ಬೆಂಗಳೂರು: ಹೂಡಿಕೆ ಮಾಡಲು ಈಗ ಹತ್ತಾರು ದಾರಿಗಳಿವೆ. ಷೇರು ಮಾರುಕಟ್ಟೆ, ಮ್ಯೂಚುವಲ್ ಫಂಡ್, ರಿಯಲ್ ಎಸ್ಟೇಟ್, ಸರ್ಕಾರಿ ಉಳಿತಾಯ ಯೋಜನೆಗಳು ಸೇರಿ ಹತ್ತಾರು ಮಾರ್ಗಗಳಿವೆ. ಭಾರತೀಯರು ಮೊದಲಿನಿಂದಲೂ ಚಿನ್ನದ ಮೇಲೂ ಹೆಚ್ಚಿನ ಹೂಡಿಕೆಯನ್ನು ಮಾಡುತ್ತಲೇ ಬಂದಿದ್ದಾರೆ. ಆದರೆ, ಇತ್ತೀಚಿನ ವರ್ಷಗಳಲ್ಲಿ ಬೆಳ್ಳಿಯ ಮೇಲೆ ಹೂಡಿಕೆ ಮಾಡುವುದೂ ಹೆಚ್ಚು ಲಾಭದಾಯಕವಾಗಿದೆ. ಅದರಲ್ಲೂ, ಕಳೆದ ಒಂದು ವರ್ಷದಲ್ಲೇ ಬೆಳ್ಳಿಯು ಸುಮಾರು 60 ಸಾವಿರ ರೂ. ರಿಟರ್ನ್ಸ್ ನೀಡಿರುವುದೇ ಇದಕ್ಕೆ ಸಾಕ್ಷಿಯಾಗಿದೆ.
ಚಿನ್ನದ ಬೆಲೆಯು ದಿನೇದಿನೆ ಜಾಸ್ತಿಯಾಗುತ್ತಿರುವ ಕಾರಣ ಜನರಿಗೆ ಚಿನ್ನದ ಮೇಲೆ ಹೆಚ್ಚು ಹೂಡಿಕೆ ಮಾಡಲು ಆಗುತ್ತಿಲ್ಲ. ಚಿನ್ನದಂತೆ ಬೆಳ್ಳಿಯ ಬೆಲೆಯೂ ಗಗನಕ್ಕೇರುತ್ತಿದ್ದು, ಹೂಡಿಕೆ ಮಾಡುವವರಿಗೆ ಹೊಸ ಆಶಾಭಾವ ಮೂಡಿಸಿದೆ. ಹೌದು, ಬೆಳ್ಳಿಯ ಬೆಲೆಯು ಕೆ.ಜಿಗೆ ಒಂದು ವರ್ಷದ ಹಿಂದೆ 89 ಸಾವಿರ ರೂಪಾಯಿ ಇತ್ತು. ಆದರೀಗ, ಒಂದು ಕೆ.ಜಿ ಬೆಳ್ಳಿ ಬೆಲೆಯು 1.5 ಲಕ್ಷ ರೂಪಾಯಿ ಆಸುಪಾಸು ತಲುಪಿದೆ. ಇದು ಬೆಳ್ಳಿಯು ಹೂಡಿಕೆಗೆ ಒಳ್ಳೆಯ ಆಯ್ಕೆ ಎಂಬುದಕ್ಕೆ ನಿದರ್ಶನವಾಗಿದೆ.
ಅಂದರೆ, ನೀವು ಒಂದು ವರ್ಷದ ಹಿಂದೆ ಒಂದು ಕೆ.ಜಿ ಬೆಳ್ಳಿ ಖರೀದಿಸಿದ್ದರೆ, ಈಗ ನಿಮಗೆ 60 ಸಾವಿರ ರೂಪಾಯಿ ಲಾಭವಾಗುತ್ತಿತ್ತು. ಅಂದರೆ, ಶೇ.54ರಷ್ಟು ರಿಟರ್ನ್ಸ್ ಸಿಕ್ಕಂತೆ ಆಗುತ್ತಿತ್ತು. ಅಷ್ಟೇ ಏಕೆ, 5 ವರ್ಷಗಳ ಹಿಂದೆ 57 ಸಾವಿರ ರೂಪಾಯಿ ಇದ್ದ ಬೆಳ್ಳಿ ದರವೀಗ ಒಂದೂವರೆ ಲಕ್ಷ ರೂಪಾಯಿ ತಲುಪಿದೆ. ಅಂದರೆ, ಬೆಳ್ಳಿ ಬೆಲೆಯು ಮೂರು ಪಟ್ಟು ಜಾಸ್ತಿಯಾಗಿದೆ. ಹಾಗಾಗಿ, ಹೂಡಿಕೆಗೆ ಬೆಳ್ಳಿಯೂ ಉತ್ತಮ ಆಯ್ಕೆ ಎನ್ನುತ್ತಿದ್ದಾರೆ ತಜ್ಞರು.
ಬೆಳ್ಳಿ ಬೆಲೆಯ ನಾಗಾಲೋಟ
ವರ್ಷ ಕೆ.ಜಿ ಬೆಳ್ಳಿಯ ದರ
2010 30,915 ರೂ.
2015 34,645 ರೂ.
2020 57,626 ರೂ.
2022 55,130 ರೂ.
2024 89,537 ರೂ.
2025 1.48 ಲಕ್ಷ ರೂ.
ಗಮನಿಸಿ: ಬೆಳ್ಳಿ ಬೆಲೆ ಏರಿಳಿತವು ಮಾರುಕಟ್ಟೆ ಆಧಾರಿತವಾಗಿರುತ್ತದೆ. ಕಳೆದ ಹಲವು ವರ್ಷಗಳ ಮಾಹಿತಿ ಇಟ್ಟುಕೊಂಡು ನಿಮಗೆ ರಿಟರ್ನ್ಸ್ ಲೆಕ್ಕಾಚಾರ ನೀಡಿದ್ದೇವೆ. ಹಾಗೆಯೇ, ಮಾಹಿತಿ ದೃಷ್ಟಿಯಿಂದ ಮಾತ್ರ ಲೇಖನವನ್ನು ಪ್ರಕಟಿಸಲಾಗಿದೆ. ಇದು ನೀವು ಹೂಡಿಕೆ ಮಾಡಲು ಶಿಫಾರಸು ಅಲ್ಲ. ಯಾವುದೇ ಹೂಡಿಕೆಗೂ ಮೊದಲು ತಜ್ಞರ ಸಲಹೆ-ಸೂಚನೆ ಪಡೆಯುವುದನ್ನು ಮರೆಯದಿರಿ.
