ನವದೆಹಲಿ: ಕ್ರಿಮಿನಲ್ ಪ್ರಕರಣಗಳಲ್ಲಿ 30 ದಿನಗಳಿಗಿಂತ ಹೆಚ್ಚು ಕಾಲ ಜೈಲಿನಲ್ಲಿರುವ ಪ್ರಧಾನಿ, ಮುಖ್ಯಮಂತ್ರಿಗಳು ಮತ್ತು ಸಚಿವರನ್ನು ಹುದ್ದೆಯಿಂದ ತೆಗೆದುಹಾಕುವ ಉದ್ದೇಶಿತ ಮಸೂದೆಗೆ ಕಾಂಗ್ರೆಸ್ ವಿರೋಧ ವ್ಯಕ್ತಪಡಿಸುತ್ತಿರುವ ಹಿನ್ನೆಲೆಯಲ್ಲಿ, ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದಾರೆ.
2013ರಲ್ಲಿ ಲಾಲು ಪ್ರಸಾದ್ ಯಾದವ್ ಅವರನ್ನು ರಕ್ಷಿಸಲು ಅಂದಿನ ಪ್ರಧಾನಿ ಮನಮೋಹನ್ ಸಿಂಗ್ ತಂದಿದ್ದ ಸುಗ್ರೀವಾಜ್ಞೆಯನ್ನು ರಾಹುಲ್ ಗಾಂಧಿ ಅವರೇ ವಿರೋಧಿಸಿ ‘ಹರಿದು ಹಾಕಿದ್ದನ್ನು’ ಸ್ಮರಿಸಿದ ಅಮಿತ್ ಶಾ, “ಅಂದಿದ್ದ ನೈತಿಕತೆ ಇಂದು ಏನಾಯಿತು?” ಎಂದು ಪ್ರಶ್ನಿಸಿದ್ದಾರೆ.
“ನೈತಿಕತೆ ಸೋಲು-ಗೆಲುವಿಗೆ ಸಂಬಂಧಿಸಿದ್ದಲ್ಲ”
“ಲಾಲು ಅವರನ್ನು ರಕ್ಷಿಸಲು ಮನಮೋಹನ್ ಸಿಂಗ್ ತಂದ ಸುಗ್ರೀವಾಜ್ಞೆಯನ್ನು ರಾಹುಲ್ ಜೀ ಏಕೆ ಹರಿದು ಹಾಕಿದ್ದರು? ಅಂದು ನೈತಿಕತೆ ಇತ್ತು ಎಂದಾದರೆ, ಇಂದು ಏನಾಗಿದೆ? ಸತತ ಮೂರು ಚುನಾವಣೆಗಳನ್ನು ಸೋತಿದ್ದಕ್ಕಾಗಿಯೇ? ನೈತಿಕತೆಯು ಚುನಾವಣೆಯ ಸೋಲು-ಗೆಲುವಿಗೆ ಸಂಬಂಧಿಸಿದ್ದಲ್ಲ. ಅದು ಸೂರ್ಯ-ಚಂದ್ರರಂತೆ ಸ್ಥಿರವಾಗಿರಬೇಕು,” ಎಂದು ಅಮಿತ್ ಶಾ ಅವರು ಎಎನ್‌ಐಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ತಿಳಿಸಿದ್ದಾರೆ.
ಮಸೂದೆಯ ಉದ್ದೇಶವೇನು?
ಕೇಂದ್ರ ಸರ್ಕಾರವು ಸಂವಿಧಾನ (130ನೇ ತಿದ್ದುಪಡಿ) ಮಸೂದೆ, 2025 ಅನ್ನು ಮಂಡಿಸಿದೆ. ಇದರ ಪ್ರಕಾರ, ಕನಿಷ್ಠ ಐದು ವರ್ಷಗಳ ಜೈಲು ಶಿಕ್ಷೆಗೆ ಅರ್ಹವಾದ ಆರೋಪದ ಮೇಲೆ ಪ್ರಧಾನಿ, ಮುಖ್ಯಮಂತ್ರಿ ಅಥವಾ ಯಾವುದೇ ಸಚಿವರು ಸತತ 30 ದಿನಗಳ ಕಾಲ ಬಂಧನದಲ್ಲಿದ್ದರೆ, ಅವರನ್ನು ಹುದ್ದೆಯಿಂದ ತೆಗೆದುಹಾಕಲಾಗುತ್ತದೆ. ಬಂಧಿತ ನಾಯಕರು ರಾಜೀನಾಮೆ ನೀಡದಿದ್ದರೆ, 31ನೇ ದಿನಕ್ಕೆ ಅವರ ಕಚೇರಿ ತಾನಾಗಿಯೇ ತೆರವಾಗುತ್ತದೆ ಎಂಬ ಅಂಶವು ಈ ಪ್ರಸ್ತಾವಿತ ವಿಧೇಯಕದಲ್ಲಿದೆ.
“ಜೈಲಿನಿಂದ ಸರ್ಕಾರ ನಡೆಸಲು ಸಾಧ್ಯವೇ?”
