ಬೆಂಗಳೂರು: ದೇಶದ ಸುಮಾರು ಏಳೂವರೆ ಕೋಟಿ ಇಪಿಎಫ್ಒ ಸದಸ್ಯರಿಗೆ ಕೇಂದ್ರ ಸರ್ಕಾರ ಭರ್ಜರಿ ಗುಡ್ ನ್ಯೂಸ್ ನೀಡಿದೆ. ಹೌದು, ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆಯ (ಇಪಿಎಫ್ಒ) ಎಲ್ಲ ಸದಸ್ಯರು ಈಗ ಪಿಎಫ್ ಖಾತೆಯಲ್ಲಿರುವ ಶೇ.100ರಷ್ಟು ಹಣವನ್ನು ವಿತ್ ಡ್ರಾ ಮಾಡಲು ಕೇಂದ್ರ ಸರ್ಕಾರ ಅವಕಾಶ ನೀಡಿದೆ. ಇದರಿಂದಾಗಿ ಕೋಟ್ಯಂತರ ಇಪಿಎಫ್ ಸದಸ್ಯರು ಈಗ ಪೆನ್ಶನ್ ಹಣವನ್ನು ಹೊರತುಪಡಿಸಿ ಉಳಿದ ಎಲ್ಲ ಮೊತ್ತವನ್ನು ಹಿಂಪಡೆಯಬಹುದಾಗಿದೆ.
ಇಪಿಎಫ್ಒಗೆ ಸಂಬಂಧಿಸಿದಂತೆ ಮಹತ್ವದ ನಿರ್ಧಾರ ತೆಗೆದುಕೊಳ್ಳಲು ರಚಿಸಿರುವ ಕೇಂದ್ರೀಯ ಟ್ರಸ್ಟಿಗಳ ಮಂಡಳಿ ಸಭೆಯಲ್ಲಿ ಇಂತಹ ಪ್ರಮುಖ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ. ಕೇಂದ್ರ ಕಾರ್ಮಿಕ ಸಚಿವ ಮನ್ಸುಖ್ ಮಂಡಾವೀಯ ಅವರ ನೇತೃತ್ವದಲ್ಲಿ ನಡೆದ ಸಭೆಯಲ್ಲಿ ಇಪಿಎಫ್ಒ ವಿತ್ ಡ್ರಾಗೆ ಸಂಬಂಧಿಸಿದಂತೆ ಪ್ರಮುಖ ತೀರ್ಮಾನ ತೆಗೆದುಕೊಳ್ಳಲಾಗಿದೆ.
ಖಾತೆಯಲ್ಲಿರುವ ಶೇ.100ರಷ್ಟು ಹಣ ವಿತ್ ಡ್ರಾ ಜತೆಗೆ ಕೆಲವು ನಿಯಮಗಳನ್ನೂ ಸರಳಗೊಳಿಸಲಾಗಿದೆ. ಇದುವರೆಗೆ ಪಿಎಫ್ ಹಣವನ್ನು ವಿತ್ ಡ್ರಾ ಮಾಡಲು ಹಲವು ಕಾರಣಗಳಿಗೆ ಸಂಬಂಧಿಸಿದ ನಿಯಮಗಳಿದ್ದವು. ಇಂತಹ 13 ನಿಯಮಗಳನ್ನು ಈಗ ಸುಲಭಗೊಳಿಸಲಾಗಿದೆ. 13 ಸಂಕೀರ್ಣ ನಿಯಮಗಳ ಬದಲಾಗಿ, ‘ಅತ್ಯವಶ್ಯಕ ಅಗತ್ಯಗಳು’ (ಅನಾರೋಗ್ಯ, ಶಿಕ್ಷಣ, ಮದುವೆ), ‘ವಸತಿ ಅಗತ್ಯಗಳು’ ಮತ್ತು ‘ವಿಶೇಷ ಸಂದರ್ಭಗಳು’ ಎಂಬ ಮೂರು ವರ್ಗಗಗಳಾಗಿ ವಿಂಗಡಿಸಲಾಗಿದೆ.
ಇವುಗಳಷ್ಟೇ ಅಲ್ಲ, ಪಿಎಫ್ ವಿತ್ ಡ್ರಾ ಮಾಡುವ ಮಿತಿಗಳನ್ನು ಕೂಡ ಹೆಚ್ಚಿಸಲಾಗಿದೆ. ಈಗ ಶಿಕ್ಷಣ ಉದ್ದೇಶಕ್ಕೆ 10 ಬಾರಿ ಪಿಎಫ್ ಹಣ ಹಿಂಪಡೆಯಲು ಅವಕಾಶ ನೀಡಲಾಗಿದೆ. ಮದುವೆ ಸೇರಿ ವಿವಿಧ ಕಾರಣ ನೀಡಿ 5 ಬಾರಿ ಹಣ ವಾಪಸ್ ಪಡೆಯಬಹುದು. ಇದಕ್ಕೂ ಮೊದಲು 3 ಬಾರಿ ಮಾತ್ರ ಪಿಎಫ್ ವಿತ್ ಡ್ರಾ ಮಾಡಲು ಅವಕಾಶವಿತ್ತು.
