ಶತೃವಿನ ಶತೃ ಮಿತ್ರ ಎಂಬ ಮಾತಿದೆ. ಭಾರತದ ವಿಚಾರದಲ್ಲಿ ಚೀನಾ ಇದೇ ನೀತಿಯನ್ನು ಪಾಲಿಸುತ್ತಿರುವುಂತೆ ಕಾಣುತ್ತಿದೆ. ಯಾಕೆ ಎಂದರೆ ಅತ್ತ ಅಮೆರಿಕಾ ಭಾರತದ ಔಷಧಿಗಳ ಮೇಲೆ ಶೇ.100 ರಷ್ಟು ಸುಂಕ ಹೇರುತ್ತಿದ್ದಂತೆ, ಇತ್ತ ಚೀನಾ ಭಾರತದ ಔಷಧಿಗಳ ಮೇಲಿನ ತೆರಿಗೆಯನ್ನು ಶೂನ್ಯಕ್ಕೆ ಇಳಿಸಿ ಅಚ್ಚರಿ ಮೂಡಿಸಿದೆ.
ಎರಡೆನೇ ಬಾರಿ ವಿಶ್ವದ ದೊಡ್ಡಣ್ಣನ ಪಟ್ಟಕ್ಕೇರಿದ ಮೇಲೆ ಡೊನಾಲ್ಡ್ ಟ್ರಂಪ್ ಭಾರತದ ಮೇಲೆ ಒಂದಿಲ್ಲೊಂದು ಸಮರ ಸಾರುತ್ತಲೇ ಇದ್ದಾರೆ. ಭಾರತ ರಷ್ಯಾ ವಿರುದ್ಧ ತೈಲ ವ್ಯಾಪಾರ ಮಾಡದಂತೆ ಬೆದರಿಸಲು ಟ್ರಂಪ್ ಅನೇಕ ಪ್ರಯತ್ನಗಳನ್ನು ಮಾಡಿದರು. ಆಮದು ಸುಂಕ ಹೆಚ್ಚಿಸಿ ಭಾರತದ ವ್ಯಾಪಾರ ವಲಯಕ್ಕೆ ಹೊಡೆತ ಕೊಟ್ಟು ಹೆದರಿಸಲು ಮುಂದಾದರು, ಆದರೆ ಭಾರತ ಯಾವುದಕ್ಕೂ ಜಗ್ಗದಿದ್ದಾಗ ಈಗ ಟ್ರಂಪ್ ಅದೇ ಟ್ಯಾಕ್ಸ್ ಹುಚ್ಚಾಟಕ್ಕೆ ಮುಂದಾಗಿದ್ದಾರೆ. ಭಾರತದ ಔಷಧಿಗಳ ಮೇಲೆ ಶೇ.100 ರಷ್ಟು ಸುಂಕವನ್ನು ಮೊನ್ನೆಯಷ್ಟೆ ಟ್ರಂಪ್ ಹೆಚ್ಚಿಸಿದ್ದಾರೆ. ಅಂದರೆ ಅಮೆರಿಕಾಗೆ ಮಾರಾಟವಾಗುವ ಔಷಧಿಗಳು ಶೇ.100 ರಷ್ಟು ಸುಂಕಕ್ಕೆ ಒಳಪಟ್ಟಿರುತ್ತವೆ. ಅಮೆರಿಕಾಗೆ ದೊಡ್ಡ ಪ್ರಮಾಣದಲ್ಲಿ ಔಷಧ ರಫ್ತು ಮಾಡುವ ದೇಶ ಎಂದರೆ ಅದು ಭಾರತ. ಭಾರತ ಜೆನೆರಿಕ್ ಔಷಧಿಗಳ ಅತಿದೊಡ್ಡ ರಫ್ತುದಾರ ಎಂಬ ಹೆಗ್ಗಳಿಕೆ ಕೂಡ ಇದೆ. ಆದರೆ ಟ್ರಂಪ್ ನಿರ್ಧಾರದಿಂದ ಭಾರತಕ್ಕೆ ನಷ್ಟವಾಗುವುದಂತು ಸತ್ಯ.
ಟ್ರಂಪ್ ನ ಈ ನಡೆಯ ಲಾಭವನ್ನು ಪಡೆಯಲು ಚೀನಾ ಮುಂದಾದಂತಿದೆ. ಭಾರತದ ಔಷಧಿಗಳ ಮೇಲೆ ಟ್ರಂಪ್ ಶೇ. 100 ರಷ್ಟು ತೆರಿಗೆ ಹೇರಿದ ಬೆನ್ನಲ್ಲೇ ಭಾರತದ ಔಷಧ ಆಮದಿನ ಮೇಲಿದ್ದ ಶೇ. 30 ರಷ್ಟು ತೆರಿಗೆಯನ್ನು ಶೂನ್ಯಕ್ಕಿಳಿಸಿ ಆದೇಶ ಹೊರಡಿಸಿದೆ. ಈ ಮೂಲಕ ಚೀನಾ ಡೊನಾಲ್ಡ್ ಟ್ರಂಪ್ಗೆ ಟಾಂಗ್ ಕೊಟ್ಟಿದೆ ಎಂದೇ ಹೇಳಬಹುದು.
ಆದರೆ ಭಾರತದ ಮಟ್ಟಿಗೆ ಇಲ್ಲಿ ತುಂಬಾ ಪ್ರಮುಖ ವಿಚಾರವೇನು ಗೊತ್ತಾ? ಭಾರತದ ಔಷಧಿಗಳ ಮೇಲೆ ಟ್ರಂಪ್ ಶೇ. .100 ರಷ್ಟು ಸುಂಕ ವಿಧಿಸಿದ್ದಾರೆ ಎನ್ನುವ ಕಾರಣಕ್ಕೆ ಸಂಪೂರ್ಣವಾಗಿ ಅಮೆರಿಕಾವನ್ನು ಭಾರತ ದೂರ ತಳ್ಳುವ ಹಾಗೂ ಇಲ್ಲ. ಹಾಗೆನೇ ಕಂಪ್ಲೀಟ್ ಸುಂಕ ಖಡಿತಗೊಳಿಸಿದೆ ಎನ್ನುವ ಕಾರಣಕ್ಕೆ ಚೀನಾವನ್ನು ಪಕ್ಕಕ್ಕೆ ಕರೆದು ಕೂರಿಸಿಕೊಳ್ಳಲು ಸಾಧ್ಯವಿಲ್ಲ. ಯಾಕೆ ಎಂದರೆ ಇಲ್ಲಿ ನಡೆಯುತ್ತಿರುವುದು ಶತ್ರುವಿನ ಶತ್ರು ಮಿತ್ರ ಎನ್ನುವ ಆಟವೇ ಹೊರತು ಮತ್ತಿನ್ನೇನು ಅಲ್ಲ ಎನ್ನುವುದನ್ನು ನಾವು ಮರೆಯಬಾರದು.
