ನವದೆಹಲಿ: ನಿಷೇಧಿತ ಉಗ್ರ ಸಂಘಟನೆ ಜೈಷ್-ಎ-ಮೊಹಮ್ಮದ್ (JeM) ತನ್ನ ಹೊಸ ಮಹಿಳಾ ಘಟಕವಾದ ‘ಜಮಾತ್-ಉಲ್-ಮೊಮಿನಾತ್’ ಮೂಲಕ ಉಗ್ರ ಚಟುವಟಿಕೆಗಳನ್ನು ವಿಸ್ತರಿಸುತ್ತಿದೆ. ಕೇವಲ ಕೆಲವೇ ವಾರಗಳಲ್ಲಿ 5,000ಕ್ಕೂ ಹೆಚ್ಚು ಮಹಿಳೆಯರನ್ನು ಈ ಪಡೆಗೆ ನೇಮಿಸಿಕೊಳ್ಳಲಾಗಿದ್ದು, ಆನ್ಲೈನ್ ಮೂಲಕ ಅವರಿಗೆ ತರಬೇತಿ ನೀಡಲಾಗುತ್ತಿದೆ ಎಂಬ ಆಘಾತಕಾರಿ ಮಾಹಿತಿ ಭದ್ರತಾ ಸಂಸ್ಥೆಗಳ ಮೂಲಗಳಿಂದ ಲಭ್ಯವಾಗಿದೆ.
ದರ 500 ರೂ., 40 ನಿಮಿಷದ ತರಬೇತಿ
ಮೂಲಗಳ ಪ್ರಕಾರ, ಅಕ್ಟೋಬರ್ 8ರಂದು ಜೈಷ್ ಪ್ರಧಾನ ಕಚೇರಿಯಾದ ‘ಮರ್ಕಜ್ ಉಸ್ಮಾನ್-ಒ-ಅಲಿ’ಯಲ್ಲಿ ನೇಮಕಾತಿ ಪ್ರಕ್ರಿಯೆ ಆರಂಭವಾಗಿತು. ಪಾಕಿಸ್ತಾನದ ಬಹಾವಲ್ಪುರ, ಮುಲ್ತಾನ್, ಸಿಯಾಲ್ಕೋಟ್, ಕರಾಚಿ, ಮುಜಾಫರಾಬಾದ್ ಮತ್ತು ಕೋಟ್ಲಿಯಿಂದ ಮಹಿಳೆಯರನ್ನು ಈ ಉಗ್ರ ಸಂಘಟನೆಗೆ ಸೇರಿಸಿಕೊಳ್ಳಲಾಗಿದೆ. ನೇಮಕಗೊಂಡ ಮಹಿಳೆಯರಿಗೆ 40 ನಿಮಿಷಗಳ ಆನ್ಲೈನ್ ತರಬೇತಿ ನೀಡಲಾಗುತ್ತಿದ್ದು, ಇದಕ್ಕಾಗಿ ಪ್ರತಿಯೊಬ್ಬರಿಂದ 500 ರೂ. ಶುಲ್ಕ ವಸೂಲಿ ಮಾಡಲಾಗುತ್ತಿದೆ. “ಅಲ್ಲಾಹುವಿನ ಕೃಪೆಯಿಂದ ಕೆಲವೇ ವಾರಗಳಲ್ಲಿ 5,000ಕ್ಕೂ ಹೆಚ್ಚು ಮಹಿಳೆಯರು ನಮ್ಮೊಂದಿಗೆ ಕೈಜೋಡಿಸಿದ್ದಾರೆ,” ಎಂದು ಜೈಷ್ ಮುಖ್ಯಸ್ಥ ಮಸೂದ್ ಅಜರ್ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾನೆ.
