ಪುದುಚೇರಿ: ವರ್ಣಭೇದ ನೀತಿಯ ವಿರುದ್ಧ ನಿರ್ಭಿಡೆಯಿಂದ ಧ್ವನಿಯೆತ್ತಿ, ಮಹಿಳೆಯರ ಸುರಕ್ಷತೆಗಾಗಿ ಸದಾ ವಕಾಲತ್ತು ವಹಿಸಿದ್ದ ಮಾಜಿ ಮಿಸ್ ಪುದುಚೇರಿ, ಮಾಡೆಲ್ ಮತ್ತು ಸೌಂದರ್ಯ ಸ್ಪರ್ಧೆಯ ವಿಜೇತೆ ಸಾನ್ ರೇಚಲ್ ಗಾಂಧಿ (26) ಶನಿವಾರ ನಿಧನರಾಗಿದ್ದಾರೆ. ನಿದ್ರೆಯ ಮಾತ್ರೆಗಳನ್ನು ಅತಿಯಾಗಿ ಸೇವಿಸಿದ್ದರಿಂದ ಅವರು ಕೊನೆಯುಸಿರೆಳೆದಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ರೇಚಲ್ ಅನೇಕ ಅಂತಾರಾಷ್ಟ್ರೀಯ ಮಾಡೆಲಿಂಗ್ ಕಾರ್ಯಕ್ರಮಗಳಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದರು.
ಫ್ಯಾಷನ್ ಉದ್ಯಮದಲ್ಲಿ ಸಮಾನತೆಗಾಗಿ ದನಿ ಎತ್ತಿದ್ದ ಸಾನ್ ರೇಚಲ್ ಗಾಂಧಿ, ಚಿಕ್ಕ ವಯಸ್ಸಿನಲ್ಲಿಯೇ ತಾಯಿಯನ್ನು ಕಳೆದುಕೊಂಡಿದ್ದರು. ಅವರ ತಂದೆ ಗಾಂಧಿ ಅವರು ಮಗಳನ್ನು ಪೋಷಿಸಿ, ಮಾಡೆಲಿಂಗ್ ಕನಸನ್ನು ಬೆಂಬಲಿಸಿದ್ದರು. ಚರ್ಮದ ಬಣ್ಣದ ಕುರಿತಾದ ಉದ್ಯಮದ ಪಕ್ಷಪಾತವನ್ನು ಧಿಕ್ಕರಿಸಿ, ‘ಗೋಧಿ ಬಣ್ಣದ’ ಚರ್ಮದ ಮಾನದಂಡಗಳ ವಿರುದ್ಧ ರೇಚಲ್ ಸದಾ ಧ್ವನಿಯಾಗಿದ್ದರು, ವರ್ಣಭೇದ ನೀತಿಯ ವಿರುದ್ಧದ ಹೋರಾಟದಲ್ಲಿ ಗುರುತಿಸಿಕೊಂಡಿದ್ದರು.
2019ರಲ್ಲಿ ‘ಮಿಸ್ ಡಾರ್ಕ್ ಕ್ವೀನ್ ತಮಿಳುನಾಡು’ ಕಿರೀಟವನ್ನು ಗೆದ್ದಿದ್ದ ರೇಚಲ್, 2021 ರಲ್ಲಿ ‘ಮಿಸ್ ಪುದುಚೇರಿ’ ಕಿರೀಟವನ್ನು ಮುಡಿಗೇರಿಸಿಕೊಂಡಿದ್ದರು. ಲಂಡನ್, ಜರ್ಮನಿ ಮತ್ತು ಫ್ರಾನ್ಸ್‌ನಂತಹ ಅಂತಾರಾಷ್ಟ್ರೀಯ ಮಾಡೆಲಿಂಗ್ ಸ್ಪರ್ಧೆಗಳಲ್ಲಿ ಭಾರತವನ್ನು ಪ್ರತಿನಿಧಿಸಿರುವ ಇವರು, ಮಹಿಳೆಯರ ಸುರಕ್ಷತೆ ಕುರಿತು ಜಾಗೃತಿ ಮೂಡಿಸುವ ಕೆಲಸದಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದರು.
ಖಿನ್ನತೆಯಿಂದ ಬಳಲುತ್ತಿದ್ದ ರೇಚಲ್:
ಪೊಲೀಸ್ ಮೂಲಗಳ ಪ್ರಕಾರ, ಇತ್ತೀಚೆಗೆ ವಿವಾಹವಾಗಿದ್ದ ರೇಚಲ್ ಖಿನ್ನತೆಯಿಂದ ಬಳಲುತ್ತಿದ್ದರು ಎನ್ನಲಾಗಿದೆ. ಜುಲೈ 5 ರಂದು ಅವರು ನಿದ್ರೆಯ ಮಾತ್ರೆಗಳನ್ನು ಅತಿಯಾಗಿ ಸೇವಿಸಿದ್ದರು ಎಂದು ಆರೋಪಿಸಲಾಗಿದೆ. ಅವರ ತಂದೆ ತಕ್ಷಣ ಅವರನ್ನು ಪುದುಚೇರಿ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿದ್ದರು. ನಂತರ ಅವರನ್ನು ಖಾಸಗಿ ಆಸ್ಪತ್ರೆಗೆ ಮತ್ತು ಕೊನೆಗೆ ಜವಾಹರಲಾಲ್ ಇನ್‌ಸ್ಟಿಟ್ಯೂಟ್ ಆಫ್ ಪೋಸ್ಟ್‌ಗ್ರಾಜುಯೇಟ್ ಮೆಡಿಕಲ್ ಎಜುಕೇಶನ್ ಅಂಡ್ ರಿಸರ್ಚ್ (JIPMER) ಗೆ ಸ್ಥಳಾಂತರಿಸಲಾಗಿತ್ತು. ಆದರೆ, ಚಿಕಿತ್ಸೆ ಫಲಕಾರಿಯಾಗದೆ ಅವರು ನಿಧನರಾದರು. ಅವರ ಆತ್ಮಹತ್ಯೆಗೆ ನಿಖರ ಕಾರಣವೇನು ಎಂದು ತಿಳಿದುಬಂದಿಲ್ಲ.
ಉರುಳೈಯನ್‌ಪೇಟ್ಟೈ ಪೊಲೀಸರು ಪ್ರಕರಣವನ್ನು ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ. ರೇಚಲ್ ಗಾಂಧಿಯವರ ಅಕಾಲಿಕ ನಿಧನಕ್ಕೆ ಫ್ಯಾಷನ್ ಮತ್ತು ಸಾಮಾಜಿಕ ಹೋರಾಟದ ವಲಯದಲ್ಲಿ ತೀವ್ರ ಸಂತಾಪ ವ್ಯಕ್ತವಾಗಿದೆ.
