ಬೆಂಗಳೂರು: ನಮ್ಮ ಸಂಬಂಧಿಕರು, ಸ್ನೇಹಿತರು ಇನ್ಶೂರೆನ್ಸ್ ಏಜೆಂಟರಾಗಿದ್ದಾರೆ ಎಂದೋ, ನಮ್ಮ ಕುಟುಂಬಕ್ಕೂ ಒಂದು ವಿಮೆ ಇರಬೇಕು ಎಂದು ತರಾತುರಿಯಲ್ಲಿ ವಿಮೆ ಮಾಡಿಸುವವರು ಇದ್ದಾರೆ. ಆರೋಗ್ಯ ವಿಮೆ, ಜೀವ ವಿಮೆ ಸೇರಿ ಹಲವು ವಿಮಾ ಪಾಲಿಸಿಗಳನ್ನು ದಾಖಲೆಗಳನ್ನು ಓದದೆ ಖರೀದಿಸುತ್ತಾರೆ. ಇದಾದ ಬಳಿಕ ಅವರು ನಿಯಮಗಳು ಗೊತ್ತಿರದೆ ಪರದಾಡುತ್ತಾರೆ. ಇಲ್ಲವೇ ಕೆಲವೊಂದು ಬಾರಿ ವಿಮಾ ಕಂಪನಿಗಳೂ ಪಾಲಿಸಿದಾರರ ಹಿತ ಕಾಪಾಡಲು ನಿರ್ಲಕ್ಷ್ಯ ವಹಿಸುತ್ತವೆ. ಆದರೆ, ಪಾಲಿಸಿದಾರರ ಹಿತ ಕಾಪಾಡಲು ಸರ್ಕಾರ ಕಾಯ್ದೆ ಜಾರಿಗೆ ತಂದಿದೆ. ಹಾಗಾಗಿ, ಪಾಲಿಸಿದಾರರು 1938ರ ವಿಮಾ ಕಾಯ್ದೆಯ ಸೆಕ್ಷನ್ 45 ಬಗ್ಗೆ ತಿಳಿದುಕೊಂಡಿರಲೇಬೇಕು. ಇದು ವಿಮಾದಾರರ ಹಿತಾಸಕ್ತಿ ಕಾಪಾಡಲು ಇರುವ ಪ್ರಮುಖ ಸೆಕ್ಷನ್ ಆಗಿದೆ.
ವಿಮೆ ಖರೀದಿಸುವ ಮೊದಲು ಪಾಲಿಸಿದಾರರು ದಾಖಲೆಗಳನ್ನು ಸರಿಯಾಗಿ ಓದಬೇಕು. ಅದರಲ್ಲೂ, ವಿಮಾ ಬಾಂಡ್ ನ ಪ್ರತಿ ಅಥವಾ ಕೈಪಿಡಿಯನ್ನು ಕೊನೆಯ ತನಕ ಓದಿದರೆ ವಿಮಾ ಕಾಯ್ದೆಯ ಸೆಕ್ಷನ್ 45ರ ಬಗ್ಗೆ ಸಾಕಷ್ಟು ಮಾಹಿತಿ ಇರುತ್ತದೆ. ಇದು ವಿಮೆ ತೆಗೆದುಕೊಂಡಿರುವ ವ್ಯಕ್ತಿಗೆ ಕ್ಷೇಮ್ ನ ಖಾತರಿ ಒದಗಿಸಿಕೊಡುತ್ತದೆ.
ವಿಮಾ ಕಾಯ್ದೆಯ ಸೆಕ್ಷನ್ 45ರ ಪ್ರಕಾರ ಪಾಲಿಸಿ ಪಡೆದ ದಿನದಿಂದ ಮೂರು ವರ್ಷಗಳ ಬಳಿಕ ವಿಮಾ ಕಂಪನಿಯು ಯಾವುದೇ ಕಾರಣ ನೀಡಿ ಇನ್ನೂರೆನ್ಸ್ ಕ್ಲೇಮ್ ನಿರಾಕರಣೆ ಮಾಡುವಂತಿಲ್ಲ. ಪಾಲಿಸಿಯ ಮೂರು ವರ್ಷಗಳ ಪ್ರೀಮಿಯಂ ಕಟ್ಟಿದ್ದರೆ ಇನ್ನೂರೆನ್ಸ್ ಕ್ಷೇಮ್ ಕೊಡಲೇಬೇಕು. ಹಾಗೇನಾದರೂ ಪಾಲಿಸಿದಾರರು ವಂಚನೆ ಅಥವಾ ಅಪರಾಧ ಕೃತ್ಯಗಳಲ್ಲಿ ಭಾಗಿಯಾಗಿದ್ದರೆ ಮಾತ್ರ ಕೇಮ್ ನಿರಾಕರಣೆ ಮಾಡಬಹುದು.
ಕಂಪನಿಗಳಿಗೂ ನಿರಾಕರಿಸುವ ಹಕ್ಕಿದೆ
ಪಾಲಿಸಿದಾರರು ತಪ್ಪು ಮಾಹಿತಿ ನೀಡಿದ್ದರೆ ಅಥವಾ ವಂಚನೆ ಉದ್ದೇಶದಿಂದ ಪಾಲಿಸಿ ಮಾಡಿಸಿದ್ದರೆ ಆಗ ಕಂಪನಿಗಳು ವಿಮೆಯನ್ನು ನಿರಾಕರಿಸುವ ಹಕ್ಕು ಹೊಂದಿವೆ. ಇನ್ನೂರೆನ್ಸ್ ಪಾಲಿಸಿ ಪಡೆಯಲು ವ್ಯಕ್ತಿ ತಪ್ಪು ಮಾಹಿತಿ ಒದಗಿಸಿದ್ದಾನೆ. ಜೀವ ವಿಮೆ ಅರ್ಜಿಯಲ್ಲಿ ಮಾಹಿತಿ ಮರೆಮಾಚಿದ್ದಾನೆ ಎನ್ನುವುದು ಮೂರು ವರ್ಷದ ಒಳಗೆ ಕಂಡುಬಂದರೆ ಕಂಪನಿಯು ಪಾಲಿಸಿದಾರನಿಗೆ/ ಸಂಬಂಧಿಗಳಿಗೆ ಈವರೆಗೆ ಕಟ್ಟಿರುವ ವಿಮಾ ಪ್ರೀಮಿಯಂ ಮೊತ್ತವನ್ನು 90 ದಿನಗಳ ಒಳಗೆ ಹಿಂದಿರುಗಿಸಿ ಪಾಲಿಸಿಯನ್ನು ರದ್ದುಪಡಿಸಬಹುದು. ಕ್ಲೇಮ್ ಅರ್ಜಿಯನ್ನೂ ತಿರಸ್ಕರಿಸಬಹುದು.
ಇದನ್ನೂ ಓದಿ: ಚಿನ್ನದ ಬೆಲೆ ಮತ್ತೆ ಗಗನಕ್ಕೆ | ಇಂದು ಹೆಚ್ಚಾಗಿದ್ದು ಇಷ್ಟು
