ನಿತೀಶ್-ಲಾಲು ಹಣೆಬರಹ ನಿರ್ಧರಿಸುತ್ತಾ ಬಿಹಾರದ ದಾಖಲೆ ಮತದಾನ? ಇಲ್ಲಿದೆ ರೋಚಕ ಅಂಕಿ-ಅಂಶ

ಪಾಟ್ನಾ: ಬಿಹಾರ ವಿಧಾನಸಭಾ ಚುನಾವಣೆಯ ಇತಿಹಾಸದಲ್ಲಿ ಈವರೆಗೆ ಮತದಾನದ ಪ್ರಮಾಣವು ರಾಜ್ಯದ ಇಬ್ಬರು ಧೀಮಂತ ನಾಯಕರಾದ ಜೆಡಿಯುನ ನಿತೀಶ್ ಕುಮಾರ್ ಮತ್ತು ಆರ್‌ಜೆಡಿಯ ಲಾಲು ಪ್ರಸಾದ್ ಯಾದವ್ ಅವರ ಸೋಲು-ಗೆಲುವನ್ನು ನಿರ್ಧರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿವೆ. ಈ ಬಾರಿಯ ಮೊದಲ ಹಂತದ ಮತದಾನದಲ್ಲೇ ಸಾರ್ವಕಾಲಿಕ ದಾಖಲೆಯ ಶೇ.64.66 ಮತದಾನ ದಾಖಲಾಗಿದ್ದು, ಹೀಗಾಗಿ ಪ್ರಸಕ್ತ ಚುನಾವಣೆಯ ಫಲಿತಾಂಶ ತೀವ್ರ ಕುತೂಹಲ ಕೆರಳಿಸಿದೆ.​​

ಈ ದಾಖಲೆಯ ಮತದಾನ ತಮ್ಮ ಪರವಾಗಿದೆ ಎಂದು ಎನ್‌ಡಿಎ ಮತ್ತು ಮಹಾಘಟಬಂಧನ್ ಎರಡೂ ಮೈತ್ರಿಕೂಟಗಳು ಹೇಳಿಕೊಳ್ಳುತ್ತಿವೆ. ಸಾಮಾನ್ಯವಾಗಿ, ಅಧಿಕ ಮತದಾನವು ಆಡಳಿತ ವಿರೋಧಿ ಅಲೆಯ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಇದು ಆರ್‌ಜೆಡಿ ನೇತೃತ್ವದ ಮಹಾಘಟಬಂಧನ್‌ಗೆ ವರವಾಗಬಹುದು ಎಂಬ ವಾದವಿದೆ. ಆದರೆ, ಕೆಲವು ಸಂದರ್ಭಗಳಲ್ಲಿ ಇದು ಆಡಳಿತ ಪರ ಒಲವನ್ನು ಸಹ ಸೂಚಿಸಿದ್ದಿದೆ.​
ನವೆಂಬರ್ 11 ರಂದು 122 ಸ್ಥಾನಗಳಿಗೆ ಎರಡನೇ ಹಂತದ ಮತದಾನ ನಡೆಯಲಿದ್ದು, ಮೂರು ದಿನಗಳ ನಂತರ ಅಂದರೆ ನ.14ರಂದು ಫಲಿತಾಂಶ ಪ್ರಕಟವಾಗಲಿದೆ.​

ಶೇ.60ರ ಗಡಿಯ ಹಿಂದಿನ ರಹಸ್ಯ

ಹಿಂದಿನ ಚುನಾವಣೆಗಳ ವಿಶ್ಲೇಷಣೆಯು ಬಿಹಾರದ ಮತದಾನದ ಪ್ರಮಾಣವು ನಿತೀಶ್ ಕುಮಾರ್ ಅಥವಾ ಲಾಲು ಪ್ರಸಾದ್ ಯಾದವ್ ಅವರಲ್ಲಿ ಯಾರು ಸರ್ಕಾರ ರಚಿಸುತ್ತಾರೆ ಎಂಬುದನ್ನು ನಿರ್ಧರಿಸುವ ಒಂದು ಸ್ಪಷ್ಟ ಚಿತ್ರಣವನ್ನು ನೀಡುತ್ತದೆ.​

ನಿತೀಶ್ ಕುಮಾರ್ ಗೆದ್ದಾಗ: ನಿತೀಶ್ ಕುಮಾರ್ ಅವರು ಅಧಿಕಾರಕ್ಕೆ ಬಂದ ಪ್ರತಿ ಬಾರಿಯೂ ರಾಜ್ಯದಲ್ಲಿ ಮತದಾನದ ಪ್ರಮಾಣವು ಶೇ.60ಕ್ಕಿಂತ ಕಡಿಮೆ ಇತ್ತು.​

2005ರಲ್ಲಿ, ನಿತೀಶ್ ಮೊದಲ ಬಾರಿಗೆ ಎನ್‌ಡಿಎಯನ್ನು ಸ್ಪಷ್ಟ ಬಹುಮತದೊಂದಿಗೆ ಅಧಿಕಾರಕ್ಕೆ ತಂದಾಗ ಮತದಾನದ ಪ್ರಮಾಣ ಕೇವಲ ಶೇ.45.85 ಇತ್ತು.​

