ಜೆರುಸಲೇಂ: ಒಂದೆಡೆ ಸ್ವೀಡನ್‌ನ ಪರಿಸರ ಹೋರಾಟಗಾರ್ತಿ 22 ವರ್ಷದ ಗ್ರೆಟಾ ಥನ್ ಬರ್ಗ್ ಅವರು ಇಸ್ರೇಲ್ ವಿರೋಧದ ನಡುವೆಯೇ ಗಾಜಾದಲ್ಲಿ ಹಸಿವಿನಿಂದ ನರಳುತ್ತಿರುವ ಸಂತ್ರಸ್ತರಿಗೆ ನೆರವಾಗಲೆಂದು ಒಂದು ಬೋಟ್ ತುಂಬಾ ಆಹಾರ ಪದಾರ್ಥಗಳನ್ನು ಹೊತ್ತು ಗಾಜಾದತ್ತ ಪ್ರಯಾಣ ಬೆಳೆಸಿದ್ದಾರೆ. ಮತ್ತೊಂದು ಕಡೆ, ಥನ್ ಬರ್ಗ್ ಆಗಮನವನ್ನು ತಡೆಯಲು ನಾವು “ಸನ್ನದ್ಧರಾಗಿದ್ದೇವೆ” ಎಂದು ಇಸ್ರೇಲ್ ಘೋಷಿಸಿದೆ.
“ನಾವು ಇದನ್ನು ಎದುರಿಸದಲು ಸಿದ್ಧರಿದ್ದೇವೆ” ಎಂದು ಇಸ್ರೇಲ್ ರಕ್ಷಣಾ ಪಡೆಗಳ ವಕ್ತಾರ ಬ್ರಿಗ್ ಜನರಲ್ ಎಫ್ಫಿ ಡೆಫ್ರಿನ್ ಹೇಳಿದ್ದಾರೆ. ನಮಗೆ ಇತ್ತೀಚಿನ ವರ್ಷಗಳಲ್ಲಿ ಸಾಕಷ್ಟು ಅನುಭವಗಳಾಗಿವೆ. ಅದೇ ರೀತಿ ನಾವು ಮುಂದುವರಿಯುತ್ತೇವೆ ಎಂದು ಹೇಳಿರುವ ಅವರು, ಯುವ ಹೋರಾಟಗಾರ್ತಿ ವಿರುದ್ಧ ಏನು ಕ್ರಮ ಕೈಗೊಳ್ಳಲಾಗುತ್ತದೆ ಎಂಬುದನ್ನು ಸ್ಪಷ್ಟವಾಗಿ ತಿಳಿಸಿಲ್ಲ.
22 ವರ್ಷದ ಗ್ರೆಟಾ ಅವರು ಫ್ರೀಡಂ ಫ್ಲೋಟಿಲ್ಲಾ ಕೊಯಿಲಿಷನ್ ಎಂಬ ಸಂಸ್ಥೆಯ ನೌಕೆ ಮದ್ಲೀನ್ ಮೂಲಕ ಭಾನುವಾರದಿಂದಲೇ ಗಾಜಾದತ್ತ ಪ್ರಯಾಣ ಆರಂಭಿಸಿದ್ದಾರೆ. ಗಾಜಾದ ನಾಗರಿಕರಿಗೆ ಅಗತ್ಯವಾದ ಮೂಲಸೌಕರ್ಯಗಳನ್ನು ಅವರು ಹೊತ್ತು ತರುತ್ತಿದ್ದಾರೆ. ಸುಮಾರು 90 ದಿನಗಳಿಂದ ಗಾಜಾ ಪಟ್ಟಿಗೆ ಹೊರಗಿನವರ ಪ್ರವೇಶ ಹಾಗೂ ಅಗತ್ಯ ವಸ್ತುಗಳ ಪೂರೈಕೆಯನ್ನು ಇಸ್ರೇಲ್ ನಿರ್ಬಂಧಿಸಿದ್ದು, 2007ರಿಂದಲೂ ಭೂಮಿ, ಸಮುದ್ರ ಮತ್ತು ವೈಮಾನಿಕ ನಿರ್ಬಂಧವು ಚಾಲ್ತಿಯಲ್ಲಿದೆ.
