ಪ್ಯಾರಿಸ್: ಫ್ರಾನ್ಸ್ನಲ್ಲೊಂದು ಭಯಾನಕ ಹತ್ಯೆ ನಡೆದಿದ್ದು, ದೇಶವನ್ನು ಬೆಚ್ಚಿಬೀಳಿಸಿದೆ. ಇಲ್ಲಿನ ಫಿಲಿಪ್ ಶೆನೈಡರ್(69) ಎಂಬ ಪಿಜ್ಜಾ ಶೆಫ್(ಬಾಣಸಿಗ) ವ್ಯಕ್ತಿಯೊಬ್ಬನನ್ನು ಕೊಂದಿದ್ದಲ್ಲದೆ, ಆತನ ದೇಹವನ್ನು ತುಂಡರಿಸಿ, ತರಕಾರಿಗಳ ಜೊತೆಗೆ ಬೇಯಿಸಿದ ಘಟನೆ ನಡೆದಿದೆ.
ಘಟನೆಗೆ ಸಂಬಂಧ ಫಿಲಿಪ್ ಮತ್ತು ಆತನ ಪತ್ನಿ ನಥಾಲಿ ಕ್ಯಾಬೌಬಸ್ಸಿ(45) ಎಂಬವರನ್ನು ಬಂಧಿಸಲಾಗಿದೆ. ಮೃತ ವ್ಯಕ್ತಿಯನ್ನು ಜಾರ್ಜಸ್ ಮೈಕ್ಲರ್ ಎಂದು ಗುರುತಿಸಲಾಗಿದೆ. ಮೈಕ್ಲರ್ ದಕ್ಷಿಣ ಫ್ರಾನ್ಸ್ನ ಬ್ರಾಸ್ಕ್ ಎಂಬಲ್ಲಿನ ಕುಗ್ರಾಮವೊಂದರಲ್ಲಿ ಜೀವಿಸುತ್ತಿದ್ದ.
57 ವರ್ಷದ ಮೈಕ್ಲರ್ ಕುಗ್ರಾಮದ ಅರಣ್ಯ ಪ್ರದೇಶವೊಂದರ ಪುಟ್ಟ ಮನೆಯಲ್ಲಿ ವಾಸಿಸುತ್ತಿದ್ದ. ಆ ಮನೆಗೆ ನೀರು ಅಥವಾ ವಿದ್ಯುತ್ ಪೂರೈಕೆಯೂ ಇರಲಿಲ್ಲ. ಕಳೆದ ಕೆಲವು ದಿನಗಳಿಂದ ಆತ ಯಾರ ಕಣ್ಣಿಗೂ ಬಿದ್ದಿರಲಿಲ್ಲ. ಜತೆಗೆ, ನಾನು ನನ್ನ ಗೆಳೆಯನೊಂದಿಗೆ ಬ್ರಿಟಾನಿಗೆ ಹೋಗುತ್ತಿದ್ದೇನೆ ಎಂದು ತನ್ನ ಪುತ್ರಿಗೆ ಸಂದೇಶ ಕಳುಹಿಸಿದ್ದ. ಈ ಸಂದೇಶ ನೋಡಿದಾಗ ಪುತ್ರಿಗೆ ಅನುಮಾನ ಬಂದಿತ್ತು. ಏಕೆಂದರೆ, ಮೈಕ್ಲರ್ ಯಾವತ್ತೂ ಆ ರೀತಿ ಸಂದೇಶ ಕಳುಹಿಸದವರೇ ಅಲ್ಲ. ಅನುಮಾನಗೊಂಡ ಆಕೆ ಪೊಲೀಸರಿಗೆ ದೂರು ನೀಡಿದ್ದಳು.
ಪೊಲೀಸರು ತನಿಖೆ ಆರಂಭಿಸಿದಾಗ 24 ಮೈಲುಗಳ ದೂರದಲ್ಲಿ ಕೌನ್ಸಿಲ್ ಬಿಲ್ಡಿಂಗ್ ಸಮೀಪದಲ್ಲಿ ಮೈಕ್ಲರ್ ಅವರ ವ್ಯಾನ್ ಅನ್ನು ಫಿಲಿಪ್ ಮತ್ತು ಆತನ ಪತ್ನಿ ನಥಾಲಿ ಚಲಾಯಿಸುತ್ತಿದ್ದುದು ಕಂಡುಬಂದಿತ್ತು. ಕೂಡಲೇ ವ್ಯಾನ್ ತಡೆದು ಶೋಧ ಕಾರ್ಯ ನಡೆಸಿದಾಗ, ಅದರೊಳಗೆ ತುಂಬಾ ರಕ್ತ ಹಾಗೂ ಚೀಲದಲ್ಲಿ ತುಂಬಿಟ್ಟಿದ್ದ ಮಾನವನ ದೇಹದ ಕೆಲವು ಭಾಗಗಳು ಕಂಡುಬಂದವು.
ಇಬ್ಬರನ್ನೂ ವಶಕ್ಕೆ ಪಡೆದು ತನಿಖೆಗೆ ಒಳಪಡಿಸಿದಾಗ, ಭೀಕರ ಹತ್ಯೆಯ ವಿವರವನ್ನು ಪತಿ-ಪತ್ನಿ ಬಾಯಿಬಿಟ್ಟರು. “ನಾವು ಮೈಕ್ಲರ್ ನನ್ನು ದರೋಡೆ ಮಾಡಬೇಕೆಂದು ಬಯಸಿ, ಆತನ ವ್ಯಾನ್ ನಿಲ್ಲಿಸಿದ್ದೆವು. ದರೋಡೆ ವೇಳೆ ಆತ ತಪ್ಪಿಸಿಕೊಳ್ಳದಂತೆ ಗಟ್ಟಿಯಾಗಿ ಕುತ್ತಿಗೆ ಲಾಕ್ ಮಾಡಿದ್ದೆವು. ಆದರೆ, ಉಸಿರುಗಟ್ಟಿ ಆತ ಅಲ್ಲೇ ಮೃತಪಟ್ಟ. ಏನು ಮಾಡಬೇಕೆಂದು ಗೊತ್ತಾಗದೇ ನಾನು, ಆತನ ದೇಹವನ್ನು ಹಲವು ಭಾಗಗಳಾಗಿ ಕತ್ತರಿಸಿದೆ. ತಲೆ, ಕೈಗಳು ಮತ್ತು ಕಾಲನ್ನು ಸುಟ್ಟು ಹಾಕಿದೆ. ಕೆಲವು ಭಾಗಗಳನ್ನು ಬೇರೆ ಬೇರೆ ಕಡೆಗೆ ಎಸೆದೆ. ನೇಪಾಳಿ ಧಾರ್ಮಿಕ ಕಾರ್ಯಕ್ರಮವೊಂದರ ಭಾಗವಾಗಿ ದೇಹದ ಕೆಲವು ಭಾಗಗಳನ್ನು ತರಕಾರಿಗಳ ಜೊತೆಗೆ ಬೇಯಿಸಿದೆ. ಈ ಮೂಲಕ ದೇಹದಿಂದ ಕೆಟ್ಟ ವಾಸನೆ ಬರದಂತೆ ನೋಡಿಕೊಂಡೆ ಎಂದು ಫಿಲಿಪ್ ಹೇಳಿದ್ದಾನೆ.
