ಬೆಂಗಳೂರು: ದೇಶದಲ್ಲೇ ಅತಿ ಹೆಚ್ಚು ಜನ ಬಳಸುವ ಯುಪಿಐ ಅಗ್ರಿಗೇಟರ್ ಆಗಿರುವ ಫೋನ್ ಪೇ ಈಗ ಹೂಡಿಕೆಯ ಮಾಧ್ಯಮವೂ ಆಗಿದೆ. ಮ್ಯೂಚುವಲ್ ಫಂಡ್ ಎಸ್ಐಪಿ, ಲಂಪ್ ಸಮ್ ಅಮೌಂಟ್, ಗೋಲ್ಡ್ ಇಟಿಎಫ್ ಸೇರಿ ಹಲವು ರೀತಿಯಲ್ಲಿ ಫೋನ್ ಪೇ ಮೂಲಕ ಹೂಡಿಕೆ ಮಾಡಬಹುದಾಗಿದೆ. ಇದರ ಬೆನ್ನಲ್ಲೇ, ಫೋನ್ ಪೇ ಈಗ ಹೊಸ ಹೂಡಿಕೆಯ ಯೋಜನೆಯನ್ನು ಪರಿಚಯಿಸಿದೆ. ಆ ಮೂಲಕ ಯಾರು ಬೇಕಾದರೂ ಇದರಲ್ಲಿ ಹೂಡಿಕೆ ಮಾಡಲು ಅವಕಾಶ ನೀಡಲಾಗಿದೆ.
ಹೌದು, ಫೋನ್ ಪೇ ಸಂಸ್ಥೆಯು ಡೈಲಿ ಎಸ್ಐಪಿ (Daily SIP) ಎಂಬ ಹೊಸ ಹೂಡಿಕೆ ಯೋಜನೆಯನ್ನು ಪರಿಚಯಿಸಿದೆ. ಇದರ ಅನ್ವಯ ಗ್ರಾಹಕರು ಪ್ರತಿ ದಿನ ಕನಿಷ್ಠ 10 ರೂಪಾಯಿಯಿಂದಲೂ ಮ್ಯೂಚುವಲ್ ಫಂಡ್ ಎಸ್ಐಪಿಗಳಲ್ಲಿ ಹೂಡಿಕೆ ಮಾಡಬಹುದಾಗಿದೆ. ಪ್ರತಿ ದಿನ ಕೂಲಿ ಮಾಡುವವರು, ಗೃಹಿಣಿಯರಿಂದ ಹಿಡಿದು ಯಾರು ಬೇಕಾದರೂ ಸಣ್ಣ ಮೊತ್ತವನ್ನು ಹೂಡಿಕೆ ಮಾಡಬಹುದಾಗಿದೆ.
ಆಟೋ ಪೇಮೆಂಟ್ ಮೂಲಕವೂ ಎಸ್ಐಪಿ ಆರಂಭಿಸಬಹುದಾಗಿದೆ. ಇದರಿಂದ ನಿಮಗೆ ಪ್ರತಿ ದಿನ ಅಥವಾ ಆಯ್ಕೆ ಮಾಡಿಕೊಂಡರೆ ಪ್ರತಿ ತಿಂಗಳು ಹಣ ಕಡಿತವಾಗುತ್ತದೆ. ಈಕ್ವಿಟಿಗಳಿಂದ ಹಿಡಿದು, ಮಲ್ಟಿ ಅಸೆಟ್ ಹಾಗೂ ಚಿನ್ನದ ಮೇಲೂ ಸಾರ್ವಜನಿಕರು ಹೂಡಿಕೆ ಮಾಡಬಹುದಾಗಿದೆ. ಹೊಸ ಸೇವೆಯು ಫೋನ್ ಪೇ ಆ್ಯಪ್ ನಲ್ಲಿಯೇ ಲಭ್ಯವಿದೆ.
ದೇಶದಲ್ಲಿ ಇತ್ತೀಚೆಗೆ ಮ್ಯೂಚುವಲ್ ಫಂಡ್ ಎಸ್ಐಪಿಗಳಲ್ಲಿ ಹೂಡಿಕೆ ಮಾಡುವವರ ಪ್ರಮಾಣ ಗಣನೀಯವಾಗಿ ಜಾಸ್ತಿಯಾಗಿದೆ. ಕಳೆದ ನವೆಂಬರ್ ನಲ್ಲಿಯೇ ದೇಶದ ಜನ 29 ಸಾವಿರ ಕೋಟಿ ರೂ.ಗಿಂತ ಅಧಿಕ ಹಣವನ್ನು ಎಸ್ಐಪಿಯಲ್ಲಿ ಹೂಡಿಕೆ ಮಾಡಿದ್ದಾರೆ. ಇದರೊಂದಿಗೆ ದೇಶದಲ್ಲಿ ಸಕ್ರಿಯ ಎಸ್ಐಪಿ ಖಾತೆಗಳ ಸಂಖ್ಯೆ 9.43 ಕೋಟಿಗೆ ತಲುಪಿದೆ.
ಗಮನಿಸಿ:
ನಾವು ಫೋನ್ ಪೇ ಆರಂಭಿಸಿರುವ ಹೊಸ ಹೂಡಿಕೆ ಯೋಜನೆ ಬಗ್ಗೆ ಮಾಹಿತಿ ನೀಡುವ ದೃಷ್ಟಿಯಿಂದ ಮಾತ್ರ ಈ ವರದಿಯನ್ನು ಪ್ರಕಟಿಸಿದ್ದೇವೆ. ಹೂಡಿಕೆ ಮಾಡಲು ನಾವು ಮಾಡುತ್ತಿರುವ ಶಿಫಾರಸು ಇದಲ್ಲ. ಯಾವುದೇ ಬಗೆಯ ಹೂಡಿಕೆಗೂ ಮುನ್ನ ತಜ್ಞರನ್ನು ಸಂಪರ್ಕಿಸುವುದು ಕಡ್ಡಾಯವಾಗಿದೆ.
ಇದನ್ನೂ ಓದಿ : ಎಸ್ಸೆಸ್ಸೆಲ್ಸಿ, ಪಿಯುಸಿ ಪಾಸಾದವರಿಗೆ ಗುಡ್ ನ್ಯೂಸ್ : 340 ಅಂಗನವಾಡಿ ಕಾರ್ಯಕರ್ತೆಯರ ನೇಮಕ
