಆರೋಗ್ಯದ ಬಗ್ಗೆ ಆಪ್ತ ಮಿತ್ರ ಆಡಮ್ ಗಿಲ್‌ಕ್ರಿಸ್ಟ್ ಈಗ ಸಕಾರಾತ್ಮಕ ಅಪ್‌ಡೇಟ್ ನೀಡಿದ್ದಾರೆ.

ಆಸ್ಟ್ರೇಲಿಯಾದ ಕ್ಲಾಸಿಕ್ ಆಟಗಾರ ಮಾರ್ಟಿನ್, ಡಿಿಸೆಂಬರ್ 26ರಂದು (ಬಾಕ್ಸಿಂಗ್ ಡೇ) ಆರೋಗ್ಯ ಹದಗೆಟ್ಟ ಹಿನ್ನೆಲೆಯಲ್ಲಿ ಗೋಲ್ಡ್ ಕೋಸ್ಟ್ ಯೂನಿವರ್ಸಿಟಿ ಆಸ್ಪತ್ರೆಗೆ ದಾಖಲಾಗಿದ್ದರು. ವೈದ್ಯರು ಅವರನ್ನು ಪ್ರಸ್ತುತ ‘ಮೆಡಿಕಲಿ ಇಂಡ್ಯೂಸ್ಡ್ ಕೋಮಾ’ದಲ್ಲಿ ಇರಿಸಿ ಚಿಕಿತ್ಸೆ ನೀಡುತ್ತಿದ್ದಾರೆ.

ಗಿಲ್‌ಕ್ರಿಸ್ಟ್ ಹೇಳಿದ್ದೇನು?

ಫಾಕ್ಸ್ ಕ್ರಿಕೆಟ್ (FOX Cricket) ಜೊತೆ ಮಾತನಾಡಿದ ಮಾಜಿ ವಿಕೆಟ್ ಕೀಪರ್ ಆಡಮ್ ಗಿಲ್‌ಕ್ರಿಸ್ಟ್, “ಮಾರ್ಟಿನ್ ಇನ್ನೂ ಆಸ್ಪತ್ರೆಯಲ್ಲಿದ್ದಾರೆ. ಆದರೆ ಕಳೆದ 24 ಗಂಟೆಗಳಲ್ಲಿ ಅವರ ಆರೋಗ್ಯದಲ್ಲಿ ಚೇತರಿಕೆ ಕಂಡುಬಂದಿದೆ. ನಡೆಸಲಾದ ವಿವಿಧ ಪರೀಕ್ಷೆಗಳಲ್ಲಿ ಸಕಾರಾತ್ಮಕ ಲಕ್ಷಣಗಳು ಗೋಚರಿಸುತ್ತಿವೆ. ಅವರ ಚೇತರಿಕೆ ಹೀಗೆಯೇ ಮುಂದುವರಿಯಲಿ ಎಂದು ಆಶಿಸುತ್ತೇನೆ” ಎಂದು ತಿಳಿಸಿದ್ದಾರೆ. ಅಲ್ಲದೆ, ಜಗತ್ತಿನಾದ್ಯಂತ ಅಭಿಮಾನಿಗಳು ಮತ್ತು ಕ್ರಿಕೆಟಿಗರು ತೋರುತ್ತಿರುವ ಪ್ರೀತಿಗೆ ಅವರು ಕೃತಜ್ಞತೆ ಸಲ್ಲಿಸಿದ್ದಾರೆ.

ಪ್ರಾರ್ಥಿಸುತ್ತಿರುವ ಕ್ರಿಕೆಟ್ ಲೋಕ

ಮಾರ್ಟಿನ್ ಶೀಘ್ರವಾಗಿ ಚೇತರಿಸಿಕೊಳ್ಳಲಿ ಎಂದು ಭಾರತದ ಮಾಜಿ ಆಟಗಾರರಾದ ವಿ.ವಿ.ಎಸ್. ಲಕ್ಷ್ಮಣ್, ರವಿಚಂದ್ರನ್ ಅಶ್ವಿನ್ ಸೇರಿದಂತೆ ಹಲವು ದಿಗ್ಗಜರು ಸಾಮಾಜಿಕ ಜಾಲತಾಣಗಳಲ್ಲಿ ಹಾರೈಸಿದ್ದಾರೆ. “ನನ್ನ ಆತ್ಮೀಯ ಗೆಳೆಯ ಮಾರ್ಟಿನ್ ಮತ್ತು ಅವರ ಕುಟುಂಬದ ಪರವಾಗಿ ನಮ್ಮ ಪ್ರಾರ್ಥನೆ ಇದೆ. ಇಡೀ ಕ್ರಿಕೆಟ್ ಲೋಕವೇ ನಿಮ್ಮ ಜೊತೆಗಿದೆ” ಎಂದು ಲಕ್ಷ್ಮಣ್ ಭಾವನಾತ್ಮಕವಾಗಿ ಬರೆದುಕೊಂಡಿದ್ದಾರೆ.

