ವಾಷಿಂಗ್ಟನ್: ಇರಾನ್-ಇಸ್ರೇಲ್ ಸಂಘರ್ಷದಲ್ಲಿ ಈಗ ಅಮೆರಿಕ ಎಂಟ್ರಿಯಾಗಿದೆ. ಇರಾನ್ನ ಮೂರು ಪರಮಾಣು ಸೌಲಭ್ಯಗಳಾದ ಫೋರ್ಡೊ, ಇಸ್ಫಾಹಾನ್ ಮತ್ತು ನತಾಂಜ್ಗಳ ಮೇಲೆ ಭಾನುವಾರ ರಾತ್ರೋರಾತ್ರಿ ಅಮೆರಿಕ ದಾಳಿ ನಡೆಸಿದೆ. ಈ ದಾಳಿಯಲ್ಲಿ ಆರು ಬಿ-2 ಸ್ಟೆಲ್ತ್ ಬಾಂಬರ್ಗಳನ್ನು ಬಳಸಲಾಗಿದ್ದು, ಒಟ್ಟು 12 ಜಿಬಿಯು-57 “ಬಂಕರ್-ಬಸ್ಟಿಂಗ್” ಬಾಂಬ್ಗಳನ್ನು ಮತ್ತು 30 ಟೊಮಾಹಾಕ್ ಕ್ರೂಸ್ ಕ್ಷಿಪಣಿಗಳನ್ನು ಮೂರು ಪರಮಾಣು ಸ್ಥಾವರಗಳ ಮೇಲೆ ಹಾಕಲಾಗಿದೆ ಎಂದು ವರದಿಯಾಗಿದೆ. ಅಮೆರಿಕದ ಈ ನಡೆಯು ಮಧ್ಯಪ್ರಾಚ್ಯದಲ್ಲಿ ದೊಡ್ಡ ಮಟ್ಟದ ಸಂಚಲನಕ್ಕೆ ಕಾರಣವಾಗಿದ್ದು, ಯುದ್ಧ ಮತ್ತೊಂದು ಮಜಲು ತಲುಪುವ ಭೀತಿ ಎದುರಾಗಿದೆ.
ಈ ಬಿ-2 ಬಾಂಬರ್ಗಳು ಮಿಸೌರಿಯಲ್ಲಿರುವ ತಮ್ಮ ನೆಲೆಯಿಂದ ಸುಮಾರು 37 ಗಂಟೆಗಳ ಕಾಲ ನಿರಂತರವಾಗಿ ಹಾರಾಟ ನಡೆಸಿದ್ದು, ದಾರಿ ಮಧ್ಯೆಯೇ ಹಲವಾರು ಬಾರಿ ಆಗಸದಲ್ಲೇ ಇಂಧನ ತುಂಬಿಸಿಕೊಂಡು ಮುಂದೆ ಸಾಗಿವೆ ಎಂದು ಅಮೆರಿಕದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಈ ದಾಳಿಯು ಇರಾನ್ನ ಪರಮಾಣು ಕಾರ್ಯಕ್ರಮವನ್ನು ದುರ್ಬಲಗೊಳಿಸುವ ಉದ್ದೇಶದಿಂದ ನಡೆದಿದೆ ಎಂದು ಹೇಳಲಾಗಿದೆ.
ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಈ ಕಾರ್ಯಾಚರಣೆಯನ್ನು “ಅತ್ಯಂತ ಯಶಸ್ವಿ” ಎಂದು ವರ್ಣಿಸಿದ್ದಾರೆ. ಫೋರ್ಡೊ ಪರಮಾಣು ಸೌಲಭ್ಯವನ್ನು “ಸಂಪೂರ್ಣವಾಗಿ ನಾಶಗೊಳಿಸಲಾಗಿದೆ” ಎಂದು ಕೆಲವು ವರದಿಗಳು ಹೇಳಿವೆ.
ಬಿ-2 ಸ್ಟೆಲ್ತ್ ಬಾಂಬರ್ಗಳು ಅತ್ಯಾಧುನಿಕ ತಂತ್ರಜ್ಞಾನವನ್ನು ಹೊಂದಿದ್ದು, ರಾಡಾರ್ ಕಣ್ಣು ತಪ್ಪಿಸಿ ನಿಖರವಾಗಿ ತನ್ನ ಗುರಿಗಳನ್ನು ಛೇದಿಸುವ ವಿಶೇಷ ಸಾಮರ್ಥ್ಯವನ್ನು ಹೊಂದಿವೆ. ಈ ವಿಮಾನಗಳು 6,000 ನಾಟಿಕಲ್ ಮೈಲುಗಳಷ್ಟು ದೂರವನ್ನು ಇಂಧನ ತುಂಬಿಕೊಳ್ಳದೆ ಹಾರಬಲ್ಲವು ಮತ್ತು ಆಗಸದಲ್ಲೇ ಇಂಧನ ತುಂಬಿಕೊಳ್ಳುತ್ತಾ ವಿಶ್ವದ ಯಾವುದೇ ಗುರಿಯನ್ನು ತಲುಪಬಲ್ಲವು.
ಈ ದಾಳಿಯು ಮಧ್ಯಪ್ರಾಚ್ಯದಲ್ಲಿ ಹೆಚ್ಚಿನ ಉದ್ವಿಗ್ನತೆಗೆ ಕಾರಣವಾಗಿದ್ದು, ಇರಾನ್ನ ವಿದೇಶಾಂಗ ಸಚಿವ ಅಬ್ಬಾಸ್ ಅರಾಘ್ಚಿ ಅವರು ಈ ದಾಳಿಯನ್ನು “ಅತಿರೇಕ” ಎಂದು ಕರೆದಿದ್ದಾರೆ ಮತ್ತು ಇದರಿಂದ “ದೀರ್ಘಕಾಲೀನ ಪರಿಣಾಮಗಳು” ಉಂಟಾಗಲಿವೆ ಎಂದು ಎಚ್ಚರಿಕೆ ನೀಡಿದ್ದಾರೆ.
ಇಸ್ರೇಲ್ನ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರು ದಾಳಿಯನ್ನು ಶ್ಲಾಘಿಸಿದ್ದಾರೆ ಮತ್ತು ಟ್ರಂಪ್ ಅವರ “ದಿಟ್ಟ ನಿರ್ಧಾರ”ವು ಇತಿಹಾಸವನ್ನು ಬದಲಾಯಿಸಲಿದೆ ಎಂದು ಹೇಳಿದ್ದಾರೆ.
ಇನ್ನೊಂದೆಡೆ, ಅಮೆರಿಕ ನಡೆಸಿದ ದಾಳಿಯಿಂದ ಯಾವುದೇ ವಿಕಿರಣ ಸೋರಿಕೆಯಾಗಿಲ್ಲ ಎಂದು ಅಂತರರಾಷ್ಟ್ರೀಯ ಪರಮಾಣು ಶಕ್ತಿ ಸಂಸ್ಥೆ (IAEA) ತಿಳಿಸಿದೆ. ಏಕೆಂದರೆ ಗುರಿಯಾಗಿರುವ ಪರಮಾಣು ಸೌಲಭ್ಯಗಳಲ್ಲಿ ಯಾವುದೇ ಪರಮಾಣು ವಸ್ತುಗಳಿರಲಿಲ್ಲ ಅಥವಾ ಕಡಿಮೆ ಪ್ರಮಾಣದ ಯುರೇನಿಯಂ ಇತ್ತು ಎಂದು ಹೇಳಿದೆ.