ಗ್ರೆಟಾ ಥನ್‌ಬರ್ಗ್, ಗೇಮ್ ಆಫ್ ಥ್ರೋನ್ಸ್ ನಟ ಲಿಯಾಮ್ ಕನ್ನಿಂಗ್ ಹ್ಯಾಂ ಸೇರಿದಂತೆ ಒಟ್ಟು 12 ಅಂತಾರಾಷ್ಟ್ರೀಯ ಹೋರಾಟಗಾರರು ಈ ನೌಕೆಯಲ್ಲಿದ್ದಾರೆ. ನಮ್ಮದು ಇಸ್ರೇಲ್‌ನ ಅಕ್ರಮ ವಶ ಮತ್ತು ಯುದ್ಧಾಪರಾಧಗಳ ವಿರುದ್ಧದ ಅಹಿಂಸಾತ್ಮಕ ಪಯಣ ಎಂದು ಇವರು ಹೇಳಿದ್ದಾರೆ.
ದಕ್ಷಿಣ ಇಟಲಿಯ ಕೆಟಾನಿಯಾದಿಂದ ಪಯಣ ಆರಂಭವಾಗಿದ್ದು, ಈ ಹೋರಾಟಗಾರರ ಮೇಲೆ ಗ್ರೀಕ್ ಕರಾವಳಿ ಪಡೆಯ ಕೆಲವು ಡ್ರೋನ್ ಗಳು ನಿಗಾ ಇರಿಸಿವೆ. ತಮ್ಮ ಸುರಕ್ಷತೆ ಖಾತ್ರಿಪಡಿಸಿಕೊಳ್ಳುವಂತೆ ಇವರು ಅಂತಾರಾಷ್ಟ್ರೀಯ ಸಮುದಾಯಕ್ಕೆ ಮನವಿ ಮಾಡಿಕೊಂಡಿದ್ದಾರೆ.
ಗ್ರೆಟಾ ಅವರು ತಮ್ಮ ಪಯಣದ ವಿವರಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಿದ್ದು, ಪ್ಯಾಲೆಸ್ತೀನ್ ಧ್ವಜವನ್ನು ಹಿಡಿದು ನಿಂತಿರುವ, ಮೆಡಿಟರೇನಿಯನ್ ಸಮುದ್ರದಲ್ಲಿ ಈಜುತ್ತಿರುವ ಫೋಟೋಗಳನ್ನು ಅಪ್ಲೋಡ್ ಮಾಡಿದ್ದಾರೆ.
ನಿರ್ಗಮನಕ್ಕೂ ಮುನ್ನ ಭಾವುಕ ಭಾಷಣ ಮಾಡಿದ್ದ ಗ್ರೆಟಾ, “ಮುಂದೆ ನಮಗೆ ಯಾವ ರೀತಿಯ ಸವಾಲುಗಳು ಎದುರಾಗಲಿವೆ ಎಂಬುವುದು ಗೊತ್ತಿಲ್ಲ. ಅದರ ಬಗ್ಗೆ ನಾವು ತಲೆಕೆಡಿಸಿಕೊಳ್ಳುವುದಿಲ್ಲ. ನಾವು ಪ್ರಯತ್ನಿಸುತ್ತಲೇ ಇರಬೇಕು. ಯಾವಾಗ ನಾವು ಪ್ರಯತ್ನವನ್ನು ಕೈಬಿಡುತ್ತೇವೋ ಆಗ ನಮ್ಮ ಮಾನವತೆಯನ್ನೇ ಕೈಬಿಟ್ಟಂತೆ” ಎಂದು ಹೇಳಿದ್ದರು.