ಈ ಮಸೂದೆಯನ್ನು ಸಮರ್ಥಿಸಿಕೊಂಡಿರುವ ಸಚಿವ ಅಮಿತ್ ಶಾ, “ಯಾವುದೇ ಮುಖ್ಯಮಂತ್ರಿ, ಪ್ರಧಾನಿ ಅಥವಾ ಸಚಿವರು ಜೈಲಿನಿಂದ ಸರ್ಕಾರ ನಡೆಸುವುದು ದೇಶದ ಪ್ರಜಾಪ್ರಭುತ್ವಕ್ಕೆ ಸೂಕ್ತವೇ? ಇಂದು ಎನ್‌ಡಿಎ ಮುಖ್ಯಮಂತ್ರಿಗಳ ಸಂಖ್ಯೆಯೇ ಹೆಚ್ಚಿದೆ. ಪ್ರಧಾನಿಯೂ ಎನ್‌ಡಿಎಯವರೇ. ಹಾಗಾಗಿ ಈ ಮಸೂದೆ ಕೇವಲ ವಿರೋಧ ಪಕ್ಷಗಳಿಗೆ ಮಾತ್ರವಲ್ಲ, ನಮ್ಮ ಮುಖ್ಯಮಂತ್ರಿಗಳಿಗೂ ಅನ್ವಯಿಸುತ್ತದೆ,” ಎಂದು ಸ್ಪಷ್ಟಪಡಿಸಿದರು.
“ಸುಳ್ಳು ಪ್ರಕರಣ ದಾಖಲಾಗಿದ್ದರೆ 30 ದಿನಗಳೊಳಗೆ ಜಾಮೀನು ಪಡೆಯಲು ಅವಕಾಶವಿದೆ. ದೇಶದ ಹೈಕೋರ್ಟ್, ಸುಪ್ರೀಂ ಕೋರ್ಟ್‌ಗಳು ಕಣ್ಣು ಮುಚ್ಚಿ ಕುಳಿತಿಲ್ಲ. ಜಾಮೀನು ಸಿಗದಿದ್ದರೆ, ನೀವು ಹುದ್ದೆ ಬಿಡಲೇಬೇಕು,” ಎಂದು ಅವರು ಪ್ರತಿಪಾದಿಸಿದರು.
ತಮ್ಮದೇ ಉದಾಹರಣೆ ನೀಡಿದ ಶಾ
ಸೊಹ್ರಾಬುದ್ದೀನ್ ಶೇಕ್ ನಕಲಿ ಎನ್‌ಕೌಂಟರ್ ಪ್ರಕರಣದಲ್ಲಿ ತಮ್ಮ ಬಂಧನವನ್ನು ಉಲ್ಲೇಖಿಸಿದ ಅವರು, “ಸಿಬಿಐನಿಂದ ಸಮನ್ಸ್ ಬಂದ ಮರುದಿನವೇ ನಾನು ರಾಜೀನಾಮೆ ನೀಡಿದ್ದೆ. ನಂತರ ನನ್ನನ್ನು ಬಂಧಿಸಲಾಯಿತು. ಪ್ರಕರಣ ನಡೆದು, ಇದು ರಾಜಕೀಯ ಪ್ರೇರಿತ ಎಂದು ತೀರ್ಪು ಬಂತು. ನಾನು ಸಂಪೂರ್ಣ ನಿರಪರಾಧಿ ಎಂದು ಸಾಬೀತಾಗುವವರೆಗೂ ಯಾವುದೇ ಸಾಂವಿಧಾನಿಕ ಹುದ್ದೆಯನ್ನು ಸ್ವೀಕರಿಸಲಿಲ್ಲ. ವಿರೋಧ ಪಕ್ಷಗಳು ನನಗೆ ನೈತಿಕತೆಯ ಪಾಠ ಹೇಳುತ್ತಿವೆಯೇ?” ಎಂದು ಪ್ರಶ್ನಿಸಿದರು.
ಇಂಡಿಯಾ ಒಕ್ಕೂಟದ ವಿರುದ್ಧ ವಾಗ್ದಾಳಿ
“ಜೈಲಿನಿಂದಲೇ ಸರ್ಕಾರ ನಡೆಸುವ ಉದ್ದೇಶದಿಂದ ಇಂಡಿಯಾ ಒಕ್ಕೂಟ ಈ ಮಸೂದೆಯನ್ನು ವಿರೋಧಿಸುತ್ತಿದೆ. ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್, ಮನೀಶ್ ಸಿಸೋಡಿಯಾ ಮತ್ತು ತಮಿಳುನಾಡಿನ ಕೆಲವು ಸಚಿವರು ಜೈಲಿಗೆ ಹೋದರೂ ರಾಜೀನಾಮೆ ನೀಡಲಿಲ್ಲ. ಇದೊಂದು ಹೊಸ ಕೆಟ್ಟ ಸಂಪ್ರದಾಯ. ರಾಜಕೀಯ ನೈತಿಕತೆಯನ್ನು ಈ ಮಟ್ಟಕ್ಕೆ ಕುಗ್ಗಿಸುವುದನ್ನು ನಾವು ಒಪ್ಪುವುದಿಲ್ಲ,” ಎಂದು ಅಮಿತ್ ಶಾ ಹೇಳಿದರು. ಈ ಮಸೂದೆಯು ಸಂಸತ್ತಿನಲ್ಲಿ ಅಂಗೀಕಾರಗೊಳ್ಳುವ ಸಂಪೂರ್ಣ ವಿಶ್ವಾಸವಿದೆ ಎಂದೂ ಅವರು ಇದೇ ವೇಳೆ ತಿಳಿಸಿದರು.
