ಬೆಂಗಳೂರು: ಚಿನ್ನದ ಬೆಲೆ ದಿನೇದಿನೆ ಜಾಸ್ತಿಯಾಗುತ್ತಿದೆ. ಕೆಲ ದಿನಗಳ ಹಿಂದೆಯಂತೂ 10 ಗ್ರಾಂ (24 ಕ್ಯಾರಟ್) ಚಿನ್ನದ ಬೆಲೆಯು ಒಂದು ಲಕ್ಷ ರೂ. ಗಡಿ ದಾಟಿತ್ತು. ಈಗಲೂ ಲಕ್ಷ ರೂ. ಆಸುಪಾಸಿನಲ್ಲೇ ಇದೆ. ಹೀಗೆ, ದಿನೇದಿನೆ ಚಿನ್ನದ ಬೆಲೆ ಜಾಸ್ತಿಯಾಗುತ್ತಿರುವುದನ್ನು ನೋಡಿದರೆ ಬೆಲೆಯು ಶೀಘ್ರದಲ್ಲೇ 1.3 ಲಕ್ಷ ರೂ.ಗೆ ಏರಿಕೆಯಾಗುತ್ತದೆ ಎಂದು ವ್ಯಾಪಾರಿಗಳು, ಪರಿಣತರು ಎಚ್ಚರಿಸಿದ್ದಾರೆ. ಹಾಗಾದರೆ, ಚಿನ್ನ ಖರೀದಿಗೆ ಇದು ಸೂಕ್ತ ಸಮಯವೇ? ಕಳೆದ ಒಂದು ವರ್ಷದಲ್ಲಿ ಎಷ್ಟು ರಿಟರ್ನ್ಸ್ ಸಿಕ್ಕಿದೆ ಎಂಬುದರ ಮಾಹಿತಿ ಇಲ್ಲಿದೆ.
2024ರ ಅಕ್ಷಯ ತೃತೀಯ ಹಬ್ಬದಿಂದ ಪ್ರಸಕ್ತ ವರ್ಷದ ಅಕ್ಷಯ ತೃತೀಯದ ವೇಳೆಗೆ ಚಿನ್ನವು ಶೇ.31ರಷ್ಟು ರಿಟರ್ನ್ಸ್ ನೀಡಿದೆ. ಷೇರು ಮಾರುಕಟ್ಟೆ, ಮ್ಯೂಚುವಲ್ ಫಂಡ್ಸ್ ರಿಟರ್ನ್ಸ್ ಗಿಂತ ಹೆಚ್ಚಿನ ಲಾಭ ತಂದುಕೊಟ್ಟಿದೆ. ಹಾಗಾಗಿ, ವ್ಯಾಪಾರಿಗಳು, ಹೂಡಿಕೆ ತಜ್ಞರು ಚಿನ್ನದ ಮೇಲೆ ಹೂಡಿಕೆ ಮಾಡಲು ಯಾವಾಗಲೂ ಸರಿಯಾದ ಸಮಯವೇ ಇರುತ್ತದೆ ಎಂದು ಹೇಳುತ್ತಾರೆ.
ಅದರಲ್ಲೂ, ಮುಂದಿನ ಕೆಲ ತಿಂಗಳಲ್ಲಿ ಚಿನ್ನದ ಬೆಲೆಯು 1.3 ಲಕ್ಷ ರೂ.ಗೆ ಏರಿಕೆಯಾಗುತ್ತದೆ ಎಂದು ಮಾರುಕಟ್ಟೆ ನಿಪುಣರು ಹೇಳುತ್ತಿದ್ದಾರೆ. ಹಾಗಾಗಿ, ಈಗ ಚಿನ್ನ ಖರೀದಿಸಿದರೂ, ಒಂದು ವರ್ಷದಲ್ಲಿ ಹೆಚ್ಚಿನ ಲಾಭ ಗಳಿಸಬಹುದು. ಚಿನ್ನದ ಮೇಲೆ ಹೂಡಿಕೆ ಮಾಡಲು ಇದು ಸಕಾಲ ಎಂದೇ ಹೇಳಲಾಗುತ್ತಿದೆ.
5 ವರ್ಷದ ಹಿಂದೆ ಚಿನ್ನ ಖರೀದಿಸಿದ್ದರೆ?
ಚಿನ್ನದ ಮೇಲೆ ಹೂಡಿಕೆ ಮಾಡುವುದು ಎಷ್ಟು ಒಳ್ಳೆಯದು ಎಂಬುದಕ್ಕೆ ಇಲ್ಲೊಂದು ಉದಾಹರಣೆ ಇದೆ. 2019ರ ಡಿಸೆಂಬರ್ ನಲ್ಲಿ 10 ಗ್ರಾಂ ಚಿನ್ನದ ಬೆಲೆಯು 31,500 ರೂ. ಇತ್ತು. ಆಗ ಏನಾದರೂ ನೀವು 10 ಗ್ರಾಂ ಚಿನ್ನ ಖರೀದಿಸಿದ್ದರೆ, ಈಗ ಅದರ ಬೆಲೆಯು 97 ಸಾವಿರ ರೂ. ಆಗುತ್ತಿತ್ತು. ಅಲ್ಲಿಗೆ, ನಿಮಗೆ ಸುಮಾರು 65 ಸಾವಿರ ರೂ. ಲಾಭವಾಗುತ್ತಿತ್ತು. ಚಿನ್ನ ಖರೀದಿಸುವವರು 4-5 ವರ್ಷವನ್ನು ಗಮನದಲ್ಲಿಟ್ಟುಕೊಂಡು ಖರೀದಿಸಬೇಕು ಎಂಬುದು ಪರಿಣತರ ಲೆಕ್ಕಾಚಾರವಾಗಿದೆ.