ಉಗ್ರರ ಪತ್ನಿಯರು, ಸಹೋದರಿಯರೇ ನೇತಾರರು
ಈ ‘ಜಮಾತ್-ಉಲ್-ಮೊಮಿನಾತ್’ ಮಹಿಳಾ ಪಡೆಯ ನೇತೃತ್ವವನ್ನು ಮಸೂದ್ ಅಜರ್ ಸಹೋದರಿ ಸಾದಿಯಾ ವಹಿಸಿಕೊಂಡಿದ್ದಾಳೆ. ಈಕೆ ‘ಆಪರೇಷನ್ ಸಿಂದೂರ’ ವೇಳೆ ಭಾರತೀಯ ಸೇನೆಯ ದಾಳಿಯಲ್ಲಿ ಹತ್ಯೆಯಾದ ಉಗ್ರ ಯೂಸುಫ್ ಅಜರ್ನ ಪತ್ನಿ. ಅಲ್ಲದೆ, ಪುಲ್ವಾಮಾ ದಾಳಿಯ ಸೂತ್ರಧಾರಿ, ಎನ್ಕೌಂಟರ್ನಲ್ಲಿ ಹತ್ಯೆಯಾದ ಉಮರ್ ಫಾರೂಕ್ನ ಪತ್ನಿ ಆಫಿರಾ ಕೂಡ ಈ ಪಡೆಯ ಮತ್ತೊಬ್ಬ ಪ್ರಮುಖ ಪಾತ್ರಧಾರಿಯಾಗಿದ್ದಾಳೆ.
ಫಿದಾಯೀನ್ ದಾಳಿಗೆ ಸಂಚು
ಐಸಿಸ್, ಹಮಾಸ್ ಮತ್ತು ಎಲ್ಟಿಟಿಇ ಮಾದರಿಯಲ್ಲಿ ಮಹಿಳಾ ಫಿದಾಯೀನ್ (ಆತ್ಮಾಹುತಿ) ದಳವನ್ನು ಸಿದ್ಧಪಡಿಸುವುದು ಮತ್ತು ಮಹಿಳೆಯರನ್ನು ಮೂಲಭೂತವಾದಿಗಳನ್ನಾಗಿ ಮಾಡುವುದು ಜೈಷ್ ಸಂಘಟನೆಯ ಪ್ರಮುಖ ಉದ್ದೇಶವಾಗಿದೆ. ಇತ್ತೀಚೆಗೆ ದೆಹಲಿಯಲ್ಲಿ 13 ಜನರ ಸಾವಿಗೆ ಕಾರಣವಾದ ಕಾರು ಸ್ಫೋಟ ಪ್ರಕರಣ ಮತ್ತು ಫರಿದಾಬಾದ್ನಲ್ಲಿ ಸ್ಫೋಟಕಗಳೊಂದಿಗೆ ಸೆರೆಸಿಕ್ಕ ಡಾ. ಶಾಹೀನ್ ಸಯೀದ್ಗೂ ಈ ಮಹಿಳಾ ಘಟಕಕ್ಕೂ ನಂಟಿರುವುದು ತನಿಖೆಯಿಂದ ತಿಳಿದುಬಂದಿದೆ.
‘ದೌರಾ-ಎ-ತಸ್ ಕಿಯಾ’ ತರಬೇತಿ
ಪುರುಷ ಉಗ್ರರಿಗೆ 15 ದಿನಗಳ ‘ದೌರಾ-ಎ-ತರ್ಬಿಯತ್’ ತರಬೇತಿ ಇರುವಂತೆಯೇ, ಮಹಿಳೆಯರಿಗಾಗಿ ‘ದೌರಾ-ಎ-ತಸ್ ಕಿಯಾ’ ಎಂಬ ವಿಶೇಷ ಕೋರ್ಸ್ ವಿನ್ಯಾಸಗೊಳಿಸಲಾಗಿದೆ. ಈ ಪಡೆಗೆ ಸೇರುವ ಮಹಿಳೆಯರು ತಮ್ಮ ಪತಿ ಅಥವಾ ಹತ್ತಿರದ ಸಂಬಂಧಿಗಳನ್ನು ಹೊರತುಪಡಿಸಿ ಬೇರೆ ಯಾವುದೇ ಪುರುಷರೊಂದಿಗೆ ಫೋನ್ ಅಥವಾ ಮೆಸೆಂಜರ್ ಮೂಲಕ ಸಂಪರ್ಕ ಸಾಧಿಸುವಂತಿಲ್ಲ ಎಂಬ ಕಠಿಣ ನಿಯಮಗಳನ್ನು ಮಸೂದ್ ಅಜರ್ ವಿಧಿಸಿದ್ದಾನೆ.
ಇದನ್ನೂ ಓದಿ: ನಿಂತಿದ್ದ ಟ್ರಕ್ಗೆ ಕಾರು ಡಿಕ್ಕಿ | ನಾಲ್ವರು MBBS ವಿದ್ಯಾರ್ಥಿಗಳು ಸ್ಥಳದಲ್ಲೇ ದುರ್ಮರಣ