ಅದ್ಭುತ ಆಟಗಾರ ಮಾರ್ಟಿನ್

1992 ರಿಂದ 2006 ರವರೆಗೆ ಆಸ್ಟ್ರೇಲಿಯಾ ತಂಡದ ಅವಿಭಾಜ್ಯ ಅಂಗವಾಗಿದ್ದ ಮಾರ್ಟಿನ್, 67 ಟೆಸ್ಟ್ ಪಂದ್ಯಗಳಿಂದ 4,406 ರನ್ ಗಳಿಸಿದ್ದಾರೆ. ಇದರಲ್ಲಿ 13 ಶತಕಗಳು ಸೇರಿವೆ. ಸ್ಟೀವ್ ವಾ ಮತ್ತು ರಿಕಿ ಪಾಂಟಿಂಗ್ ನಾಯಕತ್ವದ ಅಜೇಯ ಆಸ್ಟ್ರೇಲಿಯಾ ತಂಡದ ಪ್ರಮುಖ ಸ್ತಂಭವಾಗಿದ್ದ ಮಾರ್ಟಿನ್, ತಮ್ಮ ಸೊಗಸಾದ ಬ್ಯಾಟಿಂಗ್ ಶೈಲಿಗೆ ಹೆಸರಾದವರು.

ಏನಿದು ಕಾಯಿಲೆ?

ಮೆನಿಂಜೈಟಿಸ್ (Meningitis) ಎಂಬುದು ಮೆದುಳು ಮತ್ತು ಬೆನ್ನುಹುರಿಯನ್ನು ರಕ್ಷಿಸುವ ಪೊರೆಗಳಲ್ಲಿ (Meninges) ಉಂಟಾಗುವ ತೀವ್ರವಾದ ಉರಿಯೂತ ಅಥವಾ ಸೋಂಕು ಆಗಿದ್ದು, ಇದು ಹೆಚ್ಚಾಗಿ ಬ್ಯಾಕ್ಟೀರಿಯಾ ಅಥವಾ ವೈರಸ್‌ಗಳ ದಾಳಿಯಿಂದ ಸಂಭವಿಸುತ್ತದೆ. ಈ ಕಾಯಿಲೆಯು ಹಠಾತ್ ಕಾಣಿಸಿಕೊಳ್ಳುವ ತೀವ್ರ ಜ್ವರ, ಕುತ್ತಿಗೆ ಬಿಗಿತ (stiff neck), ಸಹಿಸಲಸಾಧ್ಯವಾದ ತಲೆನೋವು, ವಾಂತಿ ಮತ್ತು ಬೆಳಕನ್ನು ನೋಡಲು ಕಷ್ಟವಾಗುವಂತಹ (photophobia) ಲಕ್ಷಣಗಳನ್ನು ಹೊಂದಿರುತ್ತದೆ. ಇದು ಮೆದುಳಿನ ಕಾರ್ಯನಿರ್ವಹಣೆಯ ಮೇಲೆ ತೀವ್ರ ಪರಿಣಾಮ ಬೀರುವುದರಿಂದ ರೋಗಿಯು ಗೊಂದಲಕ್ಕೊಳಗಾಗುವುದು ಅಥವಾ ಪ್ರಜ್ಞೆ ಕಳೆದುಕೊಂಡು ಕೋಮಾ ಸ್ಥಿತಿಗೆ ತಲುಪುವ ಅಪಾಯವಿರುತ್ತದೆ.

ಸಕಾಲದಲ್ಲಿ ಸೂಕ್ತ ವೈದ್ಯಕೀಯ ಚಿಕಿತ್ಸೆ ನೀಡದಿದ್ದರೆ ಇದು ಮೆದುಳಿಗೆ ಶಾಶ್ವತ ಹಾನಿ ಉಂಟುಮಾಡಬಹುದು ಅಥವಾ ಪ್ರಾಣಾಪಾಯಕ್ಕೆ ಕಾರಣವಾಗಬಹುದು.

ಇದನ್ನೂ ಓದಿ: ಕ್ರಿಕೆಟ್ ಮೈದಾನದಲ್ಲಿ ಪ್ಯಾಲೆಸ್ತೀನ್ ಧ್ವಜ ಪ್ರದರ್ಶನ | ಆಟಗಾರ ಮತ್ತು ಸಂಘಟಕರಿಗೆ ಜಮ್ಮು-ಕಾಶ್ಮೀರ ಪೊಲೀಸರ ಸಮನ್ಸ್