ಬೆಂಗಳೂರು: ಗೃಹ ಸಾಲ, ವಾಹನ ಸಾಲ ಸೇರಿ ಹಲವು ರೀತಿಯ ಸಾಲ ಮಾಡಿದವರಿಗೆ ಕೆಲ ದಿನಗಳ ಹಿಂದಷ್ಟೇ ಭಾರತೀಯ ರಿಸರ್ವ್ ಬ್ಯಾಂಕ್ ಸಿಹಿ ಸುದ್ದಿ ನೀಡಿದೆ. ರೆಪೊ ದರವನ್ನು ಇಳಿಸುವ ಮೂಲಕ ಸಾಲಗಾರರ ಇಎಂಐ ಹೊರೆಯನ್ನು ಸ್ವಲ್ಪ ಇಳಿಸಿದೆ. ಇದರ ಬೆನ್ನಲ್ಲೇ, ಆರ್ ಬಿಐ ಈಗ ಸಾಲಗಾರರಿಗೆ ಮತ್ತೊಂದು ಸಹಿ ಸುದ್ದಿ ಘೋಷಣೆ ಮಾಡಿದೆ. 2026ರ ಜನವರಿ 1ರಿಂದ ಹೊಸ ನಿಯಮವು ಸಾಲಗಾರರಿಗೆ ಅನುಕೂಲ ಮಾಡಿಕೊಡಲಿದೆ.
ಹೌದು, ಸಾಲಗಾರರು ಅವಧಿಗೂ ಮುನ್ನ ಸಾಲ ತೀರಿಸಿದರೆ, ಬ್ಯಾಂಕುಗಳು ಹಾಗೂ ನಾನ್ ಬ್ಯಾಂಕಿಂಗ್ ಫೈನಾನ್ಶಿಯಲ್ ಕಂಪನಿಗಳು ವಿಧಿಸುವ ಶುಲ್ಕವನ್ನು ಆರ್ ಬಿಐ ಈಗ ರದ್ದುಗೊಳಿಸಿದೆ. ಅಂದರೆ, ಸಾಲಗಾರರು ಗೃಹ ಸಾಲವನ್ನೋ, ವಾಹನ ಸಾಲವನ್ನೋ ಮಾಡಿರುತ್ತಾರೆ. ಆದರೆ, ಅವರಿಗೆ ಹೂಡಿಕೆಯಿಂದಲೋ ಸೇರಿ ಯಾವುದೇ ಕಾರಣದಿಂದ ಹೆಚ್ಚಿನ ಹಣ ಲಭಿಸುತ್ತದೆ. ಆಗ ಅವರು ಅವಧಿಗೂ ಮುನ್ನ ಸಾಲ ತೀರಿಸಿದರೆ ಕೆಲ ಬ್ಯಾಂಕ್ ಗಳು ಹಾಗೂ ಹಣಕಾಸು ಕಂಪನಿಗಳು ಶುಲ್ಕ ವಿಧಿಸುತ್ತವೆ.
ಸಾಲಗಾರರಿಗೆ ಇಂತಹ ಶುಲ್ಕದಿಂದ ಹೊರೆಯಾಗುತ್ತಿತ್ತು. ಇದನ್ನು ಮನಗಂಡ ಕೇಂದ್ರೀಯ ಬ್ಯಾಂಕ್ ಈಗ, ಜನವರಿ 1ರಿಂದ ಬ್ಯಾಂಕ್ ಗಳು ಹಾಗೂ ಬ್ಯಾಂಕೇತರ ಹಣಕಾಸು ಸಂಸ್ಥೆಗಳು, ಯಾವುದೇ ಕಾರಣಕ್ಕೂ ಅವಧಿಗೂ ಮುನ್ನ ಸಾಲ ತೀರಿಸಿದರೆ ಶುಲ್ಕ ವಿಧಿಸಬಾರದು ಎಂದು ಆದೇಶ ಹೊರಡಿಸಿದೆ. ವಾಣಿಜ್ಯೇತರ ಕಾರಣಕ್ಕಾಗಿ ಸಾಲ ತೆಗೆದುಕೊಂಡವರಿಗೆ ಹೊಸ ನಿಯಮಗಳು ಅನ್ವಯ ಆಗಲಿವೆ.
ಇದರ ಜತೆಗೆ ಮತ್ತೊಂದು ಹೊಸ ನಿಯಮವೂ ಜಾರಿಗೆ ಬರಲಿದೆ. ಡಿಟಿಟಲ್ ಪ್ಲಾಟ್ ಫಾರ್ಮ್ ಗಳ ಮೂಲಕ ಬ್ಯಾಂಕುಗಳು ಗ್ರಾಹಕರಿಂದ ದಾಖಲೆ ಪಡೆಯುವ ಮುನ್ನ ಅವರ ಅನುಮತಿ ಪಡೆಯಬೇಕು. ಹಾಗೆಯೇ, ಗ್ರಾಹಕರಿಗೆ ದಾಖಲೆ, ಮೊಬೈಲ್ ನಲ್ಲಿ ಕಾಂಟ್ಯಾಕ್ಟ್ ಗಳು ಸೇರಿ ಯಾವುದೇ ಮಾಹಿತಿ ನೀಡಲು ತಿರಸ್ಕರಿಸುವ ಹಕ್ಕು ಇರಬೇಕು ಎಂದು ತಿಳಿಸಿದೆ.
ಇದನ್ನೂ ಓದಿ : ಆನ್ಲೈನ್ ವಂಚನೆ ತಡೆಗೆ ಕ್ರಮ : ಮೊಬೈಲ್ ಕಾಲ್ ರಿಸೀವ್ ಮಾಡೋ ಮುನ್ನ ಇದು ನೆನಪಿರಲಿ
