ಬೆಂಗಳೂರು: ಸರಕು ಮತ್ತು ಸೇವಾ ತೆರಿಗೆ (ಜಿ ಎಸ್ ಟಿ) ಕುರಿತು ಪ್ರಧಾನಿ ನರೇಂದ್ರ ಮೋದಿ (Narendra Modi) ಅವರು ಸಿಹಿ ಸುದ್ದಿ ನೀಡಿದ್ದಾರೆ. ಈ ದೀಪಾವಳಿ ವೇಳೆಗೆ ಜಿ ಎಸ್ ಟಿ ದರವನ್ನು (GST Slabs) ಕಡಿಮೆ ಮಾಡುವುದಾಗಿ ಘೋಷಣೆ ಮಾಡಿದ್ದಾರೆ. ಇದರಿಂದಾಗಿ ದೇಶದ ಜನರಿಗೆ ಜಿ ಎಸ್ ಟಿ ಭಾರ ಇಳಿಯುವುದು ಖಚಿತವಾಗಿದೆ. ಅದರಲ್ಲೂ ಯಾವ ಉತ್ಪನ್ನಗಳ ಮೇಲಿನ ಜಿ ಎಸ್ ಟಿ ಕಡಿಮೆಯಾಗಲಿದೆ ಎಂಬ ಕುತೂಹಲ ಜಾಸ್ತಿಯಾಗಿದೆ.
ಈಗ ದೇಶದಲ್ಲಿ ಜಿ ಎಸ್ ಟಿ ವಿಧಿಸಲು ನಾಲ್ಕು ಸ್ಲ್ಯಾಬ್ ಗಳಿವೆ. ಶೇ.5, ಶೇ.12, ಶೇ.18 ಹಾಗೂ ಶೇ.28ರಷ್ಟು ಜಿ ಎಸ್ ಟಿ ವಿಧಿಸುವ ಸ್ಲ್ಯಾಬ್ ಗಳಿವೆ. ತಜ್ಞರ ಪ್ರಕಾರ, ಕೇಂದ್ರ ಸರ್ಕಾರವು ಇವುಗಳನ್ನು ಮೂರು ಸ್ಲ್ಯಾಬ್ ಗಳಿಗೆ ಇಳಿಸಲಾಗುತ್ತದೆ ಎಂದು ತಿಳಿದುಬಂದಿದೆ. ಅಂದರೆ, ಶೇ.5, ಶೇ.18 ಹಾಗೂ ಶೇ.40ರ ಸ್ಲ್ಯಾಬ್ ಗಳನ್ನು ಪರಿಚಯಿಸಲಾಗುತ್ತದೆ ಎಂದು ಹೇಳಲಾಗುತ್ತದೆ. ಅಂದರೆ, ಬಡವರು ಹಾಗೂ ಮಧ್ಯಮ ವರ್ಗದವರು ಹೆಚ್ಚಾಗಿ ಖರೀದಿಸುವ ಉತ್ಪನ್ನಗಳ ಬೆಲೆಯು ಕಡಿಮೆಯಾಗಲಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ವಿಶ್ಲೇಷಣೆಯ ಪ್ರಕಾರ, ಶೇ.12ರಷ್ಟು ಜಿ ಎಸ್ ಟಿ ವ್ಯಾಪ್ತಿಗೆ ಬರುವ ಶೇ.99ರಷ್ಟು ಉತ್ಪನ್ನಗಳು ಶೇ.5ರ ಸ್ಲ್ಯಾಬ್ ಗೆ ತರಲಾಗುತ್ತದೆ. ಮತ್ತೊಂದೆಡೆ, ಶೇ,28ರಷ್ಟು ಜಿಎಸ್ ಟಿ ಇರುವ ಉತ್ಪನ್ನಗಳನ್ನು ಶೇ.18ರ ಸ್ಲ್ಯಾಬಿಗೆ ತರಲಾಗುತ್ತದೆ. ಇನ್ನು ಐಷಾರಾಮಿ ಉತ್ಪನ್ನಗಳಿಗೆ ಇರುವ ಶೇ.28ರಷ್ಟು ಜಿಎಸ್ ಟಿ ಬದಲಾಗಿ, ಅವುಗಳಿಗೆ ಶೇ.40ರಷ್ಟು ಜಿಎಸ್ ಟಿ ವಿಧಿಸುವುದು ಕೇಂದ್ರ ಸರ್ಕಾರದ ಚಿಂತನೆಯಾಗಿದೆ ಎಂದು ತಿಳಿದುಬಂದಿದೆ.
ಹಾಲು, ಡ್ರೈ ಫ್ರೂಟ್ಸ್, ಫ್ರೋಜನ್ ತರಕಾರಿ, ಪಾಸ್ತಾ, ಜಾಮ್, ಭುಜಿಯಾ, ಟೂತ್ ಪೌಡರ್, ಕೊಡೆ, ಫರ್ನಿಚರ್, ಪೆನ್ಸಿಲ್ ಗಳು, ಹ್ಯಾಂಡ್ ಬ್ಯಾಗ್ ಸೇರಿ 1 ಸಾವಿರ ರೂ.ಗಿಂತ ಕಡಿಮೆ ಬೆಲೆಯ ಉತ್ಪನ್ನಗಳಿಗೆ ಶೇ.12ರಷ್ಟು ಜಿಎಸ್ ಟಿ ವಿಧಿಸಲಾಗುತ್ತದೆ. ಇವುಗಳನ್ನು ಶೇ.5ರ ವ್ಯಾಪ್ತಿಗೆ ತಂದರೆ ಜನರಿಗೆ ಅನುಕೂಲವಾಗಲಿದೆ.
