ಮಲಪ್ಪುರಂ: ವೈದ್ಯಕೀಯ ಲೋಕದಲ್ಲಿ ಒಂದಿಲ್ಲೊಂದು ವಿಸ್ಮಯಗಳು ನಡೆಯುತ್ತಿರುತ್ತವೆ. ಅದಕ್ಕೆ ಹೊಸ ಸೇರ್ಪಡೆ ಎಂಬಂತೆ, ಕೇವಲ ಮೂರು ಅಡಿ ಎತ್ತರವಿರುವ ಕೇರಳದ ಮಲಪ್ಪುರಂ ಮೂಲದ ಸಿಮಿ ಎಂಬ ಮಹಿಳೆಯು ಈಗ ಆರೋಗ್ಯವಂತ ಗಂಡು ಮಗುವಿಗೆ ಜನ್ಮ ನೀಡಿದ್ದಾರೆ. ಈ ಮೂಲಕ, ಭಾರತದಲ್ಲಿ ಅತಿ ಕಡಿಮೆ ಎತ್ತರವಿದ್ದುಕೊಂಡು, ತಾಯಿಯಾದ ಮಹಿಳೆ ಎಂಬ ಹೆಗ್ಗಳಿಕೆಗೆ ಅವರು ಪಾತ್ರರಾಗಿದ್ದಾರೆ.
ಮರಂಚೇರಿ ನಿವಾಸಿ ಪ್ರಗೇಶ್ ಅವರ ಪತ್ನಿಯಾಗಿರುವ 36 ವರ್ಷದ ಸಿಮಿ, ಕೆಲವು ದಿನಗಳ ಹಿಂದೆ ತ್ರಿಶೂರ್‌ನ ಕಣಿಮಂಗಲಂನಲ್ಲಿರುವ ಸಿಮಾರ್ (CIMAR) ಆಸ್ಪತ್ರೆಯಲ್ಲಿ ಮಗುವಿಗೆ ಜನ್ಮ ನೀಡಿದ್ದಾರೆ. ಜನನದ ಸಮಯದಲ್ಲಿ ಮಗು 1.69 ಕೆಜಿ ತೂಕವಿದ್ದು, ಆರೋಗ್ಯವಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.
ಸಿಮಿಯವರ ಎತ್ತರ ಕೇವಲ 3.1 ಅಡಿಗಳಾಗಿದ್ದು, ಇಷ್ಟು ಕಡಿಮೆ ಎತ್ತರದ ಮಹಿಳೆ ಗರ್ಭ ಧರಿಸಿ ಮಗುವಿಗೆ ಜನ್ಮ ನೀಡುವುದು ಅತ್ಯಂತ ಅಪರೂಪದ ಪ್ರಕರಣವಾಗಿದೆ ಎಂದು ಚಿಕಿತ್ಸೆಯ ನೇತೃತ್ವ ವಹಿಸಿದ್ದ ಡಾ. ಕೆ.ಕೆ. ಗೋಪಿನಾಥನ್ ಹೇಳಿದ್ದಾರೆ. ಈ ಹಿಂದೆ, ತಮಿಳುನಾಡಿನ 3.5 ಅಡಿ ಎತ್ತರದ ಕಾಮಾಕ್ಷಿ ಎಂಬುವವರು ಭಾರತದಲ್ಲಿ ಅತಿ ಕಡಿಮೆ ಎತ್ತರದಲ್ಲಿ ತಾಯಿಯಾದ ಮಹಿಳೆ ಎಂಬ ಖ್ಯಾತಿಗೆ ಪಾತ್ರರಾಗಿದ್ದರು.
ಸವಾಲುಗಳ ಹಾದಿ
ಕುಳ್ಳಗಿನ ದೇಹ ಮತ್ತು ದುರ್ಬಲ ಮೂಳೆಗಳು ಸಿಮಿಯವರ ಮಾತೃತ್ವದ ಹಾದಿಯಲ್ಲಿ ಎದುರಾದ ಪ್ರಮುಖ ಸವಾಲುಗಳಾಗಿದ್ದವು. ಕುಬ್ಜತೆಯುಳ್ಳ ಮಹಿಳೆಯರು ಗರ್ಭಾವಸ್ಥೆಯಲ್ಲಿ ಮತ್ತು ಹೆರಿಗೆಯ ಸಮಯದಲ್ಲಿ ಉಸಿರಾಟದ ಸಮಸ್ಯೆಗಳನ್ನು ಎದುರಿಸುತ್ತಾರೆ. ಅವರ ಸೊಂಟದ ಮೂಳೆಯ ಆಕಾರವು ಸಾಮಾನ್ಯ ಹೆರಿಗೆಗೆ ಪೂರಕವಾಗಿಲ್ಲದ ಕಾರಣ, ಅವರಿಗೆ ಸಿ-ಸೆಕ್ಷನ್ (ಶಸ್ತ್ರಚಿಕಿತ್ಸೆ) ಮೂಲಕ ಹೆರಿಗೆ ಮಾಡಿಸುವುದು ಅನಿವಾರ್ಯವಾಗಿರುತ್ತದೆ. ಇದಲ್ಲದೆ, ಗರ್ಭಾವಸ್ಥೆಯು ಹೃದಯದ ಮೇಲೆ ಹೆಚ್ಚುವರಿ ಒತ್ತಡವನ್ನು ಉಂಟುಮಾಡಬಹುದು. ಈ ಎಲ್ಲಾ ಸವಾಲುಗಳನ್ನು ಮೀರಿ ಸಿಮಿ ಅವರು ತಾಯಿಯಾಗಿದ್ದಾರೆ. ವಿಶೇಷವೆಂದರೆ, ಸಿಮಿಯವರ ಪತಿ ಪ್ರಗೇಶ್ ಅವರು ದೃಷ್ಟಿದೋಷವುಳ್ಳವರಾಗಿದ್ದಾರೆ.