2010ರಲ್ಲಿ ಎನ್‌ಡಿಎ ಮತ್ತೆ ಗೆದ್ದಾಗ ಮತದಾನ ಪ್ರಮಾಣ ಶೇ.52.73 ಆಗಿತ್ತು.​

2015ರಲ್ಲಿ, ಲಾಲು ಪ್ರಸಾದ್ ಯಾದವ್ ಅವರೊಂದಿಗೆ ಮೈತ್ರಿ ಮಾಡಿಕೊಂಡು ಮಹಾಘಟಬಂಧನ್ ಮೂಲಕ ಮುಖ್ಯಮಂತ್ರಿಯಾದಾಗ ಮತದಾನ ಪ್ರಮಾಣ ಶೇ.56.91 ಇತ್ತು.​

2020ರಲ್ಲಿ, ಮತ್ತೆ ಎನ್‌ಡಿಎ ತೆಕ್ಕೆಗೆ ಮರಳಿದ ನಿತೀಶ್ ಕುಮಾರ್, ರೋಚಕ ಸ್ಪರ್ಧೆಯಲ್ಲಿ ಗೆದ್ದಾಗ ಮತದಾನದ ಪ್ರಮಾಣ ಶೇ.57.29 ಆಗಿತ್ತು.​

ಲಾಲು ಪ್ರಸಾದ್ ಯಾದವ್ ಗೆದ್ದಾಗ

ಇದಕ್ಕೆ ವ್ಯತಿರಿಕ್ತವಾಗಿ, ಲಾಲು ಪ್ರಸಾದ್ ಯಾದವ್ ಅವರು ಅಧಿಕಾರಕ್ಕೆ ಬಂದಾಗಲೆಲ್ಲಾ ಮತದಾನದ ಪ್ರಮಾಣವು ಯಾವಾಗಲೂ ಶೇ.60ರ ಗಡಿಯನ್ನು ದಾಟಿತ್ತು.​

1990ರಲ್ಲಿ ಲಾಲು ಪ್ರಸಾದ್ ಯಾದವ್ ಮೊದಲ ಬಾರಿಗೆ ಬಿಹಾರದಲ್ಲಿ ಅಧಿಕಾರ ಹಿಡಿದಾಗ, ಮತದಾನದ ಪ್ರಮಾಣ ಶೇ.62.04 ಇತ್ತು.​
1995ರಲ್ಲಿ ಅವರು ಅಧಿಕಾರವನ್ನು ಉಳಿಸಿಕೊಂಡಾಗ, ಶೇ.61.79 ಮತದಾನವಾಗಿತ್ತು.​

2000ರಲ್ಲಿ, ರಾಬ್ರಿ ದೇವಿ ಅವರ ನೇತೃತ್ವದಲ್ಲಿ ಆರ್‌ಜೆಡಿ ಮತ್ತೆ ಚುನಾವಣೆ ಗೆದ್ದಾಗ, ಸುಮಾರು ಶೇ.62.57 ಮತದಾರರು ಮತ ಚಲಾಯಿಸಿದ್ದರು.​
ಮತ್ತೊಂದು ಆಸಕ್ತಿದಾಯಕ ಸಂಗತಿಯೆಂದರೆ, ಮತದಾನದ ಪ್ರಮಾಣವು ಶೇ.5ಕ್ಕಿಂತ ಹೆಚ್ಚು ಹೆಚ್ಚಾದಾಗಲೆಲ್ಲಾ, ಅದು ಸರ್ಕಾರದ ಬದಲಾವಣೆಗೆ ಕಾರಣವಾಗಿದೆ. 2020ರಲ್ಲಿ ಶೇ.56.1 ರಷ್ಟಿದ್ದ ಮತದಾನವು ಈ ಬಾರಿ ಮೊದಲ ಹಂತದಲ್ಲಿ ಶೇ.64.66ಕ್ಕೆ ಏರಿದ್ದು, ಶೇ.8.5ರಷ್ಟು ಹೆಚ್ಚಳವಾಗಿದೆ. ಬಿಹಾರ ಚುನಾವಣೆಯ ಮೊದಲ ಹಂತದಲ್ಲಿನ ಈ ದಾಖಲೆಯ ಮತದಾನವು ನಿತೀಶ್ ಕುಮಾರ್ ವಿರುದ್ಧದ ಆಡಳಿತ ವಿರೋಧಿ ಅಲೆಯ ಸಂಕೇತವೇ ಅಥವಾ ಅವರ ಆಡಳಿತಕ್ಕೆ ನವೀಕೃತ ಬೆಂಬಲವೇ ಎಂಬುದನ್ನು ಕಾಲವೇ ನಿರ್ಧರಿಸಲಿದೆ.

ಇದನ್ನೂ ಓದಿ: ಹುಲಿ ದಾಳಿಗೆ ರೈತ ಬಲಿ.. ನಾಗರಹೊಳೆ, ಬಂಡೀಪುರ ಸಫಾರಿ, ಟ್ರಕ್ಕಿಂಗ್ ಇಂದಿನಿಂದಲೇ ಬಂದ್‌ | ಈಶ್ವರ್‌ ಖಂಡ್ರೆ ಆದೇಶ!